بديل عمرة الموتور

[mahmoudbadr]

كنت فى كارفور و شفت حاجة اسمها بديل عمرة الموتور engine resurs و بعد البحث فى النت عرفت انه منتج روسى و حسب الكلام ان فيه منه انواع كتير و استخدامات كتير

ودى صفحة منتجاته ع النت

http://eng.smazka.ru/services/prod/advantage/


وكمان لقيت فيديو دعائى له على قناة الناس و ده اللينك

http://www.youtube.com/watch?v=8g_QmXeBUhs&feature=channel



لكن سؤالى فيه حد من الاخوة جربه ؟ و لو حد جربه إيه النتيجة؟

[x_gomgom]

حابب اشارككم تجربتي ممع المنتجات دي:
انا جربت الكلام دا كذا مره( لادا نيفا محتاجه عمره بتجيب دخنه زرقاء و مره في عربيتي القديمه بولونيز).... هو كل اللي بيعمله بالفعل و اللي انا لاحظته انو بيزود كثافة الزيت جدا بطريقه تجعله ميعديش من الشنابر لغرفه الاحتراق يعني من بين سطع البستم و البوجيهات و بالتالي بتقل نسبه حرق الزيت.... اكرر يقلل و النسبه دي بتفرق من موتور للتاني.
مثلا لما جربته في النيفا مكنش له اي اثر بالعكس ريحه العادم بقت لا تطاق وتحسها تخنق بس الدخنه قلت.
اما في البوبونيز اتمنع العادم فعلا و كان معدل تناقص الزيت قليل جدا بس العيب اللي نتج ان معدل السخونه بقي مرعب لحد ما طرمبه الزيت قفشت و انتوا عارفين الباقي( انا تفسيري الشخصي ان مع زياده كثافه الزيت ادت الي عدم قدرة الطرمبه علي تقليب الزيت بشكل جيد مما يفسر السخونيه الزياده و قفشان الطرمبه)...
و نصيحه بجد اول ما تحس ان الموتور ابتدي يحرق زيت و يجيب دخنه اعمل حسابك علي عمره و بلاش المنتجات دي عشان كده كده مش هتطولك في عمر الموتور بالطريقه اللي بتتقال في الاعلانات (و ارجع و اقولك دا كلام اعلانات)
و اهم حااجه اللي اخدت بالي منها ان في انواع مينفعش تنضاف علي الزيوت التخليقيه و لابد عن اضافة المنتج تغير الزيت و الفلتر قبل الاضافه....
يريت اكون افدت

[mahmoudbadr]

شكرا أخى الفاضل على إفادتك ودا كان رأيى برده بس أنا حبيت أعرفه من واحد مجرب

[aymansaad]

سعره كام فى كارفور.؟
لو سمحتم

[NOUR_OMRAN]

سعره فى كارفور 85 جنيه مصرى انا جبته وسبته عند الكاشير قلقت منه

[kemks]

بلاش منه ملوش ادني لزمة و مبيعملش اي حاجة مع التجربه لا امل لو خلاص داخل في عمرة يبقي خليك علي زيت الشمبر مع زيت المحرك حتي عمل العمرة ..........بالتوفيق

[amrcorolla]

انا اعتقد انه كلام دعاية
ومديرى جابها قبل كدة ومعهملتش حاجة خالص

[shankosi]

طيب مش يمكن الاخ اللي كان عنده بولونيز حط كمية اكبر من اللازم او استخدمه مع زيت قديم؟

انا فهمت انه لازم يتحط مع زيت نظيف تماما وتمشي بيه فقط 100 او 150 كيلو وتغير الزيت

[x_gomgom]

انا يا سيدي صاحب البولونيز و احب اقولك خطوات الاستخدام:
اولا تغير الزيت و الفلتر قبل اضافة الماده
ثانيا بعد التغير يشغل المحرك لمده كافيه حتي يسخن بعدين تبطل و تطيف الماده.....
اما بالنسبه لكلامك انك تمشي بيه 100 كيلو دا انت قصدك حاجه تانيه.. في مواد بتنضاف علي الزيت لتظيف دوره التزييت من طرمبه و كارتيره الخ....
و دا بالفعل بستخدم زي ما بتقول بتغير الزيت و تمشي بيه مسافه قليله و بعدين بتغير الزيت...
اما البديل للعمره دا بيفضل محطوط مع الزيت لحين ميعاد تغيره و طبعا لما بتغير بتحط تاني
يا رب اكون افدتك

[DAHB115]

حلو بجد الكلام في الموضوع دا بس كان لي سؤال يتعرف امتي ان العربيه عاوزه عمرة ايه هي العلامات والمؤشرات اللي توضح ذلك وتكلفه العمرة بتاخد اد ايه وازاى احافظ علي الموتور عشان ميجبش عمرة وشكرا

[x_gomgom]

