الهيدروليك والنيوماتيك

[evoo90]

السلام عليكم ورحمه الله وبركاته

بصوا بقى عايز تركيز كويس فى الموضوع ده لأنه ان شاء الله من اهم وافيد المواضيع فى المنتدى عن حاجه مهمه جدا فى حياتنا ومفيده جدا وسهلت علينا حاجات كتير جدا. الموضوع عن منظومات نقل القدره الهيدروليكيه والنيوماتيكيه
بالراحه كده وواحده واحده خليكم معايا
- يعنى ايه هيدروليك؟
الهيدروليك ده هو عمليه نقل القدره او الحركه والتوجيه.
- يعنى ايه؟
الزيوت الهيدروليكيه من اهم خواصها انها بتتحمل ضغوط ودرجات حراره عاليه جدا يعنى ضغط الزيت بيحرك اجسام وبيدى قوه وعزم اقوى من قوى الانسان بكتير . يعنى نص ليتر من الزيت ده بيرفع احمال بتوصل اوزانها للأطنان وبيحرك الاجسام الساكنه لان ضغطه ممكن يوصل لـ 100:200 bar ......
- يعنى ايه bar ؟
البار وحده قياس للضغط
طبعا مش اى زيت هيستحمل درجات الحراره العاليه ولا الضغوط العاليه جدا دى عشان كده فى المنظومات الهيدروليكيه بيستخدم زيت خاص للعمليات دى .[info] 1بار= 10 اس 5 نيوتن/متر مربع
[/info]- يعنى ايه الزيوت الهيدروليكيه؟
الزيوت الهيدروليكيه دى نوع من انواع الزيوت المعدنيه وليها خصائص ومواصفات.
-خواص الزيوت الهيدروليكيه:
1-سلوك لزوجى حرارى جيد.......يعنى يقدر يتماسك ويحافظ على لزوجته فى درجات الحراره العاليه.
2- ثبوت ضد قدم الزيت........يعنى حتى لما يقدم الزيت يكون قادر على الشغل لفتره.
3- وقايه جيده من الصدأ...... لازم كمان يكون ليه القدره على مقاومه الصدأبدرجه كبيره.
4- قابليه تحمل الضغوط العاليه.......زى ماقلنا انه بيرفع احمال كبيره وبيتعرض لضغوط عايه جدا لازم يكون جزيئات الزيت قادره على الصمود ومقاومه الانهيار عند الضغوط العاليه دى.
5- تكوين رغوى قليل......الزيوت دى بتبقى رايحه جايه فى الخراطيم والخزان لأنها دايره مغلقه ومع الحركه دى بتكون رغوه فى الزيت ودى ممكن تتسبب فى مشاكل كبيره جدا فى الدائره الهيدروليكيه.
6- امكانيه الانفصال عن الماء....... لأن دى بتسبب حاجه اسمها الاستحلاب ودى ليها مشاكل كتير فى الدائره.
[info]
من اخطار الدوائر الهيدروليكيه الكارثيه وجود هواء او ماء فى اجزاء الدائره
ومواصفات الزيت ده عاده بتكون شكلها كلأتى:
DIN 51524 T 2
FZG TEST 12[/info]
[info]
كل ماكان الزيت درجه حرارته قليله كل ماكانت قدره على اتمام الشغل ضعيفه
اى يجب تسخين الزيوت الهيدروليكيه قبل العمل بها.[/info]
- مميزات النظم الهيدروليكيه:
بالعقل كده لما يكون عندى لودر بيشتغل ميكانيكى يعنى كل حاجه فيه تروس وجنازير وسيور واعمده وكامات.......
مش كل ده بياخد حجم كبير؟ نظام الهيدروليك بيبقى اقل من نص الحجم وهشرح دلوقتى مكونات الدائره الهيدروليكيه.. كده دى اول ميزه ان الحجم بقى اقل.
طيب كل الحاجات دى مش بتحتاج عزم ووقود؟ يعنى كده استهلاك وقود اكتر وفقد فى العزم الهيدروليك بسيط وسهل دى تانى ميزه للهيدروليك. وكمان الصوت لما يكون تروس وجنازير وكلام من ده ببقى فى احتكاك والصوت عالى اما الهيدروليك ناعم دى حركه زيت ومكابس دى كمان ميزه. الهيدروليك تركيبه بسيط وسهل الفك والصيانه والتركيب اما التروس والجنازير والسيور ربنا يكون فى عون اللى بيعمل صيانه فيها.
يعنى من الاخر الهيدروليك نظام كويس جدا وبيحل مشاكل كبيره وبيسهل امور كتيره على عكس النظم الميكانيكيه.

