كيفيه عمل الesp

[yoko]

طبعا الموضوع ده بناء على طلب SonaSteel و ashouhdy الي مقدرش أرفضلهم طلب

طبعا فيه فديوهات بالهبل بتشرح الموضوع ده بس أنا حبيت يكون هنا وبالعربي عشان الكل يستوعب وكمان الي عنده سؤال هرد عليه (على قد معلوماتي المتواضعة جدا)

اول حاجة هل الesp بيجي لوحده ولا بيجي مع شويه حاجات تانيه؟
بيجي معاه abs ebd asr esp يعني هو مجموعة وعشان نفهم الموضوع صح يبقى نبتديه صح ونفهم كل واحد في السريع وبعد كده نخش على الesp

اول حاجة الABS
(anti-lock brake system)
طبعا كلنا عرفينه وعرفين لزمته يبقى نقول بيشتغل إزاي

المكونات:
1) وحده تحكم للabs
ودي طبعا الي بتاخد القرايات من كل حاجة وترسل إشارات التحكم. وفيها جزء هيدروليك عشان بيعدي عليها ضغط الزيت من الماستر عشان تتحكم فيه


2) حساس سرعة

وده بيتركب في الشمعدان عشان يقيس سرعة العجله
وبيتركب في ال4 عجلات

3) سينسور فرامل
وده موجود في كل العربيات وللأسف مش لاقيله صورة
وهو الي بيخلي نور الفرامل ينور على فكر

* فكرة عمل الabs
لما تدوس فرامل جامد بيحصل إن العجل يقفش يقوم السينسور بيدي للecu إن العجله قفشت تقوم مديه أمر للعجله دي إنها تفك وترجع تدوس فرامل تاني بسرعة جدا وبكده العجل يفضل يقدر يتحكم في العربيه وبالتالي تقدر تفادي العائق الي طلعلك


تاني حاجة ال EBD
(electrical brake distribution)

حلو كلنا عارفين وظيفة الabs طيب دلوقتي لو العربيه عجلتين على رمل وعجلتين على الأسفلت لو دوست فرامل مرة واحده والabs إشتغل هل العربيه هتكمل في طريقها ولا هتنحرف؟؟؟
معظم الناس هتقول هتفضل في طريقها أومال الabs لزمته إيه!!!
لكن في الحقيقة لو abs بس ومفيش ebd هتنحرف مش هتلف حوالين نفسها لكن هتلف بطريقة ممكن يبقى فيها خطورة كبيره

المكونات
نفس الabs بالظبط مفيش حاجة زيادة غير برمجة الوحده بتاعت الabs وبعض مكوناتها الداخليه

طيب فكرة عمل الوحده دي
بتقيس سرعة كل عجله مقارنه بالعجلات التانيه وتخفف الضغط العجلة الي تقف اسرع عشان العربيه ميبقاش فرامل ناحيه أقوي من ناحيه وبالتالي العربيه تحافظ على مسارها وملهاش دعوة الabs إشتغل ولا لأ

ودي أنا جربتها وكان كريم منير معايا في رحلة اليخت بتاعت العين السخنة ودخلت ملف حاد (مكنتش متوقع إنه بالحده دي) على سرعة عاليه فرجلي على الفرامل خفيف (مفيش abs إشتغل أصلا) العربيه فضلت في مسارها العربيه الي ورايا وكانت بنفس سرعتي إترمت في الحارة التانيه (عكس الإتجاه) مع إن كان فيها abs لكن مكنش فيها ebd

وبكده يبقى خلصنا الebd

تالت حاجة الasr أو الtcs
(anti slip regulation) (traction control system)

ودي بقى كتير يعرفوا إنها بتمنع إن العربيه تطلع وهيا بتفرك بس لكن هيا أكتر من كده بكتير
هي بتمنع لو إنت ماشي في أمان الله وجيت مرة واحده جنب الطريق رمله وإنت ماشي نس العربيه في الرمله (أو ميه) والنص التاني لأ الي هيحصل إن العجل الي على التراب أو الميه هيلف أسرع من الي على الأرض النضيفة وبالتالي العربيه هتلف منك ده بقى بيحل الموضوع ده طب إزاي

المكونات:
برده نفس الي فوق بإختلاف البرمجة وبعض أجزاء وحدة التحكم الداخليه لكن هنا زيادة بيبقى فيه وصله إشارة من وحده التحكم الخاصة بالasr للوحده العموميه بتاعت التحكم في الموتور والفيتيس وهنعرف ليه كمان شويه

