سائقة على الطريق تحتاج رأيكم

[kiapicanto2014]

دلوقتى انا حاولت اتعلم السواقة اكتر من مرة ...
و كل مرة افشل انى اطلع لوحدى نظرا للخوف الشديد او عدم الثقة فى عدم مقدرتى على التصرف فى المواقف المفاجئة !

و كنت بتعلم على المانيوال و مشيت بيها و طلعت كبارى بس كان بجانبى احد دائما

كانت اكتر حاجة بتدايقنى فى المانيوال هو الغيار و ان الفتيس يعلق فى ايدى او اجيب غيار غلط .. يعنى احاول اجيب التانى يطلع الرابع و العربية صوتها يعلى !

و علشان احط نفسى قدام الامر الواقع و انى لازم اسووووووووووووووق ... جبت البيكانتو الاوتوماتيك 2014 ..

يا ترى هحتاج وقت قد ايه علشان اقدر اطلع بيها لوحدى ؟؟؟ و هل الاتوماتيك محتاج تعليم من الأول و لا ايه؟؟؟ وهل الاوتوماتيك اسهل من المانيوال؟؟؟ يعنى دة هيسهل عليا المهمة؟؟؟ بصراحة خايفة بعد ما دفعت كل الفلوس دى فيها معرفش اسوقها .. انا بالمناسبة اخترت عربية صغيرة علشان تكون اسهل فى القيادة ... الكلام دة مظبوط؟؟

[Hunting_Eagle]

مبروك عليكي اولا العربية الجديدة

ثانيا برافو عليكي انك اشتريتي اتوماتيك لأن المانيوال ده بقى اختيار فاشل

انتي كده قطعتي تقريبا كل نص المشوار في السواقة يفضلك بس حاجتين انك تعرفي ابعاد العربية ودي سهلة لان عربيتك صغيرة و تتعلمي تركني و دي بردو سهلة علشان بردو عربيتك صغيرة

بالتوفيق

[elmkaneeki]

الاوتو اسهل كتير من المانيوال....والبيكانتو اختيار جميل....بالتوفيق

[Maghraby1987]

الاوتوماتيك اختيار موفق في بلدنا الجميلة دي و البيكانتو عربية ممتازة ليكي و ربنا يديكي خيرها و يكفيكي شرها

[Mzeid]

أولا مبروك العربية :)
ثانيا اختيارك مناسب للعربية لأنها صغيرة أولا و دة هيسهل عليكي في الأول السواقة و الركن
بس لما تركني خلي حد واقف معاكي برة العربية علشان تعرفي ابعاد العربية
و ثانيا انها اوتوماتيك لأن دة بيسهل السواقة لأنك يا دوب بتجيبي ال d و بنزين و فرامل بقى

و حاولي تاخدي العربية وقت الفجرية كدة و الشوارع فاضية و لفي بيها علشان تاخدي عليها برضو

[dede_dodo88]

هي السواقة عموماً و خصوصاً في شوارعنا محتاجة شوية قلب جامد..
فمع الوقت الرهبة اللي عندك دي هتروح و خوفك على العربية هيقل تدريجياً لحد أما تلاقي نفسك أنتي اللي بقيتي تزنقي على العربيات lol

[Mzeid]

هي السواقة عموماً و خصوصاً في شوارعنا محتاجة شوية قلب جامد..
فمع الوقت الرهبة اللي عندك دي هتروح و خوفك على العربية هيقل تدريجياً لحد أما تلاقي نفسك أنتي اللي بقيتي تزنقي على العربيات lol

+11111

و نصيحة أي حد هيركب معاكي و ان سايقة من عينة حسبي فيه مطب و خلي بالك فيه عربية و انت ماشية عادي و واخدة بالك نصيحي شغلي الراديو و عليه على الاخر و يا ريت ميركبوش معاكي لأن الناس دي كل اللي بتعمله انهم يلغبطوا اللي سايق و خصوصا اللي بيعمل كدة الأهل

[ياريساوي]

