تعالوا نعرف ازاي نرش الطاسات تحت شعار ( يلا نوفر )

[Amr Axel]

بسم الله الرحمن الرحيم
السلام عليكم و رحمة الله و بركاته

و لسه مكملين سلسلة تعالوا نعرف اللي مش شكلها مش ناوية تخلص
و مع تاني موضوع في شهر رمضان الكريم

و هترتاحوا من ضميري انهاردة عشان نزل يلعب مع العيال في الشارع بالصواريخ و البومب
ههههههههه

انهاردة هوريكم ازاي نرش طاسات العربية
تحت شعار يلا نوفر و نغيظ التجار
هههههههههههه

نبدأ ع بركة الله

طبعا كتيير مننا مركب طاسات بدل الجنوط اهي منها رخيصة جدا و بتدي شكل حلو للعربية و ممكن نلاقي شكل في الطاسات مش لاقيينه في الجنوط
المهم انا لبست طقم القوات الخاصة بتاع التنضيف و بعد ما العربية نضفت بصيت للطاسات قرفت من عيشتي ازاي مكنتش شايفها
و قررت اني ارجع الطاسات جديدة مرة تانية و انزل بعد الفطار اشتري اللي هحتاجه
و هو الآتي :

- علبة رش فضي ( سيلفر ) ميتالك لون الطاسات العلبة بــ12 جنيه عشان ميتالك ( ام لمعة يعني هههه) و المطفي بــ8 عشان لو حد عايز
- 4 افيسات من الطويل و العريض ابو 50 قرش
- ورقة صنفرة -2000 و لو ملقتش جيب 1500 بس مش اقل من كده عشان هيبقي خشن اوي
و الباقي كان متوفر في البيت من جرايد و خلافه

المهم رجعت ع الساعة 12 بليل و شديت الطاسات

ده منظر الطاسات قبل الشغل طبعا في حالة يرثي لها و حتي الغطيان اللي زي المسامير واقعة و و خربشة و حالتها حالة ومخبي كمان اللي حالته وحشة تحت و طبعا مشوفتهاش قبل الغسلة
المهم غسلتها



بعدين تحت المية و بالصنفرة في الحتت المحتاجة الي هي زي ما تكون متنسلة و ظبط و روقتها
و دايما الصنفرة تكون مبلولة و فيه مية نازلة عشان الطاسات متتخربش زي ما عملنا في الفوانيس هنا

http://www.nilemotors.net/Nile/232413-a.html

و بعد ما خلصنا من التنعيم و التظبيط
لسه عندنا مشكلة ان المسامير المنظر ديه مش موجودة
انا بقي بعمل حاجة للظروف ديه اي طاسات قديمة بتتكسر عندي بشيل منها المسامير البلاستيك ديه
و اشيلها في علبة بلاستيك زي ما انتوا شايفين



اللمهم خدت من العلبة الللي عايزه و اتصدمت اني ملقتش سوبر جلو في البيت بس لقيت البديل غراء الشعلة و لزقته و استنيت لما نشفوه
و حطيت حتة ورقة ع حرف الاس اللي في الوسط عشان اللون بتاعه ميروحش عشان لونه مختلف و حتي لو جت عليه متقلقوش بالتنر و تشيل





جينا بقي للمهمة الصعبة و هي رش الطاسات بعلبة الرش اللي جبناها




جبت الجرايد و فرشتها برة البيت كله و عايز انبهكم لحاجة لما تيجوا ترشوا حطوا قماشة ع وشكم
و بالنسبة ليا عشان عيني بعيد عنكم بتلتهب من ابسط حاجة لبست نضارة بتاعت السباحة هههههه
لأني نسيت اول رشة و رشيت من غير النضارة و تعبت اوي و مازالت بعاني
وبدأت الرش ع مسافة حوالي 30 س




و بعدين سيبتهم ينشفوا في الهوا الطلق
و جت برده حتة لون خفيفة ع حرف الاس و تمت ازالتها بقطنة مبللة بتنر
و في ركن الاصلاحات لقيت علبة رش ازرق قولت طب ما ارش حرف الاس لون ازرق و يمشي مع لون العربية لكن بعد ما رشيت اتضح انه فاتح اكتر من اللازم مكنش شكله حلو و تمت ازالته برده بالتنر اللي زهق مني هههههه

وها هي النتيجة النهائية قبل التركيب
الطاسات رجعت تاني كأني لسه مشتريها
و كله بـ12 جنيه قولوا 15 جنيه باللزق و الافيسات + ربع - تلت ساعة شغل
احسن من 50 - 60 جنيه :)
يعني توفير و في نفس الوقت بغيظ اي تاجر جشع هههههه






