ثرموستات الكوعة... المفترى عليه

[midnightman_74]

الموضوع دة كان مضايقنى بقالة اكتر من سنة واحد ميكانيكى شالة
وبعدها لقيت الحرارة علطول باردة
المشكلة ان بقالى فترة بدور علية مش لائقية لفورد اسكورت ١٣٠٠
الحمد لله لقيته النهارة ولسة مركبة وتحت التجربة
بس فى ناس كتير مش بتهتم بتسخين العربية وحرارة الموتور

[Abo Yasso]

الله عليك بجد ربنا يباركلك
بس سؤال بقى ....... الموضوع ده انا اروح اشترى ترموستات الآول ( بكام ؟؟؟)
وبعدين اروح للميكانيكى ولا ممكن تكون موجوده وتتصلح
واخر حاجه بقى معلش المصنعيه بتاعتها كام

[borio1704]

برافوووو عليك ...... موضوع متكامل ومجهود ممتاز ...... ده تعليق تحفيزى تستحقه

أما على جانب الإستفسارات : هل يوجد بدائل ميكانيكية أو ألكترونية لهذا الجزء ..... ويكون ليه تحكم من قائد السيارة بلمبة فى التابلوه وزرار يشغله أو يطفى منه ؟

تحيااااااتى

أكيد فيه بدائل... إنما هتبقى محتاجة كنترول خارجي

الميزة الكبرى في الثرموستات بصورته الحالية هو إنه بيشتغل بدون أي كنترول، ومش بيحصله حاجة ما دام بنستخدم العربية بأسلوب سليم ونحافظ على وجود المياه الملونة في نظام التبريد


بالنسبة للبدائل (وده اللي أعرفه من خبرتي في المصانع) فهي غالبا بدائل كهربية ، بحيث يتركب محبس بيشتغل عن طريق كويل كهربا (بيسموه "سولينويد" Solenoid) ويقدر يتحكم في الفتح والقفل عن طريق إشارة الكهربا اللي جاياله

على فكرة ... فيه حاليا تجارب على إن فتح وقفل الصبابات يكون عن طريق نفس الفكرة... بس لسه ما أثبتتش نجاح يعتمد عليه في موتور هيشتغل على الأقل 300 ألف كيلو

لو عايز تعرف أكتر عن السولينويد... ادخل على ملف الـpdf ده
"Solenoid Basics"
أعتقد إنه مبسط وهتعرف منه معلومات كتير وبسرعة



...

[linkin2008]

موضوع رائع وطريقة عرض اروع

[borio1704]

الله عليك بجد ربنا يباركلك
بس سؤال بقى ....... الموضوع ده انا اروح اشترى ترموستات الآول ( بكام ؟؟؟)
وبعدين اروح للميكانيكى ولا ممكن تكون موجوده وتتصلح
واخر حاجه بقى معلش المصنعيه بتاعتها كام

لو الثرموستات بتاع العربية موجود بسهولة (أعتقد إن الدايو حاجتها في كل مكان) يبقى روح اشتريه الأول وبعدين ركبه

إذا كان الثرموستات مش موجود.. يبقى الأول شيله من العربية وهات واحد زيه.

أهم حاجة إن درجة الحرارة اللي مكتوبه عليه تكون نفسها اللي مكتوبه على الجديد

بالنسبة لإصلاح الثرموستات.. متهيألي مش ممكن لو كان مش يترجلش، إنما لو بيترجلش (بس دول نادرين قوي) فتقدر تقلل أو تزود الفتح بتاعه بحيث يشتغل حسب خطوات الاختبار اللي في الموضوع فوق.

سعر الثرموستات مش غالي ... يتراوح ما بين 50 و 150 جنيه (يمكن اكتر شوية أو أقل شوية) حسب نوعه وبتشتريه منين.. وكمان نوع العربية، بس الأهم إنك تنظف الدايرة كويس وبعدين تحط ميه خضرا (أو ملونة) بعد التركيب عشان تحافظ عليه.

المفروض إن مصنعية تركيبهم رخيصة.. لإن الميكانيكي مش بيعمل حاجة صعبة... وممكن تعملها بنفسك لو عندك العدة المناسبة، وشوية كلّه أو سيليكون أحمر عشان تعزل وانت بتقفل.





