الفرق بين الجر الامامى والخلفى والسيارات المتوفره خلفى

[ashrafloutfy]

ارجو افادتى وايهما افضل والسيارات المتوفره جر خلفى الحديثه من الاوبل والفولكس فاجن والفيات .
مع خالص الشكر ،[/b]

[Ahmed Hassan]

لكل مميزات و استخدامات. بالنسبه للجزء التاني من سؤالك مفييييششششششششششششششششششششششششششششش الاوبل و الفولكس و الفيات كله سحب امامي لو عايز دفع خلفي حوش شويه كمان (20 سنه كده) و هات مرسيدس او بي ام :mrgreen:

[sab3aawy]

أولا بالنسبة لسؤالك عن السيارات الحديثة من الأوبل والفولكس فاجن والفيات بنظام الدفع الخلفى فالإجابة تتلخص فى كلمة واحدة: مافيش ، اما لو كنت عايز تعرف المزيد عن الدفع الخلفى والجر الامامى فإليك بعض المعلومات

الإختلافات بين الجر الامامى والدفع الخلفى كثيرة جدا لأنها تنبع من تصميم السيارة نفسه فسيارة الدفع الخلفى مبنية على تصميم بعيد تماما عن مثيلتها ذات الجر الامامى وقد لا تتشابهان سوى فى الشكل الخارجى (مثال: الشاهين ذات الدفع الخلفى والريجاتا ذات الجر الامامى، برغم تشابه الشكل الخارجى لكن لا علاقة لهذة بتلك نهائيا من وجهة نظر التصميم)

عموما فإن الدفع الخلفى اقدم تاريخيا وهو الشكل الأساسى وتقريبا الوحيد الذى اعتمدته كل السيارات المصنعة على كوكب الأرض فى الثلاثة أرباع الاولى للقرن العشرين حتى بدأت سيارات الجر الامامى تزاحمها على استحياء على قطعة من السوق بداية من السيارة مينى كوبر(القديمة المصنعة فى ستينات القرن العشرين وليس النسخة الحديثة التى نعرفها حاليا) التى كانت اول سيارة ناجحة بنظام الجر الامامى (1964) ثم الفيات 128 (1969)التى كانت اول سيارة تستخدم تصميم عمودين الجر الغير متساويين فى الطول الذى اصبح هو تصميم كل سيارات الركوب حاليا ثم الفولكس فاجن جولف(1975) التى دفعت فكرة الجر الأمامى الى ذروة النجاح لتبدأ كل شركات العالم فى تقديم سياراتها ذات الجر الأمامى فنرى البيجو 205 و 305 ثم الرينو 5 من فرنسا وفى بدايات الثمانينات لحق بهم اليابانيون حيث حولت تويوتا موديلها الشهير كورولا الى الجر الأمامى وكذلك فعلت مازدا بموديل ال323 ومثلها فعلت داتسون(التى صارت نيسان لاحقا) بموديل ال120 (الذى صار صنى لاحقا) وذلك فى نفس الوقت الذى كانت فيات فيه توقف الموديل 131 ذو الجر الخلفى ليحل محله موديل الريجاتا ذو الجر الأمامى والتى جاءت كنموذج مكبر ومحسن من ال128 والريتمو الناجحتين وكانت فولكس فاجن تقدم العديد من الموديلات المبنية على الجر الأمامى مثل الفوكس (بولو لاحقا) والييتا ،وبالمثل تفعل رينو وستروين ، واخيرا تدخل المرسيدس العريقة حلبة الجر الأمامى عندما تقوم فى نهاية الثمانينات بتحويل الفئة سى الى الجر الأمامى لتصبح فلسفة الثمانينات من القرن الماضى ان السيارة الصغيرة والمتوسطة هى سيارة دفع امامى فى حين ان السيارة الكبيرة هى سيارة دفع خلفى(كانت سيارات الدفع الخلفى الفخمة مثل البيجو 505 والفيات ارجنتا والمرسيدس E والتويوتا كراسيدا والبى إم دبليو تملأ السمع والبصر آنذاك)

لكن عندما وصلنا الى حقبة التسعينات بدا واضحا ان كل موديل دفع خلفى يتوقف انتاجه يتم احلاله بموديل جديد ذو جر امامى فنرى البيجو 405 ذات الجر الأمامى تأخد مكان ال505 ذات الدفع الخلفى ونرى تحول ال بى إم دبليو الفئة الثالثة الى الجر الامامى ونرى الكروما ذات الجر امامى تحل محل الأرجنتا ذات الدفع الخلفى ونرى الكامرى ذات الجر اأمامى تحل محل الكراسيدا ذات الدفع الخلفى ، وحتى الكوريون الذين كانو جديدين على الصناعة نراهم يحولون سياراتهم الهيونداى بونى(التى صارت إكسيل ثم أكسنت لاحقا) والسيارة هيونداى ستيلر (إلانترا لاحقا) الى الجر الامامى ، ونرى الروس اصحاب التصميمات التى تعود للعصر الحجرى يدخلون مجال الجر الأمامى بسيارات مثل اللادا سمارا والتافريا