طريقة عمل الasr

لو العربيه واقفه بيقيس سرعة كل عجله للعجل التاني لو لقى العجل الي بيزق العربيه (على حسب هيا أمامي ولا خلفي) وهنفترض هنا إنها أمامي لو لقى قدام أسرع من ورا هيبتدي يفرمل العجل الي قدام لقى مفيش فايدة هيقلل دوسه السواق من على البنزين (حتى لو الي سايق ملبس الدواسي في الأرض) من الاخر ده معمول عشان يتفادا غشامة السواق مش حاجة فجائيه زي الabs وده زي ما شوفتوا في الفيديو الأول لما حب يطلع مطلع على تلج
ولو سايق نفس الفكرة لكن بيتحكم في العجلة الي بتلف اسرع من الباقين

كده بقى نخش في عمنا الESP
(electric stability program)

ها إتقطع نفسكم زي ولا لسه

نيجي الأول لأسمائة
وده أكتر نظام إتحطله أسماء
هو في الحقيه إسمه الأصلي
Electronic stability control (ESC)
بس هو إتشهر بالesp ودي بقى بقيت الأسامي

Vehicle Stability Assist (VSA)
Vehicle Dynamic Control (VDC)
Dynamic Stability Control (DSC)Controllo Stabilità (CST)
AdvanceTrac with Roll Stability Control (RSC)
Vehicle Stability Assist (VSA)

كفايه كده مع إن فيه تاني كل شركة تعمله إسم
لو حد عاوز يعرفهم كلهم
Electronic stability control - Wikipedia, the free encyclopedia

يا عم قرفتنا بأساميه وإحنا ملنا

المهم لزمته إيه
نشوف الفيديوهات دي

Top Gear - Fifth Gear - Bosch ESP - YouTube

Work of ESP - YouTube

طيب ده بيعمل إيه برده زي ما الفيديو شارح بيلغي الunder steering والover steering
ونقول هما إيه في السريع من غير ما نخش في التفصيل الممله

under steering إن تلف الدركسيون والعربيه تكمل في طريقا او تلف بس مش بنفس المقدار الي الدركسيون ملفوف بيه يعني بتزحف لبره (عكس إتجاه اللف)

over steering يعني تلف الدركسيون لفه بسيطه تلاقي العربيه لفت زياده قوي أو ما يطلق عليه عومت

حلو مفهمناش برده طب نقول موقف كده ونشوف شويه الحاجات الي فوق وبنهتي فيهم من الصبح هينفعوا ولا لأ
تخيل ماشي في أمان الله مره واحده العربيه النص نقل الي قدامك وقع منها قفص فراخ قدامك أول حاجة هتعملها إيه هتلف الدركسيون مرة واحده العربيه مش هتستجيب بسرعة نقول حظنا حلو وإستجابت في الوقت المناسب وروحت الحارة الي على الشمال بس أكيد لفة الدركسيون عنيفة وهتلبس في السور قمت لافف عكس قامت العربيه عومت وإنت ونصيبك بقى

أو حاجة ابسط ماشي بسرعة ومره واحده لقيت نفسك في ملف هتلف الدرسكيون العربيه هتزحف وتكمل في طريقها وتركب الرصيف (حصلت معايا شخصيا )
نيجي لوسائل الأمان الي قلناها فوق هل دوسنا فرامل لأ يبقى الabs وebd مش هيشتغلوا ولو دوست مع لفة دركسون على السرعة دي هتزود التعويم أكتر
الasr هل عجل بقى اسرع من عجل ايوه بس حتى مع وجود الasr هيلم شويه بس العربيه عومت خلاص والي كان كان هنا يجي الesp

نيجي بقى للمكونات
طبعا زي الabs ونزود عليهم شويه حاجات كده
1) حساس دركسيون وده بيقيس الدركسون لف قد إيه
وده شكله


2) حساس الإلتواء yaw sensor
وده الي بشوف العربيه رايحة في أنهي إتجاه ومعدل تسارعها وإرتفاعها عن الأرض
ومن جوه عامل زي الgeroscopic sensor الي في الطيارات الي بيشوف الطيارة زواياها عاملة إزاي وال موجود برده في الموبيلات الحديثة
وده تردد إرساله للبيانات 30هرتز بيدي 30 قرايه في الثانيه الواحده

