أستفسار عن جيب شيروكى موديل 1993 حتى 1998

[MaNoLa]

واحد قريبى كان نازل مصر هنا حوالى 6 شهور و مسافر تانى
سألنى أية أحسن عربيه ممكن يجيبها مستعمله و فى نفس الوقت تكون رخيصة و كبيرة
لأنه كدة كدة هيركنها أو مش عارفة هيعمل أية بعد ما يقضى الـ 6 شهور دول

طبعا قولتلة على أنواع كتيرة أوى بس لما جيت مرة واحدة قولتلة على الجيب شيروكى موديل 1993 حتى موديل 1998 قالى دى تعمل فى حدود كام كدة قولتلة حوالى 40 ألف لموديل 1993 و حوالى 50 ألف لموديل 1998 أو أكتر حاجات بسيطة جدا

مش دة موضوعنا الموضوع حاليا أننا لما جيت أدورلة على شيروكى على النت لقيت فيه 2500 سى سى و فيه 4100 سى سى و مش عارفة أية الفرق لأن الأتنين فيهم تكييف و يعتبروا زى بعض بالظبط

يا ريت حد يقولى أختيارى كدة كان مناسب له ولا لأ ؟
و شوية معلومات عن الجيب شيروكى موديل 1993 لحد 1998 و أية الفرق بين 2500 سى سى و 4100 سى سى

[ALMAGICO]

اولا حضرتك فى فرق بين موديل 1993 وموديل 1998 وتقدرى حضرتك تشوفى الفروق من برة وحتى الصالون متغير تماما
الفروقات من برة فى كرف فى الفانوس الخلفى والمرايات وكمان فانوس الاشارى فى جسم العربية نفسها
بالنسبة للاسعار لو حالة تظيفة هتزيد عن السعر دة لان 40 الف ميجيبوش شيروكى وحتى 50 الف بالنسبة للموديلات من 1992 الى 1997 ميجيبوش حاجة نظيفة اوى يعنى هتزيد شوية وكلة حسب الموديل والسنة ودة فيما يخص موديلات 1992 الى 1997 اما من موديلات 1998 الى 2001 هتزيد كتير وكلة حسب الحالة
نيجى بقى لنقطة ال2500 سى سى وال4000 سى سى
2500 سى سى 4 سلندر 130 حصان كلة مانيوال مفيش اوتوماتيك
ميزتة انة اقتصادى فى البنزين مقارنة بال6 سلندر
4000 سى سى 6 سلندر 190 حصان فى منة مانيوال واتوماتيك
ميزتة القوة الجبارة طبعا وكمان قطع غيارة متوفرة عن ال4 سلندر ودة مش معناة ان ال4 سلندر ملهاش قطع غيار لا ليها وهتلاقيها بس دة اكتر وكمان ميزتة ان اسعار قطع غيارة ارخص من اسعار قطع غيار ال4 سلندر
ولكن زى مقولت القوة الجبارة دى كلها هتسحب بنزين اكتر من ال4 سلندر
وطبعا الاختيار بين الموتورين بيبقى بناءا على احتياجاتى هل انا هدخل صحرا وكدة عشان كدة هحتاج الموتور ال6 سلندر ولا مش هدخل صحرا وتعاملى كلة على الاسفلت فى الحالة دية اختيارى هيبقى الموتور ال4 سلندر
ودة طبعا بجانب مثبت السرعة اللى موجود فى ال6سلندر والكراسى الكهربا يعنى شوية اوبشن
وعامة الجيب شيروكى عربية محترمة جدا جدا جدا وقطع غيار معمرة جدا جدا لو اصلية ولو فى اهتمام بيها مش هتسمعلها صوت
والله اعلى واعلم فيما قلت

[ahmed_eng2001]

انا موافق حضرتك فى اغلب الى ذكرته عن الشيروكى .... بس اختلف مع حضرتك فى بهض النقاط ... و منها :-
الـ 4 سلندر .... انا شفت منها اوتو ماتيك و كان تمنها غالى شوية ... علشان كان فيها كل اوبشنز ال 6 سلندر .. العربية كانت سبيشيال ايديشن
الـ 6 سلندر اغلبه اوتوماتيك ... و قليل منه مانيوال ... و بيسموه كانترى

الـ 6 سلندر عربية قوية على الطريق فعلا .... صاحبى كان بينتش على الغيار التالت و احدى ميزات الشيروكى اها عربية ملمومة ... حجمها مش كبير
و عربية تتركب و شكلها حلو
بس فيها بعد العيوب من وجهة نظرى الشخصية :-

ضيق الكابينة الواضح .... بالرغم من حجم السيارة الخارجى .. الا ان كل الركاب مبيكونيش مرتاحين
و خاصة الجالسين فى الكنبة الخلفية
الغريب فى الامر .. ان الليبرتى و الشيروكى الجديد فيهم نفس الضيق فى الكابينة

