عايزه افهم يعنى ايه كرونه سريعه او لوك

[MarEgypt]

سمعت عن كرونه عاديه وكرونه سريعه (لوك) وكرونه 4.04 او كرونه 3.62
كمان فتيس سريع وبطئ
وسمعت ان لو الفيس سريع المفروض تبقى الكرونه بطيئه والعكس
ولو غيرت موتور اكبر وفتيس هحتاج اغير كرونه عشان العربيه تظبط ؟

ممكن حضراتكم توضحولى اللوغرتيمات دى يعنى ايه ولو حتى بروابط مواقع عربى او انجليزى

وتغير الاطارات من 14 الى 16 مثلا هل ليه تأثير على الكرونه او الكرونه ليها تأثير ولازم تعديل ؟

لو تعرف اى معلومه ولو جزئيه او بسيطه اكون شاكره جدا بمشاركة حضرتك

[akmm]

مواضيع واسئله مهمه ........... ومتابع مع حضرتك .

[besso]

طالما محدش رد عليك هاقوللك اللى اعرفه

الكرونه دى فيها ترسين لنقل الحركه من الفتيس للعجل
التروس دى لازم يكون بينها نسبه تخفيض زى الفتيس بالظبط يبقى الارقام اللى انت بتتكلم عليها دى نسب التخفيض بتاعه الكرونه

الكرونه السريعه يعنى نسبه التخفيض فيها قليله يعنى معظم الطاقه اللى جايه من الفتيس بتخرج للعجل ودى بتبقى موجوده فى العربيات الملاكى مع اختلاف التصميمات (يعنى مش كل العربيات نفس نسب التخفيض)

الكرونه البطيئه نسبه التخفيض فيها عاليه يعنى جزء من طاقه المحرك هو اللى خارج بس (زى كأنك جايب الغيار الاول فى العريبه شوف بيبقى بطىء ازاى) والكلام ده بيبقى موجوده فى الجرارت وعريبات النقل بسبب انها بتحتاج عزوم عاليه جداااا فطبعا السرعه اللى خارجه بتبقى بطيئه(بين العزم والسرعه علاقه عكسيه)

الكرونه اللوك دى تقريبا كده والله اعلى بتاعه العربيات 4×4

طبعا الفتيس ليه علاقه بالكرونه يعنى لو انت عايز تغير الكرونه بواحده سريعه لازم يكون الفتيس متوافق معاها بشكل ما انا مش قادر اوضحهوللك او تقدر تقول مش قادر افهمه كويس علشان اشرحه

طبعا تغير الكاوتش بقطر اصغر هايأثر على السرعه بردو بنفس فكره التروس كده (لان فيه بين العجل والطريق نسبه تخفيض بردو اللى بيتحكم فيها قطر الكاوتش)
طبعا السرعه اللى هاتتغير مش كتير يعنى بتبقى فى حدود ضيقه مثلا 4 او 5 كيلو حاجه ما تذكرش يعنى

العجل مالوش تأثر على الكرونه لان الكرونه هى اللى بتاثر على العجل مش العجل هو اللى بياثر عليها يعنى سواء كبرت قطر الكاوتش او صغرته الكرونه مش هاتتاثر لان دورها بينتهى عند الاكس اللى راكب عليه العجله (يعنى كده كده عدد لفاتها ثابت مالوش علاقه بالكاوتش)

[Nourhawash]

الكرونة اللوك دي العجلتين بيلفو في نفس الوقت لكن العادية (المفتوحه) لو واحده غرزت التانيه هتلف عالفاضي

[Mohamed.Raafat]

اللى اعرفه ان الكرونة اللوك بتبقى في العربيات اللى بيتلعب بيها زي البي ام او عربيات الدريفت
و ميزتها انها بتخلي العجلتين اللى ورا يلفوا مع بعض حتى لو واحد منهم في الهوا او في رملة
اما الكرونة العادية لو عجلة مثلا على ارض صلبه و واحدة تانية على رمله هتلاقي الرملة بتفرك منك

[juba8]

شكرا على المعلومات