وبيركب جوه العربيه في الأرضيه

طيب الesp بيشتغل إزاي
طول ما إنت سايق محترم ومفيش حاجة جت قدامك وخضتك كله تمام نيجي للسناريو الي فوق
وناخد الاول الأبسط الي هو ملف إنت لفيت الدركسيون فلنفترض يمين والعربيه كملت على طول هيحصل إيه

أيوه صح سينسور الدركسيون قال يمين 90 درجة مثلا طيب الyaw قال إيه قال العربيه ماشيه على طول يقوم الecu ضارب فرامل بسرعة في العجلة ورا يمين طيب إشمعنى العجله دي كلنا عارفين إن أي جسم بيلف حوالين النقطة الثابته فيه الي هيا في جزء من الثانية العجلة ورا يمين الجسم هيلف إزاي أيوه صح كله هيترمي ناحيه اليمين يبقى العربيه وشها إتعدل أول ما تعدل الesp يفك العجلة والحمد لله ربنا سترها معانا

ودي رسمه توضيحيه معلش بالإنجليزي العربي مش شغال في الفوتوشوب وكمان وحش عشان ملياش في الرسم على الكمبيوتر


طيب السيناريو التاني
الي هو بتاع الفرخة نفس الفكرة
وغنت بتفادي اول مره زي الملف فالعربيه تستجيب بسرعة طيب مع رده الفعل هتفرمل برده بس الي قدام عشان تعمل عزم عكس التعويمه


يا رب يكون الموضوع ذات قيمة وميكنش دمه تقيل (كعادة مواضيعي)

ولو حد عنده سؤال يسأل هحاول أجاوب على قد ما أعرف
ولو حد عاوز رسومات توضيحيه لإزاي توصيل الكلام ده في العربيه عندي بس هو معقد شويتين 3 عشرة كده فعشان كده محتطوش بس الي عاوز ممكن أديهوله

[warning] يا ريت لو حد عاوز ينقل يذكر المصدر نايل موتور[/warning]

ويا ريت دعوه كده أنا بقالي 5 ساعات برتب في الموضوع عشان خاطر وعدت الناس أحطه بكره فدعوه صغيرة كده
ومعلش لو مش مرتب قوي أو مش واضح عشان عملته بسرعة ولو حد تاه هوضحلة كل حاجة يسأل عليها إن شاء الله

[SonaSteel]

ربنا يجزيك عنا خير ياوكو باشا ...... وربنا يجعله في ميزان حسناتك
ويستر طريقك يابني دنيا وأخرة و ربنا يرضي عنك
تعبتك معايا ...... انا مكنتش اعرف ان السحور هايظبطك كده :))))
وترجع بألف سلامة يا هندسة :))

[SonaSteel]

بصراحة موضوع جميل و فهمي زاد في اكتر للabsو ebd كمان
بس علشان الesp يركب لاي عربية ..... لازم يكون فيها absو ebd ولا مش شرط؟؟
وتركيبه سهل و هو اصلا يتجاب منين؟؟ ...... والله تسلم ايدك
انا مش عارف ازاي يبقي عربيات بتتباع والله بوسائل امان زي ديه .... واروح ادفع فلوس في عربيات تاني مفيهاش ايرباج حتي .
abs ماشاء الله فرق معايا في لحظات فارقة .... اول ما اشتريت العربية وكنت ماشي علي 110 ولقيت مطب ... سبحان الله
دوست فرامل هب ...... وقفت قبل المطب بسم وحسيت بيه جامد ... غير كده كان زماني لبسته والله اعلم العربية كانت هاتفضل طايرة ولا هاتحط علي ارض الوطن بسلام :))
ده غير موقف تاني والارض كانوا شغالين فيها حفر علي اليمين .... وكان في حفرة من اللي قلبك يحبها يعني تاخد ربع العربية .... ودوست فرامل ووقفت قبليها علي طول .... كان ممكن احود بس في عربيات علي شمال .
ربنا يسترها معايا ومعاكم ويكفيكم شر الطريق ....!!
تسلم يايوكو .... تيسلم ايدك والله
اقعد بالعافية :))

[Angel_wolf]