طب كده كله فهم يعنى ايه هيدروليك ويعنى ايه زيت هيدروليكى
نيجى بقى لأستخدامات الهيدروليك فى حياتنا
مصانع الحيد والتشكيل بتعتمد اعتماد كبير جدا على الهيدروليك لأنها بيه بتقدر تضغط المعادن شديده الصلابه وتقطعها وتشكلها بسهوله.
بقينا نشوف كتير كراسى هيدروليك وبتبقى عباره عن مساعد زى مساعد العربيه بالظبط بس معظمها دلوقتى هواء بدل الزيت.
وكمان دلوقتى بيستعملوه فى المصاعد كنت تدوس على زرار الدور اللى انت عايزه يشتغل موتور كهرباء يرفع وينزل بس طبعا بدأت تظهر عيوبه فى انه مش بيشيل احمال كبيره وبطيئ نسبيا.. لكن المصاعد الهيدروليكيه بتدوس على الزرار يشتغل صمام توجيهى يوجه الزيت لمكبس يرفع او ينزل وطبعا انتوا عارفين ان الزيت بيتحمل ضغوط واحمال عاليه يعنى مافيش مشاكل بالنسبه للوزن.



وبيستخدم برده فى الاوناش( التلسكوبيه - الكلاركات - الحفارات - الكباشات - اللوادر - البلدوزر - الجريدر - الانجل دوزر - الخ الخ الخ...)
اما فى سياراتنا بقى وده موضوعنا الاهم واللى هيكون فى شرح كبير ان شاء الله.
الاول نعرف مكونات الدوائر الهيدروليكيه :
1- الخزان:
وده الخزان اللى بيحتوى على الزيت الهيدروليكى المستدم فى الدائره.

2- مضخه الزيت الهيدروليكيه:
عشان الزيت يتحرك من الخزان ويمشى فى الخراطيم ويروح يعمل الشغل المطلوب لازم يكون فى حاجه تسحبه من الخزان وتضغطه بضغوط عاليه جدا عشان يؤدى وظيفته

دى مضخه الزيت

[gdwl][/gdwl]

لما المضخه بتدور بتعمل خلخله او شفط. بتشفط الزيت من الخزان اللى بيدخل من الفتحه عند السهم الاخضر وبيدخل بين اسنان التروس اللى بتدور بسرعه وبيخرج من الناحيه التانيه عند السهم الاحمر بضغط عالى جدا ويروح للخراطيم اللى بعد كده هتوجه لصمام التحكم

3- مرشح الزيت الهيدروليكى(الفلاتر):
قبل ما الزيت يخش الدائره لازم يتنقى من الشوائب والاتربه ودى وظيفه مرشح الزيت

[gdwl][/gdwl]

بيدخل الزيت اللى جاى من الطلمبه بضغطه العالى الى المرشح عشان يتم تنقيته من الشوائب اللى ممكن تسبب خلل او عطل فى اجزاء الدائره. بيدخل الزيت من بين العضو الورقى اللى فى الصوره لونه اصفر ويخرج من النص منقى خالى من اى شوائب
-فى الدوائر الهيدروليكيه دايما بيبقى فى 4 انواع من المرشحات دى :
-1- مرشحات سحب.------ بيتركب بين الخزان والطلمبه عشان ينقى الزيت القادم من الخزان ولو المرشح ده اتسد بيبقى فى صمام تفويت يدخل الزيت للطلمبه ولعدين يدخل على مرشح الضغط.

-2- مرشحات الضغط.---- وده اللى بيركب بعد الطلمبه مباشره ودايما بيتحط قبل اجهزه التنظيم والتحكم عشان يحميها من التلف.

-3- مرشحات الراجع.---- وده بيركب بين خطوط الزيت الراجه والخزان عشان ينقى الزيت تانى قبل مايرجع للخزان
-4- مرشحات التعبئه والتنفيس.---- وده ليه وظيفتين
اولا :بيعمل كمرشح تعبئه لمنع دخول الاجسام الكبيره عند تعبئه الخزات (ورق شجر - ظلط صغير - ورق - الخ الخ...)