اتمني ان يكون الشرح واضح


و بالتوفيق للجميع ان شاء الله

[A.Saad]

الله ينور والف سلامة ليك

[A.Saad]

بس انا مش فاهم جزئية الصنفرة بتستعملها فى اى جزء
لو فيه اماكن متخربشة ورونها اسود هتعمل ايه

[Amr Axel]

الله ينور والف سلامة ليك
بس انا مش فاهم جزئية الصنفرة بتستعملها فى اى جزء
لو فيه اماكن متخربشة ورونها اسود هتعمل ايه

الله يسلمك يا استاذ احمد

الحتة بتاعت الصنفرة لأن لما اي حاجة بتكحت الطاسات بالاضافة للعوامل و الظروف الخارجية هتلاقي حتت في الطاسات زي ما تكون متقشرة و القشرة مكانها محتاجة تتقطع او بروز طالعة زي سنون مببة بعد ما تقطع القشرة
فالصنفرة تشيل البروز و الحتت المقشرة و اخلرابيش البارزة اوي و تساويها بس كده
لو الطاسات عندك مش متقشرة و لا فيها الكلام ده يبقي ملهاش لازمة الصنفرة :)
بالنسبة لو فيه بقي اي دهان جيه ع الطاسات زي الاسود بقطنة و تشممها تنر و تشيله

[graffittiii]

أصلي يا Axel .....
ملحوظة : بتقول بغيظ أي تاجر جشع ؟!!!
يابني تاجر إيه هو في تاجر بيرش طاسات ؟!!
يادي الزهايمر اللي مش عاوز يسيبك ياصديقي ...
أنا أبتديت أقلق علي ك .... أستني هدعيلك أهو

[Amr Axel]

أصلي يا Axel .....
ملحوظة : بتقول بغيظ أي تاجر جشع ؟!!!
يابني تاجر إيه هو في تاجر بيرش طاسات ؟!!
يادي الزهايمر اللي مش عاوز يسيبك ياصديقي ...
أنا أبتديت أقلق علي ك .... أستني هدعيلك أهو

هههه حبيب هارتي يا تايو

يا ريس مش بيرشوا ا
اللي بيبعوا الطاسات نفسها الزهايمر اشتغل و لا ايه ههههه شكلي انا اللي هدعيلك استني لما ادعيلك

سألت ع طاسات زي اللي معايا عند واحد قالي 55 جنيه من هنا لهنا و يا حج نزلت لــ40 جنيه قولتله معلش نسيت الفلوس و مشيت ههههههههه
خليت واحد صاحبي بعد اسبوع راح يسأله قاله 75 جنيه
مش عارف الخمسة جنيه المعلقة معاه ديه

سألت عند واحد تاني حاططهم كده في علبة كرتون عرة بكام يا عم الحج 80 جنيه
نعم ؟؟؟ ازاي 80 جنيه ديه بــ30 جنيه
قالي: لأ دوكها مضروبة انما ديه الأأصلي بالكرتونة بتاعتها
كل ما اشوف حد عنده طاسات انزل اساله الاقي عجائب و غرائب
و لاحظ اني بسال ع مقاس 13 و كل ما المقاس كبر كل ما السعر زاد

بعدها لقيت واحد معلق اعداد و اشكال قولتله عايز طاسة مقاس 16 للكيا نيو سيراتو
و يكون عليها العلامة قالي فيه المقاس اللي انت عايزه بكام يا عم 150 جنيه بس معليهاش علامة نقي اللي يعجبك قولتله طب عليها العلامة قالي انا عندي لزق يتحط في الوسط بـ4 جنيه
هو يقصد الاستيكر اللي بيتباع و عليه نوع العربية
اومال لو قولتله بي ام هيقولي كام 500 جنيه ؟؟
فقولت اغيظهم و اوفر في نفس الوقت و بدل ما اشتري واحدة جديدة اديها رشة احسن و اقول الباقين يعملوا كده و بكده اغيظهم بس بيني وبين نفسي و بطريقة غير مباشرة هههههههه

ع فكرة علبة الجبنة خلصت من بدري و معبرتنيش و لا حتي بجبنة قريش ههههههه

[graffittiii]

هههه حبيب هارتي يا تايو

يا ريس مش بيرشوا ا
اللي بيبعوا الطاسات نفسها الزهايمر اشتغل و لا ايه ههههه شكلي انا اللي هدعيلك استني لما ادعيلك

فقولت اغيظهم و اوفر في نفس الوقت و بدل ما اشتري واحدة جديدة اديها رشة احسن و اقول الباقين يعملوا كده و بكده اغيظهم بس بيني وبين نفسي و بطريقة غير مباشرة هههههههه

ع فكرة علبة الجبنة خلصت من بدري و معبرتنيش و لا حتي بجبنة قريش ههههههه

مممممممم....
أصل أنا أفتكرت ده تبع سلسلة ولا الحوجة للصنايعية (اللي افتكرت انك تقصد بتاع الرش ) ...

