الوقوف و الحركه في المطالع

[fady911x]

انا عندي مشكله اني اقف و اطلع في مطلع كبري واقف
يعني مثلا المطلع زحمه و طلعت فيه شويه و بعدين اضطريت اقف و دوست فرامل عشان اللي قدامي
لو شيلت رجلي عن الفرامل هرجع علي اللي ورا
و مش هلحق ادوس بنزين بسرعه كفايه
اصحاب ليا قلولي اوعي تدوس فرامل انت تكلبش العربيه في الارض بانك توازن الدبرياج و البنزين
و في ناس تانيه قلتلي مش هتعرف تعملها عشان انت لسه جديد فاستخدم فرامل اليد و خفها بشويش لما تحب تتحرك

في سؤال اضافي برضه
انا حصل معايا في الأول لما كنت احب بس انزل اغير ركنه العربيه لقدام شويه انسي فرامل اليد مرفوعه و مع ذلك الاقي العربيه بتتحرك عادي هل ده معناه انه فرامل اليد ضعيفه؟ و ازاي اتأكد من قوه الفرامل عامه سواء يد او رجل من غير مخاطره عشان انا لسه بتعلم

[ottana]

هو فى طريقة تانية بدل استخدام فرامل اليد
و هى انك لما بتكون واقف فى المطالع بتكون دايس دبرياج للاخر مع الفرامل و لما تبدى تتحرك تانى شيل رجلك سنة سنة من على الدبرياج من غير ما تشيل رجلك من على الفرامل لغاية ما تحس برجة فى العربية و ان العربية عاوزة تمشى و هنا تشيل رجلك من على الفرامل و العربية ما عمرها ما هترجع لورا ابدا و تمشى عادى

[ramylanos]

هو فى طريقة تانية بدل استخدام فرامل اليد
و هى انك لما بتكون واقف فى المطالع بتكون دايس دبرياج للاخر مع الفرامل و لما تبدى تتحرك تانى شيل رجلك سنة سنة من على الدبرياج من غير ما تشيل رجلك من على الفرامل لغاية ما تحس برجة فى العربية و ان العربية عاوزة تمشى و هنا تشيل رجلك من على الفرامل و العربية ما عمرها ما هترجع لورا ابدا و تمشى عادى

بس لو مطلع شديد العربيه هتبطل

[Abdo_Eldesokey]

الكلام الي اتقلك صح ...

في الأول استخدم فرامل اليد لحد ما تتعود على العربية وابتدي اوزنها بالدبرياج والبنزين

وفيه فكرة جميلة إنك تيجي في يوم بالليل الدنيا تكون فاضية وشوف أي مطلع جنب البيت ، وروح اتدرب عليه

حاول توقف العربية عليه باستخدام الدبرياج والبنزين ، في الأول الموضوع متعب لكن بعد كده هتعمله بكل سهولة

[SAMER_ENGINES]

كل الأراء السابقة تعتبر صح و اللي كتبه Ottana صح و انا شخصيا بعمل كدة بس رأيي ده هيكون صعب عليك دلوقتي.
و أحسن حل هو فرامل اليد حالياً حتي تتعود علي السيارة.

و بالنسبة للتأكد من فرامل اليد أو الرجل فإليك الإجابة من موضوعي "إسال و إطمن علي الفرامل" في "ورشة نايل موتورز"

كيف أتأكد من جودة الفرامل؟؟

1- يكون مشوارها مش طويل لتحت.

2- (تجربة الفرامل العادية) تاخد سرعة بالعربية و تفرمل فجائي و لو صرخ العجل و توقف العجل عن الدوران يبقي الفرامل جيدة.

3- ألا تكون الفرامل ناشفة زيادة عن اللزوم يعني مشوارها قصير زيادة عن اللزوم و اول ما تدوس العربية تكلبش في الأرض.

4- تكون الفرامل مش محجرة لما تدوس تحس انك بتدوس علي طوبة و مع ذلك العربية مش بتفرمل و لا تتوقف.

5- عدم وجود حدفة يمين او يسار.

6- أن تكون الفرامل مستقرة و استقرار الفرامل بمعني الا تتوقف في مرة و مرة الفرامل تهرب.

7- عدم توقف عجلة واحدة فقط و الباقي لا و عدم توقف جميع العجل و عجلة واحدة لا أو ان تتوقف السيارة من ناحية الشمال فقط او اليمين فقط او من الامام فقط او الخلف فقط.

* و للتأكد من فرامل اليد نضع السيارة علي السرعة الاولي و نشد فرامل اليد و نقوم بالتحرك بالسيارة بصورة عادية و كأننا بنتحرك بالسيارة بشكل عادي لو امتنعت السيارة عن التحرك أو المحرك بطل تكون الفرامل جيدة اما لو تحكرت السيارة و لو بثقل يكون هناك عيب, مع مراعاة انك تشدها بطريقة جيدة فلو شديت الفرامل سنتين او تلاتة فقط فلن توقف السيارة كما ينبغي فيجب عليك شدها جيدا ليس بعنف زيادة عن اللزوم و لا بخفة زيادة عن اللزوم.