ثانيا: بيعمل كمرشح تنفيس لأن دايما الزيت جوه الخزان بيقل ويزيد وكذلك ضغطه وده بيسبب تغير كميه وضغط الهواء داخل الخزان عشان كده لازم يبقى فى فتحه تنفيس فى الخزان

[info]فتحته التنفيس دى موجوده ايضا فى خزان الوقود واللى ناس كتير ماتعرفوش ان فتحه التنفيس دى بتبقى فتحه المفتاح اللى فى غطاء الخزان[/info]

4- صمام تصريف الضغط:
صمام تصريف الضغط مهم جدا بالذات فى الدوائر الهيدروليكيه ذات الضغوط العاليه لأنه بيحمى الدائره من الانفجار عند ذياده الضغط بأنه بيصرف كميه من الزيت عبر الانابيب الخاصه بيه ليقلل الضغط الواقع على الدائره وبيتم رجوع الزيت ده للخزان مره اخرى

5- صمام لارجعى:
والصمام ده مهم جدا فى الدائره بيتركب على خطوط دخول الزيت القادم من المضخه ومهما حدث من ضغط او حمل خارجى على الدائره لايسمح برجوع الزيت من نفس الاتجاه حتى لا تحدث كوارث واعطال جسيمه بالدائره

6- الاسطوانات الهيدروليكيه:
طبعا كلنا عارفينا وهى اللى بالظبط زى المساعد بتاع العربيه

ده شكلها

[gdwl][/gdwl]

وفى منها نوعين:

اسطوانه هيدروليكيه مفرده التأثير


[gdwl][/gdwl]

اسطوانه هيدروليكيه مذدوجه التأثير


[gdwl][/gdwl]

7- صمام التحكم التوجيهى:
الصمام ده يعتبر قلب الدائره لأنه هو اللى بيتحكم فى اتجاه الزيت القادم من المضخه
ودى رسمه مبسطه كده على الماشى

[gdwl][/gdwl]

ده صمام 4/3 يعنى 4 فتحات و3 اوضاع تشغيل 1,2,3
A,B دول مدخل ومخرج الزيت من الاسطوانه الهيدروليكيه
لو تخيلنا ان فى فوق اسطوانه هيدروليكيه مفرده الفعل يعنى بتتحرك فى اتجاه واحد
الوضع 1 لو شغلناه هيبقى بالشكل ده

[gdwl][/gdwl]

هيدخل الزيت للغرفه رقم 1 اللى هتوجهه للفتحه B هيقوم بتحريك الاسطوانه الهيدروليكيه من اليمين للشمال كده حصلنا على حركه افقيه من اليمين للشمال وبيبقى فى صمام بين الفتحه A,B اسمه صمام تصريف الضغط عشان لو الضغط الواقع على الاسطوانه الهيدروليكيه ذاد يبتدى الصمام يصرف الزيت للفتحه A عشان يرجع ينزل للخزان
ده فى حاله حركه الاسطوانه من اليمين للشمال
طب لو عايزينها تتحرك من الشمال لليمين بنشغل الوضع 3 بيكون بالشكل الاتى

[gdwl][/gdwl]

هنا دخول الزيت بيبقى من الفتحه A وبيتم تحريك الاسطوانه من الشمال لليمين وعند ذياده الضغط يتم تصريف الزيت من خلال الفتحه B بواسطه صمام تصريف الضغط ويرجع الزيت للخزان.

8- المبينات:
طبعا كلنا عارفين ايه هى وايه وظيفتها وهى انها بتبين الضغط داخل الدائره ومنها بنعرف اذا كان الضغط قليل يبقى الزيت محتاج يسخن لو لسه الدائره مشغلينها من فتره قصيره لو شغاله من فتره كبيره والضغط قليل يبقى اكيد هناك عطل فى الطلمبه او صمام التحكم ويجب الكشف على الدائره.
لو الضغط زياده يبقى لازم يتم ايقاف الدائره فورا والكشف عليها حتى لا تحدث مشاكل.

9- الخراطيم الهيدروليكيه:
طبعا بتستخدم خراطيم معينه لتحمل الضغوط العاليه جدا دى ولازم نراعى الاتى عند تركيب تللك الخراطيم.
-يجب تجنب التقوس الضيق للخراطيم.
-يجب تجنب التواء الخراطيم.
-يجب عدم وضع الخراطيم بجانب اماكن السخونه.
-يجب عدم وضع الخراطيم بجانب الأجزاء المتحركه.
-يجب عدم وضع الخراطيم بجانب بعضها او فوق بعضها.