استاذ والله فكرتنى لما كنت عامل بريزنتشن فى الكلية عن العربيات والتكنولوجيا الى فيها
العيال والدكتور فتحوا بقهم من اول الـ ABS رغم ان كل الى قاعدين عندهم ABs فى عربياتهم بس تقول ايه جهل السنين بيشتروا و خلاص وانا كنت حاطت ABS , EBD , ESP
و كمان كنت جايب فرامل جديدة كانت عاملها شركة سيمنس اسمها (EWB) بس حاجة فتاكة فيها كنترول خاص بيها والفرامل شغالة عن طريق الكهرباء مش ضغط زيت فى المواسير والشغل الضيق دة

بس بجد ربنا يباركلنا فيك و فى شروحاتك

ودى صور الــــ (EWB)

[Amr Axel]

تسلم ايدك يا ريس ع المجهود المبذول في الموضوع
و اللي عايز فعلا يجرب الانظمة ديه ارشحله يجربها في البي ام 3
و هيدعيلي اسألوا مجرب :)

[mohammedabdallh]

شكرا يا باشا على الشرح ده
ايه الجمال ده كله
انت فعلا اسبتلى انا احنا مش راكبين عربيات

[osama.m]

الف شكر يا يوكو ربنا يكرمك على المجهود دا
بس فرق كبير بين عربية فيها الانظمة دي وعربية مفيهاش
لما بنزل من عربيتي واركب الاوكتافيا مثلا بحس اني متطمن

[smsm_nabawy]

ايييييييه الجماااااااال ده يا يوووكووو

ماشاااء الله ،، الموضوع جميل و ملم بالتفاصيل على فكرة !!

ماشاء الله :)

تسلم أيدك و ربنا يجاازيك خير ان شاء الله

[yoko]

ربنا يجزيك عنا خير ياوكو باشا ...... وربنا يجعله في ميزان حسناتك
ويستر طريقك يابني دنيا وأخرة و ربنا يرضي عنك
تعبتك معايا ...... انا مكنتش اعرف ان السحور هايظبطك كده :))))
وترجع بألف سلامة يا هندسة :))

العفوا يا باشا

بصراحة موضوع جميل و فهمي زاد في اكتر للabsو ebd كمان
بس علشان الesp يركب لاي عربية ..... لازم يكون فيها absو ebd ولا مش شرط؟؟
وتركيبه سهل و هو اصلا يتجاب منين؟؟ ...... والله تسلم ايدك
انا مش عارف ازاي يبقي عربيات بتتباع والله بوسائل امان زي ديه .... واروح ادفع فلوس في عربيات تاني مفيهاش ايرباج حتي .
abs ماشاء الله فرق معايا في لحظات فارقة .... اول ما اشتريت العربية وكنت ماشي علي 110 ولقيت مطب ... سبحان الله
دوست فرامل هب ...... وقفت قبل المطب بسم وحسيت بيه جامد ... غير كده كان زماني لبسته والله اعلم العربية كانت هاتفضل طايرة ولا هاتحط علي ارض الوطن بسلام :))
ده غير موقف تاني والارض كانوا شغالين فيها حفر علي اليمين .... وكان في حفرة من اللي قلبك يحبها يعني تاخد ربع العربية .... ودوست فرامل ووقفت قبليها علي طول .... كان ممكن احود بس في عربيات علي شمال .
ربنا يسترها معايا ومعاكم ويكفيكم شر الطريق ....!!
تسلم يايوكو .... تيسلم ايدك والله
اقعد بالعافية :))

زي ما شفت الesp عشان يشتغل محتاج كل مكونات الabs ebd asr يبقى ليه ميتحطوش خصوصا إن حالات إستخدمهم اكبر بكتير ده في عربيات زي فيات بيزودوا كمان على الي قلته hill holder

استاذ والله فكرتنى لما كنت عامل بريزنتشن فى الكلية عن العربيات والتكنولوجيا الى فيها
العيال والدكتور فتحوا بقهم من اول الـ ABS رغم ان كل الى قاعدين عندهم ABs فى عربياتهم بس تقول ايه جهل السنين بيشتروا و خلاص وانا كنت حاطت ABS , EBD , ESP
و كمان كنت جايب فرامل جديدة كانت عاملها شركة سيمنس اسمها (EWB) بس حاجة فتاكة فيها كنترول خاص بيها والفرامل شغالة عن طريق الكهرباء مش ضغط زيت فى المواسير والشغل الضيق دة

بس بجد ربنا يباركلنا فيك و فى شروحاتك

ودى صور الــــ (EWB)

