مشواري في تعلم السواقة "أ-ب-ت" سوا سوا

[Dr M.Noaman]

بسم الله الرحمن الرحيم

أنا لسه منضم جديد للمنتدى و لسه جديد جداً في موضوع العربيات كله سواء معرفة أنواعها ولا بتمشي إزاي العربيات دي أساسا ...

بصراحة مابدأتش أنتبه للموضوع دا إلا في وقت تخليصي للكلية وإن مشاويري هتزيد الفترة الجاية بحكم شغلي بأمر الله كطبيب وكمان دا أنسب وقت في رأيي إني أتعلم حاجة جديدة زي كدا خصوصاً إن فترة الإمتياز بتبقى فيها وقت كتير ولسه ما اتشوحتش في الجمهورية عشان التكليف

المهم ,,
حبيت أشارك معاكم كل حاجة هعرفها جديد بأمر الله في موضوع تعليم القيادة وهخليها على خطوات زي بالظبط ما بدأت أفهم الخطوات دي واحدة واحدة لأني بأمانة ماكنتش أعرف أي حاجة فعلا زي كتير من الناس بيتهيألي .. وهحاول أخليها على شكل قصة يعني

أول حاجة
كنت بأجرب العربية الجديدة مع صاحبي وبعدين قالي " شغل العربية " يعني اعملها contact فطبعا حطيت المفتاح في مكانه اللي ورا الدركسيون -الدركسيون هو الطارة بتاعت القيادة اللي بتلفها بإيدك- وبعدين لفيت المفتاح مع إتجاه عقارب الساعة وقمت راجع على طول فبطلت مني للأسف وما اشتغلشي الموتور ...
صاحبي قالي إني لازم أصبر شوية على المفتاح وأنا محركه لما أسمع صوت الموتور بيدور فأرجع حتة صغيرة ..
وقرأت في الكتالوج إن لو عربية مانيوال ممكن تحاول تدور الموتور في خلال 15 ثانية وأنت لافف المفتاح ولو مادرش فبتستنى 20 ثانية بعدين تحاول تدوره تاني ,,
وقرأت كمان إن لو عربية أتوماتيك ممكن تحاول تدور الموتور في خلال 15 ثانية وإذا مادراش تستنى كمان 15 ثانية بعدين تحاول تدور من جديد

ثاني حاجة :
في العربيات المانيوال هتلاقي عند رجلك 3 أماكن للضغط وهم
( البنزين - الفرامل - الدبرياج )
أما
في العربيات الاتوماتيك هتلاقي عند رجلك مكانين فقط للضغط وهم
( البنزين - الفرامل )

طبعاً تاخد بالك إن الرجل اليمين هي المسئولة بمفردها -وركز بمفردها- عن الضغط على البنزين أو الفرامل "أصلها الرجل الدقيقة" ...
أما الرجل الشمال هي المسئولة بمفردها -وركز برده بمفردها- عن الضغط على الدبرياج "أصلها الرجل الغشيمة".
طيب هنلاحظ إن مافيش دبرياج في العربيات الأتوماتيك فهنسأل إيه وظيفة الرجل الشمال .. فأحب أقولك مافيش ليها وظيفة فهتركنها وتنيمها ع الأرض كدا ماتعملشي بيها أي أي أي حاجة

ثاني حاجة
في العربية المانيوال العادية بتتأكد طبعا إن الفتيس -اللي هو العصاية اللي جنب السواق- في وضع المور (هنقول إن وضع المور دا بتبقى العصاية واقفة في النص واسمه وضع الحياد يعني تروس العربية كلها متعادلة في مكانها الأصلي لا واخدة وضع تمشي لقدام ولا واخدة وضع ترجع لورا) ...
هنعرف هنا إن فيه 7 أماكن في عربيات المانيوال اللي ممكن تجيب 5 سرعات ونحفظهم كدا :
1 - وضع المور "المنتصف"
2 - وضع السرعة 1 "يسار ثم أمام"
3 - وضع السرعة 2 "يسار ثم خلف"
4 - وضع السرعة 3 "إلى أمام المنتصف"
5 - وضع السرعة 4 "إلى خلف المنتصف"
6 - وضع السرعة 5 "يمين ثم أمام"
7 - وضع المارشدير أي الرجوع للخلف "يمين ثم خلف"

