إيه الفرق بين مواتير التربو والمواتير العادية؟؟؟

[borio1704]

كتير مننا سمع قبل كده عن التربو... وإن مواتير التربو قوية وحاجات زي كده


طيب هو إيه الفرق بين مواتير التربو والمواتير العادية؟؟؟


موتور التربو ما يفرقش كتير عن الموتور العادي... كل الموضوع إن موتور التربو متركب عليه تربو :)




بس التربو ده بيعمل إيه؟؟؟ وبيشتغل إزاي؟؟؟


التربو Turbo عبارة عن مروحة قوية (توربينة Turbine) مهمتها إنها تزود كمية الهوا اللي داخل على السلندر عشان يزود قوة الحرق داخل السلندر

إزاي؟؟؟ هو مش لو زودنا الهوا الحرق ممكن يقل؟؟؟

لأ.... كل ما كان الهوا أكتر بنقدر ناخد حرق أفضل للبنزين


الموضوع عامل زي الفرق بين الفحم لما تولعه... بيبقى كده



وبعدين لما تهوي عليه أو تشغل قدامه مروحة هيولع جامد ويشعلل.. زي كده





وعشان نفهم أكتر... خلينا نشوف الأول هو الموتور العادي الهوا بيدخله إزاي؟؟؟



ده شكل الموتور العادي




فيه حاجة إسمها Intake Manifold أو مانيفولد السحب... وده عبارة عن ماسورة كبيرة طلع منها مواسير أصغر بعدد السلندرات...

ومهمته إنه ياخد الهوا من الفلتر ويوزعه على السلندرات..



طيب هو بيسحب الهوا إزاي؟؟

هقوللك... بس متهيألي إننا محتاجين الأول ناخد فكرة سريعة عن دورة الاحتراق..


ده شكل دورة الاحتراق للموتور




اللي يهمنا هو اللي بيحصل في المرحلة رقم 1 ورقم 4


• في المرحلة رقم 1 السلندر بينزل لتحت ويسحب معاه الهوا.. بنفس فكرة السرنجة لما بتشفط الدوا

كدا الهوا دخل السلندر وبعدين عملية الحرق بتتم .. ومش هندخل في تفاصيلها لإن ده مش موضوعنا دلوقتي.

• في المرحلة رقم 4 السلندر بيطلع لفوق ويطرد العادم من فتحة تانية اللي بتودي على الشكمان..


طيب ... وده إيه علاقته بالتربو؟؟؟

زي ما قلنا التربو هو عبارة عن مروحة....

بس الفكرة العبقرية هنا بقى إني استخدم العادم في تشغيل المروحة..


إزاي؟؟؟


بص على الصورة كده




التربو عبارة عن مروحتين على عمود واحد... واحدة متوصلة على العادم والتانية متوصلة على هوا السحب..

ولما تدوس بنزين العادم بيطلع بكمية كبيرة ويبدأ يحرك المروحة... اللي هي كمان بتحرك المروحة التانية اللي على السحب وتدخل هوا زيادة .. أو بمعنى أصح "تضغط الهواء"..



التربو عشان يشتغل كويس لازم الهوا اللي داخل في السحب يكون بارد نسبيا، إنما اللي بيحصل إن الهوا بيبقى سخن جدا ويمكن يوصل لحد 150 درجة مئوية بسبب حاجتين:

* ضغط الهواء بيرفع درجة حرارة الهوا..

* لما الموتور بيسخن العادم السخن بيسخن التربو جدا لدرجة إنه يوصل لدرجة الاحمرار... وطبعا الهوا هيسخن هو كمان..

بص على الصور دي



والهوا لما يسخن بيبقى متمدد جدا .. يعني كمية الأكسجين اللي هتحرق البنزين هتبقى قليلة، وكده يبقى التربو مالوش لازمة، لإن الهوا اللي داخل مافيهوش هوا !!!


طيب إيه الحل عشان نبرده؟؟؟

الحل في تركيب سربنتينة يدخل فيها هوا السحب ويبرد فيها قبل ما يدخل السلندر.. السربنتينة دي بيسموها "مبادل حراري" أو Heat Exchanger وبيقولوا عليها في دنيا التربو Intercooler






المبادل الحراري بيبقى مشكلة للي بيعمل أو بيعدل على العربية علشان لازم يلاقيله مكان جوه الكبوت... ولازم يكون مكان مواجه للهوا بشكل مباشر علشان يبرد كويس..

بعض العربيات بيتحط المبادل الحراري فوق الموتور ... والعربيات دي بيكون فيه فتحة في الكبوت...

زي كده




طبعا الفتحات دي ممكن أي حد يعملها في العربية .. حتى لو مجرد منظر مش بجد





وفي أغلب العربيات الحديثة .. المبادل الحراري بيتعمله حساب جوه الكبوت.. وغالبا بيتحط قدام الرادياتير وسربنتينة التكييف.. أو على الجوانب قدام العجل الأمامي مثلا..




ده مثال لعربية فيه منها نسختين واحدة عادية والتانية بتربو




المبادل الحراري واضح جدا من الاكصدام.


