كيفية إستخدام الجير الأتوماتيك

[walidharoun]

السلام عليكم
ياريت احد الفنيين يشرح لي ببساطة كيفية استخدام الجير الاتوماتيك لاني اول مرة استخدمه لما استلم السيارة الجديدة بعد اسبوع ان شاء الله

[abou_ruqi]

عربيتك نوعها ايه ؟
علشان نعرف هو ايزي ترونك والا تيب ترونيك والا cvt.والا اتوماتيك عادي ؟

[walidharoun]

العربية نوعها بروتون برسونا

[walidharoun]

ارجو الافادة لوسمحتم

[fahd_628]

بص يا باشا التعامل سهل جدا

انت علشان تنقل ما بين اى حاجة من دول D , P , R , N لازم تدوس فرامل يعنى علشان تنقل من N ل R لازم تدوس فرامل

لكن لو عاوز تسقط من D ل 2 او 3 مثلا يبقى مش لازم تدوس فرامل و كذالك لو عاوز ترجع لل D من 2 مثلا

ال 1 و 2 و 3 دول حيخلوك اكنك بتسقط نقلة فى المانيوال يعنى مثلا انت بتشد و قاعد تعمل فى كيك داون و لما تسيب رجلك الفتيس بينقل للنقلة الأعلى و بعدين تقوم دايس و هوة يقوم مسقط و طبعا بياخد وقت فا ساعتها لو انت السرعة الى انت ماشى عليها ممكن تمشى بيها على النقلة الثانية تقوم جايب على 2 و بكدة عمر الفتيس ما حينقل للتالت و الرابع

المهم ان 1 و 2 و 3 فى حالات الشد فقط و لو بتسوق عادى مش حتحتاجهم

الكيك داون هوة انك تدوس بنزين على الأخر ( و شيل اى دواسة او حاجة تحت الدواسة بتاعت البنزين علشان متعوقهاش و لما تدوس للأخر حتلاقى الفتيس سقط نقلة و ال Rpm ارتفع جامد و لو كملت دوسة حينقل عند 6000 او 6500 تقريبا فا متقلقش

لما تركن و وراك و قدامك حد حاول تسيب الفتيس على N لو عندك المفتاح بيطلع على الوضع N علشان لو انت كنت سايبها على ال P و اتزقت غلط على الفتيس ( انا شخصيا بسيبها علطول على N ) لو المفتاح مبيطلعش يبقى تأكد من انك رافع فرامل اليد

و لو راكن على مطلعاية و المفتاح عندك مش بيطلع غير على P يبقى تجيب الفتيس على N و تشد الهاند بريك و تقوم سايب رجلك من على الفرامل فا العربية حتفرمل بفرامل اليد و ساعتها تقوم دايس فرامل تانى و تجيب P و لما تعوز تطلع تخلى رجلك على الفرامل و تقوم جايب R او D و تقوم منزل فرامل اليد و تمشى عادى

و لو عندك اى استفسار تانى انا موجود

[walidharoun]

شكرا جزيلا على التوضيح

[الطنطاوي]

طيب لو واقف مثلا في إشارة أقف على أي وضع ؟؟

[ata7daki]

تقف علي p أحسن لان دة معناة أن العربية هتكون متمورة + كأنك شدد فرامل اليد