تجربتي في دورة تعليم السواقة التابعة للادارة العامة للمرور

[FT swift]

بسم الله الرحمن الرحيم

الموضوع ده اثار اهتمامي جدا اني هتعلم في حاجة تابعة لادارة المرور وهيسهلولي الترخيص وما الي ذلك
الحقيقة ان كل دي اوهاااااااااام والموضوع عبارة عن نصب في نصب
من اول متدفع الفلوس لحد متخلص واموضوع كلاتي
اولا:
(1) تدفع 407 جنيه في المكتب التابع للادارة العامة للمرور ويحدد معاك معاد عشان تيجي تستلم جدول الدورة
(2) تروح في الميعاد المحدد عشان تستلم الجدول ويشرحلك ايه اللي هيحصل بالظبط وهو ان انت بيكون ليك 6 حصص 3 حصص بيكونوا لمدة 3 ساعات و 3 حصص بيكونوا لمدة ساعتين يعني اجمالي 15 ساعة.
(3) هتروح اول حصه كما هو مقرر في مكان التدريب وتلبس المقلب الاول ان المدرب مش هتلاقيه اما هيجي متاخر لدرجة انك هتزهأ وتمشي او مش هيجي وتكلموا ويقولك معلش اصلي جالي ظروف وعلي فكرة هم اسلوبهم زي الزفت في الكلام
(4) هتروح تاني حصة وبردوا مش هتلاقيه تكلموا يقولك ان العربيه بايظه وبيصلحها ولما تقوله الدورة كده هتروح عليا يقولك روح اشتكي للمشرف.
(5) تكلم المشرف تلاقيه اصلا سواق ميكروباص ويقولك معلش انا هعلمه الادب تعالي المرة الجايه وانا هظبطهولك.
(6) تروح الميعاد ال 3 وبردوا مش هتلاقيه بس هتزهأ ودمك هيغلي فتكلم المشرف تلاقي تليفونه مغلق تقوم تفتكر رقم المكان اللي انت دفعت فيه الفلوس وتكلمه يثبتك طبعا بالكلام ويقولك روح لاستاذ باسم في المحافظه واشتيكيله وهو هيجيبلك حقك وفجأه تلاقي تليفون المشرف اتفتح وتتفاجيء انه بيكون موجود في مكان التدريب.
(7) هتقابله وتشتكيله والشكوي لغير الله مذله (اه والله) وهو اصلا ولا كأنه سامعك ويقولك طب استني وانا هظبطك
(8) هتلاقي 2 او تلاته في نفس اليوم معاك واقفين بيزعقوا مع المشرف لو ركزت في كلامهم هتلاقيهم عندهم نفس المشكله.

ثانيا :
(1) هيجيبلك سواق نص نقل ويقولك الاستاذ ده هيكون معاك بدل التاني تقوله هو التعليم علي نقل !!!!!!!!!! يقولك اااااااه الملاكي للحريم بس انما الرجاله علي نص نقل (واخدلي بالك انت .. )
(2) المهم هتظبط مع الراجل الجديد ده معاد جديد علي حسب معاده هو ولو مش عاجبك استني للدوره اللي بعدها
(3) هتروح اول حصه وتتفاجيء ان ال3 ساعات هيبقوا نص ساعه ويقلبك لان هو كل ساعة بيكون في واحد فلو حتي عملت عبيط هيقولك يلا عشان زميلك جه
(4) واللي هتتعلمه في اول حصة مش هيزيد عليه حاجه لحد الحصة السادسة
(5) ولما تسأله عن بعض المعلومات في السواقه علي سبيل المثال عي العربيه اللي فيها باور بتفرق كتير في السواقه عن اللي مافيهاش هيقولك مافيش فرق وان ابعاد العربيه هتفرق معايه وانا في الامتحان هيقولك السواقه واحده مفيش حاجه اسمها ابعاد (برافووووو )
(6) غي الحصة الخامسه هيقولك متنساش النفحات وانت جاي المرة الجايه.
(7) في الحصة السادسة والاخيرة هيحس انك مش جايب النفحات (اللي هو الاوبيج ) وهيكون مصيرك انك متعملش حاجه جديده وتتقلب كالعاده.

