إستفســـار عن العيــوب الشهيــرة فى الجيــب الشيــروكى

[zoro]

السلام عليكم
ازيكو يا جماعة ، الصراحة دي أول مشاركه ليا في المنتدي ، انا ناوي اشتري شيروكي أوتوماتيك 6 سليندر
و كنت عاوز أعرف هل فيه عيوب مشهورة للشيروكي
لأني كل ما اجييب سيره اني بدور على سشروكي قدام معارفي ، يقولو دي عربية مشاكلها كتير
و لما أسأل ايه هي المشاكل دي ، يقول معرفش بس أنا سمعت من فلان و هكذا
لو حد يفيدني أكون متشكر

[Nader]

اهلاً بيك يا زورو

انا هقولك ما سمعتة "ايضاً" عن الشيروكي عاماً والاوتوماتك خاصاً ان ابرز عيوبها انها حريقة بنزين عايز بنزينة وراها.

عموماً الجيب هي من وجة نظري اصل ال4*4 واعتقد ان الهيئة العربية للتصنيع هي البتجمعها دلوقتي.

[جندى مجند]

شوف أنا معنديش فكرة عن الشيروكى لكن اللى أعرفه عن الشيروكى ليبرتى انها صيانتها محتاجة ثروة ... لى صديق لدية شركة تأجير عربيات و عنده ليبرتى ... بيحكيلى انه من ضمن صيانات العربية الدورية فى تغيير زيت جيربوكس عند 60 ألف كيلو ... تفتكر اتكلف كام؟؟؟

العربية بتاخد 16 لتر زيت جيربوكس (نعم الرقم صحيح مش غلطة مطبعية) ... و اللتر سعره 100 جنيه ... يعنى 1600 جنيه تمن تغيير زيت جيربوكس لوحده!!

[Karim_Monir]

اكتر واحد يفيدك هو زميلنا مهندس حازم حزة
لانه معاه واحدة

[fahd_628]

هية فعلا حووووووووت بنزين

[Karim_Monir]

ابعت لاستاذ حازم حزة علي الخاص اللينك بتاع الموضوع عشان كان في اجازة وتلاقية ماقراش كل المواضيع

[Kisho]

بالنسبه للشيروكى ال 2005 ليبرتى و عن تجربه

1- استهلاك البنزين فى المتوسط 16 ليتر لكل 100 كيلو
2- موتور قوى جدا
3- عافشه و نظام تعليق ضايع فى الملفات و المطر لا يوجد ثبات حتى مع الدفع الرباعى
4- نظام دفع رباعى يكسف (بتغرق فى شبر رمله)
5- مريحه فى السفر
6- تكيف جيد مقارنتا بحجم السياره الكبير


و شكرا

[h_hezzah]

انا برضه ماقدرش افتى كتير قوى فيها.
بس هى معايا دلوقتى بقالها حوالى اربع شهور وممكن اقولك اللى جمعته عنها.
هى مبدأيا انا جايبها لغرض خاص وهو انى غاوى ادخل فى الصحراء ولقيت ان الشيروكى مناسبة للغرض ده وصيانتها اكيد اسهل بسبب انتشارها .

انا اول ماجبتها غيرت كل الزيوت اللى فيها.
هى فعلا زيوتها كتير قوى بس مش مأسوية زى ما "جندى مجند" بيقول
فيه زيت كورونا قدام، وكورونا خلفية وفتيس الغرز، وده زيت فتيس عادى جبت جركل 4 لتر وكفا الكل سعره حوالى 45 جنيه.
زيت الفتيس الاوتوماتيك بيتغير جزئى مش كله حوالى 6 لتر ولو عايز تغير كله (بس فيه لازم تفك الفتيس من بعضه) حوالى 14 لتر. بس انا قريت عالنت وفى ال Service Manual وقايلين انه بيتغير جزئى بس. وده اللتر ب 14 جنيه
وفيه اضافة لزيت الكرونة الخلفية (علبة دواء كده :) Friction Modifier) دى كانت ب90 جنيه
الموضوع ده كله كلف حوالى 250 جنيه (مش 1600!!) عادى يعنى .
طبعا دى اسعار خارج التوكيل فى مركز خدمة خاص. هو بس الملحوظة اللى قالهالى مهندس المركز ان التغييرة دى كل 20 الف مش 60 وفى ال Serv Manual مكتوب 36!
يعنى ممكن تبقى كل 30-40 الف.

استهلاك البنزين عالى طبعا، بس ده كل العربيات ال 4*4 كده. ماينفعش تقارنها بالاوبترا طبعا. بس ممكن اقولك استهلاكها معايا
الاستهلاك اليومى 13-15 لتر /100 كم مع ملاحظة انى ساكن فى الرحاب فنص طريقى طوالى
فى السفر انا لسه راجع من الغردقة كان الاستهلاك فى الرايح 11.5 لتر/100 والراجع 14/100 (علشان عكس الهواء) وماشى اغلب الوفت على 130-140 فأظن انه معقول لو قارنتها بغريتى السابقة (اوكتافيا) كانت بتستهلك اليومى 9-10 لتر/100 وفى مشوار الغردقة رايح 7.5 وراحع 11 لو ماشى بنفس السرعة او اسرع شوية.
يعنى تعمل حساب مصاريف بنزين حوالى مرة ونص اللى بتدفعه فى عربية 1600.

