هل عدم القياده لفتره يؤثر على مستوى السائق ؟؟

[MOHAMED OSAMA]

بسم الله الرحمن الرحيم
السلام عليكم ورحمة الله وبركاته

يارب تكونوا بخير دايما

انا الحمد لله معايا رخصه وبعرف اسوق
بس المشكله انى بقالى 4 شهور مش بسوق
واحتمال كمان اقعد كمان 4 شهور من غير مااسوق يعنى حوالى 8 شهور
عشان مفيش عربيه :b4_048:
هل ده يؤثر على مستوى القياده ولا عادى

[Survival]

هتفرق معاك شوية فى الركنة بس و الباقى اعتقد انه بيبقى عادى انا اكتر مدة قعدتها من غير سواقه حوالى 3 شهور و لما رجعت كان عادى جدا بس الركنة ما بقتيش تيجى بسرعة زى الاول. بعدها بيومين خلاص كله بيرجع لاصله

[dr.hazem]

معنى انك بتعرف تسوق يعني السواقه بقت في عقلك الباطن وبالتالي لايمكن تنساها...
انا كنت بقعد بال8-10شهور مبسوقش وعادي جدا الحمد لله....
تحياتي

Sent from my SE Arc S using Forum Runner

[divianella]

نفس الكلام بعد يومين او تلاتة بيكون الجزء الخاص بدينامكية السواقة و احساسك بالزوايا رجع تانى و مفيش مشاكل إن شاء الله

[S O P H O S]

حاجة بسيطة ولكن بمجرد انك ترجع تسوق
يومين او ما شابه وترجع كما كنت ان شاء الله
والله اعلم ..

[aldesha989]

انا قعدت فتره كبيره يمكن سنه بسوق كل شهرين تلاته ويمكن اربع خمس شهور مره
كنت ببقى مقلق ومش مستريح وانا سايق ولما جبت العربيه تلات ايام بالظبط والركن والاحساس بالزوايا وكل حاجه ترجع معاك افضل من الاول كمان

[mahmoud_afifi]

انا شايف انها بتأثر.
ده انا لو ماسوقتش في طريق معين او في الزحمه يومين واجي ادخل في الزحمه اعصابي بتتعب انما لو كل يوم بيبقى عادي جدا.
ولو ماسوقتش في الدائري لمدة بنسى ازاي الناس بتسوق عليه :d
سواقة الدائري غير اي سواقه

[Mr.Lawyer]

طبعا بتأثر لان السواقه ممارسه اكثر ما هى تعلم
بس طالما انت متأسس صح فمش هتقعد اكتر من يومين تلاته وهتبقى زى الفل لوحدك سواء فى الركن او غيره
حاول بس اول ما ترجع للسواقه تسوق لوحدك فى وقت البلد فيه فااضيه ومش زحمه عشان ترجع ثقتك فى نفسك وتحفظ مقاسات العربيه وتبقى استاذ سواقه

[m_elkhishin]

لو بتعرف تعوم، وقعدت سنة مروحتش البحر بتنسى السباحة؟
لياقتك ممكن تقل شوية، انما مستحيل تنسى.

[akmm]

ولا الهوا .... زى تعليم سواقه العجله اقصد البسكلته لايمكن تتنسى .