عربيتى لانوس وعريسها مش دايس !!

[zikoofire]

السلام عليكم
ازيكم
انا اشتريت دايو لانوس من فترة كدا
ولسة بتعلم سواقة
اوقات بحس ان السواقة سهلة جدا
بس ساعات تانية بحس انها كيميا وخصوصا لما بتجيلى حالة الرهبة من الطريق ومن العربيات
ادينى بتعلم بس المشكلة لما بتكون بتتعلم على عربيتك بتبقى خايف عليها اوى
خصوصا انى حكيتها فى عربية لادا من كام يوم
يلا الحمدلله بقى
انا بعرف امشى واتحرك بالعربية وكل حاجة لكن فى اوقات بتزنق فى مواقف مش بعرف اتصرف فيها، علشان كدا مش بنزل لوحدى خااالص لازم يكون جنبى حد
وديه حاجة مضايقانى شوية ، لانى مش دايما بلاقى حد فاضيلى ينزل معايا
لدرجة انى ممكن اقعد يومين ولا حاجة ماجيش ناحيتها لمجرد انه مافيش حد فاضى
انا حبيت افضفض معاكم وياريت تدعولى ربنا يكفينى شرها
وتنصحونى نصايحكم بما انى لسة جديد فى عالم السواقة

[Samir Elshahawy]

ربنا يكفيك و يكفينا جميعا شر الطريق..

- أهم حاجة تخلي بالك و تتوقع خطأ الغير
- و في البداية ماتجريش بالعربية و حاول تمشي بالنهار و علي جنب (اليمين طبعا علشان ماتعطلش الطريق)
- لا تخف من الزحام بس أهم حاجة تعرف تظبط المرايات و تتعود تكشف الطريق حواليك
- ماتمشيش ورا بتوع الميكروباصات و التاكسي لأنهم ممكن يقفوا مرة واحدة أو يغيروا اتجاههم بدون أشارات أو أي انذار علشان خاطر جنيه علي الارض

ده اللي انا فاكره دلوقتي و ربنا معاك و معانا

[zikoofire]

اشكرك بشدة يا استاذنا
وربنا يسترها وانا هاعمل بنصايحك إن شاء الله

[ابو حسين]

ربنا يكفيك و يكفينا جميعا شر الطريق

[ehab4367]

امشى بالنهار
على اليمين دايما
امشى الاول فى شوارع فاضية مش زحمة عشان تتعلم
اتعود تتدى الاشارات الجانبية
اطلع بيها كل يوم لحد لما تتوكد
مع الشكر

[kareembelal]

ما تنساش تعمل رخصة قياده اهم حاجه طبعا
والف مبروك
والسواقه سهلة جدا هي مسألة وقت وتعود فقط لاغير بعد كده هاتحس انك سايق لا اراديا بدون اي مشقه

[Abdo_Eldesokey]

كلنا كنا كده يا باشا في الأول ... بعد كده مع التعود هتلاقي نفسك سايق حتى لو نايم

[dr.hany]

ربنا معاك و ونصيحتى ليك مع نصايح الاخوه الاعضاء السابقين انك تجمد قلبك شويه طبعا بعقل .قصدى فرضا انك اتزنقت ومش عارف تتصرف ولاقيت فيييض من الكلاكساات وراك.خد نصحتى واهدى خالص واديها الطرشه .كل ده عشان ماتتلخبطش وتعرف تتصرف

[belal rashed]

أهم حاجه تحافظ على هدؤك مهما حصل حواليك وبالنسبه للسواقه فأنا دايما بأقول إنها بتيجى بالتعود مش بالتعلم... وربنا يكفينا جميعا شر الطريق.

[zikoofire]

المشكلة لما بلاقى نفسى ماشى فى شارع وحد معدى من جنبى وفى نفس الوقت حد قصادى
بتلخبط اوى ومش بعرف اتصرف
ولسة ماحفظتش رد فعل العربية مع ايدى اوى
هوا انا بتحسن الحمدلله بس ربنا يسترها بقى

[MohaMed_Refaat]

المشكلة لما بلاقى نفسى ماشى فى شارع وحد معدى من جنبى وفى نفس الوقت حد قصادى
بتلخبط اوى ومش بعرف اتصرف
ولسة ماحفظتش رد فعل العربية مع ايدى اوى
هوا انا بتحسن الحمدلله بس ربنا يسترها بقى

انت لما تلاقى نفسك فى الموقف دة مور الفتيس وهدى وخلى رجللك على الفرامل علشان تبقى مستعد لاى طارئ.
لحد متعدى احدى العربيتيين والطريق يتفتح قدامك وبعد كدة ادى النقلة تانى وامشى.
وواحدة واحدة حتلاقى نفسك بتقدر بتلقائية تتصرف فى المواقف الى زى كدة .

[zikoofire]

اشكرك بشدة يا باشا
فعلا انا مشكلتى شوية هيا الخوف
يعنى لسة بردو محتاج اكون جرىء زيادة عن كدا وماتوترش

[feras_elngar]

القاعده الذهبية ولو انك حتى سواق فورميولا حتى

احذر خطأ الغير

لان ببساطة السواقة فى مصر عتاله
يعنى لازم تتوقع السواق اللى قدامك هيعمل ايه .. الراجل اللى جاى من على اليمين ده هينط قدامك ولا هيستناك تعدى ... الخ الخ

وعليك على الكلاكس والنور الرعاش (شد دراع النور عليك ) لتنبيه السواق اللى هيهيس عليك

حاول تهرب بالعربية فى مكان فاضى خالص الاول
التجمع الخامس - الشيخ زايد اى حته فاضية
وجرب تعمل كل حاجة بالعربية لغاية ما تاخد عليها وما تمشيش فى الزحمة والعربية لسه بتبطل منك او الحوارات دى

ساعة المشى فى الزحمة المفروض انك تكون ناسى العربية خالص وكل تفكيرك فى الطريق والناس اللى حواليك لو انت داخل مثلا الشارع الى على اليمين لازم تحضن قبله بشوية موش تبقى ماشى فى الشمال وبعدين تقرر مرة واحدة انك هتلف
وكذالك فى مطالع الكبارى لازم تبقى عارف انت هتتطلع ولا لا من بدرى عشان متجيش عند المطلع وتقلب الدنيا وتسمع سيمفونيات عذبة

واخر كلام بقى

امشى بالراحة ..... توصل بسرعة

وبالتوفيق

[zikoofire]

ياجماعة بجد وللهى مش عارف اشكركم ازاى على تعاونكم
بس انا مشيت كتير فى المساحات الفاضية وحاليا بحاول امشى فى الزحمة
اصلى بعيد عنكم ساكن فى حلوان
حيث الشوارع الضيقة والتقاطعات الكثيرة
والسواقة اللى على اصولها
يعنى علشان تسوق فى حلوان لازم تكون بطل
وديه مشكلتى نوعا ما
يلا ربنا يسترها معانا ومعاكم

[himatros]

والله انا كنت طيييييييييينه اكتر منك بس تتخيل عملت ايه مع العلم اني مكنتش بطلع الا لما واحد يكون معايا والله وبيكون وراه شغل برضه ولازم حد يكون فاضي تخيل عملت ايه
رحت جاي واخد العربية وطلعت مع نفسي والله بقيت ميه ميه وكنت بخااااااف مووووت بس لما طلعت لوحدي انتهى الخوف ده وتحول لمتعة القيادة