في الزحمة

[EdoAmeen]

طبعاً انا لسه سواق جديد وبخاف امشي في الطرق الزحمة لأني بخاف اخبط في عربية حد

لأني مش بعرف ازاي اقف واطلع بالعربية في مسافة صغيرة ممكن حد يعلمني ازاي

[mohamed_e36]

بص يا باشا في الطرق الزحمه لما تيجي تطلع بالعربيه اعمل حساب ان العربيه هتمشي شويه قبل ما توقفها من غير ما تكون دايس بنزين يعني مثلا انته واقف في زحمه وقدامك حوالي 6 متر وتقف تاني هتروح عامل ايه تجيب الاول وتدوس على دواسه البنزين دوسه خفيفه تمشي العربيه وبعدين تشيل رجلك من على دواسه البنزين وتدوس دبرياج هتلاقي العربيه مشيت بالراحه وتكون رجلك جاهزه على الفرامل وتبدأ تريح على الفرامل وحده وحده لغايه ما توقف العربيه خلي بالك في الزحمه اوعى توقف العربيه قفش مره واحده وتدوس فرامل على الاخر علشان اللي وراك ميلبسش فيك

[romieh]

الاسهل فعلا بدل ماتخبط عربيتك وعربيات الناس

روح مكان فاضى ومعاك اى حاجة بلاستيك يمكن رؤيتها من داخل العربية ( قمع - جردل - ........)

وحطه على بعد معين من العربية وابدأ قرب منه واقف قبليه من غير ماتلمسه

طبعا فى الاول انت هتخبطه بس مش مشكلة لانه مش هيأثر فى العربية

بعد كده هتلاقيك عرفت تحدد انك تمشى وتوقف العربية فى المسافات الصغيرة

لو يكون فيه حد معاك يساعدك انه يحركلك الحاجة دى كل شوية هيوفرلك كتير جدا

بعد كده لازم تمشى فى الزحمة علشان تحفظ ابعاد العربية كويس

[amr011111]

روح مكان فاضى واتدرب كتير جدا على انك تطلع بالعربيه فى وقت قليل من غير ما تفصل منك وجرب برضه انك تقف كتير عند اى علامه انت محددها وبعد كده اطلع على الطريق امسك الحاره اليمين ومتغيرش الحارات الا لو انت متاكد ان الطريق وراك فاضى
وفى الاول خلى حد معاك زى اخوك مثلا او صاحبك وان شاء الله الموضوع ممارسه

[drcobra]

عادى

روح مكان فاضى وارسم خطوط قدام العربية وجنبها وامشى عليها وبص فى المراية شوف انتى فين من الخطوط دى ... واكسر عليها وشوف ابعاد العربية... وامشى فى الزحمة براحتك خالص الناس هاتساعدك بس اوعى تتوتر حتى لو وقفت فى نص الطريق احسن ما تلبس فى حد