كل الكلام ده مقدمه بسيطه عن الهيدروليك وعلى فكره النيوماتيك زيه بالظبط بس بدل الزيت هوا وبدل مضخه الزيت بيبقى كمبريسور هواء
مع تغير عضو الترشيح الورقى بأخر سلكى.

برجاء عدم وضع ردود الان

[evoo90]

نيجى بقى لأستخدامات الهيدروليك والنيوماتيك فى سياراتنا

كده عرفنا يعنى ايه هيدروليك وايه فايدته وشرح مبسط لعمل الدوائر الهيدروليكيه
طب تعالوا نعرف ايه استخداماته فى سياراتنا...


اولا: دائره التوجيه(الباور ستيرنج):
زمان ماكانش فى حاجه اسمها باور ستيرنج كنت لما تلف التاره يطلع عينك فى اللف وبتبذل مجهود كبير جدا وكانت السواقه متعبه وتقيله وبدايه صناعه الباور واستخدامه كان من مجموعه جنرال موتورز الامريكيه

دى دائره التوجيه ألى المؤازره اللى هو الباور ستيرنج

[gdwl][/gdwl]

واللى بيتم فيها زى اللى شرحته فوق فى صمام التحكم التوجيهى
لما بتلف التاره يمين بتشغل وضع من اوضاع الصمام يقوم مدخل الزيت من الفتحه اللى شمال مكبس الاسطوانه الهيدروليكيه فيقوم بتحريكها لليمين واللى بتقوم بدورها بلف العجله يمين
ولو لفيت شمال يقوم الصمام مدخل الزيت من يمين المكبس بتاع الاسطوانه فيقوم الزيت محركه شمال فيقوم محرك العجله شمال
اظن مافيش اسهل ولا ابسط من كده

ثانيا: دائره الفرامل:
دى رسمه برده مبسطه رسمتها على السريع كده بتوضح نظريه تشغيل دائره الفرامل الهيدروليكيه

[gdwl][/gdwl]

بمجرد الضغط على دواسه الفرامل بيدخل الزيت بضغط عالى جدا للأسطوانه الهيدروليكيه بدائره الفرامل فيقوم الزيت ضاغط على المكبسين اللى باللون الاحمر المثبتين على حذائين الفرمله(التيل) للخارج ليتتم عمليه احتكاك التيل وفرمله العجله
[warning]
من اخطر اسباب الحوادث التى تتسبب فيها الفرامل هى:
- وجود هواء بدائره الفرامل.
- وجود ماء بدائره الفرامل.
- نقص كميه الزيت فى خزان زيت الفرامل.
- عدم وصول الزيت لدرجه حراره التشغيل المثاليه وذلك يحدث دائما فى المناطق البارده وفى الطقس البارد ويجب الانتظار قليلا قبل التحرك بالسياره والسير ببطئ جدا والتوقف(السير المتقطع) حتى يتحرك الزيت زهابا وايابا حتى يصل لدرجه الحراره المطلوبه تلقائيا.
[/warning]
[info]بعض اعطال الفرامل الهيدروليكيه:

أولا - وجود رعشه عند استخدام الفرامل:
1- عدم إحكام ربط الأجزاء الخاصة بالكابح جيدا.
2- تأكل الاسطوانات ولذلك يجب اعاده خرطها او استبادلها.
3- تلف التيل الخاص بالفرامل ويجب استبداله فورا.

ثانيا - انحراف السيارة عند الفرملة:
1- أحد الإطارات به ضغط أقل من الآخر، فيجب الكشف على ضغط الإطارات وتظبيطه

2- عدم ضبط الفرامل بالتساوي في الناحيتين اليمنى واليسرى، فلذلك يجب ضبط الفرامل بحيث يتم الإيقاف في نفس الوقت في الناحيتين اليمنى واليسرى وبنفس القوة أيضا.

3- وجود شحوم أو زيوت على "الاسطوانات"، مما يسبب انزلاق تيل الفرامل أو عدم فاعلية الفرامل، فمن الأفضل تنظيف الناحية التي بها شحوم.

4 – انحشار أو التصاق إحدى الاسطوانات الفرعية مما يؤدي إلى عدم فاعلية الفرملة.

ثالثا - السيارة لا تقف إلا بعد الضغط على بدال الفرامل لفترة طويلة:
1- تآكل تيل الفرامل لذلك يجب استبدالها فورا.