دي أوضاع المانيوال كلها ,, هيقابلها في الأتوماتيك
1 - وضع الـP ودا بيرمز إلى الParking ودا اسمه الوقوف الطويل "وطبعا بيدي للعربية ثبات ماحدش بيعرف يحركها طالما في الوضع دا وفيه عربيات كتير مش بتعرف تخرج المفتاح منها إلى وهي في وضع الP "
2 - وضع الـR ودا بيرمز إلى الReverse ودا وضع الرجوع للوراء "وطبعاً مش شرط تديله بنزين عشان العربية تمشي معاك لكن بمجرد ما تبقى في الوضع دا العربية بترجع لواحدها فوظيفتك أنك تحط رجليك ع الفرامل الأول لما تطمن أنك راجع بزاوية صح فتسيب الفرامل"
3 - وضع الـN ودا بيرمز إلى الNeutral ودا مثيل وضع المور في العربيات المانيول "وطبعا نفتكر تاني إن معنى الوضع دا إن التروس كلها بقت محايدة يعني مش واخدة وضع القيادة و لا وضع الرجوع , وفي نفس الوقت نعرف إن الوضع دا لازم نعدي عليه وإحنا بنحول من وضع الرجوع إلى القيادة أو بنحول من وضع القيادة إلى الرجوع عشان نظبط التروس بتاعت العربية بعدين نديها الوضع الجديد"
4 - وضع الـD ودا بيرمز إلى الDriving ودا مثيل السرعات في المانيوال لكن طبعاً في المانيوال كل سرعة ليها حركة لازم تتعمل إنما في الأتوماتيك فهو وضع واحد والعربية بتمشي منك لواحدها بعدين تقدر تسرع عليه , وزي ما اتعلمنا لما تدي العربية الوضع بتاع الـD لازم تحط رجلك ع الفرامل ولما تطمن إنك واخد زاوية صح تبدأ تسيب الفرامل بشويش وهتلاقي العربية ماشية لواحدها وأنت مش لامس البنزين بعدين لما تحب تزود السرعة تبدأ تضغط على البنزين بقى .


----------


كدا إحنا عرفنا ازاي تعمل كونتاكت للعربية .. و إيه الحاجات اللي بستخدمها برجلي دي وأنا بأسوق .. و إيه وضعيات الفتيس في المانيوال والأتوماتيك

أتمنى أكون أفدت كبداية ,, وهنكمل بأمر الله الباقي في نفس الموضوع هنا واحدة واحدة وزي ما اتعلمت ودورت هحاول أبسط وأوصل وربنا ييسرها ليا وليكم فهيفضل أنك تسمعها مرة على الطبيعة فقط وتاخد الجرأة ع الطريق

[lidosasa]

ملاحظة بسيطة
* متطولش فى الكونتاكت عشان متحرقش المارش يعنى أنا شايف موضوع 15 ثانية ده كتير

[Dr M.Noaman]

فعلا مفروض ماحدش يدور الكونتاكت وعشان كدا الأصل اللي ذكرته الأول هو "سماع صوت الموتور شغال" لكن أوقات -اضطرارا- لو ماعرفتش تجيبه على طول والماتور اشتغل معاك فاعرف إن معاك أقل من 15 ثانية فقط بفرق 20 ثانية بين كل محاولة والأخرى في العربيات المانيوال أو فرق 15 ثانية بين كل محاولة والأخرى في العربيات الأتوماتيك

شكرا على مرورك وتعليقك المفيد
lidosasa

[Dr M.Noaman]