حاليا ومع اقتراب نهاية العقد الاول من الألفية الجديدة فإن السيارة ذات الجر الأمامى هى الأساس وسيارة الدفع الخلفى هى استثناء ويعد على اصابع اليد الواحدة، فكل السيارات التى تراها فى الشارع هى سيارات جر امامى، ماعدا بعض السيارات المعتمدة على تصميمات قديمة جدا (مثل الشاهين المعتمدة على تصميم ال131 الذى يعود لاوئل السبعينات) واللادا (المعتمدة على تصميم الفيات 124 من ستينات القرن الماضى) والبيجو روا (المعتمدة على تصميم قديم لاحد الشركات الإنجليزية مع كل احترامى لمن يروجون لفكرة ان البيجو روا هى نفسها البيجو 405 تم تعديلها للدفع الخلفى حيث انه ناهيك عن ان هذا الكلام غير مقبول فنيا فإنه لا احد يضيع وقته لتصميم نظام دفع تخلى عنه العالم منذ ربع قرن ولن يستخدم الناس تصميمات قديمة لا تكلف قرشا مقابل الإنتفاع بحقوق المصمم) والتويوتا افانزا المعتمدة على تصميم قديم لديايهاتسو وتصنع فى دايهاتسو ماليزيا وتسوق فى مصر تحت علامة تويوتا المحبوبة

فكما ترى ان كل السيارات الجديدة هى سيارات جر امامى، اما سيارات الدفع الخلفى فهى كلها سيارات تعتمد على تصميمات قديمة جدا وتأتى من دول تصنف كدول الصف الثانى فى مجال تصنيع السيارات

عموما فإن سيارة الدفع الخلفى تتصف بالمتانة وقوة التحمل ولكن على حساب مساحة صالون وشنطة السيارة وسهولة التحكم فى السيارة، الى جانب ان قطع غيار آلات الجر الخاصة بسيارات الجر الأمامى ارخص كثير من مثيلتها ذات الجر الخلفى نظرا لعدم تعقيدها، الى جانب افتقار الكثير من سيارات الدفع الخلفى للرفاهية المتوفرة لذوات الجر الامامى بسبب قدم تصميماتها
فى حين تتصف سيارة الجر الامامى بالراحة والتساع وسهولة التحكم بها

يبقى ان نقول ان سيارات الدفع الرباعى تنتمى تصميميا لسيارات الدفع الخلفى، فسيارة الدفع الرباعى هى سيارة دفع خلفى تم اضافة وصلة ميكانيكية لها لدفع العجلات الامامية وليس العكس (يعنى فى سيارات الدفع الرباعى نجد المحرك بالطول وعمود كردان تحت الصالون وكورونا خلفية، تماما مثل سيارة الدفع الخلفى ، مع وجود عمود كردان اضافى وكورونا اضافية دفع العجلات الامامية)

فبينما ان تعديل سيارة دفع خلفى لتكون ذات دفع رباعى مسألة ليست صعبة ودليلنا على ذلك قيام الروس بتعديل تصميم السيارة لادا ذات الفع الخلفى لنظام دفع رباعى شاهدناه فى السيارة نيفا فى الثمانينات فإن سيارة الدفع الخلفى لا تصلح لأن يتم تعديلها للدفع الامامى فقط او العكس، ولذلك نرى ان تقديم الروس لسيارة جر امامى تأخر عشرة سنوات عن قيامهم بتعديل سيارة دفع خلفى الى الدفع الرباعى

[modux]

جزاك الله كل خير يا سبعاوي علي المعلومات القيمة اوي

[Ahmed Hassan]

ونرى تحول ال بى إم دبليو الفئة الثالثة الى الجر الامامى

معلومات قيمه فعلا بس اظن مفيش BMW جر امامي لليوم؟!

[Islam_galal]

ايه يا عم سبعاوي ده
موسوعه :D :D
ربنا يزيدك

[sab3aawy]

ونرى تحول ال بى إم دبليو الفئة الثالثة الى الجر الامامى

معلومات قيمه فعلا بس اظن مفيش BMW جر امامي لليوم؟!

