ضبط المرايات

[Dew Drops]

مش عارف اظبط المراية اليمين
كل ما امشى بالعربية واجى ادخل يمين افاجأ بعربية جاية من غير ما اشوفها فى المراية
هل ممكن تفيدونى فى كيفية ضبط المرايات

[MMamdouh]

خللى مرايتين الجنب بزاوية 90 درجة على جسم السيارة

MMamdouh

[MMamdouh]

special thanks to my good friend Sameh Aziz

MMamdouh

[mohsen]

مش عارف اظبط المراية اليمين
كل ما امشى بالعربية واجى ادخل يمين افاجأ بعربية جاية من غير ما اشوفها فى المراية
هل ممكن تفيدونى فى كيفية ضبط المرايات

لو سمحتوا
انا حاسس ان الاخ nnnnnn بيستخدم المراية اليمين على اساس ان الصورة فيها بابعاد حقيقية فبييجى يحود يمين يلاقى الكلاكسات اشتغلت من الى وراه على اليمين

حضرتك المرايا اليمين بتدى صورة غير حقيقية يعنى حضرتك بتشوف صورة العربية الى وراك ناحية اليمين بعيدة شوية فى المراية اليمين لكن الحقيقة ان العربية الى وراك ناحية اليمين اقرب بكتير من الى المراية بتقولهولك
لذلك انصح حضرتك باستخدام مراية الصالون لرؤية العربية الى جاية وراك من اليمين علشان مراية الصالون بتدى ابعاد حقيقية
ولا تستخدم مراية الجنب اليمين إلا لوانت بتبتدى تتحرك من الثبات لما تكون راكن فى اى حتة او واقف فى اشارة مثلا
ولو لاحظت هتلاقى نسبة كتيرة من الناس قافلة مراية الجنب اليمين علشان ماتنساش وتستخدمها غلط

حفظك الله وكفاك شر طريقك

[marsguy]

ولا تستخدم مراية الجنب اليمين إلا لوانت بتبتدى تتحرك من الثبات لما تكون راكن فى اى حتة او واقف فى اشارة مثلا
ولو لاحظت هتلاقى نسبة كتيرة من الناس قافلة مراية الجنب اليمين علشان ماتنساش وتستخدمها غلط
حفظك الله وكفاك شر طريقك

انا مختلف معاك أشد الإختلاف يا أخ محسن

إستخدام المرايات الجانبيه مهم جداً جداً، بس لازم تاخد بالك إن أبعادها مش حقيقيه، عشان كده تلاقي العربيات الجديده كلها مكتوب على مراياتها نحذير "objects in the mirror are closer than they appear" بس ده معناه إنك تعمل حسابك مش تقفل المرايه خالص.

اكيد لما تيجي تخش يمين أو تغير حارتك لازم تبص في المرايه اليمين، ولو مش كده ما كانوش عملوا المرايه اليمين أصلاً

[uhlphp]

انا لسة مبتداء جديد فى القيادة وبعانى نفس المشكلة ان مراية العرابية ثابتة لا تغلق ولما بحاول احرك زجاج المرايا اليمين على اخرة لا ارى سوى جنب العربية وايضاً هل معنى ذلك ان المرايا الشمال ابعادها غير حقيقية .
وانا لانى لسة مبتداء فحتى الان لا اسطتيع تقدير المسافة بينى وبين السيارات القادمة خلفى وده بيخلنى اخاف ادخل لحارة فى المنتصف واحاول دائماً ان امشى على اليمين ولكن بهذة الطريقة اطر احياناً انى استنى العرابية المتوقفة لما تمشى لانى بخاف ادخل حد يخبطنى .
فارجو حل لهذه المشكلة اواقترحات ليها
واشكركم على الردود ومساعدة الاعضاء

[l0new0lf]

bos ya man
elmafrod en elmrayat mabetgeblaks kol 7aga 3ashan fe 7aga esmaha blind area aw blind spot we de mante2a elmerayat mabetgebhash

check the following links

http://www.mynrma.com.au/cps/rde/xchg/mynrma/hs.xsl/blis.htm

http://www.videojug.com/interview/driver-blind-spots

http://www.rta.nsw.gov.au/licensing/downloads/guide_to_driving_test.pdf

page7

[l0new0lf]

also
http://en.wikipedia.org/wiki/Blind_spot_(automobile)

