تجربة استخراج رخصة قيادة أول مرة من مرور الأميرية

[DEVILRIDER]

هو مكانه فين بالضبط بقى ؟

[El Prince]

مبروك الرخصة، دة كدة انضف من السلام بكتير اوى اوى

السؤال بقى، دلوقتى الملفات اللى كانت فى السلام تبع عين شمس راحت الاميرية و لا لسة فى السلام؟ يعنى لو عايزين نطلع شهادة ولا أى حاجة نروح السلام و لا نروح الاميرية؟

و ياريت لو حد يقولنا مرور الاميرية دة فين اصلا؟

انا روحت سألت عشان رخصة قيادتى من السلام و ماشى بتصريح
رحت للظابط زوق جدا و قالى اجيب شهادة مخالفات و بيانات من السلام و اروح الاميرية و اعمل طلب نقل ملف و اتصور و تطلع كمبيوتر

هو بعد ميدان المطرية بشوية فى منطقة المصانع تخش شمال فى يمين فى شمال تلاقى نفسك قصاده و 1000 مين يدلك هناك

[Ahmed Metwally]

النقطة الزرقاء دى تبئى ميدان المطرية
والنقطة الحمراء هى المرور

ممكن توصله من ناحية شارع الكابلات
او من شارع المصانع .. اللى هو متفرع من شارع المطرية (ودى احسن سكة)

[omnia23]

بسم الله الرحمن الرحيم
فى البداية احب اقول بإختصار انى استفادت كتير من المنتدى هنا
وابسط حاجة الواحد يعملها انه ينقل تجاربه لباقى الأعضاء لعلها تفيد.

اول حاجة انا بحمد ربنا ان تراخيص "عين شمس" اتنقلت من مرور السلام لمرور الأميرية
لسببين .. الأول قد يكون معروف للناس وهو ان مرور السلام ده مش مرور عادى .. ده حاجة استغفر الله العظيم كده..
والسبب التانى ان مرور الأميرية بينى وبينه تقريباً ربع ساعة.

المهم نبدأ الرحلة

مرحلة الإستطلاع
يوم السبت
رحت على المرور اتفرج على الإختبار شكله ايه علشان اتمرن عليه
لاقيته اختبار لطيف نوعاً ما

اول حاجة إختبار الإشارات او الإختبار الشفوى
عبارة عن يافطة كبيرة عاملة زى اللوحات اللى بتتعلق فى فصول المدارس كده.. وعليها اشارات
(فى جوة المرور كشك بتاع تصوير .. بيتباع فيه كارت شبه اليافطة دى بالظبط .. ب 3 جنيه)
الظابط بيشاورلك على كام واحدة وانت تجاوب
لو جاوبت صح بيقول خش على اختبار السواقة

اول حاجة لفتت نظرى العربية اللى هتختبر عليها
بيجو بارتنر
عربية جديدة ونضيفة.. ومانيول طبعاً.

اختبار السواقة بتمشى زى ما فى الصورة كده
بتبدأ من النقطة السوداء وتمشى مع الأسهم وترجع للنقطة السوداء تانى


(صورة الإختبار)

بتاخد لفه واحدة وتقف وشكراً على كده .. مافيش رجوع بالضهر ولا حرف s ولا حرف u والكلام ده.