اولا جنبنا الله شر العمرات و الاعطال بجميع اشكالها...
في شويه علامات بتبان عندك ساعتها تعرف ان العربيه محتاجه عمره و منها:
تناقص مستوي الزيت في المحرك يعني تلاقي الزيت بينقص علي المقياس...
و ظهور دخنه مائله للزرقه من الشكمان و دا دليل على ان الموتور ابتدي يحرق زيت...
و في السخونيع الغير مبرره يعني تلاقي دوره الميه سليمه طرمبه الميه سليمه و الترموستات سليم بس بتسخن و دا غالبا بيكون عيب في وش السلندر....
في بقي حاجه بتسبب بقي قفشان الموتور غير الاسباب المعتاده و اللي هي عمر المحرك. و هي قفشان طرمبه الزيت و دا ممكن تلااحظه لو عربيتك فيها امبير ضغط للزيت تلاقيه على الصفر اثناء مشي العربيه و دا دليل ان الطرمبه مبتقلبش زيت او لو عندك لمبه بيان تلاقيها بتنور و انت ماشي في الحاله دي تاخد بالك لان لا قدر الله و طلعت الطرمبه مش بتقلب زيت كدا الموتور بالسلامه...
عامه مصطلح العمره شامل حاجات كتير مثلا في ناس بتعمل طقم شنبر بس عشان حرق الزيت فقط و ناس بيكون العيب منحصر في وش السلندر و ما الى ذلك... و عامه الميكانيكي اللي يقولك هي العربيه محتاجه ايه بالظبط...
انا عامه بعيد عنكم الطرمبه قفشت اضطريت اني اغير كل حاجه في الموتور حتى البساتم و اخدتش من الموتور القديم غير الفارغ بس و وقفت عليا ب حوالي 4000 جندي (عربيه بولونيز موديل 1990)...
و نيجي هنا للاهم ازاي تحافظ على موتورك ...
اولا و قبل كل شئ الصيانه الدوريه اللي هي الفلاتر و السيور و اهمهم غيار الزيت في ميعاده و سامحوني لو يا ريت تغيره قبل معاده بفتره عشان تبقي في المضمون و يستحسن انك تحط زيت جودته عاليه بالذات في فصل الصيف عشان تحافظ على الموتور من التأكل في فصل الصيف بالذات...
و طبعا لازم تخلي بالك من دوره التبريد يعني تكشف على مستوى المياه و تزودها لو ناقصه و ظبط ردياتير العربيه و تكشف على الوصلات عشان ممكن وصله ب 5 جنيه تضيعلك مكنه ب 6000 (حصلت مع صديق لي معاه ليجانزا موديل 2000 توصيله التكييف السخن ضربت و فضت ميه الردياتير كاملا و هو على طريق العالمين و غرمته عمره كامله)...
و ان شاء الله تعيش بيها مرتاح البال و تعمل ال 200,000 و المليون كمان امين...
جنبكم الله شر الاعطال و اشتغالات الميكانيكيه...
يا رب اكون افدت
رمضان كريم

[aymansaad]

شكرا على المجهود

[ahmdmagdy]

و الله ماقصرت

[Lion_Heart]

اولا جنبنا الله شر العمرات و الاعطال بجميع اشكالها...
في شويه علامات بتبان عندك ساعتها تعرف ان العربيه محتاجه عمره و منها:
تناقص مستوي الزيت في المحرك يعني تلاقي الزيت بينقص علي المقياس...
و ظهور دخنه مائله للزرقه من الشكمان و دا دليل على ان الموتور ابتدي يحرق زيت...
و في السخونيع الغير مبرره يعني تلاقي دوره الميه سليمه طرمبه الميه سليمه و الترموستات سليم بس بتسخن و دا غالبا بيكون عيب في وش السلندر....
في بقي حاجه بتسبب بقي قفشان الموتور غير الاسباب المعتاده و اللي هي عمر المحرك. و هي قفشان طرمبه الزيت و دا ممكن تلااحظه لو عربيتك فيها امبير ضغط للزيت تلاقيه على الصفر اثناء مشي العربيه و دا دليل ان الطرمبه مبتقلبش زيت او لو عندك لمبه بيان تلاقيها بتنور و انت ماشي في الحاله دي تاخد بالك لان لا قدر الله و طلعت الطرمبه مش بتقلب زيت كدا الموتور بالسلامه...
عامه مصطلح العمره شامل حاجات كتير مثلا في ناس بتعمل طقم شنبر بس عشان حرق الزيت فقط و ناس بيكون العيب منحصر في وش السلندر و ما الى ذلك... و عامه الميكانيكي اللي يقولك هي العربيه محتاجه ايه بالظبط...
انا عامه بعيد عنكم الطرمبه قفشت اضطريت اني اغير كل حاجه في الموتور حتى البساتم و اخدتش من الموتور القديم غير الفارغ بس و وقفت عليا ب حوالي 4000 جندي (عربيه بولونيز موديل 1990)...
و نيجي هنا للاهم ازاي تحافظ على موتورك ...
اولا و قبل كل شئ الصيانه الدوريه اللي هي الفلاتر و السيور و اهمهم غيار الزيت في ميعاده و سامحوني لو يا ريت تغيره قبل معاده بفتره عشان تبقي في المضمون و يستحسن انك تحط زيت جودته عاليه بالذات في فصل الصيف عشان تحافظ على الموتور من التأكل في فصل الصيف بالذات...
و طبعا لازم تخلي بالك من دوره التبريد يعني تكشف على مستوى المياه و تزودها لو ناقصه و ظبط ردياتير العربيه و تكشف على الوصلات عشان ممكن وصله ب 5 جنيه تضيعلك مكنه ب 6000 (حصلت مع صديق لي معاه ليجانزا موديل 2000 توصيله التكييف السخن ضربت و فضت ميه الردياتير كاملا و هو على طريق العالمين و غرمته عمره كامله)...
و ان شاء الله تعيش بيها مرتاح البال و تعمل ال 200,000 و المليون كمان امين...
جنبكم الله شر الاعطال و اشتغالات الميكانيكيه...
يا رب اكون افدت
رمضان كريم

نصائح مهمة و احب اضيف ان كل الاضافات اللى بيقولوا عنها بتلغى العمرة ماهى الا مسكنات و قد تنجح مع مواتير و اخرى لأ , و الحل العملى هو عمل العمرة .