دليلك للحصول علي رخصه قياده و اجتياز اختبار الاشارات و السواقه

[moamen2015]

بسم الله الرحمن الرحيم

اولا احب ان اشكر المنتدي علي الخدمات الكتير الي بيقدمها لمستخدميه و انا شخصيا استفدت كتير جدا من المنتدي .. مفيش اي حاجه كنت بحتاج اعرفها مبلقيهاش هنا بجد ..

نتكلم في الموضوع بقا .. انا من الناس الي نادر جدا ما بكتب مواضيع في منتديات و كلام زي كدا بس لما جيت ادور عالنت علي الاجرائات بتاعت الرخصه لقيت معلومات بسيطه جدا و مواضيع مكتوبه من سنين تقريبا مبقاش دا الي بيحصل علي ارض الواقع دلوقتي .. فا حبيت اشارك الناس تجربتي و معاناتي و رحلتي في استخراص الرخصه :D علشان الناس كلها تستفيد

__________________________________________________ ___________________________

انا تبع مرور فيصل و طبعا الاسم غني التعريف يعني كل حاجه رشاوي و فلوس و مفيش اي حاجه بتمشي قانوني .. بسوق تقريبا بقالي سنه و روحت من 6 شهور كدا اختبر و قولت اجرب انا هخسر ايه انا كدا كدا معيش اي واسطه فا اشوف الدنيا هتمشي ازاي .. المهم روحت و سقط اشارات و قالولي تعاله بعد 3 شهوي
جالي اكتئاب من كل حاجه و كرهت السواقه و العربيات و ان كل حاجه بتمشي في البلد دي بالواسطه و الرشاوي المهم عدو ال 3 شهور و كمان 3 شهور لما زهقت مش عارف اروح اي مشوار بالعربيه ولا اخرج بيها المهم مش هطول عليكم بقا ..
__________________________________________________ _______________________

المتطلبات :

1- عدد 5 صور شخصيه
2- عدد 5 صور للبطاقه الشخصيه
3- ملف استخراج رخصه سواقه خاصه اول مرة بكل مشتملاته (18 جنيه )
4- شهاده باطنه و شهاده نظر .. بيتعملو من اي عياده جنب المرور اسئل اي حد هناك هيقولك ( مش شرط تشتريهم في الاول ممكن بعد ما تنجح خالص في الاختبارات تبقا تجيبهم ) 30 جنيه الشهادتين
5- 75 جنيه رسوم استخراج الرخصه إن شاء الله بعد ما تعدي كل الاختبارات

__________________________________________________ _______________________

مواعيد العمل

دلوقتي عملو نظام جديد كدا مش عارف دا في كل المرور ولا فيصل بس المهم انا بولاق الدكرور فا قالولي تيجي سبت او حد و العمرانيه يوم الاثنين و هكذا كل مكان ليه ايام محدده علشان الزحمه و كدا

__________________________________________________ ________________________

الخطواط و بعض التعليمات الهامه

1- اهم حاجه تبقا هناك الساعه 8 لازم لازم لازم تبقا واقف قدام الباب الساعه 8 لو 8:30 هتلاقي الدنيا اتزحمت جدا و الموظفين مش طايقين الناس و مش هتعرف تنجز نفسك انما لما تروح بدري تعرف تخلص كل حاجه بالهدوء و الانجاز

2- هتلاقي ناس واقفه برة عالباب بتقولك ''تنجز يا بيه ؟؟'' ملكش دعوة بيهم

3- متشتريش اي ورق من برة المرور كل الورق الي انت عايزة هتلاقيه في مكتبه المرور جوة كشك في النص كدا فيه كل حاجه و مكنه تصوير و كل حاجه

4- هتشتري ''ملف استخراج رخصه خاصه اول مرة'' ب 18 جنيه .. و تاخده زي ما هوة كدا متعملش فيه اي حاجه و تطلع علي المكتب الي فيه اختبار الكمبيوتر هتديه للموظف الي واقف و معاه صورة شخصيه و صورة البطاقه و تستنا ينادي علي اسمك علشان تدخل تمتحن الاشارات

