أبعاد العربية وتركيزى أثناء القيادة

[MohammedAladel]

السلام عليكم
مبدئيا أنا محدش علمنى القيادة علمت نفسى على رينو ميجان جبناها النهاردة مثلا تانى يوم الصبح كنت مدورها وعمال أدرب على ركن السيارة

المهم بعد فترة بقيت بعرف أسوق برغم انى مش بسوقها كتير يعنى وكلها مشاوير قصيرة

والحمد لله بقيت بعرف أسوق لكن عايز أقول ملحوظة بالنسبة للعربية

أنا حاسس إن العربية دى أبعادها رخمة شوية

ولما بسوق بالليل ببقى مش مركز قوى برغم ان نظرى تمام الحمد لله

ولما بكون متوتر ممكن اخبط العربية هل دا طبيعى مع أى حد حتى لو كان متمكن جدا فى القيادة ولا لأ ؟

لأنى امبارح وانا داخل أفول العربية فى البنزينة خبطت الأكسدام الأمامى وأنا داخل بسبب توكتوك و ج ذع نخلة

وكنت حاسس إنى هخبط سبحان الله العظيم :)

الناس حواليا اتريقوا عليا بصراحة وسمعت واحد بيقول هما بتوع الملاكى كدا مبيعرفوش يسوقوا
مبصش لغلط سواق التوكتوك خالص بس فعلا أنا لو كنت دخلت بهدوء على مهلى مكنتش هخبط ولكنى كنت متضايق من الهرجلة بتوع التكاتك والموتسكلات وأنهم بيزنقوا وبيدخلوا مش فى دورهم خفت حد ياخد دورى

هل فعلا أنا من الناس اللى مهما سقت كتير وقليل مش هبقى متمكن برضه ولا أى حد بيحصل معاه كدا ؟

[Hmatchy]

لا طبعا ده فى الاول بس لحد ما تحفظ ابعاد العربية
اكيد يعنى مش بتتعصب لدرجة انك توصل لحالة من الهيستريا
انت بس ركز و خد بالك ان ابعاد العربية بتكون غير اللى شايفها من جوا خالص لدرجة انك بعد كده هتوصل لمرحلة انك تبقى عرف بمجرد النظر المكان اللى قدامك يجيبك او لا من غير ما تبص على الكبوت

[p r i n c e]

السلام عليكم
مبدئيا أنا محدش علمنى القيادة علمت نفسى على رينو ميجان جبناها النهاردة مثلا تانى يوم الصبح كنت مدورها وعمال أدرب على ركن السيارة

المهم بعد فترة بقيت بعرف أسوق برغم انى مش بسوقها كتير يعنى وكلها مشاوير قصيرة

والحمد لله بقيت بعرف أسوق لكن عايز أقول ملحوظة بالنسبة للعربية

أنا حاسس إن العربية دى أبعادها رخمة شوية

ولما بسوق بالليل ببقى مش مركز قوى برغم ان نظرى تمام الحمد لله

ولما بكون متوتر ممكن اخبط العربية هل دا طبيعى مع أى حد حتى لو كان متمكن جدا فى القيادة ولا لأ ؟

لأنى امبارح وانا داخل أفول العربية فى البنزينة خبطت الأكسدام الأمامى وأنا داخل بسبب توكتوك و ج ذع نخلة

وكنت حاسس إنى هخبط سبحان الله العظيم :)

الناس حواليا اتريقوا عليا بصراحة وسمعت واحد بيقول هما بتوع الملاكى كدا مبيعرفوش يسوقوا
مبصش لغلط سواق التوكتوك خالص بس فعلا أنا لو كنت دخلت بهدوء على مهلى مكنتش هخبط ولكنى كنت متضايق من الهرجلة بتوع التكاتك والموتسكلات وأنهم بيزنقوا وبيدخلوا مش فى دورهم خفت حد ياخد دورى

هل فعلا أنا من الناس اللى مهما سقت كتير وقليل مش هبقى متمكن برضه ولا أى حد بيحصل معاه كدا ؟

