تعالوا نشوف اللى بيحصل للمحرك بعد الاستعمال وعلاقة منظف الحقن والفلاش إنجين بذلك

[MohammedAladel]

السلام عليكم ....
أنا فكيت محرك بالكامل هو محرك صغير وليس محرك سيارة من ماركة أسمه Robin هو تبع شركة سوبارو اليابانية
المحرك سعة 183 ml قدرته القصوى 3.7 حصان عند 4000 لفة فيه 2 صباب

بس الجزء المهم اللى جذب انتباهى أثناء الفك هو وش البستون ووش السلندر ووش الصبابات من فوق

تعالوا نشوف صور أحسن
دا وش السلندر فيه بتاع 8 مسامير فكيتهم

دا بقى منظر البستون والصبابات
شايفين السواد اللى عليهم يا أصدقاء ؟ دا مش مجرد لون يا جماعة دا عبارة عن طبقة من الكربون سمكها حوالى 1 مللى

المكنة دى كان بيتحطلها بنزين 80 وهى كربراتير طبعا وكان بيتحطلها زيت تعاون تقريبا زيوت رخيصة كانت بتستعملها

المكنة حالتها كويسة جدا للعلم مش مفوتة ولا حاجة استعمالها حوالى 3 شهور



أنا جبت مفك وقشطت الطبقة الكربونية دى ونضفت حوالين الصبابات كويس
تفتكروا ال 1 مللى الطبقة الكربونية دى تأثر على أداء المحرك ؟ هى بتقلل من مساحة غرفة الاحتراق

تفتكروا إن منظف الحقن هيقدر يفتت ال طبقة الكربونية دى؟ أنا شخصيا مفتكرش إنه يقدر يفتتها


حاجة غريبة شدت انتباهى برضه فى الموتور دا إن حجم رأس الصبابات مش قد بعضها صباب العادم أصغر من صباب داخل الهواء
صباب العادم مش معدن زى ما احنا ملاحظين فى الصور تحس إنه معمول من حجرزى الرخام كدا !!!!!!

نيجى لوش السلندر نفسه نبص عليه كدا من جوا

فيه طبقة حوالى مللى برضه من الكربون !!!



أنا فكيت المحرك كله للعلم

وكنت حابب أتكلم عن ال flush engine وحابب أقول من وجهة نظرى الشخصية أنه ملهوش لازمة تقريا لأن التلوث اللى بيحصل للمحرك كله بيبقى فوق البستون

لكن الكامات مش وباق أجزاء المحرك بتبقى متغرقة ف الزيت ومفيش داعى أننا ننضفها لأن مع السخونة والتزييت مبيترسببش عليها حاجة بالصورة اللى شركة زى ليكوى مولى عارضاها

[truss]

تفتكروا إن منظف الحقن هيقدر يفتت ال طبقة الكربونية دى؟ أنا شخصيا مفتكرش إنه يقدر يفتتها

ما اعتقدش اكيد انت شوفت ناشفة ازاى

حاجة غريبة شدت انتباهى برضه فى الموتور دا إن حجم رأس الصبابات مش قد بعضها صباب العادم أصغر من صباب داخل الهواء
صباب العادم مش معدن زى ما احنا ملاحظين فى الصور تحس إنه معمول من حجرزى الرخام كدا !!!!!!

دة طبيعى بالنسبة للمواتير اللى فيها عدد زوجى من الصباب (2 صباب - 4 صباب ) ساعتها بيكون عدد صبابات السحب قد صبابات العادم لكن صباب السحب اكبر, عشان الضغط اللى بيسحب شحنة الهوا و البنزين بيكون اقل بكتير من الضغط اللى بيدفع العادم خارج غرفة الحريق

و فيه مواتير بيكون الاسطوانة فيها عدد فردى من الصباب ( 3 صباب - 5 صباب ) ساعتها صبابات السحب بتكون اكتر من العادم , مثلاً 2 سحب و 1 عادم بالنسبة لل 3 صباب
لكن ساعتها قطر صمام السحب بيكون اصغر من صباب العادم

بالنسبة لصباب العادم بيكون مصنوع من سبيكة خاصة اغلبها من النيكل لأنه بيتعرض لدرجات حرارة عالية جداً