لأ متخافيش خالص و حطي في بالك ان عادي لما تخبطي العربية مش مشكلة محدش بيتعلم ببلاش و متتخضيش اوي عليها اهم حاجة تمشي في حارتك و متزنقيش على حد و ادي اشارة على طول (الاشارات لغة السواقين البروفيشنال) و ابعدي عن الميكروباصات و التكاتك لو في حد اتكلم عليكي او اتريق و قال سواقة حريمي اقفلي الازاز و شغلي التكيف و الكاسيت و فكك من الي في الشارع و متخليش الي جمبك يقولك حاسبي و امشي براحة لأن دول الي هيلخبطوكي ..
متسوقيش و انتي مشدودة و قلقانة خدي انها حاجة عادية قشطة يعني معايا فرامل كويسة لو في حاجة فاجئتني و كلاكس يفوق الحمير ! لما تسوقي على طرق سريعة عايزك تقفلي الأمبير (يعني تجيبي اخر العداد ) و خليكي جريئة شوية بس متجريش في شارع كله مطبات و زحمه او اول مرة تمشي فيه و تربطي حزامك عالطرق السريعة و حطي في بالك انك في عربية مجهزة لحمايتك و معاكي فرامل كويسة يعني متخاااااااافيش :d

[amr.elsayed]

اتعلمى الاول على عربية تانية مع مدرب حتى لو حتدفعى 1000 جنيه تدريب
ال 1000 جنية دول يوفروا حجات كتيييير
1- توفرى حرق اعصابك
2- توفرى حرق اعصاب الناس اللى ماشية فى الشارع
3- حتحافظى اكتر على عربيتك الزيرو و حتقل نسبة الحوادث على الاقل سرعة رد الفعل تزيد
4- اثناء التدريب تكتسبى ثقة اكتر وخبرة اكتر لان السواقة خبرة مواقف
5- عربية التدريب مسؤولية المدرب لكن عربيتك لو اتخبطت حتزعلى وحتغرمى فلوس كتير
طب وعلى ايه كل دة ؟ اتعلمى الاول افضل باى تمن واى فترة من غير استعجال
ومبروك العربية

[يارا]

ربنا يوفقك يارب

[Ahmed Amin]

أولاُ مبروك علي العربية الجديدة, واختيار ممتاز ليكي كا بنت وكسواقة جديدة. ربنا يبارك لك فيها,,

طبعاً الأوتوماتيك عاملة زي ال video game في السواقة ومش صعبة زي المانيوال خالص,
لأنك هتجيبي D وتدوسي بنزين العربية هتمشي, وتدوسي فرامل العربية تهدي لحد ما تقف,, بس كدا..

مش هتشغلي بالك بنقل غيارات ولا لخبطة,, باللي هتركزي عليه دلوقتي مراياتك قبل ما تدخلي يمين وشمال,
عشان هتلاقي ناس محترفين كتير بتعدي من جنبك بسرعة من غير ما يزمرو ولا يدو نور ولا ينبهك,
وقبل ما تدخلي في شارع برضه وحد داخل معاكي جنبك, لو مبصتيش علي المراية وعلي جمبك كويس ممكن تخبطية..

أخر نصيحة وياريت متستهونيش بيها,, أمني علي عربيتك وتوقعي جداً أنها ممكن تتحك أو تتخبط في ظروف بلدنا الزحمة جداً دي والحر دا,
ومش بفول عليكي ربنا يستر طريقك,, بس أن حد يخبطك أو يحك لك عربيتك دا المفروض تعتبريه من دلوقتي Lifestyle في مصر. ومتزعليش أووي لما يحصلك..

لأنه عاجلاً أم أجلاً هيصحل, ومش بفول تاني والله, ربنا يستر طريقك وطريقنا,, بس طالما عربيتك جديدة و 2014..
أأمني عليها دلوقتي قبل ما تتحركي بيها كتير,, عشان لو أتخبطت سواء منك أو من حد متهور لقدر الله,
متزعليش عليها أوي ولا تتعبك في المصاريف,, خصوصاً أنك لسه دافعة فيها مبلغ محترم.


وأحسن شركة تأمين في مصر هيا كونتاكت كارز, عشان لما العربية بيحصلها حاجة بتكلمي الكول سنتر بتاعهم بيبعت لك ونش ياخد عربيتك لحد التوكيل عشان تتصلح لو العربية مش هتقدر تتحرك من مكانها, علي عكس أي تأمين تاني هتعدي تدوري علي ونش وحد يجي ياخد عربيتك,
وبيوفرو لك عربية تقدري تتحركي بيها لمدة يومين لتلات أيام لحد ما عربيتك تتصلح, بدل ما تدوري علي عربية أيجار لو حركتك من غير العربية صعبة.
وبيحاسبو علي الأصلاح وتروحي تستلمي عربيتك, علي عكس شركات تأمين مصرية كتير برضه تقولك صلحي أنتي وأبقي تعالي حاسبينا وممكن المبلغ ميكفيش معاكي ساعتها لو التكلفة كبيرة,, ولما تروحي لهم عشان تحاسبيهم يفاصلو معاكي في المبلغ اللي صلحتي بيه.