يا باشا دا عادي جدا جدا ولا يهمك
انا زيك علمت نفسي
انا كنت متعلم سواقة نظري بس عمري ما سقت
و اشتريت عربيتي و انا مبعرفش اسوق و الحمدلله هوا اسبوع بالظبط و بقيت تمام و بعد شهر بقيت بسوق كأني بسوق بقالي عشر سنين
ف اول يوم جبت فيه العربية حصل معايا زيك كدا.كنت معدي ف حارة ضيقة و عربية بيجو 7 راكب قديمة راكنة و في مسافة تعدي عربيتي بالظبط بس انا اتسرعت و مشيت بسرعة و حكيت ف البيجو بس الحمدلله حكة بسيطة ربنا سترها
و كمان اول مرة ادخل افول ف البنزينة في مطلع كدا ف اول البنزينة برا العربية قعدت تبطل مني على المطلع
دا عادي جدا يا باشا
فكك من الناس و إقفل قزاز عربيتك و سيب ال يتكلم يتكلم
يعني ال بيتريق دا اتولد بيعرف يسوق؟ كلو بيعك فالأول
يا باشا انا اول اسبوع كنت قربت أكره السواقة و كنت بكره انزل بالعربية بس كنت بنزل برضو و بقول لنفسي ال هيتخنق و يخاف عمرو ما هيتعلم و ال بيسوقو مش احسن مني
و دلوقتي الحمدلله بسوق حلو جدا جدا و ال بيركب معايا مش بيصدق اني لسه متعلم السواقه قريب
و نصيحتي ليك اقعد جنب حد من أصحابك بيسوق كويس و ركز مع حركة ايدو على الفتيس
وأي استفسار انا تحت امر حضرتك
وآسف على الإطالة

[amrelsaqqa]

السواقة ممارسة وخبرات

شوف زي ما في فرق بين اول يوم سواقة ودلوقتى

برضه في فرق بين دلوقتى وكمان سنة

[MohammedAladel]

المشكلة أنى متعلم السواقة خلاص وبتحكم فى العربية بصورة ممتازة الحمد لله ... لكن أنا لما بكون متوتر شوية مش بعرف أتحكم فى العربية كويس وبجرى وخلاص وساعات بطلع من عربيات والمقابل قرب وبخاطر جامد عشان كدا مش بحب أسوق وأنا متضايق

[MohammedAladel]

ومنهم لله الناس اللى واقفين فى البنزينة مفيش يوم مفيش عربية فيه مبتتخبطش السواقين بيبقوا لازقين فى بعض

النهاردة فكيت الأكسدام ورديت الخبطة بأيدى وركبته تانى بس تعبت جامد وقرفت من العربية حتى

[amrelsaqqa]

المشكلة أنى متعلم السواقة خلاص وبتحكم فى العربية بصورة ممتازة الحمد لله ... لكن أنا لما بكون متوتر شوية مش بعرف أتحكم فى العربية كويس وبجرى وخلاص وساعات بطلع من عربيات والمقابل قرب وبخاطر جامد عشان كدا مش بحب أسوق وأنا متضايق

نصيحة اخ ، اعمل اي حاجة بالعربية ماعدا الحركة دى عشان الحركة دى مفيهاش هزار ، عارف يعنى ايه لو عربيتين ماشيين بسرعة 120 وخبطوا وش في وش بعد الشر عليك، يعنى كأنك كنت ماشى على 240 ، ممكن تبقى هتجيبك بس انت تخض اللى قدامك تخليه يتصرف تصرف يكلفه عربيته وحياته يبقى انت استفدت ايه

ما تعديش عربية من مسافة ضيقة وقدامك مقابل وما تعديش تانى او تالت مهما كانت الظروف
لازم تبقى كاشف الطريق كويس والمسافة امنة وفي امكانية ترجع في حارتك تحت اي ظرف

[تامر.محمد]

مشكلتك مش سواقة

مشكلتك حلها
هااااااااااااادي ................ هااااااااااااادي

[AlGazar2]

الى بيحصلك ده عادى يا باشا جدا خصوصا و انت متنرفز و بيحصل لاى حد حتى لو حافظ عربيته بالمللى

و بيحصلى و انا الحمد لله بسوق العربيه دى من 5 سنوات تقريبا من بعد ما اتعلمت السواقه بشهرين تلاته مثلا
و بيحصلى باللانسر بس بتيجى سليمه الحمد لله :) و من فتره كنت متوتر و متنرفز و مصدع حكيت العربيه فى عمود من الجنب بس عادى جدا ولا اى اندهاشه