مرحلة التنفيذ
يوم الأتنين
رحت على المرور عاقد العزم على اداء الإختبار وركبى بتخبط فى بعضها
اول غلطة انا ارتكتبها انى رحت الساعة 10 وده كده متأخر جداً
المهم اول حاجة لازم تعملها انك تجيب ملف من الكشك بتاع التصوير اللى جوة المرور
وتروح تشكف باطنة ونظر عندهم فى الوحدة
لو جبت حاجة من برة هيقولك ماتنفعش
الكشفين بـ 50 جنيه
تقف طابووووور على النظر وبعد ماتخلص تقف طابووووور تانى على الباطنة
كشف عادى ومافهوش اى مشاكل ولا تلاكيك
بالنسبة لى كشف النظر الدكتور قالى انت مابتشوفش من غير النظارة للأسف لازم اعملك الشهادة بنظارة
قلت له وماله يا دكتور مافيش مشاكل ..
قالى عايزين صورة شخصية بئى بنظارة
طلعت من المرور فى استوديو اتصورت فيه فورى ورجعت له تانى حط الصور على الشهادة وشكراً
على ماخلصت الكشفين كانت الساعة بئت 11:30 رحت علشان احجز امتحان قالى مافيش النهاردة خلاص
رحت للظابط اقوله عايز امتحن .. قالى اخر معاد لحجز الإمتحان الساعة 11.. تعالى بكرة
عسكرى من اللى واقفين قالى هات كده اراجع معاك الملف
بص عليه وقالى هات من الخزنة اختبار شفوى (تقريباً بـ 10 جنيه) وتيجي بكرة تقدم الملف زى ماهو كده.

يوم التلات
كنت فى المرور الساعة 8:30 دخلت على الموظقة اديها الملف
بصت فى البطاقة .. ودار الحوار التالى
- انت الوظيفة ايه؟
- اخصائى برامج اليه
- عايزين المؤهل
- علشان ايه!!
- نطلع عليه .. لأنك مش موظف حكومة
- !!!!

رحت للظابط .. قلتله الوضع قالى معلش لازم المؤهل هنطلع عليه بس وهناخد صورة منه
قلت حاضر يا حكومة.. ومشيت

يوم الأربع
8:30 فى المرور ادام نفس الست اديتها الورق والمؤهل .. ودار الحوار التالى
- هاتلى مؤهل تانى غير ده
- !!!!!! ايه .. ده المؤهل اللى عندى
- معلهوش ختم ضاغط .. هات مؤهل الإعدادية لو عندك
- معنديش هو ده المؤهل اللى معايا .. ودى شهادة من الجامعة !!
- دى مؤقتة
- ماكل الشهادات مؤقتة .. شهادة حضرتك مؤقتة برضة
- خلاص هناخد الأصل
- ايييه .. مش هينفع انا واخد الأصل من الشغل وماضى تعهد انى ارجعه خلال 24 ساعة
- لازم ناخده وبعدين ده مؤقت
- ماينفعش طبعاً انتى قلتى هنطلع على الأصل وهناخد صورة
- روح اسأل الظابط

توجهت للظابط اول ماحكيت له راح ضاحك وماسك الورق وكتب عليه
صورة من الأصل + اقرار
رجعت للست قالتلى طيب هتكتب إقرار على ضهر الصورة انك حاصل على مؤهل كذا
قلتلها وماله
وخلصت الورق واديته لراجل واراها (شكله المدير بتاعهم)
راجع على الورق ومكانش عاجبة معرفش ليه .. بس انا عملت نفسى مش من هنا ونفضتلهم كلهم
المهم مافيش دقيقتين وسمعت حد بينده اسمى
رحت عنده ادانى البطاقة بتاعتى وقالى روح امتحن