الموتور فيه حساسات كتير ... بعضها اساسى .. و ممكن لو عطل ميحركلكش العربية من مكانها ... زى حساس الكرنك

قطع الغيار الاصلية غالية حبتين ...
موضوع جديد لسه سامعه من احد تجار قطع الغيار .. ان الكوارين
بتبوظ بسرعة !!!!!! انا مش مصدق الكلام ده

[ALMAGICO]

هوفعلا الكنبة اللى ورا ضيقة شوية
بالنسبة لا سعار قطع الغيار مش عالية اوى زى مالناس فكرة حتى كان فى موضوع عن قطع غيارها هنا والاعضاء كانوا مستغربين من الاسعار عشان مش غالية زى مهما فاكرين وعلى فكرة قطع غيارها موجود منها الصينى والهندى والتايوانى وفى منها الاصلى واسمة موبار ودة معمر جدا جدا جدا هتركبة تنساة وعامة الشيروكى لو جبتها متهانة هتتعبك جدا جدا جدا وانت بتشتريها خلى بالك من الفتيسين والكوارين لان لو كان فيهم حاجة هيزعلوك فى تصليحهم او تغيرهم
اما موضوع ان الكوارين بتبوظ بسرعة دة كلام مش صحيح خالص
ودة عن تجربة انا كان معايا شيروكى موديلات 1995 و1998 و1992 و1993 موديل 1992 قعدت معايا 11 سنة وشوية عمرى مشتكيت من كوارين ولا حاجة معرفش الكلام دة اول مرة اسمعة
وانا متفق مع حضرتك فى موضوع الحساسات وفعلا حساس الكرتك لو عطل العربية متتحركش
بس لو اهتميت بالعربية هتنساها ودة مش فى الشيروكى بس دة فى اى حاجة فى الدنيا

[ahmed_eng2001]

انا شاكر لحضرتك المعلومات دى ...

اخبار الدفع الرباعى فى الشيروكى ايه ؟؟ و الاويل سيلات ؟؟ الفك و التركيب ؟؟

[HESHAM_SAYAD]

بصراحة ياشباب انتو مسبتوليش حاجة اتكلم فيها كلام جميل وموضوع رائع انا هتكلم على تجربتى الشخصية شروكى 6 سلندر اشترتها من سبع شهور ماشاء الله عليها عربية جميلة جدا فى كل شيء وانا بفضل الله مستمتع بيها. وردا على الاخ احمد العربية ديه رائعة فى الدفع الرباعى وحش فى الصحراء انا دخلة بيها لوادى جوه الصحراء 7 كيلو وكانت اول مرة ادخل الصحراء العربية حاجة تانيه خالص غير الطرق العادية. والثبات فى السرعة فى السفر رائع وكمان بتجرى جامد واستهلاك البنزين مناسب يعنى حوالى 100 كيلو فى الصفيحة
وموضوع الاويل سيل والحساسات شىء ميبوظش كل يوم ولما بيتغير بيعيش مده طويلة جدا معمر وقطع الغيار متوفرة جدا جدا واسعار مناسبة جدا وجديد واستيراد كمان. يعنى ممكن اى حد يركب العربية ديه مش شرط يكون غنى زى ما الناس فكرة
ولكن فيه شرط مهم جدا عند الشراء وهو عدم الاسترخاص فى الشراء بمعنى شراء عربية تكون بحالة ممتازه فى العفشة والماتور والاة الجر هما دول العربية علشان لما بتيجى تغير حاجة فى عربية متهالكة بتفتح معاها 100 حاجة تانى يبقى موفرتش من تمنها حاجة , واى شىء فى الصالون او من برة مقدور عليه
وردا على الاستاذ صاحب الموضوع مفيش عربية 98 ب50 الف العربية النظيفة فى الموديل ده على الاقل ب 70 الف وده اقل تقدير لها
وفى شىء مهم جدا علشان تاخد من العربية دى خير وهى عدم الاستهانة بالاعطال يعنى لو ظهر اى عطل يجب اصلاحه فى اقرب وقت يعنى متركنش العيب

[Hazeeeeem]

جزاكم الله خيرا جميعا
بس انا ليه سؤال !!
ايهما افضل الشيروكى وللا الميتسوبيشى المونتيرو ؟؟ بالنسبه لقوه العفشه
بحيث انى بدخل بيها الجبل وطرق مكسره كتيييير
رجاء افيدونى
شكرا

[ahmed_eng2001]

ان شاء الله حد يكون جرب المونتيرو يفيد حضرتك اكتر
الشيروكى فيه ميزة ... السوست الامامية حلزونية ... و دى تديك راحة و نعومة اكتر
فيه عربيات تانية ... بعيد عنك ... سوست ورقيه .. امامية و خلفية ... دى بتكون متعبة جدا و خاصة فى المدقات و الطرق الوعرة ..
ميزتها بس ان السوست الورقية بتستحمل اكتر و خاصة مع الاوزان الكبيرة
و من امثلة العربيات الى فيها سوست ورقية امامى و خلفى ....
الرانجلر القديم ...الامريكانى القديم ... البليزر و البرونكو و الرام ... اللاند كروزر التعلبة