...

[aldesha989]

ما شاء الله مميز بس انا لسه شارى العربيه قريب وما اخدتش بالى فيها ثرموستات ولا لا
بس انا بسخن العربيه بتسخن عادى ولما الحرار توصل للنص بسمع المروحه وهى بتشتغل
هل معنى كده انها موجوده وشغال صح ؟

[darsh_darsh]

بس ده للعربيات الجديده لكن الموديلات القديمه صعب تلاقيلها ترموستات زى عندى بيجو 504 انا نفسى معرفش رقمه ايه ولا عرمى شفته اساسا ده مفكوك من اكتر من 20 سنه

[sakr_skoda]

مجهود رائع تشكر عليه والله ....*

[هيثم الشرقاوى]

جزاك الله خيرا واسال الله ان يزيدك من فضله وعلمه

[MITSUKERO]

موضوع اكثر من رائع

ربنا يبارك فيك

[sno7y]

شكرا على المعلومات المفيده

[Abo.Omar]

الله ينور يا باشا

طيب انا دلوقتى لما اجى امشى براحه او واقف ف ىاشاره المؤشر يبقى فالنص لكن لو جريت بينخفض خااالص لفوق البارد بحاجه بسيطه ... قولت للميكانيكى قالى دا كويس ودوره التبريد عندك مكنتش شغاله واشتغلت .. وانا مش مقتنع بكلامه لانى اعرف ان مهما الموتور برد وهو شغال المفروض يا يكوون فالنص او اقل بحاجه بسيطه

هل دا كده يكون مشكلته ثرموستات الكوعه ؟؟؟

[michohat]

عن تجربة
بعد رحله البحث عن الترموستات عند تجار الاستيراد و العثور عليها وتركيبها
العربية بسم الله ما شاء الله مرتاحه
وتبريدها سريع
ونادرا لما تسخن
بسم الله ما شاء الله
الدور الان على اني الاقي ترموستات جديدة

[borio1704]

الله ينور يا باشا

طيب انا دلوقتى لما اجى امشى براحه او واقف فى اشاره المؤشر يبقى فالنص لكن لو جريت بينخفض خااالص لفوق البارد بحاجه بسيطه ... قولت للميكانيكى قالى دا كويس ودوره التبريد عندك مكنتش شغاله واشتغلت .. وانا مش مقتنع بكلامه لانى اعرف ان مهما الموتور برد وهو شغال المفروض يا يكوون فالنص او اقل بحاجه بسيطه

هل دا كده يكون مشكلته ثرموستات الكوعه ؟؟؟

بدون شك... المشكلة كده في ثرموستات الكوعة

مفيش حاجة إسمها دورة تبريد ما كانتش شغالة... أُمّال طلمبة المية بتعمل إيه والرادياتير لازمته إيه؟؟؟


أنا أتوقع إن لو ترموستات الكوعة موجود يبقى معلق وهو مفتوح قبل ما يقفل بحاجة بسيطة

زي ما قلنا... الترموستات بيعلق لما نستخدم ميه عادية ويبدأ الصدا يتكون جوه الموتور...

عشان كده لما تغير الترموستات إن شاء الله لازم تكون عامل دورة غسيل كويسه لدورة التبريد الأول وتتأكد إن مفيش تسريب من أي مكان، وبعدين ركبه على بركة الله



...

[borio1704]

عن تجربة
بعد رحله البحث عن الترموستات عند تجار الاستيراد و العثور عليها وتركيبها
العربية بسم الله ما شاء الله مرتاحه
وتبريدها سريع
ونادرا لما تسخن
بسم الله ما شاء الله
الدور الان على اني الاقي ترموستات جديدة

ربنا يباركلك فيها إن شاء الله

على فكرة... ثرموستات الكوعة ممكن يعيش معاك فترة طويلة جدا وممكن ما تحتجش جديد... بس أهم شيء إنك تحط ميه ملونة في دورة التبريد (خضرة أو زرقة أو حمرة مش مشكلة)، عشان الصدا ما يتراكمش عليه والثرموستات يعيش معاك أطول فترة ممكنة

بس الصح إنك تكون عملت دورة تنظيف لدورة التبريد وتكشف عن أي تسريبات ، وبعديها تركب الثرموستات وانت مطمن.




...