اريد حلاً...السواقة بالنسبة لى عذاب

[samar abdo]

الزملاء الاعزاء اريد الاستشارة فى هذه المشكلة
بإختصار السيارة عندى من اربعة شهور تقريبا اتعلمت فى مدرسة ثم على عربيتى ولم استعجل الخروج لوحدى دلوقتى انا اتحسنت كتير ذهبت بيها مشاوير بعيدة لكن مش لوحدى دايما عايزة حد جنبى و ده غير متاح كل واحد مشغول بحاله ....خرجت لوحدى مرتين فقط الصبح بدرى و كله تمام ...طيب المشكلة انى لما اقرر انى انزل بيها الشغل اتخيل زحمة الطريق و خصوصا بعد دخول المدارس احس انى رايحة اتعذب و بكون مهمومة جدا
اليوم بقى رحت الجراج و رفعت الغطا و بعدين افتكرت الزحمة اللى فى الشارع رغم انى نازلة 7 صباحا رحت مغطية السيارة و ركبت مواصلات ........اعمل ايه و ازاى اتغلب على انزعاجى الشديد لما افكر انى رايحة اسوق السيارة

[J A G U A R]

لو بتسوقى كويس ايه اللى هايمنعك من النزول ..
ممكن فى الاول حد يركب معاكى لغايه متاخدى ثقه اكتر وتمشى بعد كده لواحدك لو مقلقه من النزول لواحدك

وهاتتعذبى من ايه بالظبط ..
العربيه هاتبطل منك مثلا ولا ايه ..

[samar abdo]

لو بتسوقى كويس ايه اللى هايمنعك من النزول ..
ممكن فى الاول حد يركب معاكى لغايه متاخدى ثقه اكتر وتمشى بعد كده لواحدك لو مقلقه من النزول لواحدك

وهاتتعذبى من ايه بالظبط ..
العربيه هاتبطل منك مثلا ولا ايه ..

تعليقات اصحاب السيارات الاخرى ..احيانا بتبقى سخيفة جدا..دخولى شارع جانبى اتجاهين بعد وقت حتى اجد فرصة الدخول بدون ما يكون فيه مقابل واستعجال السيارات اللى ورايا ....ناس ماشية براحتها فى وسط الشارع ......الزحمة المستمرة ليل نهار ....امشى و اقف على فترات متقاربة جدا .....باحس بمعاناة رغم انى باوصل مكانى عادى ...يعنى من الاخر لسه بأفضل ركوب المواصلات خاصة فى الزحمة دى

[sfahmy6]

لو عربيتك اوتوماتيك ............. ممكن يكون الموضوع سهل شويه

مش هيا كده برضه

[samar abdo]

لأ منوال حضرتك

[J A G U A R]

تعليقات اصحاب السيارات الاخرى ..احيانا بتبقى سخيفة جدا..دخولى شارع جانبى اتجاهين بعد وقت حتى اجد فرصة الدخول بدون ما يكون فيه مقابل واستعجال السيارات اللى ورايا ....ناس ماشية براحتها فى وسط الشارع ......الزحمة المستمرة ليل نهار ....امشى و اقف على فترات متقاربة جدا .....باحس بمعاناة رغم انى باوصل مكانى عادى ...يعنى من الاخر لسه بأفضل ركوب المواصلات خاصة فى الزحمة دى

دي كلها حاجات طبيعيه عندنا ولازم تتأقلمى معاها
جمدى قلبك وخليكى ملتزمه واقفلى الشباك وملكيش دعوه بكلام الناس طالما مش غلطانه

[hesham fawzy h]

دي كلها حاجات طبيعيه عندنا ولازم تتأقلمى معاها
جمدى قلبك وخليكى ملتزمه واقفلى الشباك وملكيش دعوه بكلام الناس طالما مش غلطانه

فعلا اقفلى الشباك و ملكيش دعوة بحد

و انزلى بالظبط 3 مرات لوحدك و بعديها ان شاء الله هيكون عندك ثقة كبيرة فى نفسك .. و هتفتحى الشباك كمان :)

[egyption2012]

مرحلة ومعظمنا مر بيها
في البداية تتعودين على القيادة وبجانبك شخص
وتتملكك رهبة من القيادة منفردة
بعد ذلك تتملكك رهبة من القيادة في بعض الاوقات
او رهبة من القيادة في بعض الاماكن
ورهبة من الوقوع في موقف تخافين فيه من عدم القدرة غلى التصرف
رهبة الدخول في شوارع جديدة او شوارع ضيقة

