استهلاك البنزين على الغيارات

[aboharb]

السؤال ده مجننى عايز حد يشرحه ليه العربيه على الغيار الثانى مثلا وعلى 35الى 40 كيلو المحرك يستهلك نفس كمية البنزين بتعاى غيار الثالث والسرعه بين 55 الى 60و كذللك الغيار الرابع علشان اللى انا فاهمه ان عدد لفات المحرك ثابته طول ما ار بى ام مثلا على 3 واللى بيزيد السرعه هى الاسطوانه مع الفتيس وبكده يبقى الاستهلاك متساوى عايز افهم الموضوع ده

[momo44]

متااابع

[aboharb]

14 مشاهده ومحدش رد يبقى اكيد موضوع صعب

[Amr Axel]

لو بتحرق ع الغيار اوي طبعا استهلاك البنزين هيزيد اي ان كان الغيار اول او تاني او تالت
يعني مثلا التاني عندك اخره 40 تجيب انت بيه 50-60 و الار بي ام يزيد اوي ده اسمه حرق غيار و بيستهلك بنزين جامد
و الموضوع برده ليه علاقة بالظروف المحيطة و طريقة سواقتك
يعني مثلا كل شوية تقف و تمشي بتحرق ع الغيارات , وقفة الاشارات , فتح الشبابيك و انت ماشي
كل ديه عوامل بتأثر ع استهلاك البنزين بالاضافة

و بالتوفيق ان شاء الله

[hemalotfy]

متابع

[ahmedtunning]

استهلاك البنزين بيبقي مع الار بي ام مش السرعة كل ما الار بي ام بيزيد كل ما الاستهلاك يزيد

[MMamdouh]

انا مفهمتش ايه السؤال اصلا.....

MMamdouh

[ahmedsamir5edr]

بص يا سيدي ..
استهلاك البنزين المثالي بيكون عند سرعه 90 كم مثلا علي الغيار الخامس .. يعني rpm 2 تقريبا

لو انت علي نفس ال rpm علي الغيار التالت سرعه 40 مثلا .. هيكون الاستهلاك أكبر كتير جدا

لأن كمان وزن العربيه بيقل جدا علي السرعه 90 مثلا .. و استهلاك البنزين بيقل .. مع ان الاتنين نفس عدد دورات المحرك

أنا فاهم سؤالك كويس .. و أتمني تكون وصلتك اجابتي

[tutankhamoun]

استهلاك البنزين بيبقي مع الار بي ام مش السرعة كل ما الار بي ام بيزيد كل ما الاستهلاك يزيد

مش الأر بي أم لوحده يا باشا .

الأر بي أم و سرعة العربية كمان
لأن الأر بي ام بيحدد سرعة العربية بالاضافة أن السرعة أعلى من 90 بيبدأ قوة الهوا المضاد تتضاعف عليك و ده بيكون حمل على الموتور بيقاومه علشان يستمر في الجري أو جر السيارة .
و بالتالي طبعا سرعة العربية بتحدد أستهلاك البنزين .

على السرعات القليلة الأستهلاك بيكون أعلى على نفس سرعة الأر بي ام .
ليه ؟
علشان الشرح اللي شرحه الأستاذ أحمد سمير قبلي
الموتور لسة بيحاول يجر الوزن بتاع العربية

هاديك مثال
لو أنت بتدفع عربية لواحد بطاريته نايمة
مش لو العربية واقفة بتحس ان العربية مش بتتحرك و محتاج تدفع أقوى علشان تتحرك للأمام
و بعدين أول ما العربية بتأخد سرعة تحس أن قوة دفعك قلت لأن العربية بتتحرك بقوة دفعها الذاتي بالاضافة لقوة دفعك و ده بالظبط اللي بيحصل مع سرعة العربية و الغيار
أفضل أستهلاك بنزين

زي برضه ما الأستاذ أحمد سمير قال
سرعة 90 كم - س عند أر بي أم ما يزيدش عن 2800 لفة في الدقيقة حسب نسب الفتيس بتاعك و خرج العزم عند النقط دي .

[Eng.Geo]

بص يا سيدي ..
استهلاك البنزين المثالي بيكون عند سرعه 90 كم مثلا علي الغيار الخامس .. يعني rpm 2 تقريبا

لو انت علي نفس ال rpm علي الغيار التالت سرعه 40 مثلا .. هيكون الاستهلاك أكبر كتير جدا

لأن كمان وزن العربيه بيقل جدا علي السرعه 90 مثلا .. و استهلاك البنزين بيقل .. مع ان الاتنين نفس عدد دورات المحرك

أنا فاهم سؤالك كويس .. و أتمني تكون وصلتك اجابتي

+1111111111111

[ahmedtunning]