5- علشان تنجح في اختبار الاشارات دا في ملزمه pdf معرفش الي جابها دا جابها منين بصراحه الاختبار كله جيه منها اهم حاجه تذاكرها كويس لانها تقريبا طبق الاصل من الاسئله الي موجوده علي السيستم فا تذاكرها و تفهما كويس و دي حصري لمنتدي نايل موتورز و إن شاء الله تعدي انا عن نفسي جبت 100%
نزلها من هنا _____ - Download - 4shared - MoU'min Déro

6- بعد ما بتنجح من اختبار الاشارات بيطلب منك صورة شخصيه تانيه و يديلك ورقه تمضي عليها و بيسلمك نتيجه الاختبار علشان تنزل بيها اختبار السواقه .. دلوقتي انت عندك اختيارات

--انك بتاخد نتيجه الاختبار و تنزل تختبر السواقه علي طول
--او انك لو مش معاك عربيه دلوقتي ممكن بتسيب نتيجه الاختبار الكمبيوتر و تيجي تاني يوم تمتحن السواقه ( انا شخضيه عملت كدا مكنش معايا عربيه فا مشيت و سيبت الورقه معاهم و روحت تاني يوم قولتلهم اني نجحت في الاشارات و سايب الورقه معاهم فوق و دخلت امتحنت السواقه )

7- نيجي بقا لاختبار السواقه .. انت دلوقتي عديت حوالي 50% من الاجرائات و نجحت الحمد لله في الاشارات هتروح بقا تختبر سواقه .. خلي بالك اللجنه بتيجي من 8 ل 10 بس فا لازم تخلص الاشارات بدري علشان تلحق لجنه اختبار السواقه دا لو هتختبر في نفس اليوم


زي ما انت شايف الاختبار بيبقا 6 اقماع علي 3 مراحل .. الاختبار مرة واحده فقط مينفعش يتعاد و لو و انت طالع قدام و معرفتش تظبط نفسك في الملف ميتفعش ترجع لورا .. و لو العربيه بطلت او لمست القمع بيتلغي الامتحان و بتسقط اهم حاجه في الموضوع كله القمعين الي في النص دول لازم تخدهم و انت بتلف براحه جدا و علي مهلك و انت راجع نفس النظام و تظبط مراياتك و الكرسي بتاعك علشان تبقا مرتاح

الموضوع بسيط جدا و الله بس محتاج شويه تركيز و سينس و يفضل لو العربيه باور و اوتوماتيك يبقا احست او اي عربيه صغير سيات او 127 هو مبيسئلكش دي عربيه مين اهم حاجه تعمل الاختبار و لو معاكش عربيه ممكن تاجر عربيت المرور بي 35 جنيه بس مش مستحب يعني لازم عربيتك علشان تبقا متعود عليها

المهم بعد ما بتنجح من اختبار السواقه بتطلع تاني مبني المرور و تستني يبعتو الورق بتاعك من تحت انك خلاص نجحت في السواقه و بينادو علي اسمك تخلص بقيت الورق بتاعك و تديلهم صورتين و صورة البطاقه بتاعتك و بتتدفع الرسوم 75 جنيه و بتستنا ينادو عليك تاني علشان تتصور و تستلم الرخصه و مبروك عليك يا معلم

ارجو ان يكون الشرح و افي و اكون رديت جزء بسيط من الي استفدته من المنتدي و اي استفسار انا متابع

[amr011111]

مشكور
وألف مبروك على الرخصه

[semo911]

شكرااااااااا جدااااااااااااااااا

[Ahmed Tarek 00]

ألف مبروك على الرخصه

[ahmed atiaa]

ألف مبروك

ألف مبروك على الرخصة... أنا إن شاء الله رايح بكرة الإمتحان وللأسف مش عارف أحمل الملف لو في رابط تاني ابقى متشكر جدا لحضرتك

[juba8]

شكرااااااا الله يكرمك