2- عدم ضبط دواسة الفرامل بشكل جيد.

رابعا - دواسة الفرامل تتطلب الضغط عليها عدة مرات لتظهر فاعلية الفرامل:
1- وجود هواء بدورة الفرامل، فيجب استخراج الهواء من دورة الفرامل.

2- وجود عطل في "ماستر" (الاسطوانه الهيدروليكيه) الفرامل فيجب استبداله فورا.

3- وجود تسريب في الدورة الخاصة بالفرامل.

خامسا - سخونة الاسطوانات وانبعاث الدخان من لقم الفرامل:
1- التصاق لقم الفرامل مع "الديسكات"، فلذلك يجب إعادة ضبطها.

2- استخدام الفرامل بصورة مستمرة على المنحدرات أو خلال قطر السيارة مما يتسبب بسخونة "الديسكات"، فاعمل على إيقاف السيارة لتبريد "الديسكات".

سادسا - هرب الفرامل بصورة مفاجئة:
هذه الحالة تشير إلى وجود خلل فني بنظام الكابح مثل وجود كسر او قطع بأحد مواسير الفرامل، فلذلك يجب أخذ السيارة لورشة متخصصة.


[/info]


نيجى بقى لنظام رفع وخفض السيارات بالهيدروليك كتير مننا يسمع عنه وكتير برده معجب بالنظام ده قوى ونفسه يركبه فى عربيته

(الهيدروليك سيستم أو نظام الهيدروليك)

[gdwl][/gdwl]

[gdwl][/gdwl]

نظام الهيدروليك يعتمد اعتماد كلي على الزيت
وكيف يعمل ؟؟

يعمل النظام بالبطاريات السائلة أو البطاريات العادية زى اللي بتتتركب في السيارات 70 أمبير أو 80 أمبير
او الي بيسموها ( بطاريات الكتروني ) زى السيارات الأمريكيه تقريبا
والأفضل هي البطاريات الجل ودى طبعا غالية
وتستخدم غالبا في سيارات القصور أو سيارات ملاعب لعبة القولف
ودى صوره المضخه
[gdwl][/gdwl]

[gdwl][/gdwl]

[gdwl][/gdwl]

والنظام ده بيعتمد أساسا على مضخه الزيت
وخراطيم خاصة بنظام الهيدروليك بتتحمل ضغط عالي جدا جدا
وبتتتغلف بطبقه أسلاك (يعني تمسك السلك كأنه كفر ضغط)
ودى صور الخراطيم الخاصة بالهيدرولك

[gdwl][/gdwl]

وفى النظام ده بيتركب مساعدين خاصه ليه وكمان هنا بالذات بتتسمى بستم
ودى صورها واشكالها

[gdwl][/gdwl]

[gdwl][/gdwl]

ولازم تغير السوست بتاعه النظام عشان توصل قوتها ل حوالى 4 طن
فى الشركات بتاعتها بيقى اسمها (1طن - 2طن - 3طن - الخ الخ الخ......)
ودى صورها واشكالها

[gdwl][/gdwl]

[gdwl][/gdwl]

[gdwl][/gdwl]

وكل مقاس من اليايات دى ليه ميزه وكل ما يكون الياي اقوي وأطول يكون
التقفيز بالسيارة أعلى وأقوى
و كل ما كان الياي أقوى كل ماكانت السيارة أصعب في السواقة

وهذي صوره النظام الكامل بجميع اجزائه

[gdwl][/gdwl]

[gdwl][/gdwl]

شوفوا بتاخد مكان قد ايه من الشنطه

[gdwl][/gdwl]

[gdwl][/gdwl]

وكمان لازم يتشال البطانه او الفرش اللى فى شنطه العربيه وبتتدهن بمواد عازله ومقاومه للحريق والماس الكهربى

عشان ساعات البطاريات بتعمل شراره أو الأسلاك الكهربائية بتسخن وتتحرق
أو ممكن يحصل ماس كهربائي وده لو كان بجانبه أي شي سريع الاشتعال
والهيدروليك يفضل انه يتركب على السيارات الدفع الخلفي
والسيارات القديمة أو الأمريكي الكلاسيكية لأن الهيدروليك بيحتاج سيارة صلبه وقويه
في نفس الوقت
وفوق قوتها لازم تدعم الشاسيه بتاعها و تقويه وتقوى المقصات كمان
طبعا كل حاجه وليه طريقه فى التدعيم
وممكن تحتاج سلاسل للتدعيم
و جنوط سلك صغير مقاس "14 أو"13 واكبر مقاس ممكن يتركب مقاس 15"

برجاء عدم وضع ردود الان

[evoo90]

مميزات نظام الهيدروليك

1- أولا بيخلي العربيه تمشي على 3كاوتشات بس.

