ياريت حد يفدنى فى المطالع

[mas_shine]

ياجماعة دلوقتى انا بسوق تمام بس المشكلة فى المطالع
يعنى لو فى مطلع والاشارة وقفت فية او كان واقف وزحمة مش بعرف أتصرف ولما بمسك الفرامل واجى أسيبها واحط رجلى على البنزين علشان طلع العربية بتكون ريحت على اللى ورايا وواللى ورايا هاتك ياكلاكسات فبطلخبت أكتر والعربية بتقف منى وبتبقى ايه فرجة

ياريت ياجماعة تفدونى أعمل اية ونظرا ان طريقى كله مطالع
والعربية جديدة وبتصعب عليا من اللى بعمله فيها فى المطالع بصراحة خايفة عليها

[HeMa_LanCeR]

حضرتك لما تشيلي رجلك من الفرامل سليها بسرعه وحطيها علي البنزين لأن من الواضح ان حضرتك بتنقليها ببطء شديد
او حل اخر بس محتاج تركيز
اول ما حضرتك تقف تشد الفرامل يد وانت طالع بقي تحط رجلك علي البنزين وتبتدي تطلع سنه سنه
وانت بتنزل الفرامل براحه لحد ما تتعود علي الموضوع ده

[hoza]

علي فكرة الموضوع مش صعب زي مانتي متخيلة
بكل بساطة لما تقفي علي مطلع ترفعي الهاندبريك ولما تكوني عايزا تتحركي تدوسي بنزين ودبرياج ولما تحسي ان العربية عايزا تتطلع تنزلي الهاند بريك
وبالتكرار حيكون الموضوع سهل جدا

[amirhamed]

ادي الاول وحط رجلك على البنزين وارفع سنه دبرياج وبعدين سيب فرمل اليد مع زيادة البنزين ورفع الدبرياج سنه سنه.

[pro_samir]

المشكلة كلها بسبب ان الموضوع محتاج حساسية فى الدبرياج
فى درجة معينة فى الدواسة هيا اللى بيبتدى عندها حركة العربية
لو حضرتك عرفتى مكان الدرجة دى بالظبط مش هيكون فى اى مشكلة

ممكن تقعدى تجربى لحد ما تعرفى مكانها وتتعودى عليها
اسندى شوية بنزين وسيبى الدبرياج لحد ما تعرفى مكان الدرجة دى بالظبط
بعد كدة هتلاقى نفسك مش لازم تسيبى الدبرياج بالراحة لأ ممكن تسيبى لحد الدرجة دى وتثبتى عندها علشان العربية متنطش منك وبعد ما العربية تتحرك سيبى باقى الدبرياج ببطء عادى طالما لسة على الأول

لما تبقى فى مطلع قدامك حاجة من اتنين
يا اما تفضلى دايسة شوية صغيرين خالص بنزين ومعلقة الدبرياج عند الدرجة اللى بيبتدى يحرك العربية عندها و هتلاقى انك ممكن تسندى العربية بحيث ولا تمشى ولا ترجع لورا
دة لو الوقفة مش هتطول يعنى ثوانى مثلا أو الطريق بيمشى ويقف

لكن لو هتقفى شوية يبقى تشدى فرامل اليد وقبل ما تنزليها تكونى جبتى الأول ودايسة شوية بنزين وجهزتى رجلك على الدبرياج علشان تبتدى تتحركى اول ما تنزلى اليد على طول

والحل الاجمل بقى انك تجيبى عربية اوتوماتيك وتشترى دماغك

[دموع الثلج]

بالظبط نفس كلام الاخوه

اوووووووووووووول شى متخافيش ولا تتوترى عشان تتحكمى وتتصرفى صح

ارفعى فرامل اليد ولما يمشى الطريق قدامك حطى الاول وكانك عادى بتمشى على ارض مستويه عادى جدا

دبرياج وبنزين تشيلى رجلك من الدبرياج خفيف وتدوسى بنزين خفيف
وايدك على فرامل اليد تنزليها سنه سنه لحد ما تلاقى لعربيه بتمشى مش بتتزحلق للخلف تنزلى فرامل اليد كامله وتوكلى على الله
معلش هى شويه تعود وهتبقى عادى معاكى

[patshi]

انا كان عندي نفس المشكله زيك كده بالظبط وانا لسه بتعلم .. و اتعلمتها لوحدي بظروفها كده بفرامل اليد و انتي علي المطلع ولوعايزه تتحركي بئا اسندي بنزين بالراحه و رجلك علي دبرياج خفيف و امشي سنه سنه و تنزلي فرامل اليد وحده وحده و تمشي بئا :>

[ahmedelzeeny]

فعلا زى ما الاخوة قالوا بفرامل اليد بس افرض فرامل اليد بايظه نعمل ليه ؟
طبعا وانت واقف فى المطلع بيبقى رجلك على الفرامل والتانيه على الدبرياج
والحل انك ترفع رجلك من على الدبرياج بالراحه لحد ما تحس ان العربيه بدأت تتهز هزة خفيفه ثبت رجلك على كده
و شيل رجلك من على الفرامل هتلاقى العربيه ثابته واطلع بعربيتك عادى
طبعا ده كله بيبقى فى وقت قصير لأن كل ده ضغط على الدبرياج
جرب الطريقه دى هتعجبك اوى و هتدعيلى

[msms_ms2001]

فعلا كلامك مظبوط انا بعمل كده على طول ولو شيلت رجلك من على الفرامل العربيه مش هترجع بيكى ابدا ولو على طريق مستوى واشاره واقفه مثلا مش لازم تدوسى بنزين ارفعى دبرياج بس سنه سنه هتلاقى العربيه سحبت معاكى

[beautiful0mind]

علي فكرة الموضوع مش صعب زي مانتي متخيلة
بكل بساطة لما تقفي علي مطلع ترفعي الهاندبريك ولما تكوني عايزا تتحركي تدوسي بنزين ودبرياج ولما تحسي ان العربية عايزا تتطلع تنزلي الهاند بريك
وبالتكرار حيكون الموضوع سهل جدا

ده الحل الامثل والاسهل ....بس تقلى رجلك شوية على البنزين عشان يكون فى عزم

[hdmrdash]

ده كان جزء من أريع أجزاء فى امتحان السواقه بره
كان كوبرى طالع حاد ونازل حاد
نقف غلى خط ابيض واحنا طالعين ونشد فرامل يد والعجله على خط ابيض وبعدين يقولك أطلع من غير ما العربيه ترجع عن الخط البيض أو تطلع امريكانى
والعكس فى النزول كان بيبقى مارشدير على المنزل
فكرتينى باللذى مضى

[essa]

خليكى دايسه فرامل
ولما الاشارة تفتح
هاتى الاول وانتى دايسه بردو على الفرامل
وابتدى شيلى رجلك واحده واحده من على الدبرياج لحد ماتحسى ان العربيه بتقولك انا عايزه امشى
تقومى انتى فى اللحظه دى تشيلى رجلك من على الفرامل ,, والموضوع ده هيتكرر كتير علشان طبعا واضح ان المطلع طويل وزحمه وربنا معاكى