لو سمحتم

[tiger_man]

بسم الله الرحمن الرحيم

لو سمحتم يا جماعة عاوز اعرف مدارس لتعليم القيادة وياريت تكون فى ميت غمر او بلد قريبة من ميت غمر وياريت اعر الاسعار وشكراااااااااا

[Amr Axel]

بسم الله الرحمن الرحيم

لو سمحتم يا جماعة عاوز اعرف مدارس لتعليم القيادة وياريت تكون فى ميت غمر او بلد قريبة من ميت غمر وياريت اعر الاسعار وشكراااااااااا

بصراحة معرفش مدارس بعينها و بالنسبة النظام بيكون بالحصة و الحصة ساعة و بتكون في حدود 20 جنيه و ع حسب
نظام 8 حصص و تدفع 400 كده في نفس حدود السعر ده تزيد او تقل

[MoStAfA MaHmOuD]

فيه مدرسة فى المرور اسأل فيها يا باشا

[agwaa]

السلام عليكم
وكل عام وأنتم طيبين
كل محافظة بيكون فيها مدرسة مرور تابعة لإدارة المرور
مسوغات ( أوراق ) التقديم فيها بتكون نفس الأوراق المطلوبة لإستخراج رخصة القيادة
والرسوم معقولة جداً
وبالتوفيق

[Zika9909]

مدرسة المرور مش بيعلموا غير اختبار الأقماع و غير كده المدرب بيبقى عايز إكرامية عشان يظبطك تدريب كويس (قليل أوي إللي بيشتغل بضمير)، و لو ما أكرمتوش زي ما هو عايز هيطلع عينك؛ مش هيدربك صح و ممكن يوم الامتحان مايجيش خالص (أنت المفروض بتمتحن على العربية إللي اتدربت عليها و لو هو ماجاش أنت هتلبس).
بالنسبة لمكاتب تعليم السواقة: أسعارهم غالية على الفاضي؛ يعني ممكن يطلب منك 15 جنيه في الحصة و على الأقل 5 حصص و الحصة المفروض ساعة إلا ربع بتقف عليك ثلث ساعة أو نص ساعة بالكتير (دي أقل الأسعار و ممكن يطلب أكتر من كده خصوصًا لو كانت العربية إللي المفروض هتتعلم عليها أكسنت أو لانوس مش 128)، آخرك هتسوق على الأول و التاني و هيمشيك في الشوارع كده زي إللي مأجر عجلة و بيلف بيها لفتين، مالهمش برنامج واضح للتعليم؛ يعني بيدرب بالبركة و مافيش خطوات محددة أو مرحلة معينة هيوصل لها المتدرب بعد ما يخلص التدريب.
من الآخر مش هتستفيد منهم إلا إذا كنت مش بتعرف تسوق على الإطلاق.

أنا من رأيي إنك تشوف لو تعرف حد ممكن يعلمك على عربيته شوية (ببلاش أو نظير مبلغ تتفقوا عليه) يبقى أحسن، لو مالاقيتش يبقى تروح مكاتب السواقة و أمرك لله بس ما تطولش معاهم (يعني احجز أقل عدد ممكن من الحصص لو عجبك الشغل بتاعهم زود حصص غير كده شوف غيرهم)، بعد ما تحس إنك بقيت قادر تتحكم في العربية على السرعات البطيئة (قدام و مارشدير) روح مدرسة المرور لأنهم غالبًا بيسهلوا الامتحان للي جايين من مدرسة المرور لأنهم دافعين فلوس، بس خللي بالك لو خبطت القمع هتسقط و لو لخبطت في الإشارات بردو هتسقط، لازم يكون مستواك كويس.

لو لخصنا الكلمتين إللي فاتوا:
1-اتعلم عند واحد معرفة لو مالاقيتش يبقى مكتب سواقة.
2- روح مدرسة المرور لأنها أسهل في استخراج الرخصة (و احتمال تسقط).
3- اشتري عربية مستعملة و كمل تعليم سواقة (أقصد تكتسب خبرة سواقة الشوارع في مصر).

[tiger_man]

الف شكر ليكم يا جماعة