يعنى إيه جلفنة صاج العربية؟؟

[amr mokhtar]

انا سمعت كتير كلمة "جلفنة" و اللى فهمته إن ده عشان منع الصدأ انه يوصل لصاج العربية

فإيه هو الجلفنة و هل دى مواد فى البطانة بتاعة البوية مثلآ و لا إيه بالظبط؟
و معلش حاجة كمان
هل الجلفنة دى هى مانع الصدأ اللى بيتكلموا عليه فى بعض المواقع الأجنبية؟

شكرآ

[SEATLOVER]

الجلفنة هى تكوين طبقة حماية على الصاج لعزلة عن الهواء الخارجى و بالتالى تقليل احتمال حدوث الصداء وهى اولى درجات الحماية من الصداء

الدرجة التانية من الحماية من الصداء من خلال (المعالجة الكهروكيمائية ) بواسطة الغمر فى احواض خاصة و تكوين طبقة اخرى كيمائية اكثر مقاومة للصداء و تستمر تأثيرها فى الحماية لسنوات طويلة

ولا يشترط بالطبع حدوث العمليتين فى كل السيارات و خصوصاً العملية الثانية حيث انها مكلفة و ترفع من ثمن السيارة و من الاشياء التى اصبحت هامة جداً فى كل السيارات الحديثة

[amr mokhtar]

و منكم نستفيد يا عمرو باشا

يعنى الجلفنة دى هى إستخدام مواد تحت البوية لمنع الهواء و المياء من الوصول إلى الصاج و بالتالى منع ظهور البرومة... صح كده؟؟

طيب دلوفتى العربية عندى (مجلفنة بالكامل) لكن العتب بتاعها مخبوط و عايز أصلحه و ارش العربي كلها نضافة لإن البوية تعبت و بقت كلها خرابيش

العتب عشان يطلعه تانى لبره.. بيجيب قطعة نحاس و يلحمه فى الصاج بتاع العتبة و يشده لبره و بعد كده تاخد معجون و تترش كلها تانى

طيب هل اللحام ده هيأثر على جلفنة العتب و هيخليها عرضه للبرومة بعد كده؟؟
طيب لو الجلفنة بتاعة العتب راحت هل ده هيأثر على جلفنة العربية كلها و لا ملوش علاقة؟؟

تقلت عليك مش كده!!
انا سمعت عن الجلفنة بالكهرباء هل بيستخدم فى العربيات و له إستخدامات أخرى؟؟

شكرآ

[SEATLOVER]

بص يا سيدى اهم دور للجلفنة انها متخليش البرومة تسرح فى الصاج
يعنى البرومة بتلاقى مقاومة عشان تمشى فيها

بالنسبة للحام ..دة هايكون مكانة صغير ماتقلقش ..بعدين بعد كدة هاتاخد معجون و رش يعنى هايتغطى تماماً فامفيش مشكلة

ماينفعش جلفنة العتب او الصاج تروح لانها بتبقى بمساحة العتب او الصاج كلة و دة مش هايحصل الا لو العتب كلة (اتكحت) و ماظنش ابداً دة اللى عندك

فى بقى اختيار تانى ممكن يكون جديد عليك
فى مكنة دلوقتى (شفط بالهوا ) بتتركب على الجزء المضغوط من العتب و بتشدة بالكامل على البارد بدون اى حاجة للعمليات التانية دى
ودى اعتقد بقت موجودة فى كذا حتة وفى فى الحرفيين منها

او الحل التانى انة ما يعملش لحام ولا حاجة
بيعمل فتحة فى العتب من الجنب عند الكاوتش و يدخل بار حديد يرجع بية الجزء المضغوط ...وبعد كدة يقفل الفتحة دى باللحام و طبعاً يمعجن و يرش و ما يبنش اى حاجة

[amr mokhtar]

شكرآ لردك و طمنطنى كده ان الموضوع مش خطر للدرجة دى

بالنسبة لشفط الصاج هسأل عنه و أشوف إذا كان ينفع هيكون جميل جدآ

بالنسبة للحل التانى بصراحة لا أحبذه لإن اى حاجة فيها فتح و لحامات و حاجات مؤذية بلاش منها

[Ramy.Gamal]

انا مره سمعت ان الجلفنه بتساعد على ارتباط اللون مع الصاج يعنى فى منتدى هوندا اصحاب السيفيك بيشتكوا من ان اللون مش ماسك فى الصاج جامد وسهل تقشيره فهل ده عيب فى الجلفنه ولا لأ؟

[muslem]

اظن ان معظم و اذا مكنش الكل العربيات الجديدةمجلفنةاو مغمورة فى احواض على الاقل
مش كده؟