أنا حبيت أنبهك لنقطة التأمين دي بس بما أنك لسه جديدة في السواقة وعربيتك زيرو,
أمني مع أحسن شركة تشوفيها مناسبة بالنسبة لك, وأقري كل الشروط الخاصة بشركات التأمين من ناحية نسبة التحمل وأمكانية دفع مصاريف الأصلاح والكلام دا.

[kiapicanto2014]

شكراااااااااااااااااااااااااااااااااااااااااا ليكم بجد كلكم يا جماعة و الله طمنتونى :)

الواحد كان قلقان من قصة السواقة دى لانى حاولت اكتر من مرة ... بس اخر مرة حاولت فيها (كانت على سيارة فيات مانيوال و تقييييلة ) المدرب بتاعى قالى انتى كدة كويسة بس ناقص تتعلمى تركنى ..... و بعدين وقفت الموضوع كااااااااااام شهر لحد ما قررت انى اضع حد للمهزلة دى هههههههههه و انى لازم اسوق !! فقررت انى ادفع كل اللى معايا فى عربية زيرو علشان اسوقها ، ما هو ما ينفعش ادفع كل دة فى عربية و فى الآخر ما اسوقش :( .... بس انا مشيت بالمانيوال فى الشارع قبل كدة و كان جنبى حد ... دلوقتى قررت انى خلاااااااااااص هجيب بس حد انزل معاه مرتين على العربية إن شاء الله و بعدين هاخدها لوحدى بس مثلا يوم سبت الصبح و مشوار يكون قصير ..

[kiapicanto2014]

مبروك عليكي اولا العربية الجديدة

ثانيا برافو عليكي انك اشتريتي اتوماتيك لأن المانيوال ده بقى اختيار فاشل

انتي كده قطعتي تقريبا كل نص المشوار في السواقة يفضلك بس حاجتين انك تعرفي ابعاد العربية ودي سهلة لان عربيتك صغيرة و تتعلمي تركني و دي بردو سهلة علشان بردو عربيتك صغيرة

بالتوفيق

ربنا يكرمك على تشجيعك يا رب

أنا فعلا ركزت و عصرت فى مخى و قلت لنفسى يا ترى يا هالترى .. هو ايه مشكلتى فى السواقة ؟؟

لقيتهم بالترتيب كدة: 1- الركنة 2- ساعات (مش كتير يعنى) بتلخبط من الفتيس و خصوصا مع دوران العربية و بعدين ارجع تانى على سرعتى .. هو فى الحقيقة انا الحمد لله كنت بطلت اتلخبط .. بس الموضوع بيبقى تقيل على نفسى كل ما اقرب من ملف و اقعد اراجع فى مخى هعمل ايه !!! هههه 3- المرايات (نظرا لانى قصيرة قليلا مش بعرف اوى اضبط المرايا اليمين ... بس بستعيض عنها بالمرايا الأمامية

الركنة .. قلت احلها بانى اجيب عربية صغيرة ... تتركن فى اى خندق !
الفتيس ... اجيبها اتوماتيك
المرايات بقى ... مش فارقة !!

[Ahmed Amin]

المرايات الجانبية أهم حاجة تخليكي متخبطيش العربية وأنتي بتركني, وكمان وانتي ماشسة في وسط البلد عشان متخبطيش اللي جنب لو حبيتي تحودي او تدخلي ف شارع او حد عدي من جنبك بسرعه تشوفيه.

ولازم خديها قاعدة حتي دا في كراسة تعليم السواقة بتاع المرور,, تظبي المرايات قبل ما تتحركي بالعربية حتي لو كنتي أيه..

[kiapicanto2014]

الاوتو اسهل كتير من المانيوال....والبيكانتو اختيار جميل....بالتوفيق

الاوتوماتيك اختيار موفق في بلدنا الجميلة دي و البيكانتو عربية ممتازة ليكي و ربنا يديكي خيرها و يكفيكي شرها

ربنا يطمنك شكرا جزيلاااااااااااا