[Akram]

انا بسوق و انا عندي 15 سنة و طلعت الرخصة و انا عندي 18 سنة و لكن بسوق في الطريق الفاضي أو ممكن أركن العربية و مش ممكن اسوق في الأماكن الزحمة و الميادين , تلاقيني بتلخبط و بيبقى كأني مش عارف أمشي خالص ,
المهم رحت لمركز تعليم و انا عندي 25 سنة علشان أعرف مشكلتي إيه , و الراجل اللي بيعلمني القيادة لما جربني لقى إن مشكلتي إني مش عارف اتحكم في المرايات ,
و علمني إنه طول ما إنا ماشي طوالي ابص على المراية إللي في الصالون فقط و كل فترة ابص (آخد لقطة من الطريق خلفي) و لما أكون عايز انتقل لحارة يمين أو آخد ملف يمين أو ادخل في شارع يمين يبقى لازم استخدم المرايات اليمين لفترة كافية مع تقدير بعد السيارات فيها و السرعة اللي انا ماشي بيها و كذلك بالنسبة للمرايا الشمال و طبعاً ده مع استخدام الإشارة المناسبة ,
و مع الإستخدام أصبح الموضوع عادة ,
و للعلم في ناس بتستخدم المرايا اللي في الصالون فقط و لكن الأفضل إنك تستخدم المرايات كلها و إلا مكنش المصنع عملها من الأساس .

[M.Mokhtar]

و للعلم في ناس بتستخدم المرايا اللي في الصالون فقط و لكن الأفضل إنك تستخدم المرايات كلها و إلا مكنش المصنع عملها من الأساس .

قصدك معظم الناس
وانا بتخنق مووت من الناس اللى ماشية بالعربيه وقافلة المرايا اليمين وساعات الشمال كمان
مفكرين ان دول كماليات ومش حاجة اساسيه لاى قائد سيارة بيفهم مع الاعتذار لاى حد بيعمل كده

[kh_talaat]

أنا معرفش أسوق أبدا بدون المرايات الجانبية .... و بستغرب جدا من الناس إللي بتقفلها دة الواحد لو يطول يركب مرايه رابعة كمان عشان يكشف أكتر زوايا عربيته كان ركب

[M.Mokhtar]

سواقين المكروباصات والتاكسى بيحطوا 19 مرايه قدام اعمل زيهم
بس هم مش بيحطوهم عشان يشوفوا زوايا اكتر
ده عشان حاجات تانيه مش ينفع نقولها هنا :)

[دموع الثلج]

انا معرفش احرك عربيتى من الجراج قبل ما اتاكد من ظبط المرايات الجانبيه ولو حسيت وانا ماشيه ان المرايات مش مظبوطه بزاويه الرؤيه الصحيحه اتلخبط واحس انى هعمل لا قدر الله حادثه عشان المرايات مش متظبطه اركن فورا واظبط
المرايات الجانبيه مهمه جدا ومرايه الصالون مينفعش اعتمد عليها 100% لانها بتجيب ابعاد الطريق اللى وراك لكن مش هتجيب ابعاد الطريق من الزاويه اليمين او الشمال ذى المرايات بتاعه الجنب

انا بظبط المرايات اليمين بحيث يظهر لى جزء بسيط من جنب عربيتى والرؤيه الاكثر للخارج يعنى معرفش موضوع 90 درجه ومفهمتش ازاى اعمله

[kh_talaat]

سواقين المكروباصات والتاكسى بيحطوا 19 مرايه قدام اعمل زيهم
بس هم مش بيحطوهم عشان يشوفوا زوايا اكتر
ده عشان حاجات تانيه مش ينفع نقولها هنا

ههههههههههههههههه أكيد مقصدش كدة ... بلاش سوء نيه يا راجل
دة فيه كمان سواقين التوكتوك مره شوفت واحدة منهم حاطط 4 مرايات جانبية يمين و4 شمال

[elrasy]

طبعا المريات الجانبية مهمة جدا, بس المشكلة فى المناطق العميا
انا لقيت حل بسيط جبت المريات المقعرة الصغيرة ولزقتها على المريات الجانبية
ميزتها انها بتجيب العربيات اللى مش باينة فى المريات الجانبية,, عيبها انها ساعات بتلخبط الواحد