دورات المجموعة البافارية

[haythamon]

السلام عليكم

امبارح عن طريق الصدفة عرفت ان المجموعة البافارية عاملة كورسات في ميكانيكا السيارات و الكهرباء و الالكترونيات و الميجاترونيكس لاي حد ... يعني مش مهم يكون خريج هندسة...

خدت بعضي و رحت عليهم و قابلت ا/ صلاح لولح ... مدير عام اكاديمية التدريب و هو شخصية محترمة جدا ... و سالته عن الموضوع... و دار الحوار التالي..

-هل صحيح ان المجموعة البافارية هتدي كورسات؟

-فعلا الكلام ده صحيح وده بسبب المعاناة اللي بنقابلها لما بنعمل اي مقابلات عمل للخريجين الجدد ... اكتشفنا ان الدراسة في اتجاه و متطلبات سوق العمل في اتجاه اخر.

-ازاي؟

-المناهج اللي بيدرسوها قديمة جدا و لا تتماشى مع التكنولوجيا الحديثة...وده بياثر على اي خريج في اي مجال مش مجال السيارات بس...

-و الكورسات دي لمين بالتحديد؟

-لاي حد مش لازم يكون خريج هندسة...يعني ممكن خريج حقوق او تجارة ما دام بيحب المجال ده و عاوز يتعلمه...

-بس خريج هندسة هيكون عنده خلفية كبيرة عن الميكانيكا و الكهرباء احسن من اي حد تاني

-و علشان كده احنا عاملين الكورسات دي مكثفة من اول المبتدا اللي ما يعرفش حاجة لحد مايوصل عندي لدرجة خبير و ده مش كلام لان حاليا انا عندي ناس من حقوق بياخدو الكورسات دي و في نهاية كل دورة بعد الامتحان الطالب هياخد من عندي شهادة معتمدة دوليا من BMW بس مش كل واحد هياخدها اللي هينجح بس لان دي هتكون سمعة المجموعة البافارية .

-طيب الدورات دي عملي و لا نظري؟

-الدورات دي هتكون الاتنين...و العملي طبعا اكتر

-و الدورات دي هتكون فين و مين اللي هيديها؟

-بالنسبة للافراد هتكون عندنا هنا في المجموعة .. فيه عندنا مكان للنظري و الورش للعملي...بالنسبة للشركات يا اما هنا برضه يا اما لو عنده مكانه ممكن...على حسب رغبته. و اللي هيديها مدربين خبرة من عندنا.

-طيب لو حبيت اسجل اسمي في دورة المبتدأين اعمل ايه؟

-هتروح عند شركة aic ودي هي الشركة المسئولة عن تسويق و تنظيم الدورات

-طب و ايه علاقة الشركة دي بكم؟

-فيه بروتوكول تعاون بنا و بين الشركة دي في موضوع التسويق و التنظيم و الشركة دي بتتكلم باسمنا فيما يخص التسويق و التنظيم للدورات.

-طب معلش سؤال تاني غلس شوية...بالنسبة لفلوس الكورسات...بكام ؟ و الدفع امتى؟...و فين؟

-ايه يابني...انت و كيل نيابة؟؟؟ كل دي اسالة...هههه...التفاصيل دي كلها عند شركة aic و تعاملك معاها كانك بتتعامل معانا بالظبط فمتقلقش من حاجة.

شكرت الراجل و اخدت منه العنوان و التليفونات و عندي معاد معاهم النهاردة...و ان شاء الله اعرف التفاصيل و ابلغكم بيها....و اسف على الاطالة...

[Ahmed Nasser]

ياريت ياباشا لانى مكملتش فى تجارة بسبب انى بحب المجال دة
وياريت الاسعار والتفاصيل
وشكرا ليك

[mem]

جزاك الله خيرا على الموضوع الرائع ده

[haythamon]

اسف على التاخير...
انا رحت عند شركة aic و قابلت ا/ ايمن اسماعيل...و هو احد الشركاء...وتكلمت معاه في موضوع الدورات بتاعة بافاريا...و هو وعدني انه يجهز كل البيانات اللي انا طلبتها و هيبعتها لي خلال يومين بالكتير...( للاسف النهاردة الخميس و الجمعة و السبت اجازة) ...بس هو وعدني انه هيحاول يبعتلي قبل يوم الاحد ان شاء الله... و ربنا يسهل
هو اداني اللينك بتاع الفيسبوك بس مش عارف لو حطيته ده يعتبر دعاية ليهم و لا ايه؟
ياريت حد يفدني في الموضوع ده

