ستيبترونك؟

[momoneer]

اطمع من الاخوه الاعضاء شرح مبسط للفتيس الستيبترونيك انا سوقت المانيوال والاوتوماتيك لكن استيبترونيك ما ركبتش فياريت حد يقولى ايه هو وما مميزاته وما عيوبه لأنى محتار بينه وبين المانيوال...
عارف انى سألت كتير بس استحملونى

[fahd_628]

الستيبترونيك هوة بيجمع مابين المانيوال و الأوتوماتيك

يعنى انت ممكن تخلية كأنة مانيوال و ممكن تخلية اوتوماتيك عالدى

اوتوماتيك عادى عن طريق انك تسيبة على D و هوة حينقل لواحدة

ستيبترونيك عن طريق انك تجيب فى الحارة + و - و لو عاوز تسقط نقلة تزق العصاية ناحية ال - و لو عاوز تنقل تقوم زاقة زقة ناحية ال + و دة بتستعملة فى حالة لو انت بتشد بالعربية و عاوز انت تتحكم فى النقلات مش الفتيس هوة الى يتحكم

و بتنقل عادى جدا و انت دايس بنزين مش لازم تشيل رجلك و العربية مش حتسقط نقلة اقل من الازم يعنى مينفعش تجيب اول و انت على 80 و كمان حتلاقى فى عداد السرعة علامات حمراء كدة دية اخر كل نقلة فى الأوتوماتيك علشان لو عاوز تسقط نقلة او حاجة


عيوبة انة مش زى المانيوال فى السحب بس احسن من الاوتوماتيك العادى لأنك انت الى بتتحكم فى النقل لو حبيت

[momoneer]

هل فيه مشاكل فى صيانته....؟؟؟؟؟؟
أو اى مشاكل تانيه؟؟؟

[momoneer]

طب يا جماعه لو مكانى تجيبوا ايه؟؟؟؟؟ مانيوال ولا استيبترونيك؟؟؟؟

[fahd_628]

هل فيه مشاكل فى صيانته....؟؟؟؟؟؟
أو اى مشاكل تانيه؟؟؟

صيانتة حسب معلوماتى عادية جدا

طب يا جماعه لو مكانى تجيبوا ايه؟؟؟؟؟ مانيوال ولا استيبترونيك؟؟؟؟

دية حاجة ترجعلك بس انا رأى اوتوماتيك و دة لأن الشوارع بقت زحمة بطريقة غريبة و مفيش مكان للأستمتاع بسواقة المانيوال

[momoneer]

مش عارف اشكرك ازاى....
بس فيه استفسار
هل الستيبترونك يحتاج لعنايه اكتر وصيانه دوريه اكتر واعطال اكتر من المانيوال

[mohamed ibiza]

هو طبعا كأعطال بالذات مع طرق مصر اكتر من المانوال و كصيانة سهل مش مشكلة خلي بالك انا بتكلم كصيانة انما كتصليح مبيتصلحش لو حاجة باظت فيه ارمي و حط جديد و مش هزود عن كلام فهد لانه فيه المفيد

[mohamed ibiza]

و انا عن نفسي لو بشتري هجيب مانوال انا عندي السواقة متبقاش سواقة الا لو مانوال الاوتو ده بكرهه

[Ahmed Selim]

و انا عن نفسي لو بشتري هجيب مانوال انا عندي السواقة متبقاش سواقة الا لو مانوال الاوتو ده بكرهه

والله فكرتنى بأيام زمان يا محمد

من 9 سنيين كان معايا BMW 320i مو 86 و مانيوال طبعاً

كنت ساعتها بقول الأتو ده لفئتين من الناس: الناس اللى مبتعرفش تسوق أو الناس الكبيرة

وعدت الأيام ولقيت نفسى بقضى ساعتين يومياً من والى الشغل فى الزحمة و ابتدت رجلى توجعنى و حاجات كده وساعتها ضفت فئة تالتة : المسافرين جوه القاهرة :)

[momoneer]

يعنى اتوكل على الله واجيب استريبترونك ولا اخلينى فى اللى اعرفه (المانيوال)؟

[Ahmed Selim]

يعنى اتوكل على الله واجيب استريبترونك ولا اخلينى فى اللى اعرفه (المانيوال)؟

ده حسب أحتياجك

الفتيس الأتوماتيك فى ناس بتصلحه عموماً ( بس فتيس الميجان معرفش حد اشتكى منه و لا غيره ولا حد اشتغل فيه )

وبعدين انت لو هتشترى زيرو الضمان عليه 100 ألف كم يعنى 4 أو 5 سنيين سواقة مش فترة قليلة

[momoneer]

هو ضمان العربيه مش 3 سنين؟.؟؟؟؟
ولا الفتيس ليه ضمان لوحده؟

[mohamed ibiza]

والله فكرتنى بأيام زمان يا محمد

من 9 سنيين كان معايا BMW 320i مو 86 و مانيوال طبعاً

كنت ساعتها بقول الأتو ده لفئتين من الناس: الناس اللى مبتعرفش تسوق أو الناس الكبيرة

وعدت الأيام ولقيت نفسى بقضى ساعتين يومياً من والى الشغل فى الزحمة و ابتدت رجلى توجعنى و حاجات كده وساعتها ضفت فئة تالتة : المسافرين جوه القاهرة :)

حلوة المسافرين جوه القاهرة هههههههه بس ولله العربية لما تكون ناعمة مش بتضايق يعني الابيزا معايا ناعمة و البدال بتاعها ناعم فمش بتضايقني بس الاوتو اريح يعني بس شباب بقي و كده فأنا مانيوال الي الابد:):)

[momoneer]

هو ضمان العربيه مش 3 سنين؟.؟؟؟؟
ولا الفتيس ليه ضمان لوحده؟

[SAMER_ENGINES]

شوف لو معندكش خبرة في المنوال يبقي خليك في المنوال احسن علي الأقل عشان المصاريف لانك في شراء العربية هتدفع اكتر و في الصيانة هتدفع اكتر لكن لو فتيس مانوال يبقي الموضوع حلو و سهل في المصاريف و الصيانة و المتعة في السواقة الأوتو حلو و الاستيب كمان بس المانوال ليه طعمه و يحسسك انك سايق عربية بجد و فيها روح كدة علي رأي محمد إبيزا (السواقة متبقاش سواقة الا لو مانوال الاوتو ده بكرهه).
و لو اني انا شخصيا لو غيرت اللادا هجيب اوتوماتيك غالبا بس عشان خاطر والدي ربنا يخليهولي تعب من اللادا و من المانوال كله لكن لولا كدة كنت أجيب مانوال.
و في الآخر برضه براحتك و هات اللي انت عايزه و هتحس انه هيريحك عشان انت هتدفع فلوس و دول مش الف و لا اتنين و لا عشرة دول عشرات الألوف و لازم تحس انك جايب حاجة مقتنع بيها و مش عشان كلمة من فلان و لا علان و راينا أكيد في النهاية إستشاري و مبروك مقدماً.