[Hazeeeeem]

ان شاء الله حد يكون جرب المونتيرو يفيد حضرتك اكتر
الشيروكى فيه ميزة ... السوست الامامية حلزونية ... و دى تديك راحة و نعومة اكتر
فيه عربيات تانية ... بعيد عنك ... سوست ورقيه .. امامية و خلفية ... دى بتكون متعبة جدا و خاصة فى المدقات و الطرق الوعرة ..
ميزتها بس ان السوست الورقية بتستحمل اكتر و خاصة مع الاوزان الكبيرة
و من امثلة العربيات الى فيها سوست ورقية امامى و خلفى ....
الرانجلر القديم ...الامريكانى القديم ... البليزر و البرونكو و الرام ... اللاند كروزر التعلبة

شكرا ليك يا بشمهندس احمد
ومنتظر رأى باقى الاخوه الاعضاء

[abogooda]

ملاك الوحوش ما خلوش حاجه الواحد يتكلم فيها
الله عليكم

[Ibrahim Salam]

السلام عليكم ورحمة الله و بركاته والله ربنا يكرمكوا و يزيدكوا علم ... اللهم امين
.. بصراحة شديده انا عملت اكونت هنا في نايل موتورز عشان عاند مشكلة ..
افيدوني .
عاندي عربيتي جيب شيروكي 1997، اوتوماتيك، 4100 سي سي، انجيكشن،
عاندي مشكلة محدش عارف يحلهالي و ان شاء الله الحل عندكوا
الفتيس على الغيار الاولاني لازم يجيب 7000 rbm عشان ينقل للثاني مع العلم انه بعد الاولاني بيستجيب و زي الفل ..
غيرت حساس البوابه، كشفت حساسات، غيرت زيت الفتيس و الصفاية، زبردو مازالت المشكلة قائمة ..
مع العلم اني عاندي ثلاث حساسات فالفتيس فقط .. و خايف يكون الميكانيكي هو اللي مش فاهم ... و عايز يخليني اغير فنيس و خلاص ..
افيدوني افادكم الله .

[ahmed alex123]

اسف بس محتاج خبرتك كمالك لعربيه 6 سلندر 4100 سى سى

السلام عليكم ورحمة الله و بركاته والله ربنا يكرمكوا و يزيدكوا علم ... اللهم امين
.. بصراحة شديده انا عملت اكونت هنا في نايل موتورز عشان عاند مشكلة ..
افيدوني .
عاندي عربيتي جيب شيروكي 1997، اوتوماتيك، 4100 سي سي، انجيكشن،
عاندي مشكلة محدش عارف يحلهالي و ان شاء الله الحل عندكوا
الفتيس على الغيار الاولاني لازم يجيب 7000 rbm عشان ينقل للثاني مع العلم انه بعد الاولاني بيستجيب و زي الفل ..
غيرت حساس البوابه، كشفت حساسات، غيرت زيت الفتيس و الصفاية، زبردو مازالت المشكلة قائمة ..
مع العلم اني عاندي ثلاث حساسات فالفتيس فقط .. و خايف يكون الميكانيكي هو اللي مش فاهم ... و عايز يخليني اغير فنيس و خلاص ..
افيدوني افادكم الله .

اسف بس سؤال عاوز اعرف اجابته استهلاك العربيه الجيب 6 سلندر 4100 سى سى اد ايه فى البنزين بارقام المهم والعربيه ال4 سلندر او 2500 سى سى استهلاكها اد ايه بارقام (يعنى الصفيحه تعمل كام كيلو تقريبا )

[ahmed alex123]

عاو اعرف استهلاك الجيب ال4100 سى سى بظبط اد ايه فى البنزين ولافرق بينها وبين ال2500 سى سى ال4 سلندر وشكرا

[ahmed alex123]

معلش ياجماعه عاوز اعرف من حد مالك للعربيه ده
استهلاك البنزين اد ايه بظبط فى ال6 سلندر 4100 سى سى واد ايه فى العربيه 4 سلندر 2500 سى سى بس رقم استهلاكى مش كتير وقليل
يعنى الصفيحه مثلا تعمل كام كيلو

[ahmed alex123]

معلش ياجماعه عاوز اعرف من حد مالك للعربيه ده
استهلاك البنزين اد ايه بظبط فى ال6 سلندر 4100 سى سى واد ايه فى العربيه 4 سلندر 2500 سى سى بس رقم استهلاكى مش كتير وقليل
يعنى الصفيحه مثلا تعمل كام كيلو