كانت الساعة 9 ساعتها الإختبار بدأ الساعة 10:30
ترتيب الأسماء مكنش بترتيب الحجز
لأن انا رقمى كان 7 واتنده اسمى بعد 11 واحد تقريباً
وكان فى 3 او 4 منهم واسطة
هتقولى عرفت منين
اقولك لما واحدة توقع القمع وتدوس عليه وتنجح .. يبئى ايه؟... قول انت بئى
المهم جه عليا الدور
دخلت وركبى بتخبط برضة
بدأ معايا بالإشارات
الحمد لله كان بئالى يومين بحفظ فيهم وبسمعهم وانا نايم
سألنى تقريباً فى 5 اشارات
وبعد كده قالى اتفضل على العربية
رحت على العربية
وركبت
عجبتنى اوى العربية
فى عسكرى راكب فى العربية على طول
الراجل ده جدع جداً جداً جداً
اول سبب لأن وانا بتحرك بالعربية كان بيديني شوية توجيهات
لم هنا شوية .. هات عليا .. روح هناك
ولا بيقولك صباح الفل يا باشا ولا مبروك يا باشا ولا اى حاجة .. هو كده من نفسه
المهم .. عديت الإختبار الحمد لله
رجعت للظابط قالى يلا روح اتصور
قبل ما تتصور لازم تسلم الملف للست اللى خدته فى الأول
وهى بتسلمه لحد قاعد على الكمبيوتر وبيدخل البيانات بتاعتك عليه
بعد شوية اتنده اسمى ودخلت اودة التصوير
للأسف بيصورة بكاميرة ويب صغير كده بتطلع صورتك كأنك مجرم مجرم يعنى.
المهم بعد التصوير استنيت شوية على ما الصورة اتطبعت وموظف خدها غلفها وقصها وادهالى
ومشيت
كانت الساعة ساعتها حوالى 1:30
يعنى تقريباً قعدت هناك 5 ساعات

والحمد لله خرجت من المرور برخصة السواقة وانا عمال احمد واشكر ربنا إنها خلصت بالحلاااااال

بجد ربنا يكرمك انا برضه روحت مرور الاميريه عشان امتحن و قبل ماروح كنت عارفه الخطوات كلها من الموضوع بتاعك هيه زي ما وصفت بالظبط بس الفرق ان انا خلصت كل حاجه في يومين عشان اول مره روحت ١٠ و تاني مره روحت ٨.٣٠ امتحان الاشارات كان سهل بس للأسف مانجحتش في السواقه وقعت قمع و قالي تعالي بعد شهر ادعولي بقي ربنا يكرمتي و انجح المره الجايه انا صورت الظابط و هو بيورينا الامتحان بيتعدي ازاي و هحاول ارفع الفديو ان شاء الله

[fawaz2077]

هو مش مشكله عاى يعنى - الكشف جوة ب 50 ج + اختبار السيارة ب 25 ج
كده هايعرفوا يلموا فلوس من غير رشاوى بس صراحة حاجه كويسه جايبين عربيه محترمه للسواقه - بس اللى معجبنيش موضوع الاختبار الشفوى للاشارات - ده بيخليك تسقط اشارات لو مش حافظ الكلام بالنص حتى لو فاهم - لكن الكمبيوتر بينجحك اشارات لانك فاهم مش حافظ - انا شخصيا سقطونى اشارات فى مرور الاميريه بسبب انى مش حافظ صم -حتى قلتله انا فاهم مش حافظ قالى ده اختبار شفوى يعنى حفظ - واجلنى شهر كامل وصراحة اتخنقت ومرحتش تانى مع انهم محترمين جدا فى التعامل

[fawaz2077]

باركولى نجحت اشارات وطلعت الرخصه كمان العربيه البيجو سواقتها جميله جدا وتحفه بس ياريت ترحوا يوم سبت او خميس عشان تنجحوا فى الاشارات والسواقه

[Abdulrahman M]

10000 مبروك لحضرتك
بس ممكن تقولي التكلفة الكلية كام عشان أعمل حسابي + مواعيد المرور والأيام ؟

وشكراً مقدماً

[ahmedarab]

باركولى نجحت اشارات وطلعت الرخصه كمان العربيه البيجو سواقتها جميله جدا وتحفه بس ياريت ترحوا يوم سبت او خميس عشان تنجحوا فى الاشارات والسواقه

الف مبروك على الرخصة وعقبالي .... بس اشمعنى يوم الخميس او السبت ؟؟؟ وهل فية اى اختلاف او جديد في النظام فى الاميرية ؟؟

[Samer Makled]