[Amr Axel]

ياااااااااااااااااااااااااه بعد كل السنين ديه اخيرا الموضوع هيتحقق ده احنا كنا بندور في كل مكان لدرجة ان الموضوع وصل لـ119 مشاركة و نزلنا لفينا انا و عضو اسمه ايمن سيف روحنا هيئة النقل و كلية الهندسة لدرجة اني روحت الهيئة العربية عشان نسأل ع الكورسات :)

http://www.nilemotors.net/Nile/138040-a.html

و طبعا بشكرك ع نقلك للخبر الجميل ده و في انتظار كل البيانات عن الدورات و لو مجموعة كبيير هيكون ايه الوضع
بس ممكن توضيح للشركة يعني نشاطها و مقرها ..الخ..ألخ

[besso]

قشطه كده لو السعر حنين ينفعنى

معنى كده الخريج الجديد اللى مخاش دورات ده بيتغل ازاى بيقبلوه يعنى (على المراكز كلها عموما)؟؟؟؟؟؟؟؟؟؟؟

[Eng_Mostafa_89]

فى كذا مكان بيدى كورسات فى مجال السيارات
وفى مرسيدس فى ابو رواش بتدى كورسات
وفى شركة فى جسر السويس بتدى كورسات برضوا واللى بيدرس فيها استاذ مساعد فى هندسة المطرية جامعة حلوان لو اى حد عايز تفاصيل ممكن يبعتلى على الخاص لانى مش عارف ينفع اكتب تفاصيل هنا ولاء

[haythamon]

فى كذا مكان بيدى كورسات فى مجال السيارات
وفى مرسيدس فى ابو رواش بتدى كورسات
وفى شركة فى جسر السويس بتدى كورسات برضوا واللى بيدرس فيها استاذ مساعد فى هندسة المطرية جامعة حلوان لو اى حد عايز تفاصيل ممكن يبعتلى على الخاص لانى مش عارف ينفع اكتب تفاصيل هنا ولاء

طب تمام...
ممكن اعرف الكورسات دي في ايه؟...و لمين؟...و مدة الكورس قد ايه؟ وهل فيه شهادة معتمدة؟...و لو فيه من مين؟...
كمعلومات عامة علشان نعرف نقارن صح و الاحسن نشوفه...

[Eng_Mostafa_89]

معنى كده الخريج الجديد اللى مخاش دورات ده بيتغل ازاى بيقبلوه يعنى (على المراكز كلها عموما)؟؟؟؟؟؟؟؟؟؟؟

بما انى هتخرج السنة دى من قسم هندسة السيارات
احب اقولك فعلا الدراسة فى الكلية حاجة والواقع حاجة تانى خالص
الدراسة فى الكلية بتدرس فيها حاجات عقيمة وتكنولوجيا قديمة يعنى ابسط مفيها فى دكتور بيدرسلنا نفس المنهج اللى اخدة وهو طالب
وعلى العكس فى دكاترة بتدرسلك حاجات على مستوى عالى وحديث ودول للاسف عددهم قليل
فبالتالى انت بتكون اتعلمت الاساسيات فى الكلية وبتبتدى تعلم نفسك بنفسك تنزل كتب ومراجع من على النت وتقراها مع نفسك ولو فى حاجة وقفت معاك فى كذا دكتور وكذا معيد سهل انك ترجع وتتناقش معاهم وتفهم منهم
وفى شركات بتاخد الخريج وتبتدى بمعنى اصح تربية على ايدها وتعلمة "فى توكيلات احيانا علشان تضمن انك مش هتسيبها بتمضيك على وصل امانة ب100 الف جنية"
وفى طرق تانى تتعلم بيها زى انك تنزل تدريب وتشتغل بايدك علشان تعرف كل حاجة وتتعلم
وفى انك تروح اماكن بتدى كورسات فى المجال دة اما فى شركات وتوكيلات السيارات وفى شركات تانى زى شركة بوش برضوا دى بتدى كورسات فى مجال السيارات بس بيكون سعرها عالى مقارنة باماكن تانى

[Eng_Mostafa_89]

طب تمام...
ممكن اعرف الكورسات دي في ايه؟...و لمين؟...و مدة الكورس قد ايه؟ وهل فيه شهادة معتمدة؟...و لو فيه من مين؟...
كمعلومات عامة علشان نعرف نقارن صح و الاحسن نشوفه...

