بالصور شرح ازاي تلمع عربيتك بالبولش وتديها طبقة شمع للحماية

[Ahmod]

السلام عليكم ورحمة الله وبركاته

من كم يوم رشيت الباب والرفرف وللاسف فرق اللمعة في الباب اللى لسه مرشوش كان مضايقني جدا بحيث انه بيلمع وباقي العربية لمعتها مطفية نوعا ما

وبما ان البولش والشمع موجودين عندي قلت انزل ادي العربية وش لمعة لعل وعسى تظبط

كنت بشوف ناس كتير بتسأل عن كيفية تلميع العربية بالبولش والشمع فقلت اصورلكم العربية وهي بتتلمع واعمل تقرير بسيط يمكن يفيدكم ان شاء الله

اول حجات الادوات

1- علبة بولش
2- علبة شمع واكس
3- كيس قطن

ودي صورة البولش والشمع اللى انا بستخدمه



بالنسبة للشمع فده نوع كاربون واكس موجود في اي فرع on the run العلبة سعرها علما اذكر كان في حدود 37 جنيه تقريبا وده يكفي انك تعمل العربية بيه فوق 100 مرة

البولش تقدر تجيبه من عند اي واحد بتاع دهانات هيديلك حبة في برطمان وبرضه سعره رخيص بس مش متذكر كام



وكيس القطن من الصيدلية

يعني الموضوع كله مش هيكلف 60 جنيه ولا حاجة بالكتير اوي وال 60 جنيه دي هتلمع بيها العربية لحد ماتزهق من كتر التلميع

نبدأ بالخطوات :

بسم الله

هتجيب فوطة مبلولة نص بلة وتمسح بودي العربية كله من التراب والطين

بعد كدة تنشف العربية بحتة ناشفة بحيث بودي العربية ينشف وتستنى عليه شوية لحد ماينشف

بعد كدة هنبدأ اول حاجة بالبولش بحيث نلمع العربية كلها بالبولش وبعدين نديها طبقة الشمع عشان تحافظ على اللمعة وعلى البودي بتاع العربية

هنحط البولش على جسم العربية بالطريقة دي بالظبط وهنمسك العربية جزء جزء

يعني الرفرف وبعد مانخلصه الباب وبعدين الباب التاني وهكذا

بالطريقة دي بالظبط هنحط البولش



بعدها هتبدأ تمسك القطنة (حتة قطنة في حجم كف ايدك كدة) وتمسح الجزء اللى حطيت عليه البولش بطريقة دائرية وتكون ضاغط على القطنة وانت بتمسح يعني تمسح مع الضغط بقوة

وبعد ماتخلص مثلا الرفرف تبدا تحط البولش على الباب



وبعدين تمسحه بنفس الطريقة الدائرية ويفضل قطنة جديدة لكل جزء من اجزاء العربية

حاول انك ماتزهقش وتمسح بضمير عشان عربيتك تطلع لمعتها منورة وتبسطك

وهنا دي صورة العربية بعد ماخلصت بولش



بعد ماتخلص البولش تبدأ تحط الشمع هو جاي معاه سفنجة تقدر تستخدمها بدل القطن لو كانت نضيفة اما لو متوسخة خليك في القطن

وبرضوا بنفس الطريقة هتحط الشمع على العربية زي ماحطينا البولش بالظبط وتمسح مع الضغط بطريقة دائرية

وبكدة يبقى مبروك عليك لمعت العربية وحطيت عليها طبقة شمع تحمي البودي وتحافظ على اللمعة واللمعة ممكن تفضل مستمرة معاك مابين 4 الى 6 شهور

اهم حاجة انك ماتستخدمش فوطة زفرة في تنضيف العربية عشان ماتطفيش اللمعة وتضيع الشغل اللى انت عملته

دي النتيجة النهائية بعد ماخصلت بولش وشمع



وفي النهاية الموضوع ماكلفش اكتر من 60 جنيه في حين تلميع العربية بالبولش وبالشمع في اي بنزينة هيكلفك مش اقل من 250 جنيه للمرة الواحدة

تقدر تجيب الادوات وتعمل الموضوع ده بنفسك او انت وسايس الجراش بتاعك ومش هياخد منك اكتر من ساعة

ويارب اكون افدتكم

[kar!m]

ما شاء الله .. موضوع جميل و الشرح جميل و مبسط.

شكرا على نقل التجربة.