بعض الملاحظات :

عشان الواحد يكون حقاني بس انا كنت بروح الاقي بنات سايقه عربيات ملاكي فعلا الراجل مكذبش

وكنت بروح الاقي البنات سايقين واخلص وهم لسه مخلصوش يعني بيخدوا وقت اكتر من الرجاله

وبردوا اتعرفت علي واحد هناك شغال في الرئاسه وعرفت انهم بيعملولوا حساب بس بردوا كان علي نص نقل ( البنات مسيطره بردوا )

اسف لو كنت طولت بس بجد لو حد عايز نصيحتي بلاااااااااااااااش تروحل للعصابه دي برجلك وشكرا

[amr011111]

انت غالبا بتروح تدفع الفلوس علشان لما تدخل الامتحان تاخد الرخصه بسهوله وغالبا بيطنشوا امتحان الاشارات وكمان لما بتمتحن عملى بدل ما ترجع بين الاقماع بترجع عدل يعنى بتبقى الامور سهله

[taaaaaaaaaa7]

انا فعلا ده اللي حصل معايا بالنص بس من سبع سنين ، الميزة انهم بيظبطوا الدنيا في الاشارات لما تدخل الحاسب الالي ، وفي اختبار السواقة ليك يوم محدد انت وكل اللي معاك في مدرسة السواقة وبتبقي العملية زبادي خلاط وبتظرف اللي راكب جنبك خمسيناية وهو حيسوق مكانك وكل اللي عليك انك تحرك الطارة بس ( علي ايامي كانت 20 جنيه ) مش عارف الدنيا اختلفت ولا ايه بس اعتقد الوضع كما هو وربنا يوفق الجميع وييسر الحال

[غزلة]

احسن حاجة تاخد الرخصة وبعدين تبتدي مع مركز تدريب خارجي

[Mandooox]

عن تجربة مع المدرسة التابعة لادارة مرور طنطا :

- اجمالى الدورة شهر
- فى البداية تم الحجز ودفع مبلغ 350 جنيه وادونى ميعاد بعدها بيومين عشان اروح اشوف المعلم ( المدرب ) اللى هبقى معاه
- لما روحت اليوم ده دورت على اسمى فى الكشف ولقيته مع المدرب اديته صورة شخصية و نموذج امتحان الاشارات اللى اشتريته يوم حجز الدورة وكتبلى على ايصال الدفع اللى معايا ميعادين, الاول امتحان الاشارات كمان اسبوع والتانى الاختبار العملى اخر الشهر
- روحت امتحان الاشارات الصبح بدرى حوالى الساعة ٧ ونص والراجل اللى هناك هوا اللى ظبط كل حاجة على الكمبيوتر يعنى هوا اللى حل الامتحان ( مع العلم انى كنت مذاكر اشارات ) بس عادى يعنى هقوله لا متحلش :)
- نجحت اشارات سألت ناس معايا قالولى تيجى بقى ميعاد الاختبار العملى الساعة ٩ اخر الشهر, قولتلهم فيه تدريب يعنى ( مع العلم ان كنت اتعلمت سواقة قبل ما اقدم على المدرسة يعنى التدريب مش فارق معايا ) قالولى فيه بس مش هيعلموك حاجة وهتتعب معاهم فلو مش بتعرف تسوق روح اتعلم بره احسن مع اى حد وتيجى جاهز على الاختبار ) وفعلا استنيت الميعاد وروحت على الامتحان كان الميعاد ٩ بس بدأوا على ١٠ وكان حرف s بس كان جزئبن يعنى فى طابورين طابور يروح بوشه وطابور تانى يرجع بظهره على هيئة حرف s المهم انا كنت فى الطابور اللى بوشه وعديت تمام الحمد لله
- بعدها قالولى تيجى بقى اول الشهر الجديد عشان تتصور وتطلع الرخصة وكان يوم زحمة بس عدت الحمد لله والرخصة طلعت

ملاحظات :
- قبل ما اقدم فى المدرسة دخلت عشان اسأل على الامتحان على طول الظابط قالى لا لازم تقدم مدرسة حتى لو بتعرف تسوق ( عايزين فلوس يعنى من الاخر )
- اى يوم هتروح فيه سواء اختبار الاشارات او العملى حاول تروح بدرى هتخلص اسرع وتكون الدنيا رايقه
- المدرسة مش بتعلمك حاجة المدرسة ميزتها انك بتطلع الرخصة بكل سهولة من غير اى رخامه منهم لانك ببساطة دافع ولو فرضا سقطت هتفضل معاهم لحد ما تنجح وهيكون على طول اسبوع ولا حاجة ويقولك تعالى عشان تعيد الامتحان وبالتالى انت واخد مكان واحد جديد هيدفع فكده كده هتعدى حتى لو بتسوق 50%
- انا اتعلمت بره الاول مع واحد لمدة اسبوعين قبل ما اروح اقدم على المدرسة بتاعت المرور, كانت الاساسيات بالنسبة ليا تمام ومشيت جوا البلد وعلى السريع يعنى كنت بسوق بنسبة 70% كويس والحمد لله دلوقتى تمام الى حد ما ( بمشى عادى يعنى بالعربية :) )
- اجمالى التكاليف حوالى ٤١٠ لانى دفعت مبلغ اثناء تجهيز الورق قبل التصوير دمغات على شوية حاجات تبعهم كده