[gdwl][/gdwl]

[gdwl][/gdwl]

2- سريع في النزول والطلوع وكل مازادت البطاريات كل ماكان أسرع

[gdwl][/gdwl]

3- ممكن تنط بالعربيه اعلي من 2 متر.

[gdwl][/gdwl]

4- ممكن يعيش 10 سنين لو كان تركيبه واستخدامه صح.


5- ممكن ترفع العربيه مسافات عاليه جدا وتلزقها في الأرض في نفس الوقت.

[gdwl][/gdwl]

[gdwl][/gdwl]


عيوب نظام الهيدروليك

1 - أقصى سرعة للعربيه 60 كلم وممكن توصل لـ 100 كلم وده لأن العربيه هتكون ناشفه قوى عشان السوست القويه اللى متركبه فيها.

2- مكلف جدا.
3- وتكلفة تركيبه كمان عاليه لأنه يحتاج توليفات وتعديلات كثيرة في العربيه
وكل تعديل يأخذ مبلغ ووقت وجهد.

4- يحتاج صيانة كثير لأنه يخرب جلب المقصات وجلب البودي وكراسي الموتور بسرعة.
5- بيحتاج واحد يستخدمه بحذر وفن لأنه الضغط لغلط والحركات الغلط كلها لها تأثيرات جانبيه على السيستم والمضخات


6- تحتاج البطاريات للشحن بأستمرار.

7- يحتاج غيار زيت كل فتره

[gdwl][/gdwl]


ده الهيدروليك المستخدم فى السيارات
برجاء عدم وضع ردود الان

[evoo90]

اما بقى عن نظام النيوماتيك واللى بيسموه ايرباج او المساعدين الهوائيه

ده بقى يعتمد اعتماد كلى على الهواء بس اللى يكون مضغوط في اسطوانة هوائيه
او خزان لتكون السيارة مستعدة لأي حركه تتطلبها من السويتش بتاع التحكم
وكل ما كان عدد مواتير (الكمبريسور) الهواء اكبر أو اقوي كلما كان أفضل
ويفضل دائما بس كمبيريسورين
وهذي صوره الكومبروسرات(كمبريسر او مضخه هواء) الي بتتعبى الهواء

[gdwl][/gdwl]
[gdwl][/gdwl]

[gdwl][/gdwl]





وهنا صوره النظام كامل

[gdwl][/gdwl]



[gdwl][/gdwl]

ودى اسطوانة الهواء اللى بيتشحن فيها الهواء

[gdwl][/gdwl]

ده المساعد الهوائى او الاير باج وفى منه بنستخدمه فى مترو الانفاق بتاعنا

[gdwl][/gdwl]

[gdwl][/gdwl]

دى بساتم الهوا او الاسطوانات النيوماتيكيه

[gdwl][/gdwl]


مميزات هذا النظام

1- سهل التركيب
2- غير مكلف
3-ما بيحتاجش تدعيم أو تقويه في البودي
4-وما بيحتاجش سيارات صلبه أو فيها شاسيه قوي زي الهيدروليك

[gdwl][/gdwl]

[gdwl][/gdwl]

[gdwl][/gdwl]

5- مريح في السواقة جدا لأن العربيه ماشيه على هواء منفوخ في بالونات


6- يركب على كل السيارات سواء خلفي أو أمامي


7- تقدر تستخدم العربيه بشكل يومى بكل راحة تقريبا


8- مابياخدش مكان كبير فى الشنطه

[gdwl][/gdwl]

عيوبه نظام الهواء

1- بيحتاج حوالى 5دقائق عشان يشحن الأسطوانات في أول تشغيل.
2- ماينفعش يمشى العربه على 3 عجلات ومابيخليهاش تتنط.
3- حركته بطيئه جدا بالنسبه للنظام الهيدروليكى, وطلوع العربيه سريع لكن نزولها بطيئ ويعتمد على وزن العربيه في سرعه النزول تقريبا.