[egyptiandiver]

100 -100

[togo]

تسلم ايدك عالشرح الوافي لموضوع متميز

[alzelafy]

انتا انقذتنى من 200 جنيه كان البوهيجى بتاعى عايزهم منى عشان يلمع العربيه بعد ما اترشت و بتحايل عليه يقولى الطريقه و هو مش راضى مع ان دة كان مع الاتفاق قالى هلمعلك العربيه و بعد ما خد الفلوس فص ملح و داب

[Ahmod]

ما شاء الله .. موضوع جميل و الشرح جميل و مبسط.

شكرا على نقل التجربة.

ربنا يخليك

100 -100

من ذوقك والله

تسلم ايدك عالشرح الوافي لموضوع متميز

العفو يا باشا

انتا انقذتنى من 200 جنيه كان البوهيجى بتاعى عايزهم منى عشان يلمع العربيه بعد ما اترشت و بتحايل عليه يقولى الطريقه و هو مش راضى مع ان دة كان مع الاتفاق قالى هلمعلك العربيه و بعد ما خد الفلوس فص ملح و داب

مانا كمان والله كت متفق معاه بعد مايخلص رش هيلمع العربية كلها ومافيش تاني يوم وكانت لمعة العربية طفت

اشتري انت الحجات دي ولمعها لنفسك وان شاء الله تظبط معاك هي اكيد مش هتبقى زي لما البوهيجي يلمعهالك بالجهاز بس اهو برضوا حاجة كويسة وبتعمل لمعة حلوة

[Amr Axel]

ما شاء الله تسلم ايدك
يعني ينفع كده تسبقني وتنزل انا احتج ع فكرة ههههههههه
لا بجد تمام يا ريس انا فعلا كنت لسه بقول هجيب الحاجة و اظبط العربية و بالمرة اكمل السلسلة ههههههههه
مرة سألت بوهيجي تتكلف كام العربية بولش كلها و شمع قالي 80 جنيه فاصلت معاه لحد 50 جنيه هههههه من حوالي شهرين تلاتة
بس كده اوفر يعني 50 جنيه تشتري و تعمل اكتر من مرة , احسن ما تعمل كل شوية بــ50 جنيه
و خاصة اني بحب البس زي القوات الخاصة زي ما انت عارف و انزل و اخلص مهمة العربية بنفسي ههههههههه

[SASA3]

تمااام انت كده زى الفل و شغل زى الفل الله ينور و يحميلك عربيتك من اى خدوش و من اطفال الشوارع

و احتمال انا كمان اعمل الموضوع ده بس عادى يتعمل فى الضل ولا لازم شمس و كده ؟؟

[newcar2011]

الله ينور

[Ahmod]

ما شاء الله تسلم ايدك
يعني ينفع كده تسبقني وتنزل انا احتج ع فكرة ههههههههه
لا بجد تمام يا ريس انا فعلا كنت لسه بقول هجيب الحاجة و اظبط العربية و بالمرة اكمل السلسلة ههههههههه
مرة سألت بوهيجي تتكلف كام العربية بولش كلها و شمع قالي 80 جنيه فاصلت معاه لحد 50 جنيه هههههه من حوالي شهرين تلاتة
بس كده اوفر يعني 50 جنيه تشتري و تعمل اكتر من مرة , احسن ما تعمل كل شوية بــ50 جنيه
و خاصة اني بحب البس زي القوات الخاصة زي ما انت عارف و انزل و اخلص مهمة العربية بنفسي ههههههههه

يا باشا انا وانت واحد وموضوعي هو موضوعك

بس فين البوهيجي الجميل ده اللى هيعملك بولش وشمع ب 50 جنيه

ده انت لو رحت اي بنزينة اقل حاجة هيقولك 200 جنيه

تمااام انت كده زى الفل و شغل زى الفل الله ينور و يحميلك عربيتك من اى خدوش و من اطفال الشوارع

و احتمال انا كمان اعمل الموضوع ده بس عادى يتعمل فى الضل ولا لازم شمس و كده ؟؟

ربنا يكرمك وعادي يا باشا في الضل مافيش مشكلة انا عملته مابين المغرب والعشاء

الله ينور

ربنا يكرمك

[M.Elgergawy]

ماشاء الله

[wael_elbarkoky]

شكرا يا باشا علي الموضوع ده
ان شاء الله لما العربيه تخلص دوكو بعد العيد
حبقي انزل المعهه و احط طبقت الشمع بعد لما الراجل يظبط العربيه

[mxz911]

شكرا للافاده

[minicooper20]

تسلم ايدك بس فين الوقت

[Ayman_A1]

هو الشمع دة وظيفنه ايه بالظبط؟
وهل ممكن اعمل الشمع بس لو مش محتاج لمعة؟
وأزاى تحافظ عليه اطول فترة ممكنة؟ غسيل أو مسح العربية عادى ولا ليه شروط؟