عاوز رايكم ونصائحكم ضروري اعمل ايه

[AHMED NS]

السلام عليكم جميعا ,,,, انا ربنا كرمني وخلصت ف عربيه اسبيرانزا 516 موديل 2009 حالتها كويسه والحمد لله بس حامل هم القياده لان دي اول عربيه ليا وتجربتي مع السواقه هي اني مشيت حوالي سبعين تمانين كيلو بعربيه دبابه نص نقل 2013 وبعديها جربت عربيه نوبيرا 2005 مسافه كيلو واحد لاني كنت هشتريها بس ما حصلش نصيب والتجربتين كانوا ناجحين ومكنتش مقلق من حاجه غير اني مش مدرك ابعاد العربيه كويس ,,,,,,, انا محتاج النصيحه الامينه من اهل الخبره وعارف اني هلاقيها هنا باذن الله واعمل ايه واخد بالي من ايه واركز علي ايه حفاظا علي شقا عمري وحفاظا علي الغلابه اللي قدرهم هيجيبهم ف طريقي وانا سايق علما باني محتاج أتقنها كويس لاني عطلان كتير في شغلي من غير عربيه

[shiko85]

وعليكم السلام ورحمة الله وبركاته
الف مبروك على العربيه و ربنا يديلك خيرها و يكفيك شرها
اهم حاجه المرايات بص فيهم خصوصا قبل ما تفكر تنقل من حاره لحاره
بلاش السرعه و حاول تسيب مسافة امان بينك و بين العربيه اللى قدامك و خلى بالك انت لسه متعرفش ابعاد العربيه
ركز فالطريق و مستعجلش
قوى قلبك و متخافش علشان الخوف هيخليك تتلغبط و مش هتركز بس بلاش تهور او جرئه زياده عن اللزوم و شويه شويه هتلاقى الدنيا سهله و هتتعود
بس اعمل صيانه للعربيه و غير السيور و الزيوت امان ليك

[AHMED NS]

وعليكم السلام ورحمة الله وبركاته
الف مبروك على العربيه و ربنا يديلك خيرها و يكفيك شرها
اهم حاجه المرايات بص فيهم خصوصا قبل ما تفكر تنقل من حاره لحاره
بلاش السرعه و حاول تسيب مسافة امان بينك و بين العربيه اللى قدامك و خلى بالك انت لسه متعرفش ابعاد العربيه
ركز فالطريق و مستعجلش
قوى قلبك و متخافش علشان الخوف هيخليك تتلغبط و مش هتركز بس بلاش تهور او جرئه زياده عن اللزوم و شويه شويه هتلاقى الدنيا سهله و هتتعود
بس اعمل صيانه للعربيه و غير السيور و الزيوت امان ليك

شكراً جزيلاً للنصيحه وربنا يوقف لك ولاد الحلال
ممكن اعمل صيانه ايه بالظبط دلوقتي انا لسه جديد

[shiko85]

شكراً جزيلاً للنصيحه وربنا يوقف لك ولاد الحلال
ممكن اعمل صيانه ايه بالظبط دلوقتي انا لسه جديد

العفو يا باشا
تغير الزيوت و الفلاتر و السيور و البوجيهات و تكشف على العفشه و تشوف حالة الكاوتش
العربيه ماشيه كام كم ؟ اخر صيانه كانت امتى ؟ و ايه اللي اتعمل فأخر صيانه ؟

[الصبر يارب]

طبعا انا لسي في السواقة جديدة بس اخرج بيها كتير الصح بدري عشان تتعود عليها وع ابعادها طبعا ده من كلام الاعضاء
والف مبررووووك عليكي العربية

[AHMED NS]

[size="5"]ربنا يبارك فيكم
عموماً العربيه عامله حاجه وسبعين الف و ان شاء الله بكره هعمل فحص للكلام ده وياريت لو حد عنده اقتراحات اوتحذيرات اوتعليقات يفيدني بيها وجزاكم الله خيراً [/size

[Lama]

أنا كمان جديدة في السواقة بس هقولك النصايح اللي بتتقالي و اللي انا بقع فيها
1-مالكش دعوة باللي وراك لانك في الاول بتكون ماشي براحة و تشوف الطريق و اللي وراك مابيشلش ايده من ع الكلكس ده بيوتر و ممكن يخليك تمشي بسرعة .. افضل حاجة انك تتجاهله تماما
2-التقاطعات خطر جدا و فيه ناس بتبقى جاية بسرعة منها و لا بيهمها لازم تهدي عند التقاطع و تتأكد ان مافيش حد جاي من اي تقاطع و تعدي
3-و انت بتحود احود في نفس حارتك و ماتحدفش على حارة اللي جنبك عشان ممكن تلافي عربية جاية بسرعة و ماشية في حارتها و انت تحدف عليها " ديه انا لسه مش عارفة ازبطها اوي"
4-خلي مسافة بينك و بين اللي قدامك ديه مهمة اوي و امشي بنفس سرعتهم عشان متطرش تقف فجأة
5-لو قفت تعدي كذا عربية لازم تجيب الاول عشان ماينفعش تطلع غير ع الاول "في الاول مكنتش بفتكر اغبر و اجيب الاول فكانت العربية مابترضا تطلع معايا و بتفصل و بوقف الشارع كله دلوقتي الحمد لله بقيت افتكر اجيبه "
6-انزل الصبح و الدنيا فاضية اتعلم لوحدك او لو فيه حد من اصحابك اللي بيعرفوا يسوقوا كويس و مش عصبي يبقى جنبك عشان لو ليه ملاحظات على سواقتك يقولهالك
7-حاول تدرب كويس قبل ماتنزل على الطريق حفاظا على عربيتك و على العربيات اللي حواليك

[J A G U A R]

الاعضاء تكرمو وجابو المفيد