عايز طريقة عملية لتنظيف السيارة من الخارج

[dr_abooody]

السلام عليكم

الواحد بجد زهق من البلد اللي كلها تراب دة

الواحد بيغسل العربية مفيش كام ساعة يلاقيها بقت متربة و اتوسخت

بما اني ساكن في المعادي يعني مصانع الاسمن بتاعت حلوان و المعصرة جمبنا

فبصحى الصبح بلاقي العربية عليها اسمنت بجد مش هزار

بما ان خبرتي مش قد كدا في التنظيف

معايا فوطة ناشفة كدا قطن بحاول انفض التراب دة مش بتعمل كويس

قولت اجيب فوطة مبلولة و امسح التراب قصدي الاسمنت و بعد كدا انشف بالفوطة الناشفة لقيت العربية جيرت

انا زهقت بجد

واحد يقولي هاتت حاجة كدا ريش دة بتنفض كويس

وواحد تاني يقولي هات فوطة زفرة ؟قولتلة يعني اية قالي فوطة و عليها زيت

انا الصراحة ما اقتنعتش و عايز حل جزري للموضوع دة

[spiky1]

فى فرشة كبيرة شوية كده هتلاقيها فى اى بنزينة سعرها من اول 25 لحد 35 جنيه ومعرفش الفرق ده فى ايه هى كويسة وبتنضف كويس بس بعد فترة من الاستعمال بتبقى مجرد فرشة عادية
واسمع ان الفوطة الزفرة غلط على بوية العربية لان كلها جاز و زيت

[ahmadmidop]

بصراحة ما فيش حاجة بتخلي العربية نضيفة الا الغسيل بالكامل وخصوصا الالوان الغامقة فانا العربية عندي عشان اسود مشكلة ياريت الاقيلها حل!!

[mooz55]

سبحانك اللهم وبحمدك ، أشهد أن لا إله إلا أنت أستغفرك وأتوب إليك

[A.Saad]

جرب الخل
وفكر فى غطا يكون قماشه تثيل
قماش خيام
ممكن تجيبه ب 100 او اقل من الوكالة اة تجيب ووتر بروف

[m7nsh]

ونا والله يا فندم بعانى نفس معاناه حضرتك ,, خصوصا و ان العربيه لونها اسووووود
انا مقضيها بالفرشه الكبيره دى ,, بتنجز و كويسه ,, بس اوقات لو فى حجات لازقه غير التراب هتحتاج فوطه عشان تلمع احسن
بس شكلى هلجأ للحل التقليدى وهو الفوطه الزفره ,, اللى لسه كنت بسال عليها من شويه فى موضوع

[aymansaad]

بالنسبة لظروفك الريشة افضل حل وياريت تغطيها

[dr_timo]

الريشة وبعدها تلميع بفوطة زفرة لكن الفوطة لوحدها مش هتنفع لانها هتشيل الاسمت وهيلزق فيها لكن الريشة في البلداية تطيره والفوطة تلمع

[gomangy]

السلام عليكم ورحمة الله وبركاته
الريشة وبعدها تلميع بفوطة زفرة لكن الفوطة لوحدها مش هتنفع لانها هتشيل الاسمت وهيلزق فيها لكن الريشة في البلداية تطيره والفوطة تلمع

[Amera]

انصح حضرتك بالغطاء الووتر برووف مش القماش وعن تجربه لانى كنت بعانى تقريبا نفس المشكله بس مع التراب مش الاسمنت ( الله يكون فى عونك ) وعربيتى لونها اسود ودى بتبقى مشكله لانه بيبان فيه اى تراب بس بيبقى شيك اوى وهو نظيف ، انا هحكى عن تجاربى مع كل الطرق للحفاظ على نظافه العربيه ولونها الاسود ،
أولا : الريشه بتنقل التراب من مكان للتانى مش بتشيله .
ثانيا : الفوطه الزفره هى فوطه عليها زيت اوجاز اوشحم او التلاثه مع بعض ودى بتاكل طبقه الشمع اللى بتحافظ على لمعان العربيه ومع الوقت بتاكل فى طبقه دهان العربيه .
ثالثا : الغطا القماش حلو بيحمى العربيه من التراب ومن التجريح بس لما بيتملى تراب بتلاقيه نزل على العربيه وبهدلها ولما بيتبل بيبهدل العربيه برضه ، فبعد كل التجارب دى الحمد لله توصلت للحل الانسب وهو الغطاء الووتر برووف بيحمى العربيه من التراب ومن الميه ومن التجريح ، لو عربيتك لونها بقى مش بيلمع انصحك تغسلها وتعملها بالشمع ( Armoll All Wax ) وهتبقى كأنك لسه مستلمها من المعرض وبعدها تبقى تغطيها بالغطاء الووتر برووف وابقى ادعيلى .

[MoHaMed HaMeD]

طب الغطا الوتر بروف ده حضرتك جايبه منين وبكام وموجود لكل العربيات وشكرا

[kind]

ب 100 من التوفيقية

[ahmadmidop]

متوافر كل الاحجام لكل العربيات