بجد ربنا يكرمك انا برضه روحت مرور الاميريه عشان امتحن و قبل ماروح كنت عارفه الخطوات كلها من الموضوع بتاعك هيه زي ما وصفت بالظبط بس الفرق ان انا خلصت كل حاجه في يومين عشان اول مره روحت ١٠ و تاني مره روحت ٨.٣٠ امتحان الاشارات كان سهل بس للأسف مانجحتش في السواقه وقعت قمع و قالي تعالي بعد شهر ادعولي بقي ربنا يكرمتي و انجح المره الجايه انا صورت الظابط و هو بيورينا الامتحان بيتعدي ازاي و هحاول ارفع الفديو ان شاء الله

أخت امنيه
في انتظار الفيديو لو امكن
شكرا جزيلا

[Samer Makled]

الف مبروك على الرخصة وعقبالي .... بس اشمعنى يوم الخميس او السبت ؟؟؟ وهل فية اى اختلاف او جديد في النظام فى الاميرية ؟؟

+1

[Samer Makled]

في اي حد من اللي اختبرو رجع التراك بظهرو؟
ولا بتلف لفه كاملة وترجه تاني وخلاص؟

[Ahmed Metwally]

في اي حد من اللي اختبرو رجع التراك بظهرو؟
ولا بتلف لفه كاملة وترجه تاني وخلاص؟

مافيش رجوع بالظهر
خى لفة واحدة فى اتجاه واحد

[Samer Makled]

مافيش رجوع بالظهر
خى لفة واحدة فى اتجاه واحد

طب ايه الصعب فيها؟ الأمع اللي تحت كان مزنوق مثلا ؟

و انا من عين شمس , فكل الرخص الخاصة بأت تبع الأميرية (عين شمس شرقيه وغربيه؟ مساكن عين شمس والزهراء .... الخ؟)
سؤال أخير , في مدرسه تعليم تبع مرور الأميرية؟
شاكر سعة صدرك

[mohannad_egy]

تحربة الرخصة

انا بردو رحت يوم سبت عشان اطلع الرخصة الحمد لله نجحت في اختبار الاشارات لكن دوست على حرف القمع من غير ما اوقعه والظابط قالي انزل وتعالا بعد شهر ...المشكلة ان العربية سريعة نوعا ما عشان كده كنت ماشي بالدبرياج بس لحد ما وصلت نقطة فيها قمع على شمالي وعلى اليمين كاوتش مفرود جنب الرصيف عشان يضيق الحارة دي شوية وفيها دوران للشمال ...فلازم تتعدى سنة سنة بنزين لكن قدر الله وماشاء فعل ..كنت اتمنى الاقي حد مصور اختبار القيادة ده فيديو عشان الكل يستفيد وياريت اللي يروح يمتحن وهو واقف مستني دوره كده يصور الامتحان ويرفعه على المنتدى للافادة.

[Samer Makled]

انا بردو رحت يوم سبت عشان اطلع الرخصة الحمد لله نجحت في اختبار الاشارات لكن دوست على حرف القمع من غير ما اوقعه والظابط قالي انزل وتعالا بعد شهر ...المشكلة ان العربية سريعة نوعا ما عشان كده كنت ماشي بالدبرياج بس لحد ما وصلت نقطة فيها قمع على شمالي وعلى اليمين كاوتش مفرود جنب الرصيف عشان يضيق الحارة دي شوية وفيها دوران للشمال ...فلازم تتعدى سنة سنة بنزين لكن قدر الله وماشاء فعل ..كنت اتمنى الاقي حد مصور اختبار القيادة ده فيديو عشان الكل يستفيد وياريت اللي يروح يمتحن وهو واقف مستني دوره كده يصور الامتحان ويرفعه على المنتدى للافادة.

طب انهي قمع علي الرسمة اللي في اول صفحة اللي عملين فيه الحركه دي؟
اللي تحت خالص ده؟