يوم في ورشه العفشه!

[hazem_khidr]

انهارد الصبح قولت لازم اروح اضبط العفشه اللي مكسل بقالي اكتر من شهر اضبطها و دا بيخليني ما اطلعش بالعربيه علي الطريق و ماشي بيها خايف.
المهم روحت اشتريت جوز مساعدين امامي ياباني ماركه K Y B الصراحه اول مره اسمع الماركه باعتبار اني مش بركب ياباني غير من قريب.و قالو انها ماركه ممتازه قولت اجيب و اجرب و بلاش المخاطره في شراء مساعدين استعمال يا تتطلع حلوه يا تطلع وحشه و يبقي خسرت فلوسي.
المهم روحت الورشه الساعه 10 صباحا .و فكيت العفشه كلها علي الارض
المساعدين طبعا و الكبالن و الاسكترا و المقصات يعني بقت فاضيه من قدام خالص و اتغسلت كلها بالجاز و بدات التركيب
1.تركيب المساعدين الجديد مع كاوتش المساعد و بطاحات جديده و علايات كمان (ما سيبتشش غير اليايات)
2.تغيير كل جلب المقصات و كاوتش البيض باكمله و غسيل البيض و تشحيمه
3.فك الكبالن الداخليه و الخارجيه و تشحيمها و تركيبها من جديد
4.فك الاسكترا و غسلها و تغيير جلبه بداخلها كانت بتعمل دردره في المطبات و الكل قالي غير الاسكترا بس لما روحت قالي مالكش دعوه انا حعملهالك.
5.ضبط الزوريا بالمقاس العادي .
المهم كان في اتنين شغالين في العربيه من الساعه 10 الصبح لحد الساعه 4.30 العصر!!!!!
بس العربيه ما شاء الله لما ركبت حسيت بطعم تاني خالص لان اخر ايامها مكنتش مظبوطه بالمره.
المصنعيه في دا كله 60 جنيه بس!!!!!
و عموما اي حد عاوز يضبط عفشته و عاوز يجيلي يقولي و انا اوديه و اوصي عليه و يتعمله الواجب كمان

[TAG_Turbo0]

60جنية بس !!!!!!!!!!!!!!!!!!!!!!1
والله ممتاز

[hazem_khidr]

لعلمك يا ميدو الناس دي بتعامل معاها من زمن و بدل الواحد اعرف اتنين تلاته في نفس المهنه بس كل وحد بروح ليه في حاجه معينه يعني لما تبقي حاجه بسيطه بروح لواحد نص نص و لما تبقي حاجه كبيره بروح لواحد تمام.و طبعا ال 60 جنيه علشان خاطري و اي حد من طرفي بيتعمل ليه الواجب طبعا

[elrasy]

والله يا حازم انا بدور على واحد بتاع عفشة كويس علشان بسمع صوت رجرجة جاى من تحت العربية وخصوصا لما بكون ماشى على اسفلت مشقق اومش مستوى
,,,بس المشكلة انى معرفش حد كويس واهم حاجة يكون امين لانى معرفش اية المشكلة عندى بالظبط ومش عايز واحد يشخص غلط وبالتالى تكلفة على الفاضى ,,,لانى بينى وبينك خبرتى فى العربيات تحت الصفر
فيا ريت ترشحلى واحد معرفة وتوصية علية

[hazem_khidr]

يا اخ راسي انا من المحله مش القاهره :lol: .
لو تحب تيجي عندي هنا اعملك اللي انت عاوزه مفيش مشاكل علشان الناس اللي بشتغل معاهم ناس فاهمه بجد .اما بالنسبه للقاهره لو مش حابب تيجي اسأل اي حد من الازملاء اكيد حيدلك.في واحد علي فكره انا شفت شغله في عربيه واحد صاحبي كان في شامبليون عند ابو طارق بتاع الكشري كده كان عامل عنده شغل عفشه مضبوط و نضيف اوي بس مش فاكر اسمه ايه بس هو في المكان اللي وصفتهولك دا بالضبط

[elrasy]

يا سيدى اهل المحلة احسن ناس علشان خاطرك,,,,, واشكرك على الاهتمام

[hazem_khidr]

الله يخليك يا باشا و انا تحت امرك في اي وقت لو تحب تشرفني

[Abdallah]

طبعا يا حازم انا راشق ان شاء الله لو فى حاجة حصلت فى العفشة !!

[hazem_khidr]

تشرف يا عبد الله معادنا الجمعه ان شاء الله يا مان
انا عملتلك العفشه مخصوص علشان ما تتريقش عليها :lol:

[ASAAD ASH]

يارت تقلى سعر المسعدين اليبانى كام ومنين

[hazem_khidr]

انا جبت المساعدين ماركه K Y B و الاتنين كانوا ب 480 جنيه و كنت شاري كام حاجه معاهم ف نزلت في التمن كله جوالي 30 او 40 جنيه . و انا من المحله مش من القاهره ف جايبهم من عندي بس اعتقد انك لو نزلت التوفيقيه حتلاقي محلات قطع الغيار عندها النوع دا.انا فعلا حسيت بفرق جامد في الثبات و الفرامل و المطبات عن المساعدين اللي كانو فيها

[محمدايهاب]

أنا ركبت dvdفي سبير كار و راجل ركبه في ست ساعات و أخذ 50 جنية تركيب

[ASAAD ASH]