تسلم ايدك يا ريس ع المجهود المبذول في الموضوع
و اللي عايز فعلا يجرب الانظمة ديه ارشحله يجربها في البي ام 3
و هيدعيلي اسألوا مجرب :)

عادي يا باشا والفرامل الكهربى لسه إعتماديتها قليله مع إن نفسي إعتمادها يبقى أكبر والموتورات الكهربى تزيد عشان نشتغل بقى هههههههههههه

شكرا يا باشا على الشرح ده
ايه الجمال ده كله
انت فعلا اسبتلى انا احنا مش راكبين عربيات

للأسف تلاقي ناس في مصر تقولك الكلام ده ملوش لازمة!!!! أنا عندي abs وebd في العربيه وناوي على الباقيين حتى لو هتكلف 10 الاف جنيه وبحسبها 10 الاف ولا حياتي؟؟؟

الف شكر يا يوكو ربنا يكرمك على المجهود دا
بس فرق كبير بين عربية فيها الانظمة دي وعربية مفيهاش
لما بنزل من عربيتي واركب الاوكتافيا مثلا بحس اني متطمن

العفوا وفعلا الواحد لما بيركب عربيه أمانها أعلى بيبقى مطمن شويه

ايييييييه الجماااااااال ده يا يوووكووو

ماشاااء الله ،، الموضوع جميل و ملم بالتفاصيل على فكرة !!

ماشاء الله :)

تسلم أيدك و ربنا يجاازيك خير ان شاء الله

الله يخليك وأنا حاولت على قد ما أقدر مخشش في التفاصيل

[Moe86]

الأجهزة دى تنفع تتركب لعربية مافيهاش abs أساسا ؟ فى أجهزة جاهزة لموديلات مختلفة ؟

[yoko]

الأجهزة دى تنفع تتركب لعربية مافيهاش abs أساسا ؟ فى أجهزة جاهزة لموديلات مختلفة ؟

ممكن بس هتجيب الي نازله لعربيتك وهتكلف كتير جدا جدا لإن هتغير شمعدانات وبلي عجل غير بقى كل الحاجات الي كاتبها وضفيرتهم يعني هتعدي ال15 الف مستريح لكن لو فيها abs يبقى وفرت الشمعدانات والسينسور ورمان البلي (أنا رمان البلي عندي في العربيه ورا يمين وشمال ب2000 جنيه)

[ahmedhawas]

الله ينور عليك .. موضوع رائع ومعلومات قيمة.
وبالنسبة لموضوع ال brake by wire فانا كنت مستني اشوف التويوتا بريوس الهايبريد اللي قالوا هينزلوها في مصر قريب
عشان نشوف مدى اعتمادية الفرامل .. إلا ان قلبي مش متطمن لموضوع زي ده (خصوصا في الفرامل).

تخيل ماشي في أمان الله مره واحده العربيه النص نقل الي قدامك وقع منها قفص فراخ قدامك أول حاجة هتعملها إيه ؟؟

أكيد هركن على جنب وانزل أخده يا باشا .. وده عشان نيتي سليمة والحمد لله

[yoko]

الله ينور عليك .. موضوع رائع ومعلومات قيمة.
وبالنسبة لموضوع ال brake by wire فانا كنت مستني اشوف التويوتا بريوس الهايبريد اللي قالوا هينزلوها في مصر قريب
عشان نشوف مدى اعتمادية الفرامل .. إلا ان قلبي مش متطمن لموضوع زي ده (خصوصا في الفرامل).
انا كمان مش مقتنع بإعتماديته مع إني في بكلريوس هندسة كهربى باور وهي هتتعمل nc بحيث لو الكهربى قطعت تفرمل وتقف بس برده ده ليه خطورته

أكيد هركن على جنب وانزل أخده يا باشا .. وده عشان نيتي سليمة والحمد لله

هههههههههه ويا ريت يقع معايا فرن وتتبيله بالمرة

[ashouhdy]

لا اااا الكلام دة كبييير اوى يا يوكو وعايز اقراة بمذااااج عالى مع كوباية شاااى كدة وحجر تفاحة :)))))

انا لسة مقريتش بس الصرف واااضح هههههههههههه

بجد يا يوكو ربنا يكرمك يأخى أخر كرم و يجازيك خير عن كل حرف كتبتة وتعبت فييية ... حقراة باليل كدة لما اروح بقى :)))

[yoko]

وانا مستني النقد من سيادتك