يبدو ان لك كل الحق فى هذا، معلش انا اختلط على الامر مع الأودى والألفارميو اللى كنت لسة قارئ عنهم موضوع حديثا وكان فيه بيهم وبين البى إم مقارنة ادت الى هذا الخلط فى معلوماتى

بعتذر مرة ثانية على هذا الخطأ واحييك على دقة ملاحظتك

[Ahmed Hassan]

بعتذر مرة ثانية على هذا الخطأ واحييك على دقة ملاحظتك

تعتذر ايه بس يا خالد... ده لو انته قلت ان فيه BMW جر امامي هاصدقك و اكدب نفسي :)

[aboalm]

ان كنت عايز سيارة حديثة دفع خلفى يبقى مش لازم تحدد ماركة معينة بمعنى خلى اختياراتك اوسع شويه لانك راح تلاقى التويوتا الجديده نازل منها موديل دفع خلفى و الديهاتسو التريوس الجديده برضه دفع خلفى ودول مش غاليين زى المرسيدس و البى أم

[waleedabbas]

استاذنا الفاضل سبعاوى

اولا نشكر حضرتك على المعلومات اللى حضرتك قلتها
لكن حبيت اوضح نقطة بسيطة بس عشان مايكونش حد فاهمنى غلط بالنسبة للبيجو roa
احنا مش بنقول ان ال 405 الروا هى نفسها ال 405 القديمة لا طبعا محدش يقدر يقول كده لكن المقصود بان هى تعديل لل 405 القديمة فده حقيقى فعلا محدش يقدر ينكر اللى عينه شايفاه الروا هتفضل طول عمرها اسمها 405 لان الناس اتعودت على الشكل ده هو 405 منقدرش نقولهم ان ايران اخترعت عربية جديدة اسمها روا مالهاش اى علاقة بالبيجو وهما شايفين قدام عينيهم 405 بكل تفاصيلها حتى علامة بيجو لسه موجودة عليها
لكن المقصود ان ال 405 اتعدلت مش ان الموتور واحد او نظام التعليق والجر واحد وتم تعديله لا طبعا الموتور اكيد مختلف تماما هو فعلا زى ماحضرتك قلت موتور انجليزى اسمه هيلمان كان بينزل فى سيارات شركة رووتس الانجليزية اللى بتنتج حاليا سيارات كرايسلر فى انجلترا وبالنسبة لالات الجر والتعليق هى فعلا بتعتمد على نظام قديم شوية وان كان الموتور تم تعديله وتطويرة ليعمل بنظام الحقن الاليكترونى (وبصراحة زى ماقالوا فى توكيل بيجو الموتور ده هو احسن حاجة فى العربية وشديد على العربية دى)
لكن باقى العربية هى 405 بالكامل سواء الصالون من الداخل او الشكل الخارجى حتى الشاسية لان ده انا شايفة فعلا قدام عينى -وعندى العربيتين- اللى حصل انه مكان الشكمان اترفع عشان يستوعب عمود الكردان والكارونة اخدت مكان التنك لكن الشاسية فعلا واحد وكل اجزاء الصاج فى البادى واحدة ومقاسات واحدة.
يعنى المقصود هو تعديل العربية كلها وتحويلها من جر امامى لدفع خلفى وطبعا تغيير اللازم محدش يقدر ينكر ده مش مقصود ابدا تعديل الموتور او الات الجر.
وبالنسبة لموضوع الجر امامى او دفع خلفى فعلا لكل منهم ميزاته وعيوبه ومينفعش نفضل نظام عن الاخر -وان كنت انا بميل للجر الامامى جايز عشان اتعودت عليه - لكن عشان نقارن هنلاقى اسماء كبيرة جدا فى عالم الجر الامامى زى الفولكس والاوبل والبيجو ومعظم السيارت اليابانى تقريبا وبرضه اسماء كبيرة فى الدفع الخلفى زى مرسيدس وبى ام وجاجوار وكثير من الماركات الامريكية وكلها تنتج الدفع الخلفى حتى الان وكل مهم له احترامه يعنى منقدرش نقول ان فى نظام احسن من التانى.
بس سؤال هو فعلا مرسيدس الفئة سى جر امامى هو اللى انا متاكد منه هو فعلا البى ام عمرها مانزلت جر امامى لكن هل فعلا المرسيدس عملتها؟
وشكرا على الافادة

[hazem_khidr]

واخيرا تدخل المرسيدس العريقة حلبة الجر الأمامى عندما تقوم فى نهاية الثمانينات بتحويل الفئة سى الى الجر الأمامى

متهيالي يا باشمهندس ان اول موديل نزل دفع امامي من المرسيدس كانت الفئه A؟؟

[oshy]

الى جانب ان قطع غيار آلات الجر الخاصة بسيارات الجر الأمامى ارخص كثير من مثيلتها ذات الجر الخلفى نظرا لعدم تعقيدها، الى جانب افتقار الكثير من سيارات الدفع الخلفى للرفاهية المتوفرة لذوات الجر الامامى بسبب قدم تصميماتها
فى حين تتصف سيارة الجر الامامى بالراحة والتساع وسهولة التحكم بها