و لأي إستفسار بخصوص الفرامل فأنا في الخدمة و إليك الرابط الخاص بالموضوع:-

http://www.nilemotors.net/Nile/showthread.php?t=50685

و تقبل تحياتي.

[Mostafa Hessen]

Car_Lover

100000000000000%

[dr_timo]

بص انا شخصيا الحكاية دي كانت مشكلة ليا وانا لسة مطلعتش الرخصة وبتعلم جديد وعن نفسي برفع فرامل اليد ولانها الحمد لله ضعيفة مبتخلنيش ارجع لورا بس ممكن امشي لقدام وكدة قشطة اوي ومش هصلحها عشان لو صلحتها هتقفش ولا هترجع ورا ولا لقدام وهتبقي حوسة لان الحوسة دي حصلت معايا فعلا وانا بموون والبنزينة ليها مطلع بقي وانا وقفت عليه ودايس فرامل ودبرياج اجي اسسيب فرامل عشان ادوس بنزين ارجع علي اللي ورايا اخبط بس الحمد لله طلع راجل طيب مع اني لو منه كنت لططشطلي لما مبعرفش اسوق اية اللي مخرجني المهم واحد جالي قالي دوس فرامل ودبرياج ولما تيجي تتحرك دوس بنزين قولتله دة كدة تلت رجول ياعم الحج وانا عندي اتنين بس فقاللي علي حكاية فرامل اليد والحمد لله عدت علي خير

[Rafraf]

انا لو فى اى مطلع بوقف العربية بالبنزين

ازود و اسيبها متعلقه فى النص كدا :) لاهى ماشيه و لا واقفه

دا احسن حل لانى جربت فرمل اليد و قطعت منى!

[fadynabil]

أعتقد إن الموضوع هييجي بالتعود .. وهو مش صعب خالص

[nader1117]

انا لى سؤال هل استعمال الفرامل و الدبرياج
او الفرامل والبنزيت
لايؤثران على الاسطوانة والدسك ويقلل عمرهما
يعنى مش ممكن مع التكرار الكتير بنزين ودبرياج يلحس الاسطوانة

[محمد فريد]

بص انا والدى بيعمل الحكاية دى كتير وهو واقف على كوبرى الثلاثينى فى الاشارة انه يدوس سنة بنزين ويسيب سنه دبرياج بقالنا سنتين اهو ومحصلش حاجة وانا بعرف اعملها بس مبرضاش لان الاشارة بتطول كتير فبشد الهاند وخلاص

[DAHB115]

بص انا والدى بيعمل الحكاية دى كتير وهو واقف على كوبرى الثلاثينى فى الاشارة انه يدوس سنة بنزين ويسيب سنه دبرياج بقالنا سنتين اهو ومحصلش حاجة وانا بعرف اعملها بس مبرضاش لان الاشارة بتطول كتير فبشد الهاند وخلاص

يعني مدوس فرامل خالص طب ازاى انا جديده في السواقه بردوه وساعات العربية يتعطل مني الموضوع دا صعب اوى

[dr_timo]

يعني مدوس فرامل خالص طب ازاى انا جديده في السواقه بردوه وساعات العربية يتعطل مني الموضوع دا صعب اوى

لا الجديد في السواقة افضله فرامل اليد ولما ييجي يطلع يدو س عادي بنزين ودرياج ويقوم رافع فرامل اليد وهوة رجله عليهم وخلاص بيطلع لحد ميتعود وبعد كدة مش هتفرق معاه بفرامل اليد ولا بالفرامل العدية ولا بالبنزين والدبرياج

[ahmed322]

ياجماعه موضوع البنزين مع الدبرياج دا كويس بس ليه تأثر عسكى على الاسطوانه والديسك يعنى حاولوا مش تعملوا الموضوع دا كتير لانها مضره بس مش بتبان اللى بعد مده

[محمد فريد]

ياجماعه موضوع البنزين مع الدبرياج دا كويس بس ليه تأثر عسكى على الاسطوانه والديسك يعنى حاولوا مش تعملوا الموضوع دا كتير لانها مضره بس مش بتبان اللى بعد مده

تمام بالنسبة للجديد لأن الجديد شديد
لكن اعزرنى لو مثلا راكب عربية قديمة وجيت تطلع ولقيت عربيتك طفت وريحت على اللى وراك او حتى لحقت نفسك مش هتسلم من الناس اللى وراك وكلاكسات وممكن شتايم وأعزرنى احنا بقينا فى زمن وحش الناس كلها مش طايقة بعضها