العيوب بقى .
1- ناشفة جدا فى المطبات واى هزة فى الطريق بتحس بيها
2- ضيقة شوية فى القاعدة وخاصة الكنبة الخلفية
3- طبعا ثبات ماتقارنوش بعربية سيدان بس لو سواقتك معقولة ماتحسش بمشكلة ثبات قوى

الميزات:
1- القاعدة العالية بتخليك كاشف الطريق تماما ومريحاك.
2- قطع الغيار مش غالية قوى (خارج التوكيل) ومتوفرة وفيه منها درجات كتيرة وانت واللى عايز تدفعه.
3- طبعا اهم حاجة انك هاتعدى فى اى حتة وانت مش همك سواء مكسرة او رملة او مدقات
4- اغلب العربيات بتعملك حساب وبتوسع (بما فيهم بعض الميكروباصات)

يعنى. لو ليك اى استفسارات تانية انا فى الخدمة :lol:

[zoro]

انا متشكر ليكو يا جماعة
و شكرا ليك يا أز حازم على المعلزمات الدقيقة
و تقريبا كدة هتكل على الله و اجيب واحدة لأني غاوي سفريات و رمل و بحر و بر و حاجات من دي
و العربيه برضه ليها هيبه على الطريق زي ما انت عارف
و أول ما الاقي حاجه هستشيرك في المواصفات و السعر و الحالة برضه
قبل ما أشتري

[h_hezzah]

وانا فى الخدمة فى اى وقت

بس برضه زيادة تأكيد بالنسبة للنشوفية على الطريق
انا لسة راجع من اسكندرية ومراتى قالتلى انا اخر مرة اسافر معاك بالعربية دى!

انا مابطلتش رج من ساعت مامشينا

[Adham]

أيوة صحيح

أنا لسة جايب فورنتيرا بعد مقارنة شاملة مع الشيروكي و استقريت عليها لأنها أريح و أوسع و موتورها أقوى و اعتقد كمان انها بتوفر بنزين

و بالنسبة لقع غيارها هو بس حاجات بسيطة اللي مشتركة مع بين الفرونتيرا و الشيفرولية الفاستر النص نقل (الشبكة الكبوت الرفارف الاكصدامات وبس)
انما بالنسبة لقطع غيارها فهي رخيصة يعني انا من اول ما جبتها جبت تيل فرامل امامي ب 55 جنية و جبت مساعدين ب 250 للجوز بس لسة مش عارف قطع غيار الموتور عاملة اية لان موتورها طبعا غير النص نقل خالص حيث ان موتور الفرونتيرا بيبقى بنزين 3200 سي سي 24 صباب 6 سلندر بشكل حرف في و هو مثيل لموديل موتور الايسوزو الروديو و الهوندا الباسبورت لان الفرونتيرا بتنزل بكذا اسم لنفس السيارة في كذا بلد

تحياتي

[elkodsy]

ممكن اي حد يرد عليا لو سمحتم ويقولي مميزات وعيوب البيرتي ال 4 سيلندر اية؟ اصلي انا بصراحة بحب العربية دة اوي طبعا انا عاوز 4 سيلندر لانها هتكون ارخص من ال6 سيلندر؟
شكرا

[Adham]

والله يا أستاذ قدسي اللي اعرفة ان ال 4 سلندر بيبقى ضعيف قوي على العربيات ال 4*4 و العربيات دي تقيلة و عاوزة مواتير شديدة بالذات لوحاتمشي بيها في رملة و سفاري و كدة وكمان الموتور لما يكون ضعيف عالعربية ما بيعيشش كتير - بيبقى معدل إهلاكة اسرع

و اعرف ان عفشة الشيروكي ناشفة و بتخللي العربية متعبة عالطريق و بتدب جامد

و أخيرا كمان ان الثبات بتاعها مش كويس علشان الليبرتي بالذات عالية قوي وكنزة (مش عريضة) فابالتالي مش راسية عالارض في الملفات عالسرعات _ اكتر من الشيروكي القديم

[Adham]

غير طبعا ان استهلاك البنزين و ارتفاع اسعار قطع الغيار

لاحظ ان قطع غيار الشيروكي ليبرتي اغلى من اسعار انواع كتير من العربيات ال 4*4 التانية

أعتقد ان ال 4 سليندر اتوقف انتاجها و اللي بينزل بس 6 سلندر دلوقتي- مش مؤكد

[husseinanan26]

يا جماعه انا قدامى واحده موديل 2002 ماشيه 132000كم
فابريكه و بالتلفون
مطلوب فيها 155000جم
ادوس فيها ولا غاليه؟؟