طيب... إزاي أعرف إن الموتور ده فيه تربو بجد؟؟


الموتور التربو حتلاقيله صفارة مميزة بتزيد مع زيادة دوران الموتور... وغالبا حتلاقيها متأخرة سنه صغيرة عن الموتور... وده اللي بيسموه تأخير التربو أو Turbo Lag




طيب فيه حاجة مهمة جدا..

تركيب التربو لازم يبقى معاه تعديلات تانية على كل أجزاء الموتور اللي بتواجه الضغط والطاقة الزايدة في السلندر.. زي :

البساتم (Pistons)
الشنابر (Piston Rings)
البييلاّت (Connecting Rods)
السبايك (Bearings)
جوانات وش السلندر والفرن والسحب (Gaskets)
مانيفولد السحب (Intake Manifold)
وش السلندر (Cylinder Head)

وأحيانا كمان ممكن يكون فيه تعديلات على البلوك


وفي أغلب الأحوال.. علشان التربو يشتغل صح بدون مشاكل .. لازم الطاقة الزايدة اللي هتطلع من التربو يكون معمول حسابها في تصميم الموتور



أخر حاجة...


زي ما شرحنا قبل ... الهوا الأكتر معناه حرق أفضل وأسرع... ومعناه بردو استهلاك بنزين أعلى لو قارناه بموتور عادي له نفس السعة اللترية...

بس الميزة الأساسية من التربو هي إننا نقدر ناخد قدرة أعلى من مواتير أصغر... أو نقدر نعمل تعديل على الموتور الأصلي وناخد منه قدرة أعلى، وبكفاءة استهلاك وقود أفضل بدون شك.

في الحالة دي لما نيجي نقارن ... هنقارن الموتور أبو 1600 سي سي وفيه تربو مع موتور عادي 2700 سي سي ... لإنهم بيطلعوا تقريبا نفس القدرة الحصانية، وساعتها هتلاقي موتور الـ1600 سي سي مع تربو بيستهلك بنزين أقل من موتور الـ2700 سي سي



...

[Ahmed_Adham]

الله يفتح عليك ويرزقك بعربيه تربو

[mazagngi2010]

موضوع ممتاز
متشكرين ياباشا

[lanos2004]

رائع

[S O P H O S]

موضوع رائع
تسلم ايدك ..

[dr.hazem]

شرح جميل ومبسط،..
خير الكلام ما قل و دل..
تحياتي

Sent from my SE Arc S using Forum Runner

[SonaSteel]

ممتاااااااااز بس محتاجين موضوع عن صياناته واضراره
اتمني ذلك ان شاء الله

تقرير ممتاز واستفدت منه جدددددا ....... تسلم الايادي :))

[A7MED_PHARMA]

موضوع ممتاز ياجميل
ربنا يباركلك على المعلومات

[MohammedAladel]

يعنى لو أنا ركبت تربو لموتورى العادى

هاخد عزم يعنى تسارع أعلى هجهد الموتور أكتر من اللازم عشان أوصل لسرعة معينة فى وقت أقل أما بوصلها مع الموتور من غير تربو

لكن كسرعة قصوى أعتقد هتكون متقاربة لأن الموتور ليه عدد لفات مينفعش يزيد عنها يدخل فى red zone

[borio1704]

يعنى لو أنا ركبت تربو لموتورى العادى

هاخد عزم يعنى تسارع أعلى هجهد الموتور أكتر من اللازم عشان أوصل لسرعة معينة فى وقت أقل أما بوصلها مع الموتور من غير تربو

لكن كسرعة قصوى أعتقد هتكون متقاربة لأن الموتور ليه عدد لفات مينفعش يزيد عنها يدخل فى red zone

كلام حضرتك سليم... فعلا هقدر آخد عزم وقدرة أعلى بدون تأثير على السرعة القصوى

بس ده لما أركب تربو بدون تعديلات تانية على العربية


عادة... لما بنركب التربو بنغير معاه شوية حاجات تانية، وأهمها الجيربوكس والترس التفاضلي (الكورونا)

وفي الحالة دي نسب التروس بتبقى أطول حبتين عشان نقدر نوصل لسرعة أعلى


...

[besso]

موضوع ممتاز
استفدت منه جداااااااااا

[hossam_elwani]

شرح مستفيض مشكور عليه

بس ليه سؤال هيا فكرة التربو فى محركات البنزين هيا نفسها فى محركات الديزل زى شيفروليه الدبابه مثلا ؟؟

[MohammedAladel]

الفكرة العامة واحدة بالتأكيد

[borio1704]

شرح مستفيض مشكور عليه

بس ليه سؤال هيا فكرة التربو فى محركات البنزين هيا نفسها فى محركات الديزل زى شيفروليه الدبابه مثلا ؟؟

زي ما قال الأستاذ MohammedAladel

الفكرة واحدة.... التعديلات ممكن تكون على أماكن تثبيت الـIntercooler أو تقسيمه، وحتى ممكن لو الموتور على شكل حرف V ... ففي الحالة دي ممكن نركب 2 تربو... واحد في كل صف من السلندرات، وبيسموه ساعتها Twin Turbo.


بس على حسب علمي الدبابة ما بينزلش منها مواتير فيها تربو... على الأقل المتجمعة في مصر

اللي أعرفه إن التويوتا هايلكس النص نقل هي اللي بينزل فيها تربو



...

[akmm]

هايل . موضوع جميل .