ايه هوا غيار الفيتيس الصح فى الملفات والمطبات

[michohat]

السلام عليكم ورحمه الله وبركاته

عاوز استفسر عن غيارات ووضعيات الفيتيس وانا بلف الملفات ال U تيرن و المطبات

بالنسبة للمطبات
سمعت من اكتر من واحد ان ابقى ممور الفيتيس وانا داخل على المطب واخده باقل سرعه ممكنه
بس بعد كده ادى للعربية غيار ايه ؟ واديه امتى؟ وانا فوق المطب ولا بعد ما انزل من عليه؟

والملفات
بكون جاى بسرعتى واهدى وباخد الملفات على النقله التانية فهل ده صح ولا غلط لانى سمعت اكتر من واحد انه بياخدها على النقلة الاولى؟

عاوز اعرف ايه الصح بالنسبه للعربية واللى بيصونها اكتر؟

[فادى]

كل ده بيعتمد على سرعة السيارة فقط و مفيش قواعد ثابتة, المبدأ الأساسى انو سرعة المحرك تكون متوسطة و مناسبة بحيث لا يحدث الصفع " التسقيف" مع مراعاة الحرص على عدم الوصول بالمحرك لسرعات دوران كبيرة للمحافظة عليه لأطول فترة ممكنة, و الموضوع كله احساسك بالعربية و تعودك عليها و ملوش قواعد.

[R A N A]

انا برده السؤال ده بييجي في دماغي كتير لاني مش عارفة ان كان اللي بعمله ده صح ولا غلط بس عموما انا هاقوله ونشوف الاراء بقي.

لما بكون داخلة على مطب وانا على سرعة التالت مثلا بهدي بالفرامل خالص وانقل على التاني قبل مانزل من على المطب او احيانا لما بحس ان العربية هديت لدرجة انها هاتقف والسرعة اقل من 20 اديها اول وانا نازلة من على المطب وبعدين لما تتحرك وتعلي ل 30 او احس بصوتها بروح مدياها التاني.
ولو انا اصلا على سرعة التاني يإما بفضل على نفس النقلة قبل المطب وبعده يإما بنقل على الاول وانا نازلة من المطب لو هديت اوي وحسيتها ممكن تترجرج مني لو مشيت كده بعد المطب.
في الملفات بقي ايا كانت السرعة اللي انا عليها قبل الملف بهدي خالص بالفرامل وانقل على التاني او لو انا اصلا عليه بخليني عليه لو الملف عادي ومش قضيب قطر يعني
لكن لو معوج او قضيب قطر باخده على الأول لحد ماعدي الناحية التانية والعربية تستقيم اروح ناقلة على التاني ثم التالت كل العربية سرعتها تعلي يعني وهكذا.
بس عموما يعني في اي ملف باخده افضل ماسكة دبرياج واسيب بنزين خالص ولو العربية سرعتها مش عالية خلاص باخده على كده لو كانت سرعتها عالية بخلى رجلي تنزل على الفرامل سنة سنة بمقدار يخلي العربية متعومش مني وفي نفس الوقت متقفش مني خالص وبعد ماخلص الملف اشوف السرعة كام واديها النقلة المناسبة لسرعتها زي ماقلت فوق.

ده اللي انا بعمله عموما وانا سايقة بس الصراحة يعني مش متأكدة ان كان هو ده الصح ولا لأ وهل في حل افضل من كده ولا إيه ياريت برده حد يقولنا.

واللي علمني السواقة برده قالي اي مطب اعدي عليه اهدي من قبليه وانا نازلة من عليه انقل على الاول بس انا احيانا مبنزلش علي الاول وافضل على التاني واعدي الملف عادي بس بكون مهدية السرعة عشان احيانا العربية بتترزع مني وبحسها عايزة تشتمني بعد المطب ده

[Adham]

حسب سرعتك

لو بتاخد الملف بسرعتك ومش عاوز تهدي قوي يبقى تسقط غيار على حسب السرعه

لة متأني و براحتك و العربية كبالن و عاوز تحافظ على كبالنها يبقى تمور

[حماده المصري]

لو u تيرن يبقى تمور

اما في المطبات العاديه

ف الغيار الي ميخليش العربيه تكرر ف هو ه الغيار المناسب

في عربيات على المطب لو مدي التاني تكرر وفي عربيات لا وفي عربيات بتدي التالت وبتعدي المطب من غير ما تكرر او بكركره بسيطه

على حسب عربيتك وسنسك معاها

[morabet79]

لو فيه u turn وأنا بلف وممور لقيت العربيه إللي أمامي بطئت وبالتالي بطأت من سرعني والعربيه هتفصل مني ، أجيب أول ولا إيه؟

[michohat]

النقل والغيار عندى بيتحكم فيه احساسى بالعربية
ففكرت انى اسئلكم يمكن يكون فى اسلوب مثالى مش يحمل العربيات حمل زياده ويريحها ويصون اجزائها لانى معتقد انى اكتر حاجه تبوظ العربية الملفات والمطبات اللى بتتاخد بطريقه غلط " رأى شخصى لو غلط يا ريت حد يفهمنى الصح"

فساعات لما اعدى المطبات واديها الغيار التانى تمشى عادى وساعات تسقف
وكتير لما اجى اعدى الملفات اليو تيرن بخلينى على الغيار التانى واظبط الحركه بالبنزين والدبرياج
بس كتير فكرت انى ألف الملفات وانا ممور وبعد كده اديها الاول الا لو الملف جاى مع مطلع فبعديها اماانى اكون جاى بسرعه محسوبه بحيث مش اضغط فرامل وانا طالع الملف( القصور الذاتى ) او لو مفيش مساحه للسرعه فانى بعديه على الاول

[Defender]

فعلا مفيش قواعد انت ممكن تلف علي الثالث لو واخد سرعتك مثلا50 من غير ما تحتاج تغير للتاني

ملفات معينه اقصد

انما بتلف علشان تدخل طريق عكسي

تهدي خالص و بعدين تدي الثاني

او وانت بسرعتك تدي التاني ومتشلش رجليك من علي الدبرياج خالص ومع الفرامل
لحد ما السرعه تبطئ تبدا تشيل رجلك مع علي الدبرياج وسنه فرامل وتلف وتكمل طريقك