أعطال النوعين

بالنسبه للهيدروليكى لما يكون فى ضغط جامد او عند استخدامه بطريقه خاطئه ممكن يحصل فقع او قطع فى الانابيب والخراطيم

بالنسبة للهواء أو الأيرباج يحتاج تقريبا كل فتره تغير جلود المساعد الهوائى , حوالي كل سنه تقريبا وكله يرجع ويعتمد بشكل كبير على حسب الاستخدام وحسب حرارة الجو لأنه الجلد معروف عنه إنه بيتغير بتغير درجه الحراره

ودى السويتشات او ازرار التحكم بتاعه النوعين

[gdwl][/gdwl]

وده سويتش لنظام الهواء

[gdwl][/gdwl]

[gdwl][/gdwl]


كده ابقى تقريبا شرحت كل حاجه ببساطه شديده عن النيوماتيك والهيدروليك
اتمنى يكون كلامى واضح ومفهوم وانكم تستفيدوا منه
واخيرا دى هديه ليكم شويه كتب بالتفصيل اكتر عن الهيدروليك والنيوماتيك

ده عن نظام النيوماتيك

http://www.4shared.com/get/110128234/54d85f53/festo_pneumatics__basic_level_l.html;jsessionid=08374681217D03D7126EBF367AEDA0EE.dc156

وده كتب الكترونيه جامده جدا عن نظم الهيدروليك


1- أساسيات قدرة الموائع
http://cdd.gotevot.edu.sa/college/mechanics/pdf/sys113.pdf
http://cdd.gotevot.edu.sa/college/mechanics/pdf/sysl113.pdf

2-نظم هيدروليكية ونيوماتية
http://cdd.gotevot.edu.sa/college/mechanics/pdf/sys121.pdf
http://cdd.gotevot.edu.sa/college/mechanics/pdf/sysn121.pdf
3- مكونات هيدروليكية / نيوماتية
http://cdd.gotevot.edu.sa/college/mechanics/pdf/sys124.pdf
http://cdd.gotevot.edu.sa/college/mechanics/pdf/sysl124.pdf
4- هيدروليكا كهربية
http://cdd.gotevot.edu.sa/college/mechanics/pdf/sys211.pdf
http://cdd.gotevot.edu.sa/college/mechanics/pdf/sysl211.pdf
5- وحدات التحكم المنطقي المبرمج
http://cdd.gotevot.edu.sa/college/mechanics/pdf/sys222.pdf
http://cdd.gotevot.edu.sa/college/mechanics/pdf/sysl222.pdf
6- هيدروليكيا المعدات المتنقلة
http://cdd.gotevot.edu.sa/college/mechanics/pdf/sys223.pdf
http://cdd.gotevot.edu.sa/college/mechanics/pdf/sysl223.pdf
7- هيدروليكا تناسبية ومؤارزة
http://cdd.gotevot.edu.sa/college/mechanics/pdf/sys224.pdf
http://cdd.gotevot.edu.sa/college/mechanics/pdf/sysl224.pdf

اتمنى اكون قدمت معلومات مفيده وارجو التثبيت

[pedro732000]

الله ينور ياباشا على الشغل الجامد ده
وانا بردة اتمنى ان يثبت هذا الموضوع
على فكرة هاحاول انى اجيب صور توضيحية وشرح لــــــ Direction Control Valve
واتمنى بتدعيم صور حقيقيه ومفصله لنظام power steering الموجود فى العربية
شكرا

[Samah AbdAllah]

موضوع فعلا مهم ومفيد جدا
تسلم ايدك ايفو

[Ahmed Nouh]

موضوع اكثر من رائع

جزاك الله كل خير

[kemo0o]

ههههههه والله النهاردة كان عندي امتحان Hydraulic & Pneumatic Systems

[evoo90]

شكرا ليكم ياجماعه اتمنى تكونوا فعلا استفادتم منه
وادى شرح بسيط وسهل للباور ستيرنج
ده مقطع فى سياره بيوضح اجزاء الدائره..