طيب عندي أنا دي ياكبير .....
بالنسبة للجبنة ... أوعي تقول كده أحنا اللي بينا أكبر من الجبنة ... (( لا لا مش بسطرمة )) ...

[Mohammad_z]

طب انا عايز أرش الجنط أسود امعله بنفس الطريقة و لا أدهنة ببلاك يا باشا وشكرا

[Amr Axel]

مممممممم....
أصل أنا أفتكرت ده تبع سلسلة ولا الحوجة للصنايعية (اللي افتكرت انك تقصد بتاع الرش ) ...

طيب عندي أنا دي ياكبير ..... :e_braces[1]:
بالنسبة للجبنة ... أوعي تقول كده أحنا اللي بينا أكبر من الجبنة ... (( لا لا مش بسطرمة )) ...:f_eyeb1[1]:

اومال لانشون ؟؟
هههههه لا يا ريس مش تبعها بس متقلقش و لا الحوجة للصنايعية ليها جزء تاني و هيكون مرعب :)

[Amr Axel]

طب انا عايز أرش الجنط أسود امعله بنفس الطريقة و لا أدهنة ببلاك يا باشا وشكرا

بص يا ريس الجنط هيختلف في حاجات بسيطة يعني مثلا هترش و الكفرات راكبة و لا لأ
لو الكفرات راكبة حط بلاستر ع الكاوتش في الجهة اللي هترش فيها
و تحديد الاماكن اللي هترش فيها يعني لو هترش ريشة اه و ريشة لأ يبقي تحط بلاستر ع ريشة و ريشة لأ اخدت بالك من القصة تستخدم يعني البلاستر كمحدد لتحديد اطراف الرش
و طبعا علامة الجودة المصرية الجرايد اللي تحت الحاجة ههههههههه
و في حالة رش الجنوط يفضل تجيب علبة رش اسود ميتالك و ده بــ12 جنيه
بلاش المطفي مش هيكون حلو و هيبقي عامل زي الاسود المط

و ممكن تفنن بقي في الرش و تدخل الوان في الجنط مع الاسود
لو بعتلي صورة للجنط و لون العربية ممكن اوضحلك اقصد ايه :)

و اي استفسار يا ريس انا موجود

[khaled_yassin]

لو عندى فى خربشة فى الجنوط ليها حل؟؟

[Ahmod]

طب الاسبراي اللى انت رشيت بيه ده جبته منين ؟ وهل فيه الوان ولا اسود وسلفر ميتلك بس ؟

[kashtoot]

الله ينور عليك و تسلم ايدك

[Amr Axel]

لو عندى فى خربشة فى الجنوط ليها حل؟؟

ليها حلين الأول ع ما اتذكر بالصنفرة و البولش لكن مجربتهاش بصراحة

و الحل التاني انك تجيب سبري رش زي اللي انا جبته و ترش الجنط نفسه لو هترش و الكاوتش راكب يبقي تغسل الجنط كويس و تنشفه و تحط بلاستر ع الكاوتش و ترش الجنط و تحته ورق جرايد

لو هترش و الكاوتش مش راكب يبقي برده تغسل الجنط كله كويسه و ترشه كله

و خلي بالك هنا بتكلم عن الجنوط اللي لونها قاتم شوية زي اللي بتنزل فبريكة مع العربية الفضي او الاسود

فيه الفضي اللي هو بيلمع زي الاستانلس مش عارف فيه رش اللون ده و لا لأ بس بيتعالج برده لو فيه حاجة بالحل الأول اللي قولته او لو فيه الفضي نفس الدرجة رش برده

[Amr Axel]

طب الاسبراي اللى انت رشيت بيه ده جبته منين ؟ وهل فيه الوان ولا اسود وسلفر ميتلك بس ؟

من شارع دمشق واحد اسمه محمد ابراهيم بس مش ابراهيم بتاع الاستيكرات
ده هتلاقي يافطة كبييرة مكتوبة فوق المحل بالعرض محمد ابراهيم
و عنده دهانات و بويا و هتلاقيه ع صف بنزينة التعاون ع اليمين و انت ماشي في اتجاه الشارع
و لو روحت هناك و سألت ع محمد ابراهيم بتاع الدهانات هيدلوك

و فيه الوان كتيير من اول الاسود لحد الاصفر مطفي و ميتالك