ومع الوقت تختفي كل هذه الأعراض إن شاء الله
الأهم عدم التعجل

تراجعك عن القيادة بعد ازالة غطاء السيارة قرار موفق جدا جدا في نظري
لان تعرضك لموقف بايخ سيجعلك تكرهين القيادة لأسابيع
ولذلك في هذه المرحلة حاولي التقليل من المشاوير بالسيارة
وفي الوقت نفسه لا تبتعدي عن القيادة لأكثر من ثلاثة أيام

خلال أشهر قليلة إن شاء الله ستتعودين على القيادة
ثم بعد ذلك ستكون مشكلتك في الشعور بالإرهاق فقط من كثرة القيادة

[egyption2012]

نسيت انصحك بموضوع تشغيل الانتظار وحضرتك ماشية
عشان الناس تاخد بالها ومتركزش معاكي
وعشان لو مشيتي بطئ

[yasser100]

استخدمى مواصلات احسن طالما متاحه . بدل حرقة الدم الصبح و اخر النهار . حتى و لو بتسوقى كوبس .

انا باسوق بقالى 24 سنه . و بارفض تماما اروح الشغل بعربيتى برغم عرضهم عليه بدل البنزين و المصاريف و بافضل توفير وسيله انتقال من العمل بالسواق .

مش باسوق عربيتى الا فى نهاية الاسبوع فقط او مشوار مهم بعد العمل .

حرقة دم و قرف ليس لها داعى .

[Mecha]

يبقي حضرتك متعلمتيش مهارات سواقة الزحام congested traffic driving skills
ودا جزء اساسي في التعليم قيادة في مناطق 50 كم/س
فلازم حد جنبك يعلمك , والا هيحصلك panic وتتورطي في حادثة

[mesaharaty]

استخدمى مواصلات احسن طالما متاحه . بدل حرقة الدم الصبح و اخر النهار . حتى و لو بتسوقى كوبس .

انا باسوق بقالى 24 سنه . و بارفض تماما اروح الشغل بعربيتى برغم عرضهم عليه بدل البنزين و المصاريف و بافضل توفير وسيله انتقال من العمل بالسواق .

مش باسوق عربيتى الا فى نهاية الاسبوع فقط او مشوار مهم بعد العمل .

حرقة دم و قرف ليس لها داعى .

[samar abdo]

يبقي حضرتك متعلمتيش مهارات سواقة الزحام congested traffic driving skills
ودا جزء اساسي في التعليم قيادة في مناطق 50 كم/س
فلازم حد جنبك يعلمك , والا هيحصلك panic وتتورطي في حادثة

اشكرك لكن انا تقريبا سوقت فى مناطق هادية حوالى ست مرات بعد كده نزلت فى الزحمة حوالى عشر مرات مع اخى و كان صبور عليا و علمنى حاجات كتير و اصبحت اتحكم فى سرعة السيارة كويس لكن مشكلتى الانزعاج من النزول لوحدى تماماً..و القلق من اى موقف مفاجئ ......عموما اشكر مشاركتكم و انا فعلا نزلت امس و كان الطريق زحمة رايح و جاى لكن الحمدلله وصلت بالسلامة و لم يحدث مشكلة ...تقريبا شوية ثقة بالنفس و ابقى افضل ان شاء الله

[eng_amg]

كل شيء بالتعود ...
أول متعلمت السواقة كان عندي مشكلة في أبعاد السيارة. وكنت كل مطلع من الجراج احك الجنب. لدرجة اني اتعقدت...
لدرجة اني كنت لما اصحى من النوم عشان اروح الشغل كنت أفكر كل يوم أخرج بالعربية ولا اركب مواصلات... :)

[ahmed p880]

ده الموضوع ده طلع كبير
انتو ماذمين الموضوع قوى ليه كده
في اسوا الظروف ايه اللى ممكن يحصل
الموضوع عايز تعود ده بالنسبة للناس العادين
لكن مشكلتك من الواضح انها نفسية اكبر منها قله خبرة
وانتى نازلة الصبح حطى فى دماغك انك محترفة قيادة وايه يعنى لو خبط حد ولا حكيت العربية (لا قدر الله يعنى)
ومن الواضح كمان ان العربية لسه جديدة ربنا يبارك فيها لما تروحى صيانه فى التوكيل او بره حتى ممكن تطلبي يعلى الدبرياج ممكن يساعدك شوية
ومحدش يزعل من طريقة الكلام مش قصدى اقل من حد او اتريق على حد انا قصدى خد الموضوع ببساطه
وموضوع المواصلات انسية انت جايبه العربية ليه استمتعى بيها انزلى حالا لفي بيها بدون هدف امشي فى الشارع وخشي فى زحمه وانتى فاضيه ضيعى ساعه واتنين