المساعد والسستة ..... أيهما أكثر أمتصاصا للصدمة ؟

[MohammedAladel]

السلام عليكم
أحنا عارفين إن المساعد بيمتص الصدمات والسستة معاه برضه وهما الاتنين بيكملوا بعض وبيحققوا التوازن

عايز أعرف أيهما أكثر تلقى للصدمة

أنا بقول السستة هى اللى بتشيل الحمل الأكبر والمساعد الحمل عليه بيبقى أخف

وهى اللى بتساعد المساعد إنه يرجع العربية لارتفاعها بعد ما خدت الصدمة صح كدا ؟

[AlGazar2]

السوسته بتاخد الصدمه الاولى و المساعد بيكمل و المساعد دوره اكبر لانه كل ما زادت الصدمه المساعد بيتقل عشان يمتصها لكن السوسته قدرتها واحده
كان فى موضوع هنا عن السوست و المساعدين و دورهم طبعا كل ما كانت السوسته احسن يبقى هتساعد فى انها تشيل الحمل عن المساعد لكن مش الصدمات
و كل ما خفت هتلاقى العربيه بتهبط بزياده مع التحميل و تتنطط بعد كده مع المطبات او مطبات الهواء

[MohammedAladel]

بس السوستة برضه كل ما زاد الضغط عليها هتبقى مقاومتها أعلى مش مقاومة ثابتة
زى المساعد بالضبط كل ما يزيد الضغط عليه هيزيد رد الفعل بتاعه ومقاومته هتزيد

هو من أسمه حتى ( المساعد )

ف النهاية هما بيكملوا بعض

[AlGazar2]

هما بيكملوا بعض بس رد الفعل بتاع السوسته واحد و مع الضغط المفاجئ رد الفعل بيبقى اقل و متكرر عشان كده السوست العاديه مثلا فى مطبات الهوا بتلاقى العربيه بتتنطط من ورا و خصوصا لو السوسته ضعيفه شويه او ماشى بسرعه عالية

[darsh_darsh]

هما بيكملوا بعض بس رد الفعل بتاع السوسته واحد و مع الضغط المفاجئ رد الفعل بيبقى اقل و متكرر عشان كده السوست العاديه مثلا فى مطبات الهوا بتلاقى العربيه بتتنطط من ورا و خصوصا لو السوسته ضعيفه شويه او ماشى بسرعه عالية

+1

[dr.hazem]

المساعد هو الاساس...
ومبدئىا كلمة مساعد خطأ!!
هو اسمه بالانجليزي shock absorper
يعني ممتص الصدمات
اما الستت فهي يادوبك بتخفف شويه من الحمل وبتشيل العربية وهي محمله انما لو المساعد ضارب العربية ممكن تتقلب بسهولة من مطب لان الستت ليها انضغاط وانفلات بنفس القوة والمقدار ومعاكس في الاتجاه فاذا كانت في المطب بتنضغط لاسفل فرد فعلها لفوق واول مهتنفرد عرضه انها تقلب العربية او عالاقل هتخليها غير ثابته بالمرة...
تحياتي

Sent from my SE Arc S using Forum Runner

[amrelsaqqa]

السوستة مقاومتها بتزيد حسب سرعة الصدمة والمساعد حسب تسارع او عجلة الصدمة ( معدل التغير في سرعة الصدمة )
عشان كدة بيسموا السوستة عائق تفاضلى من الدرجة الاولى والمساعد عائق تفاضلى من الدرجة التانية


كلام مكلكع شوية انا عارف

باختصار السوستة هتنضغط وكل حاجة مع الصدمة ، بس أقل تأثير يفضل يمرجح في السوستة وتفضل رايحة جاية وهنا دور المساعد لأنه ممكن ينضغط بسرعة جدا مع قوة الصدمة ، بس ما يفتحش تانى بنفس السرعة وهنا يحصل تأثير امتصاص الصدمة
سبب وجود الاتنين مع بعض ان السوستة هى اللى بتدي العربية الارتفاع المناسب في الوضع العادى وبتخفف الحمل على المساعد بحيث المساعد يشتغل وقت الصدمات بس ، انما في الحالة المستقرة السوستة هى اللى شايلة الحمل ، يعنى من الاخر بستغل كل من السوستة والمساعد في الحتة اللى هو شاطر فيها

جزء من الكلام ده مقتبس من موضوع قريته زمان للبشمهندس خالد سبعاوى الله يمسيه بالخير

[هيثم الدسوقى]

المساعد shock damper او خامد الصدمة

المساعد هو بالاساس اللى بيتلقى الصدمات الرأسية او العمودية وبيحول الاهتزازة الرأسية للسيارة لحرارة فى الزيت بتاعه

السوستة بتتلقى الصدمات الافقية وخصوصا جدا فى عجلة القصور الذاتى وجزء من الصدمة الرأسية

وللعلم الخطر الاكبر بيكون فى الصدمات الافقية لانها صدمات مباشرة وغير اهتزازية