و فكك من كلام سواقين التكاتك و الموتوسيكلات مبقاش غير الفئه دى من المجتمع الى هتتريق على الناس كل واحد يخليه فى حاله و محدش بيدفع تصليح حاجة لحد

[MohammedAladel]

نصيحة اخ ، اعمل اي حاجة بالعربية ماعدا الحركة دى عشان الحركة دى مفيهاش هزار ، عارف يعنى ايه لو عربيتين ماشيين بسرعة 120 وخبطوا وش في وش بعد الشر عليك، يعنى كأنك كنت ماشى على 240 ، ممكن تبقى هتجيبك بس انت تخض اللى قدامك تخليه يتصرف تصرف يكلفه عربيته وحياته يبقى انت استفدت ايه

ما تعديش عربية من مسافة ضيقة وقدامك مقابل وما تعديش تانى او تالت مهما كانت الظروف
لازم تبقى كاشف الطريق كويس والمسافة امنة وفي امكانية ترجع في حارتك تحت اي ظرف

شكرا للنصحية الغالية ومش هكرر الكلام دا تانى من دلوقت مهمما كنت متضايق وللعلم أنا بحترم الطريق جدا
بس هقول لك حاجة جايز أنا بغلط لما أعمل كدا بس المقابل برضه أحيان كتيرة بيعند قصادى وأنا بعدى ببقى فلاش على طول عشان هو يهدى لكن هو لامبالاة
أنا مرة كنت بعدى من عربية مرسيدس c180 والمقابل كان بعيد كانت عربية نص نقل
كنت بعدى من المرسيدس على راحتى والمقابل بعيد وواثق من ان المسافة هتجيبنى بالراحة
ابتديت أطلع من المرسيدس بتاع المرسيدس الله يسامحه شد جامد بصيت فى المراية لقيت عربية بصراحة متراجعتش ودوست بنزين على الآخر العربية طلعت زى الطلقة وعمال أرعش للمقابل عشان يهدى ولا عبرنى
عديت بمعجزة والله من بين المقابل والمرسيدس

وأنا راجع من نفس المشوار كانت ماما تعبانة شوية وسيبتها عند الدكتور ورحت أجيب أشعة من البيت فكنت دايس جامد عشان ألحق أرجع تانى على ميعاد الكشف
كان فيه رينو كليوقدامى فتحت أشارة شمال عشان أعدى منه فتح بعدى وكسر عليا جامد وداس هو رحت جيت جنبه وسدينا الطريق كنت أنا ماشى جزء من العربية على الأسفلت والجزء التانى على التراب وعديت منه بس المقابل كان قرب بس مكنش بنفس خطورة المرة الأولى
بعد ما عديت منها كان فيه عربية شيفورليه دبابة واقفة على الطريق وأنا ماشى على الطريق المهم كنت ماشى 120 صاحبنا كسرقدامى من غير أشارة على مسافة قدامى فرملت جامد قوى وهو بصراحة صلح غلطته وطلع أمريكانى وربنا ستر كل دا فى مشوار واحد بسبب التسرع وحزام الأمان كان ليه دور جامد معايا فى ثباتى فى الفرملة المفاجئة دى
وحصل من دى مواقف كتير وربنا ستار ويسامحنى

[تامر.محمد]

انت بتعند
انا احيانا باعمل كده للأسف

[MohammedAladel]

انت بتعند
انا احيانا باعمل كده للأسف

للأسف بيبقى لحظات شيطان

قول لى يا أستاذ تامر أيه رأيك فى أبعاد ميجان بالنسبة للعربيات التانية اللى سقتها ؟

للعلم أنا ببقى قاعد على الكرسى منزله لتحت خالص ورجلى وأيديا بيقوا مفرودين يعنى دراعى بيبقى مفرود على الآخر وأنا ماسك الدركسيون واتعودت على كدا وبتحكم كويس برضه بس كل اللى يركب جنبى او يركب مكانى يعلى الكرسى وناس نفس طولى تقريبا

