الرجاء المساعده فى اختيار الشيروكى المناسبه

[totty]

اخوانى الاعزاء تحيه طيبه و بعد .....للاختصار ...انا كان معايا مرسيدس 200 موديل 2000 قعدت معايا سنه و بعتها لظروف و جبت مرسيدس سي 180 موديل 1999 لانى طول عمرى ماباركبش غيره و كنت قافل دماغى عليه المهم العربيه دى كانت مريحانى جدا لمدة 3 سنين لانى كنت واخدها عامله حوالى 65000 كيلو و عملت بيها 200000 كيلو و خلصت عليها و بعدين دماغى مالت على البى ام بعد اسعارة ما وقعت و اخدت عربيه واحد صاحب والدى كان جايبها من الزيرو العربيه 523 موديل 2000 عامله حوالى 250000 كيلو كلهم سفر لان شغله فى الغردقه و بيروح وييجي كل اسبوع المهم العربيه تحفه من كل النواحى لكن انا ركبت مع واحد صاحبى الشيروكى موديل 1998 عامله حوالى 150000 كيلو وهى 6 سلندر العربيه بستطنى جدا و بافكر ابيع عربيتي و اشترى واحده تكون موديل عالى ارجو منكم الافاده و اى موديل افضل فى الجيب لان البى ام بتاعتى مش بتاعت شقا و انا شغلى فى السويس و باسافر مره او مرتين فى الاسبوع و كل مشاويرى حمولات تقيله الرجاء الافادة و اسف على الاطاله و شكرا مقدما لكن من ابدى رايه ......

[totty]

متابع و باهتمام بالغ

[ALMAGICO]

هو حضرتك عايز جيب اية يعنى شيروكى ولا رانجلر ولا ليبرتى ولا جراند

[totty]

اشكر اهتمام سيادتك بالموضوع ...انا مهتم بالجيب الشيروكى ......و شكرا

[ALMAGICO]

فى حضرتك الجيب شيروكى موديل التسعينات ولكن من 98 الى 2002 دة الشكل الجديد اللى هو تلاقى فية كرف فى الفانوس الخلفى وتلاقى فانوس الاشارة فى الصاج بتاع العربية ودية زى اللى حضرتك ركبتها وفية اللى هو قبل 98 اللى هو موديل 97 و96 وهكذا ولكن على ماعتقد ان الاختلاف بينهم مش جوهرى يعنى الموتور واحد اختلاف فى الشكل بس وبعض الحاجات البسيطة والله واعلم الموديلات دية فية منها 4 سلندر 2500 سى سى 130 حصان ومنها 6سلندر 4000 سى سى 195 حصان ال 4 سلندر موفرة فى البنزين ولكن كقطع غيار هتتعب فى التدوير ولكن هتلاقيها ان شاء الله اما ال6 سلندر قوة وعزم شديد وطبعا حضرتك شوفت قطع غيار موحودة بكثرة اكتر من ال 4 سلندر ولكن بتاخد بنزين اكتر من ال4 ولكن فى المقابل القوة الجبارة والعزم الشديد الشيروكى عامة يستحمل جامد وميقولش لا لاى حاجة عربية بتاعت شقا بس تاخد بالك منة وتعملة الصيانة الدورية ومتسبش العطل يكبر لانها لو وقفت منك وسبتها هتجر معاها حاجات كتير الشيروكى عفشتها ناشفة شوية لو قارنها بالبى ام ولكن دة لانها مصممة للطرق الوعرة المهم ان حضرتك لو هتشترى اكشف عليها جامد بالنسبة للاسعار فى موضوع كان معمول عن اسعارها ممكن حضرتك تبص بصة علية فى بعد كدة الحيب الليبرتى معلوماتى عنها مش كتير اوى ولكن فى ناس اشتكت من ثباتها وفية الشيروكى الجديد والغيط الوقت محدش اشتكى منها والله واعلم وشوف حضرتك باقى الاعضاء واى استفسار انا فى الخدمة

[totty]

بارك الله فيك يا اخى و فى انتظار اى مشاركات اخرى من باقى الاعضاء

[totty]

مازلت متابع و باهتمام

[totty]

استاذى الفاضل الماجيكو ....دلوقتى انا قدامى عربيه شيروكى 6 سلندر موديل 2001 كامله اتوماتيك صاحبها عاوز يدخلها فى عربيتى البى ام هل عند حضرتك معلومات عنها و تعمل كام لو فابريكه بره و جوه و لونها زيتى ...و ازاى اقدر افحصها كويس ...مع الشكر

[ALMAGICO]

الشيروكى 2001 6سلندر عربية ممتازة جدا
ولكن مشكلتها انها 6سلندر يعنى بتاكل بنزين كتير شوية بمقارنتها بال4 سلندر
ولكن مقابل البنزين الكتير الا ان حضرتك هتلاقى فيها مايميزها عن ال 4 سلندر
اولا قوة جبارة موتور 4000 سى سى 6سلندر 12 صمام ينتج 193 حصان عند 4600 rpm وعزم 329 نيوتن عند 3200 rpm
وتسارع من صفر الى 100 فى 8.7 ثانية تسارع جيد
ثانيا قطع غيار متوفرة عن ال4سلندر وارخص منها وهتلاقى دة كلة حضرتك فى الحرفيين وشارع شامبليون
ناقل الحركة 4 سرعات اوتوماتيك و5 مانيوال
العربية كسعر تعمل فى حدود من 92 الى 95 الف ومتزيدش لو نادرة تعملها 95 الف وحاول تقلل فى السعر
العربية زى محضرتك بتقول كاملة يعنى فرامل abs وسائد هوائية وهكذا
ويارت لو حضرتك تقدر تنزل للعربية كام صورة كدة
بالنسبة للفحص ممكن حضرتك تشوف اى مركز خدمة عشان تبقى فى السليم هو كان فية مركز خدمة كان بيقول علية مينا بية عضو محترم جدا جدا وخدوم اوى المركز دة فى الاوتوستراد فى صقر قريش المركز اسمة جيبولى اصحابة كانوا شغالين فى توكيل جيب
وحضرتك بتكشف على الكوارين وبتكشف على فتيس الغرز وهكذا
ومثبت السرعة ابقى بص علية
الشيروكى اهم حاجة فيها انك تاخد بالك منها ومن صيانتها خدت بالك منها مش هتقولك لا على حاجة
بس خلى بالك العربية موديل 2001 يعنى اسال فى المنتدى ضريبتها هتكون كام اللى انا اعرفة ان لو عدى عليها 10 سنين ضريبتها هتكون 1160 اسال برضة عشان لو معداش عليها العشر سنين تقريبا هتدفع كتير واللة اعلم اسال اوى فى النقطة دية
واى استفسار انا فى الخدمة

[totty]

استاذى الفاضل الماجيكو انا شاكر لسيادتك جدا المعلومات القيمه و جارى التفاوض مع البائع حول فرق السعر بين عربيتى و عربيته و الله الموفق ....اشكر سيادتك مرة اخرى على اهتمامك و ذوق سيادتك العالى

[ALMAGICO]

ياباشا لا شكر على واجب

المهم بس حضرتك تكشف عليها كويس وباذن اللة ربنا يوفقك ويديك خيرها انشاء اللة

[rompo10]

بي ام طبعا احسن منها ولا انت شغلك في جبال