ما هي وظيفة أجزاء العفشة الآتية

[Strong]

ما الفرق بن كل من

بارات الدريكسيون
بيض الدريكسيون
بارات الطرف
المقصات
بيض المقصات
التيش

ووظيفة كل منهما

وعلامات تلفهم

وهل يسبب تلف أي منهم تعويم على السرعات العالية ؟

[samirayad]

طيب شوف الموضوه ده الأول

وشوف أيه الناقص وقول عليه

أضغط هنا

[Ahmed Selim]

مش هقدر أفصص وظيفة كل واحدة على حدى بس

بارات الدركسيون أعتقد و الله أعلم هى هى بارات الطرف

بارات الدركسيون بتمسك العجل مع علبة الدركسيون.....و وظيفة البارات مع العلبة تقليل الأحساس بالمطبات و النقر و الحفر + توجيه العربية حسب حركة الدركسيون ( هتلاقيها فى الصورة أسمها tie rod )
و لما تبوظ هتحس بخبط خفيف فى الدركسيون من تحت عند المشى فى حتت مكسرة أو فوق قضيب مترو.

بيض الدركسيون دى بتبقى الحتة اللى ماسكة طرف بارة الدركسيون من ناحية العجل.( هتلاقيها فى الصورة فى طرف البارة......باينة تحت الطنبورة اللى على اليمين )


المقصات بتمسك العجلة فى باقى العفشة من تحت ( أسمها Control Arm )
بيض المقصات هى القطعة الى بتمسك المقص فى القنطرة تقريباً
والمقصات نفسهم عادةً مش بتبوظ ( إلا لو فى حادثة لا قدر الله ) لأنها هبارة عن قطعة ألمونيوم اللى بيبوظ فى المقصات هى القطع اللى بتمسك المقصات فى باقى أجزاء العفشة....اللى هما
1- بيض المقصات ( أسمها control arm ball joint )
2- جلب المقصات ( أسمها control arm mount )

فى مقصات ينفع تغيرلها بيض و جلب و فى مقصات مينفعش و بالتالى لازم تشترى مقص لو البيض و الجلب باظوا.

و لو باظو هتلاقى بعض الأعراض اللى ممكن تظهر زى مثلاً طقة فى العربية من تحت لو بترجع ورا وبعد كده دوست فرامل

دى صورة عفشة أمامية لعربية بى أم مو 90



كل الأجزاء اللى أنت ذكرتها لو فى حاجة بايظة منهم هتأثر على ثبات العربية

[Ahmed Selim]

طيب شوف الموضوه ده الأول

وشوف أيه الناقص وقول عليه

أضغط هنا

سبقتنى يا باشا

[samirayad]

واحد ياريس
المصلحه واحده

[Strong]

شكرا على الردود يا جماعة

أنا وقعت في حفرة جامدة شوية زي مطب لتحت جامد على سرعة ، ومن ساعتها باسمع صوت خبطتين في الجنبين اليمين والشمال ، وفي فواصل الكوبري وفي أي طريق مش مسفلت كويس ، ولو الطريق مايل شوية والأسفت معووج

وكشفت على العفشة كل الناس بيقولولي سليمة بس أنا مش مقتنع بالذات إن في السرعات باحس زي ما يكون في الدريكسيون تعويم ومع الهواء شبه بافقد السيطرة على العربية في المشي،

لما العربية تمشي عدلة لقدام خلاص مش بتاخد يمين ولا شمال ، لكن لو جيت اتحرك سنة يمين أو شمال بأحس بشوية معاناة في التوجيه علشان كده مش بازيد عن 80 والزوايا والكاويتشات مظبوطة عند اكتر من واحد

ولما حد غيري يجرب يسوق بيقولي مفيش حاجة ، يمكن علشان هو بيسوق حتة صغيرة ، طب وازاي مفيش حاجة وأنا سامع صوت الخبط واااضح وعالي في المطبات

ففكرت أجرب أغير أي حاجة من دول يمكن تتحل المشكلة

[khalid9411]

خليه يجرب على السرعة الانت بتحس بيها بالظبط مش حتة صغيرة زى ما حضرتك بتقول

[Colin Chapman]

ما الفرق بن كل من

بارات الدريكسيون
بيض الدريكسيون
بارات الطرف
المقصات
بيض المقصات
التيش

ووظيفة كل منهما

وعلامات تلفهم

وهل يسبب تلف أي منهم تعويم على السرعات العالية ؟