برجاء شرح تفصيلى لمحتويات كبوت العربية الحديثة والاعطال الشائعة

[ofaashash]

السلام عليكم ورحمة الله وبركاتة
بدون ان اطيل عليكم انا كان معايا عربية 127 وبفضل المنتدى وأصدقاء لى أصبحت خبير في صيانتها وعارف فيها كل كبيرة وصغيرة .... دلوقتى معايا اوبترا 2008 اوتوماتيك ... لما بفتح الكبوت بتخض مش عارف اى حاجة ولا اسمها ولا فائدتها وبالتالي مش ح اعرف اشخص اى عطل يحدث لها او مكانه ...
برجاء شرح تفصيلى لمحتويات كبوت العربية الحديثة والاعطال الشائعة
شاكر لكم سعة صدركم
م.اشرف



تم تعديل العنوان
م ب 3

[ofaashash]

ايه مفيش مفيش ولا ايه

[borio1704]

أصل حضرتك طالب حاجات تفصيلية والموضوع مش محتاج تفصيل قوي كده.


عموما.. حضرتك نقلت نقلة قوية جدا بين الـ127 والأوبترا.... يعني بنتكلم في حوالي 40 سنة فرق في التكنولوجيا

كل شيء تقريبا اتغير... بس الفكرة الأساسية واحدة

يعني لازم تلاقي ماستر الفرامل موجود في الاتنين.. بس زايد عليه وحدة abs في الأوبترا

الكاربيراتير بتاع زمان مبقاش موجود ودلوقتي بداله بقى فيه وحدة الإنجكشن الكبيرة بالمانيفولد الكبير بتاعها.

فاتر الهوا مبقاش شكله دائري وعامل زي العمة اللي فوق الكاربيراتير... وبقى محطوط على جنب في علبة بلاستيك كبيرة.

طبعا.. الـ127 ماكانش فيها باور ولا تكييف... والحاجات دي كلها موجودة في كل العربيات الحديثة دلوقتي... وكلهم راكبين على السير الرئيسي

الكمبريسور هتلاقي شكله سبه الدينامو شوية بس مقفول تماما... وطالع منه خراطيم رايحة ناحية الكابينة.

إنما الباور غالبا هتلاقيه علبة صغيرة وطالع منها خراطيم نازلة للاسكاترا تحت.

الرادياتير زمان كان كله له غطا وجنبه قربة... دلوقني أحيانا بتلاقي الرادياتير مالوش غطا (بالذات في العربيات اللي فيها تكنولوجيا ألماني - زي الأوبترا) والقربة هي اللي بتزود منها المية وهي اللي فيها الضغط.

آه.. عندك كمان علبة الفيوزات ... ومقاس زيت الأوتوماتيك..


وإيه تاني؟؟؟


بس .. ده اللي أنا فاكره دلوقتي :)


ولو عندك صورة أو حاجة معينة مش عارفها ممكن تصورهالنا ونقولك هي إيه.



...