الدفع الامامي:
اجابياته:
1-انه انشط في الاندفاع من السيارات الدفع الخلفي وذلك لقرب المحرك وناقل الحرقه من قوه الدفع .
وايضاً من من القوانين الفيزيائيه ان السحب للامام أسهل من الدفع للامام ..ولهذا دائماًنجد الدفع الامامي أسرع من الخلفي .
2-اقتصادي أكثر بالوقود بحكم قرب قوه الدفع من المحرك .
سلبياته:
1-يعتمد الدفع الامامي على العكوس وهذا عيبه الكبير (والعكس) وهو:عباره عن عمود يخرج من ناقل الحركه الى الاطارات ليقوم بعمليه الدفع بمفصلين بحيث يسمحان للاطارات الاماميه بالتحرك يميناً و يساراً (في المنعطفات)وايضاً فوق وتحت في المطبات .
وعيب العكوس انها سريعه العطل وذلك لان كل مفصل موجود بالعكس تم تغطيته بربله بداخلها شحم (زيت)فمتى ما نقب سقط الشحم من الربله.
2-صعوبه التوجيه عند الانطلاق بسرعه بعكس الدفع الخلفي وذلك لانها تنطلق من الامام ومع قوة الدفع تتمايل الاطارات يميناً ويساراً.
3-غلاء الصيانه وذلك لان المحرك والعكوس وناقل الحركه كلها من الامام ولذلك يعتبر عائقاً كبير متى ما حصل شي مالانه في حاله الصيانه يحتاج الميكانيكي ال أنزال المحرك وهذا بحد ذاته مكلف .
4-عدم اتزان سيارات الدفع الامامي لان ثقل السياره كله بالامام فعندما تنعطف انعطافاً قوياً تنحرف السياره من ثقلها الامامي ويصعب عليك التوقف بها العكس الخلفي حيث يكون الوزن السياره متقارب بين الامام والخلف
5-الدفع الامامي لايستطيع تحمل الرمال والمطبات لسهوله تحطمه بعكس الخلفي


الدفع الخلفي :
ايجابياته:
ينقسم الى قسمينهما
أ- الدفرنس:وهو يكون في السيارات الامريكيه خاصه الدفع الرباعي والبيك اب والشاحنات
ب-الفريول :وهو مستخدم في اغلب السيارات الفخمه مثل مرسيدس و BMWو أودي و لكزس والانفنتي وغيرها وقص على ذلك
1-صيانته قليله مقارنه بالدفع الامامي
2-انه متزن وثابت مقارنه بالدفع الامامي وخاصه على الطرق السريعه
3-أقوىمن الدفه الامامي في التحمل واقل اعطالاًوخاصه الدفرنس حيث يستحيل ان ترى سياره نقل ليست دفرنس وكذلك أقوى من الدفع الامامي في الرمال الصحراويه
4-الفريول :هو أكثر راحه وثباتا من الدفرنس والدفع الامامي ولذلك اغلب السيارات الفخمه ان لم يكن جميعها تستخدم الفريول
سليباته:
1-أكبر عيوبه هوضعف عزم السياره مقارنه بالامامي ولكن يكاد يكون هذا العيب مدعوماً وذلك مع وجود المحركات القويه والمتطوره التي نشاهده الان.
2-ثقل السياره خاصه الدفرنس منها كسيارات النقل وsuperbanوjeepوغيرها
3-من عيوب الدفرنس انه غير مريح وغير ثابت مقارنه بالفريول .
منقووووووووووووووووول

[vooooo]

انا عندى سؤال

كلنا عارفين ان الموتور العرضى يبقى جر امامى
و الموتور الطولى يبقى جر خلفى...........

طيب حد شاف فيكوا موتور الفولكس باراتى ؟؟ هو موتور طولى بس العربيه جر امامى .. طيب ازاى؟؟؟؟؟؟؟؟؟

[معاذ الشرباصى]

طيب حد شاف فيكوا موتور الفولكس باراتى ؟؟ هو موتور طولى بس العربيه جر امامى .. طيب ازاى؟؟؟؟؟؟؟؟؟

موتور الباراتى مين قال انه طولى؟

العربية مع خالتى, و هى جر امامى, و موتورها علرضى زى اى عربية

هل حضرتك شفتها؟

[hazem_khidr]

موتور الباراتى مين قال انه طولى؟

انا شفت الفولكس فاجن جول من حوالي 6 سنين و متهيالي هيا هيا الباراتي و كان موتورها بالطول فعلا بس ما اعرفش متركب ازاي