يا شباب مش ار بي ام 2.5 مثلا علي الغيار التاني هو هو 2.5 علي الغيار التالت ,السرعة المسئول عنها الفتيس وعلي كلامكوا احسن استهلاك للبنزين علي اقل ار بي ام و اعلي غيار و السرعه المتوسطة اللي هي 90

[MMamdouh]

استهلاك البنزين مفهوم نسبى مش مطلق... يعنى لازم تنسب البنزين اللى بتستهلكة الى المسافة اللى بتقطعها

يعنى مثلا عند 2500 لفة انت بتستهلك قدر معين من البنزين... سواء انت على الاول او الخامس مش فارقة... المهم انت قطعت كام كيلو بالبنزين اللى حرقتة و انت على 2500 بالتالى من الافضل انك تقطع اكبر مسافة ممكنة باقل RPM

الموضوع برضة مش بالسهولة دى لان مقاومة الهوا بتزيد بشكل مضاعف بعد سرعة 90 لان بعد السرعة دى الهوا بيكون دوامة فراغ ورا العربية و دى بتزود من مقاومة السير بشكل كبير

اذا معنى كدة ان السرعة الامثل للحصول على افضل استهلاك بنزين هى سرعة 90 كيلو فى الساعة بشرط استخدام اعلى نقلة فى الفتيس لتحقيق السرعة دى على اقل RPM

MMamdouh

[ahmedtunning]

+111111111111111

[amrelsaqqa]

كمان لازم تخلى بالك ان الار بي ام مش هو لوحده اللى متناسب مع كمية البنزين زي مانت فاكر !!

هديك مثال

وانت واقف سلانسيه وممور لو دست الدواسة لربع مشوارها لمدة ثانيتين مثلا هتلاقيك جمعت على الاقل 5000 rpm

انما وانت ماشى طبعا لا
حسب الحمل اللى على الموتور وعزم العربية ككل ، بيختلف مقدار الدوسة اللى توصل الموتور لار بي ام معين
ومع السرعة الحمل ده بيخف والعربية بتبقى محتاجة عزم اقل وده اللى بيخلينا ننقل على نقلة اعلى في السرعة بدون ما الموتور يتعب التعب اللى كان هيتعبه لو كنا نقلنا النقلة دى على سرعة لسه ما خليتش العربية خفيفة


يعنى كدة نقدر نقول ان الار بي ام الفلانى عشان توصل له ، بتختلف كمية البنزين المطلوبة له حسب الحمل الناتج عن سرعة العربية والنقلة واي حمل اضافى (مطلع مثلا)


من الاخر اللى بيحكم موضوع كمية البنزين للوصول لار بي ام معين

الحمل اللى على الموتور اللى بيخلينا ندوس بنزين اكتر او اقل

حيث يتأثر ذلك الحمل بسرعة العربية والنقلة وقوى الاحتكاك والمقاومة (بعد سرعة 90 بتزيد مقاومة الهوا بعلاقة تربيعية بعد ما كانت علاقة خطية قبل سرعة 90 )

-----------

انت اه بتقول انك بتبقى ماشى على نفس الار بي ام في المرتين
بس المرة الجاية بص لرجلك وشوفها دايسة قد ايه في كل مرة
وشوف الاختلاف ده جه منين


ولو بفرض ان الحمل كان ثابت وكمية البنزين كانت ثابتة في الحالتين ، هل انت لمدة دقيقة مثلا (على نفس الار بي ام ) بتمشى نفس المسافة لو كنت على التانى زي ما لو كنت على الخامس عشان تقارن معدل الاستهلاك بالنسبة للمسافة ؟



يبقى اخر كلام :

عند نفس الار بي ام :
لا هى نفس المسافة ولا هى نفس كمية البنزين اصلا عشان نقارن :D



وعلى فكرة الموضوع ده داخل فيه عوامل اكتر من كدة ومعقد لو هنقعد نسرد العلاقات بين العوامل المختلفة لأنها غير منتهية و بتلف على بعضها زي قصة البيضة والفرخة ومين اللى بيأثر في مين

انما لو فهمناه هيبقى سهل جداا اسهل بكتير من اننا نشرحه

[aboharb]

انا شاكر لكل من ساهم فى شرح الموضوع لى وبالعكس انا عرفت حاجات اكتر من اللى كنت عايز اعرفها ولا اخفيكم سرا ان سبب سؤالى انا ليه طريقين بامشى بالعربيه فيهم وانا خارج من بيتى طريق زحمه موت وسرعه بالكاد تصل الى 40 وتوقفات وفرامل كتير وشغال اولانى تانى حوالى 3 كيلو بالشكل ده ممكن يخدو وقت 30 دقيقه وطريق تانى 7 كيلو بس بياخد وقت 10 دقائق وسالك ممكن تصل الى انك تمشى 60 طبعا بالاضافه الى الاشارات من هنا حبيت افهم الموضوع
وشكرااا للجميع واتمنى ان الموضوع يظل مفتوح اكيد هيفيد ناس تانيه مثلى