[MohammedAladel]

شكرا للتوضيح يا هندسة

[ahmedsrs]

سؤال ياهندسة دلوقتى طبقة الكربون دى فى ناس بتقول انها مهمة عشان بتمنع تسلخ غرفة الأحتراق والبساتم لدرجة انه لايفضل قلب العربيات الزيرو الى غاز طبيعى الا بعد ماتعدى 10000كيلو للسما ح لطبقة الكربون بالتكون وبالنسبة للفلش اعتقد انه مهم لآنه بيساعد على ازالة الرواسب الى بيسببها الزيت المستهلك خصوصا فى الجزء العلوى من الموتور عند عمود الكامة والكستوبانات.

[MohammedAladel]

بالنسبة للطبقة الكربونية أنا بصيتلها من ناحية إنها بتباخد حيز من الفراغ داخل غرفة الاحتراق

بالنسبة للزيت مش بيسيب أثر زى ما حضرتك متخيل لأن دى أجزاء متحركة

المنطقة الوحيدة اللى بيبقى فيها ترسبات هى المنطقة اللى أنا مصورها

أنا شايف إن لما تشيل الطبقة دى أفضل حتى عشان الصبابات تقفل وتفتح كويس وميبقاش فيه تسريب للضغط منهم

[akmm]

شكرا للشرح ...............................

[MohammedAladel]

فين آراء باقى الناس ؟

إيه رأيكم فى حكاية طبقة ال كربون اللى متكونة على وش السلندر من جوا وعلى البستم من فوق ؟؟ هل فعلا مهمة وبتحمى البستم ؟؟ وغلط إنى شلتها ؟؟ ولا هى ضارة عشان بتصغر حجم غرفة الاحتراق ؟

وبالنسبة للبستون دا أنا ملاحظ أنه مسطح بالرغم من أنى شفت بساتم مقعرة من فوق إيه الفرق بينهم ؟

[فادى محمد]

-تحياتي ياباشمهندس محمد ..انا من عشاق سوبارو ..كنت راكب سوبارو lion مو 84 وكان وشها علي حلو
-اكيد الموتور ده بتاع مولد كهربي او اله زراعيه ,سوبارو مشهوره في المجال ده
-الكربون المفيد للمحركات القديمه او الشقيانه هو اللي بيتكون حوالين البساتم او علي الشنابر
لانه بيعوض التاكل اللي حصل من الاحتكاك سواء من الشنابر او من جدار الاسطوانات
لو نظفت الكربون ده الموتور يدخن ابيض ويبقي محتاج طقم شنبر
-اي كربون بيتكون في الجزء العلوي من الموتور (وش السلندر) بيقلل احكام الكبس
ويزود استهلاك البنزين وحراره الموتور بالذات الكربون اللي بيتكون علي رؤوس الصبابات
-لي تجربه طويله مع منظفات الكربون اللي بتضاف للبنزين علشان كربون رؤوس الصبابات
بس للاسف كله في الفاضي تضييع فلوس وبس, الحل هو الروديه اللي بيعمله الصنايعي بايده
وعلي بيت الصباب

[MohammedAladel]

الموتور دا كان راكب على مكنة بتاع طوب أسمنتى هو دوره كان هزاز مش أكتر ولا أقل يعنى تقريبا كان بيشتغل على الفاضى

هو صعب جدا يتكون كربون بين البستون والمكان اللى بينزل ويطلع فيه وأنا شفت بنفسى لأن الاحتكاك مباشر وعالى جدا

لكن فوق البستم عشان غرفة الاحتراق

على فكرة لما جيت أغير بوجيهات لرينو ميجان بصيت بكشاف قوى على البستون بتاع العربية من فتحة البوجيه لقيته أسود زى الفحم من فوق

والمنظفات دى ملهاش أى لازمة فعلا أنا استعملت منظف أنجكشن محستش بأى حاجة وكلام فارغ مياكلش معايا

بس قول لى أيه هو الروديه دا ؟؟

وبعدين عشان نزيل الطبقة دى محتاجين نفك وش سلندر العربية كل 50 ألف كيلو مثلا دى تبقى وعكة

[ahmedsrs]