يارت تقلى سعر المسعدين اليبانى كام ومنين
اشكرك على ردك السريع وربنا يباركلك فيهم

[Abonora]

تسلم يا حازم علي المشاركة المفيدة جدا ديه وياريت تنقل للقسم التعليمي

وياريت تكمل الموضوع بشرح مبسط لكل الاجزاء اللي تمت صيانتها وفائدة عمليه الصيانة دي اذا كانت (تشحيم عسيل ظبط الخ ) انا شخصيا الاسكترا ديه معرفهاش بصراحة
بالمناسبة انت مقولتناش اذا كنت عملت حاجة في الفرامل ولا لاء يعني بالمرة ايه اللي ممكن يتعمل في الفرامل (تيل طنابير ) وكمان مجموعة التحكم زي علبة الدريكسيون ليها صيانة برضوا ولا ايه

[hazem_khidr]

التفصيل

العفو يا وائل دا حاجه بسيطه كان نفسي اصور الاجزاء الي خارجه زي المساعدين و كده بس لقيتها مش حتبقي مفيده علشان مكنش حد حيعرف ايه الفرق بين السليم و البايظ.
1. المساعدين فايدتها انها بتمتص الصدمات و عندي المساعدين كانت خفيفه مووووت الاتنين جايبين زيت و الشمال كان خفيف اوي لدرجه الراجل بيقولي دي كانت ماشيه علي السوست و كويس ان الشاسيه و الكبالن ما حصلهاش حاجه من الاهمال دا.قالي ان الشاسيه مع المطبات كان ممكن يفتح و بالتالي الكوبلن حيملص من بعضه.ف نصيحه اي واحد راكب عربيه جر امامي يكشف علي المساعدين بتوعها علشان لو فيها حاجه ما تبوزش حاجتين تلاته جنبها.
2.غيرت كاوتش المساعدين اللي بيبقي راكب علي المساعد و كان اللي عندي طالع مدمر خالص.و قالي اليباني بتوعها مش كويسين هات كاوتشيتين بتوع فيات ريتمو!! علشان فيهم صداده من فوق بتساعد في تخفيف الحمل من علي المساعد في المطبات و فعلا حسيت انهم عاملين فرق برضه.
3.البطاحات بتبقي فوق المساعد و بتبقي بين المساعد و المنطقه اللي بيركب عليها المساعد و فايدتها انها بتققل من تاثير المساعد علي الجزي العلوي و دي انا غيرتها علشان كانت متكسره برضه من المساعد البايظ!!!!
4.جلب المقصات كانت عامله رجرجه و تزييق في العربيه و هيا ماشيه و بالتالي اتغيرت و كاوتش البيض دا فايدته انه ما يهربش الشحم من البيض و طول ما البيضه فيها شحم عمرها ما تملص ابدا ولا تبوظ و انا كنت مغير المقصات من سنه و نص و لما فكها تاني لقاها زي ما هيا....
5.بالنسبه للكبالن كان في كاوتش كوبن مقطوعه قريب و بالتالي الشحم اللي فيها انتهي و كان ممكن الكوبلن يبوظ من الحركه دي و غير كده انا بحب لما اعمل حاجه اعملها صح ف خليته يفك الكبالن كلها اللي جوه و اللي بره.ف غيرت كل كاوتش الكبالن بالمره علشان ما افكش تاني و يدوب بعد كده اربط بس علشان مثلا كاوتش الكوبلن بتاع الجنب اليمين انتهي يبقي الشمال في الطريق ف بقوم بتغير كله و اريح دماغي من الفك و التركيب كل شويه دا غير الاضرار اللي ممكن تيجي من الاهمال .

انا شخصيا الاسكترا ديه معرفهاش بصراحة

6.الاسكترا دي يا وائل اللي بيسموها خزنه الدركسيون بس الخزنه اللي موجوده مثلا في ال 132 و ال 125 مثلا علشان دي فيها اتياش دركسيون و حاجات مختلفه.انما مثلا ال 131 و الجديد كله بيبقي الخزنه مدموجه مع تيش الدركسيون ف في ناس بيسموها خزنه مجازا كده بس الصح بيتقال عليها اسكترا.
المهم ان الاسكترا دي كانت بتطلع اصوات عندي و كذا واحد قالولي تتغير بس الراجل دا كان اصلا ناس قراييبي بتشتغل معاه من فتره و هما اللي قالولي روح له و هو حيظبطلك كل حاجه و مش حيخليك تغير الاسكترا(جديده ب 350 تايواني و استعمال ب 500 !!) المهم هو خلاني اشتري جلبه دااخليه ب 25 جنيه بس و فكها و شحمها و ركب تاني اينعم الدركسيون تقل شويه بس قالي حيلين مع الاستعمال..
7.الغسيل فايدته انه بيفك كل التراب و الطين و الزيوت العالقه بالعفشه و بتعرف الاجزاء اللي بايظه من الاجزاء السليمه و بعدين التشحيم علشان الحديد ما يخبطش في بعضه ف لازم تشحم و كل جزء ليه الشحم بتاعه يعني الكبالن ليها شحم مخصوص ما ينفعش اني اشحم بالشحم العادي و البيض و الاسكترا بتتشحم بالشحم العادي. ف التشحيم بيقلل من الاحتكاك و بيزود عمر الاجزار .
[size=24]ارجو ان اكون قد افدت و ارجو من الساجه المششرفين نقل الموضوع للمنتدي التعليمي ان امكن و اي سؤال انا تحت امركم[/size]