بص ياباشا الشركة اللى فى جسر السويس دى اللى بيدرس فيها مدرس مساعد فى كلية هندسة قسم السيارات وكمان شغال فى التدريب فى مرسيدس
الكورس بيكون نظرى وفى يوم فى الاخر للعملى بتنزلوا ورشة وتشتغلوا بايديكوا على حسب الكورس
الكورسات اللى موجوده هناك
مبادئ المحرك ودى تشمل اجزاء المحرك وازاى المحرك شغال بعد كدة دوائر التبريد والتزييت
وفى دورات ادارة المحرك والكهرباء ودى بتشمل الدواير الكهربائية والمارش والدينمو والحساسات ومنظومات الوقود والاشعال كلها وتشخيص اعطال كل الكلام دة
وفى دورة عن التكييف
وفى دورة عن تشخيص الاعطال
وفى دورة عن العفشة
وفى دورة عن الفرامل
وفى دورة عن ازاى الكونترولات بتتعامل وتتواصل مع بعض
وفى دورة عن الفتايس بكل انواعها
كل الدورات دى بتشمل الحاجة وانواعها وازاى بتشتغل واعطالها وتشخيصها

بخصوص مين اللى بياخد الدورات دى فاى حد عايز ياخد الدورات دى بياخدها عادى جدا سواء طالب فى هندسة او خريج او طالب او خريج اى كليىة تانى مفيش مشاكل كان معانا ناس فى صيدلة وحقوق وتجارة وهندسة من اقسام تانى

بخصوص الاسعار بتبتدى من500 جنية لغاية 1500 حسب عدد ايام الدورة

اما دورات شركة مرسيدس فى شركة gas معرفش نظامها بصراحة ولا اسعارها
انما فى مركز خدمة اخر لمرسيدس فى دورات هحاول اعرف مين اللى ممكن ياخدها وارد عليك اللىاعرفة ان فى كورس مبادئ المحرك دة سعرة 450 جنية واللى هيدرس فية واحد زميلى خريج السنة دى ان شاء الله وعلى فكرة هو عضو معانا هنا فى المنتدى بس بقالة كتير ممتنع عن المشاركة هنا :)

[haythamon]

مبادئ المحرك ودى تشمل اجزاء المحرك وازاى المحرك شغال بعد كدة دوائر التبريد والتزييت
وفى دورات ادارة المحرك والكهرباء ودى بتشمل الدواير الكهربائية والمارش والدينمو والحساسات ومنظومات الوقود والاشعال كلها وتشخيص اعطال كل الكلام دة
وفى دورة عن التكييف
وفى دورة عن تشخيص الاعطال
وفى دورة عن العفشة
وفى دورة عن الفرامل
وفى دورة عن ازاى الكونترولات بتتعامل وتتواصل مع بعض
وفى دورة عن الفتايس بكل انواعها
كل الدورات دى بتشمل الحاجة وانواعها وازاى بتشتغل واعطالها وتشخيصها

تسلم يا ريس.
طب كنت عاوز اعرف الدورة الواحدة تقريبا بتاخد قد ايه وقت؟...اسبوع و لا اكتر...طبعا انا عارف ان ده يعتمد على نوع الدورة...بس كمتوسط وقت يعنى...و تقريبا كام ساعة في اليوم؟...معلش بقى تعبك معايا...