صور توضيحية للدرس الأول

*
ما تضغط عليه قدمي السائق في سيارات المانيوال

http://imagecache.te3p.com/imgcache/ff84335463491cbe93f5d0f41737c75f.jpg

صورة حقيقية

http://imagecache.te3p.com/imgcache/7d448c40186e9527c4c20bbafaad0b8b.jpg

*
حركات الفتيس في سيارات المانيوال

http://n4hr.com/up/uploads/2ee21b78cf.bmp

[Dr M.Noaman]

بسم الله الرحمن الرحيم

النهاردة الدرس الثاني بقى ^_^

أول حاجة : تروح راجع الدرس الأول .

ثاني حاجة :
هنقول قواعد مهمة جدا جدا جدا لازم تبقى عارفها وإلا هتتلبخ والعربية هتبطل منك

قاعدة 1 : ممنوع ممنوع ممنوع تغيير نقلة بالفتيس في أي وقت إلا وأنت ضاغط على الدبرياج ضغطة كاملة وإلا هتكسر التروس جوه العربية .

قاعدة 2 : ممنوع ممنوع ممنوع تسيب العربية تقف وتشيل رجلك خالص إلا وأنت عامل الفتيس على وضع المور .

قاعدة 3 : ممنوع ممنوع ممنوع تبدأ تطلع بالعربية إلا لما تتأكد إنك منزل فرامل اليد اللي جنب مقعد السواق .

دول أهم 3 قواعد في القيادة ولو حفظتهم وعملتهم وانتبهت ليهم فأنت اجتزت 50 % من تعلم القيادة .. وقية الـ50% هتكون عبارة عن خبارات وحركات هتتعلمها معايا برده لكن لازم تتدرب عليها نظري مرة و اتنين لما تبقى حاجة طبيعية بتعملها من غير ما تفكر فيها حتى ..

انتظروووووونا في الدرس القادم .. ^_^

[hamed fadily]

حبيبى اتمنى لك الامتيازوالتقدم وشكرا على الموضوع الجميل
منتظرين المزيد من هذه الروائع المتميزه
بالتوفيق دائما ولك منى كل حب وتقديرواحترام

[Tamer_Fares]

[align=center][tabletext="width:70%;"][cell="filter:;"][align=center]دروس رائعه
و فى انتظار المزيد [/align][/cell][/tabletext][/align]

[omaranes77]

100 100 منتظر المزيد

[ahmedsaiedasa]

متابع انا معايا عربيه مانيوال بس احب اسمع وافهم اكتر عن الاتوماتيك والمانوال برضه

[alalfi]

متابع

[أسامه الحسيني]

موضوع مفيد جدا وانا بسوق بقالى يجي اسبوعيين بس بجد مش عارف ازاى اعرف ابعاد العربية بتاعتي - بمعني لما يبقي حد راكن علي اليمين وفي عربية علي شمالى بكون مش عارف المساحة الى امامي تكفي لان امر ولا لا وبطر انى اهدي علي الاخر وامر بهدوء شديد والموضوع دا تاعبني

[الصبر يارب]

ليه مش كملتوا الموضوع ما شاء الله حلو قوووي

[Dr M.Noaman]

ه النهاردة كان يوم تاريخي يا شباب .. امتحنت في السواقة ونجحت الحمد لله وهستلم الرخصة اﻷسبوع الجاي بأمر الله ... هبدأ أكتب كل اللي حصل معايا في مدرسة السواقة طوال الشهر .. وهحكيلكم عن اﻷخطاء اللي حصلت النهاردة لناس سقطت لﻷسف فاستنوني اﻷسبوع الجاي عندي تدريب وامتحان هخلصهم وأحكي كل حاجة ..... وبجد أنا فرحان أنكم استفدتم من كلامي وهحاول أفيد أكتر وربنا يوفقني لكدا

[أسامه الحسيني]

مبرووك الرخصة

[Dr M.Noaman]

مبرووك الرخصة

الله يبارك فيك يا رب .. تسلم ^_^