تمام ياهندسة انا كده اقتنعت ان الكربون المتكون على بيقلل من حجم حجرة الآحتراق وان كان وجوده على جدران خرفة الآحتراق بيقلل من تاكل غرفة الأحتراق ولكن وجوده عند الصبابات يضر بالموتور........................وبالنسبة لتقعر راس البستم بيكون معمول لزيادة خلط الهواء الداخل لغرفة الأحتراق با بخرة الوقود عن طريق عمل دوامات هوائية داخل غرفة الأحتراق

[فادى محمد]

الموتور دا كان راكب على مكنة بتاع طوب أسمنتى هو دوره كان هزاز مش أكتر ولا أقل يعنى تقريبا كان بيشتغل على الفاضى

هو صعب جدا يتكون كربون بين البستون والمكان اللى بينزل ويطلع فيه وأنا شفت بنفسى لأن الاحتكاك مباشر وعالى جدا

لكن فوق البستم عشان غرفة الاحتراق

على فكرة لما جيت أغير بوجيهات لرينو ميجان بصيت بكشاف قوى على البستون بتاع العربية من فتحة البوجيه لقيته أسود زى الفحم من فوق

والمنظفات دى ملهاش أى لازمة فعلا أنا استعملت منظف أنجكشن محستش بأى حاجة وكلام فارغ مياكلش معايا

بس قول لى أيه هو الروديه دا ؟؟

وبعدين عشان نزيل الطبقة دى محتاجين نفك وش سلندر العربية كل 50 ألف كيلو مثلا دى تبقى وعكة

-الروديه هو عمليه تنظيف لراس الصباب من الكربون ..يدوي طبعا .الميكانيكي بيحط ماده الروديه علي راس الصباب ويبيته مكانه في وش السلندر ويعد يلف في الصباب علشان الروديه ياكل الزيادات ..
-ماتفكش وش السلندر الا لو اضطريت لا قدر الله ووقتها تعمل اللي انت عاوزه كله بالمره

[Amr Axel]

ده اللي بنحاول نقوله ان ليه استخدم فلاش اساسا اومال انا بحط زيت للموتور ليه مش عشان ينضفوا من الشوائب و يعمل طبقة تحافظ ع جدار الموتور
اما منظف الانجيشكن فهو تقدر تعتبره الوقاية خير من العلاج بمعني تحافظ ع استخدامه هيكون ليه تأثير لكن مش تستني العربية تعدي 100 الف و بعدين تفكر تستخدمه زي ما البعض بينصح ان العربية توصل 80 الف ع الاقل عشان تستخدمه او تنضف البوابة طبعا كلام خطأ
بس عن نفسي لما بقعد فترة طويلة مستخدموش و اجي استخدمه بحس بفرق لكن لما جربت احطه بشكل دوري كل 5 الاف محستش بفرق و العربية زي مهي و اعتقد ده دليل ع ان له تأثير فعلا

بس عايز تنضيف صح للموتور من جوة مفيش غير حل واحد غير المحافظة ع تغيير الزيت و الفلتر و هو التنظيف اليدوي و اللي يعملك الحوار ده الميكانيكي بس طبعا صعب تفكر تعمل الموضوع ده في عربية موتورها جديد فيكفي تحافظ ع الموتور باستخدام زيت تخليقي و استخدام فلتر زيت أصلي و تغيره مع كل تغيير مع استخدام منظف دورة الوقود او الانجيشكن بشكل دوري كل 10-20 الف ك

[sno7y]

يعنى احنا وصلنا فى النهايه انا الكربون المترسب على الجدران ده مش مشكله والكربون الى مترسب على المكبس من فوق بيقلل من حجم غرفه الاحتراق وده مشكله

[MohammedAladel]

أساسا صعب كربون يترسب بين البستون والسلندر لأنه طالع نازل والاحتكاك مستمر لكن الكربون متمركز فوق البستون وعند الصبابات وعلى وش السلندر

[فادى محمد]

أساسا صعب كربون يترسب بين البستون والسلندر لأنه طالع نازل والاحتكاك مستمر لكن الكربون متمركز فوق البستون وعند الصبابات وعلى وش السلندر

+ علي الشنابر اللي حوالين البستون