[besso]

بما انى هتخرج السنة دى من قسم هندسة السيارات
احب اقولك فعلا الدراسة فى الكلية حاجة والواقع حاجة تانى خالص
الدراسة فى الكلية بتدرس فيها حاجات عقيمة وتكنولوجيا قديمة يعنى ابسط مفيها فى دكتور بيدرسلنا نفس المنهج اللى اخدة وهو طالب
وعلى العكس فى دكاترة بتدرسلك حاجات على مستوى عالى وحديث ودول للاسف عددهم قليل
فبالتالى انت بتكون اتعلمت الاساسيات فى الكلية وبتبتدى تعلم نفسك بنفسك تنزل كتب ومراجع من على النت وتقراها مع نفسك ولو فى حاجة وقفت معاك فى كذا دكتور وكذا معيد سهل انك ترجع وتتناقش معاهم وتفهم منهم
وفى شركات بتاخد الخريج وتبتدى بمعنى اصح تربية على ايدها وتعلمة "فى توكيلات احيانا علشان تضمن انك مش هتسيبها بتمضيك على وصل امانة ب100 الف جنية"
وفى طرق تانى تتعلم بيها زى انك تنزل تدريب وتشتغل بايدك علشان تعرف كل حاجة وتتعلم
وفى انك تروح اماكن بتدى كورسات فى المجال دة اما فى شركات وتوكيلات السيارات وفى شركات تانى زى شركة بوش برضوا دى بتدى كورسات فى مجال السيارات بس بيكون سعرها عالى مقارنة باماكن تانى

يادى القرف اللى عايشين فيه

لو التعليم مالوش لازمه يلغوه بقى

واهو نوفر مصاريف وسنين بتضيع على الفاضى

[Mohab555]

اسف على التاخير...:zb_sor1[1]:
انا رحت عند شركة aic و قابلت ا/ ايمن اسماعيل...و هو احد الشركاء...وتكلمت معاه في موضوع الدورات بتاعة بافاريا...و هو وعدني انه يجهز كل البيانات اللي انا طلبتها و هيبعتها لي خلال يومين بالكتير...( للاسف النهاردة الخميس و الجمعة و السبت اجازة) ...بس هو وعدني انه هيحاول يبعتلي قبل يوم الاحد ان شاء الله... و ربنا يسهل
هو اداني اللينك بتاع الفيسبوك بس مش عارف لو حطيته ده يعتبر دعاية ليهم و لا ايه؟
ياريت حد يفدني في الموضوع ده

ممكن حضرتك تبعتلى اللنك بتاع الصفحه فى رساله خاصة
علشان محتاجة ضرورى

[MaZaGAngeE]

عايزين تفاصيل عن المكان و العناوين و مواعيد الدورات

[Eng_Mostafa_89]

تسلم يا ريس.
طب كنت عاوز اعرف الدورة الواحدة تقريبا بتاخد قد ايه وقت؟...اسبوع و لا اكتر...طبعا انا عارف ان ده يعتمد على نوع الدورة...بس كمتوسط وقت يعنى...و تقريبا كام ساعة في اليوم؟...معلش بقى تعبك معايا...

العفشة والتكيف ومبادئ المحرك تقريبا دول اسبوع
واتقل واهم دورة دى اللى هى الحساسات والكهرباء ومنظمات الحقن دى 15 يوم

يادى القرف اللى عايشين فيه

لو التعليم مالوش لازمه يلغوه بقى

واهو نوفر مصاريف وسنين بتضيع على الفاضى

بص هو من رائ ان اللى عايز يتعلم حاجة بيدور عليها وبيتعلمها والحمد لله عندنا فى الكلية نماذج مشرفة كتير جدا من دكاترة ومن معيدين ومن الطلبة بردوا
يعنى مثال للدكاترة عندنا فى الكلية كبير محللى حوداث الطرق فى مصر والشرق الاوسط بشهادة الالمان واليبانين وبسم الله ما شاء الله علية فى تشخيص الاعطال بمجرد سماع الشكوى يكون عارف المشكلة ويحكم على العربية من ريحة عادمها ويعرف مشكلتها اية ومن صوتها وفى تجارب كتير جدا شوفت بعينى نجاحة فى التعامل وتحديد المشكلة ايام مكان رئيس لجنة فحص السيارات فى حماية المستهلك
ودة مثال من المعيدين الموجودين ولسة واخد الدكتوراة ربنا يكرمة

https://www.facebook.com/photo.php?fbid=543729702321856&set=a.223212924373537.68440.222751444419685&type=1&theater

والحمد لله الطلبة عندنا نجحت فى تصنيع عربية سباق فورميلا وبنشارك فى انجلترا كل سنة من سنة 2010

https://www.facebook.com/HelwanFormulaStudent