حتى أنا شفت مهند راكب عربيته البورش مش فاكر فاكر فى أنهى مسلسل من مسلسلاته ( الحتة اللى مراة عمه كشفته وهو بيخونها مع واحدة تانية ) أنا مش بشوف مسلسلات على فكرة بس اللقطة دى بس اللى شوفتها وشدتنى قعدة مهند فى العربية البورش وركبته متنية ومقربة من الدركسيون
أنا بيبقى رجلى الاتنين مفرودين برضه وببقى حاسس إنى قاعد جوا سفينة مش عربية يمكن عشان أنا رفيع شوية دا أنا كمان بحس بقيمة العربيات الكوبيه والهاتش باك عايز عربية تكون 2 كرسى وأبص ورايا ألاقى الزجاج الخلفى مش مهم الكبوت يبقى طويل :)

[abdo_2812]

أبعاد الميجان من أفضل وأريح العربيات اللي أنا سوقتها في حياتي، وكمان التحكم فيها من أسهل ما يكون ماشاء الله
بقارن مثلا في الفئات العالية بـ كورولا وكارينز وماتريكس وحتى الأوكتافيا وإلانترا وأكسنت الجداد والقدام وأكثر من عربية تانية برضو سوقتها وكنت حابب الميجان أكتر في موضوع الأبعاد ده

يمكن علشان هي عربيتي ومتعود عليها جامد بس فيه عربيات من اللي فوق دي أنا متعود عليها برضو لأنها عربيات ناس قريبة مني وبسوقها بشكل متكرر

على كل حال، حاول مايكونش الكرسي واطي وبعيد ... يعني حاجة واحدة منهم كفاية أو ظبط الموضوع على أفضل رؤية للأبعاد، كمان في بداية السواقة بالذات حاول تراعي تظبيط الكرسي على أفضل رؤية وتحكم في أبعاد العربية وسيبك من الرفاهية في النقطة دي لحد ما تحفظ العربية كويس ...


نقطة العند دي بقى كانت عندي زمان :)
لكن الحمدلله مع الوقت كنت بدرب نفسي إني ماسخنش مع حد وما أسابقش حد إلا بمزاجي وفي ظروف طريق مريحة جدا وبدون مخاطرة وأعتقد فيه تحسن مشهود بفضل الله من كل اللي يركب معايا :)
النقطة التانية بقى ماتخليش أي حاجة تنرفزك، وحاول تذكر نفسك إن كل شيئ له أجل وميعاد وماتخليش الاستعجال يفقدك تركيزك بسهولة وربنا ييسرلك كل خير إن شاء الله
ويارب يحفظنا جميعاً من كل سوء ويستر طريقنا ويرزقنا الحلم والهدوووووء علشان السواقة في مصر بقت سبب رئيسي من أسباب العكننة وإثارة الأعصاب !!

[Mostafa.Ismail]

كل دة هيروح مع الوقت ... لاتقلق.

[amrelsaqqa]

على فكرة بتحصل لنا كلنا

انا مثلا هقولك على موقف عبيط جدا حصل معايا وكل ما افتكره اقول ايه الغباء ده ههههههه :d

ماشى في شارع جانبى عادى وفي مطب فانا كنت جاي براحتى وشوفت المطب قدامى عملت فيها عم الفاهم وقمت جاي كاسر يمين قبلها وواخد المطب بالعرض عشان كان عالى فعلا وغبي ( المهم ما بصيتش في المراية :d ما تفهمش ازاى :d والمشكلة ان اخويا كل ما يركب العربية يلعب في ظبطة المراية فانا ما لمحتش اي حاجة خالص )

المهم لقيتلك موتوسكل متخلف هو كمان كان ماشى في النقطة العامية بتاعتى ولا كلكس ولا اي بتنجان وكان هيطير الجنب بس الحمد لله لحقت نفسى وعدلت بسرعة ومشيت :D


مثلا ممكن تبقى بتدخل جراج ضيق جدا بضهرك وهو بتاعك و بقالك 3 سنين بتدخل وتطلع منه كل يوم ، وتيجى في مرة تلاقى نفسك كنت هتحك الرفرف في الجدار !

ممكن تبقى بقالك 5 سنين بتركن قدام بيتك وحافظ العربية والحتة بالمللى وتيجى في يوم تلاقى نفسك حكيت الطاسة اللى قدام في حرف سلمة وكسرتها !


المشكلة ان الواحد بعد المواقف الهبلة دى بيضايق اوى رغم انها مواقف هبلة ، خصوصا لما يكون هو اصلا بيسوق كويس ومن فترة ( بيسوق كويس فعلا مش اي كلام )

بس هتقول ايه بقى :d