[gdwl][/gdwl]

هناك نوعان أساسيان لل (Power steering ) :
أ- النوع المدمج (Integral type ):
يكون مكبس القوة مدمج داخل علبة التوجيه (Steering gear ) وهو الاكثر انتشارا ويتم تركيبه فى المصنع أثناء انتاج السيارة .
ب – (Linkage type ) :
- يكون مكبس القدرة مركب بين الشاسيه وذراع التوجيه (Steering Linkage ) .
- ونشرح النوع الثاني وهو الاكثر استخداما في الشاحنات والممكن تركيبه بعد انتاج السياره وهو (Linkage type ):



[gdwl][/gdwl]
يتكون من :
اسطوانة(1) بداخلها المكبس الثابت (2) حيث يتصل ساق المكبس (3) بالشاسيه بوصلة كروية وتجويف (4) بينما تتصل الاسطوانة بكوع مفصلة التوجيه (5) عن طريق وصلة الجر(6) ويعمل ذراع بتمان(7) علي تشغيل صمام التحكم () والذي يسمح بمرور الزيت المضغوط من المضخة الى أحد نهايتي الاسطوانة خلال الممر (9) أو الممر (10) الذي يكشف عنه الصمام ، وفي الوقت نفسه يعود الزيت من النهاية الاخري من الاسطوانة الي الخزان .

طريقة التشغيل :

[gdwl][/gdwl]


التوجيه لليسار: (أ)
عند ادارة عجلة القيادة للتوجيه جهة اليسار مثلا ، يتحرك ذراع بتمان (7) في اتجاه عقارب الساعة ومن ثم فإن الصمام (8) يتحرك جهة اليسار ، وبذلك يكشف فتحة المضخة (13) ليتدفق الزيت المضغوط الوارد من المضخة عن طريق الفتحة (11) فيمر منها الي النهاية اليسرى للاسطوانة عن طريق الممر (9) وحيث أن ساق المكبس (3) مثبتة في الشاسيه فإن ضغط الزيت يؤثر على الاسطوانة فيحركها الي اليسار ويتم التوجيه ، وفي نفس الوقت يطرد الزيت الموجود علي يمين المكبس الى الخزان عن طريق الممر (10) والفتحه(12) التى كُشفت بتحرك الصمام (8) الي اليسار .
-وتمل حركة الاسطوانة علي اعادة الصمام (8) الى وضع التعادل
-- وتتم حركة التوجيه المطلوبة بصفة رئيسية بضغط الزيت ، وجزئيا بضغط ذراع بتمان (7) المباشر علي (الياي الايسر (14)
-وفي حالة فقد ضغط الزيت يمكن لذراع بتمان تشغيل وصلات التوجيه مباشرة بمجرد وصول الصمام(8) الي مسنده ، وعلي ذلك فإن حركة عجلة القيادة الحرة يتوقف مقدارها علي الحركة الحرة المسموح بها للصمام(8) عند التوجيه العادى .




التوجيه لليمين : (ب)


[gdwl][/gdwl]

حالة التوجيه لليمين ووصول الزيت المضغوط الي نهاية الاسطوانة (1) علي يمين المكبس (2) عن طريق الفتحة (12) والممر (10) وخروج الزيت من النهاية اليسرى عن طريق الممر (9) والفتحة (13) عائدا الي الخزان


وده كتاب بيتكلم بالتفصيل عن الباور ستيرنج

http://www.4shared.com/file/62275628/f05c81f0/power_steering.html?s=1

[nabaster]

طيب انا المفروض اشكرك ازاي؟؟؟

انتا رائع يا ايفو وموضوعك اكتر اكتر من رائع

بصراحه مش عارف اشكرك ازاي فعلا انا اتكيفت من الموضوع ده

شكرا يا ايفو علي المجهود الاكثر من رائع

[NaderNabil]

صدقني الموضوع من كتر ما هو رائع....شكيت فيه و قعدت أدور عليه في حتت تانية و قلت ده أكيد منقول :)
أحييك يا إيفو...علي نظامك و ترتيبك للأفكار و تنسيقك للموضوع و جعله شيق جداً...
خد بالك ده مش أخر موضوع هه؟...مستنين منك تاني كتير إن شاء الله :)

[ASSASSIN]

شكراً على المجهود الكبير

[nabaster]

صدقني الموضوع من كتر ما هو رائع....شكيت فيه و قعدت أدور عليه في حتت تانية و قلت ده أكيد منقول :)
أحييك يا إيفو...علي نظامك و ترتيبك للأفكار و تنسيقك للموضوع و جعله شيق جداً...
خد بالك ده مش أخر موضوع هه؟...مستنين منك تاني كتير إن شاء الله :)

ارجو تعديل الموضوع واضافة عبارات (حصريا لنايل موتورز) داخل الموضوع واضافتها علي الصور

وشكرا يا ايفو مره اخري علي الموضوع الرائع

[Mzeid]

شكرا على التوضيح الجميل دة ..

[Haitham10]

شكرا ياايفو موضوع مفيد ومتعوب عليه