استشاره بخصوص الجالوبر

[Lord of the flies]

بفكر اشترى جالوبر و محتاج اعرف رأى الخبراء فيها.

انا قرأت شويه على النت عن المواصافات الفنيه و عرفت انها 2500 تيربو ديزل على شاسيه قطعه واحده و هى دفع خلفى و يتم تشغيل الدفع الرباعى 50/50 حسب رغبه السائق, هل الكلام ده صح؟

لو حد جربها يا ريت يقيمها من حيث الاعتماديه ,النعومه ,سرعه قصوى على الاسفلت و قطع الغيار و مدى توفرها؟
هل فيه موديل معين تنصحونى بيه؟

وشكرا

[Lord of the flies]

طب لغايه الجماعه بتوع الجيب ما يرودوا ... الشباب بتوع الهيونداى يعرفوا اماكن بيع قطع غيارها؟؟

[Karim_Monir]

مع مديري
هي هي الباجيرو ال 97
نفس الموتور والعفشة
اللي بيشتغلو فيها موجودين في منشية ناصر
وعندهم قطع غيارها كلها واميكانيكة وكل حاجة
اهم حاجة هاتها سليمة
وفكك من قصة نص نص واصلحها
لا هاتعرف تبيعها ولا هاتعرف تركبها

[Lord of the flies]

ده كلام مشجع شكرا للمساعده.
حد يعرف الديزل الملاكى حتى كام سى سى هيكون مستحق لكوبونات الدعم (لان معروف ان الموتور الديزل عشان يكون محترم مش بيقل عن 2500 سى سى)

[Lord of the flies]

سؤال تانىى:طيب محدش يعرف الجالوبر ولا الموسو؟

[Land_Cruiser]

البلد مفيهاش سولار يا فندم و هتقف طوابير طويله على بال ما ييجى دورك و احتمال لما توصل تلاقيه خلص. الموضوع كمان شكله مكمل الافضل تخليك فى حاجه شغاله بنزين و ترحم نفسك من البهدله

[Lord of the flies]

حضرتك معاك حق بكل تأكيد بس الجيب البنزين الى ينفع اوف رود و بتاع شغل مش هيكون اقل من 2200 سى سى فما فوق و ده استهلاك (بالسعر الحر خلال شهريين)و ضريبه فى السماء.
وانا اعتقد ان ازمه الديزل هتتحل مع نظام الكوبونات المزمع تطبيقه فى شهر 4.

[احمد فهمى]

هات شروكى 1998 وركب غاز واشترى دماغك

[Lord of the flies]

اقتراح جيد بس المشكله ان العربيه هتفقد سرعه البنزين و عزم الديزل.

[احمد فهمى]

اقتراح جيد بس المشكله ان العربيه هتفقد سرعه البنزين و عزم الديزل.

الشروكى 4100 سي سي 190 حصان فمش هتحس بعزم ضايع او حاجه ونفس الموضوع للسرعه وعربيه جميع الكماليات وقطع غيار متوفره استيراد وجديد ولو محتاج حاجه عاليه واوفر وارخص ممكن تجيب فيتارا 2000 سي سي او 1600 حسب احتياجك

[Tito_ss]

كنت شاريها في السعودية
عفشتها عالاسفلت ناشفة وفي الطرق المكسرة مريحه جدا ومتفهمش ازاي
بلاعة بنزين
سرعتها القصوى ضعيفة اعلى حاجة وصلتلها 160 كم في الساعة
اعتمادية عالية ومعمرة بس لو ليها قطع غيار متوفرة
قطع غيارها الميكانيكية نفس الباجيرو 99 و 2001 وهي أصلا هيونداي
بودي تقيل وانشف من الميكروباصات
الاوتوماتيك منها متعب جدا ولو مانيوال يبقى أفضل
وشكرا

[Lord of the flies]

كنت شاريها في السعودية
عفشتها عالاسفلت ناشفة وفي الطرق المكسرة مريحه جدا ومتفهمش ازاي
بلاعة بنزين
سرعتها القصوى ضعيفة اعلى حاجة وصلتلها 160 كم في الساعة
اعتمادية عالية ومعمرة بس لو ليها قطع غيار متوفرة
قطع غيارها الميكانيكية نفس الباجيرو 99 و 2001 وهي أصلا هيونداي
بودي تقيل وانشف من الميكروباصات
الاوتوماتيك منها متعب جدا ولو مانيوال يبقى أفضل
وشكرا

عافشه اكيد انشف من الملاكى و استهلاك البنزين اكيد كبير عشان 3000 سى سى و انا شايف 160 فى الجيب مناسب جدا خصوصا انها مش عريضه اوى و عاليه.
حضرتك ياريت تقولى مشاكل الاوتوماتيك ايه لانى استويت من سواقه المانيول و شكرا

[Tito_ss]

عافشه اكيد انشف من الملاكى و استهلاك البنزين اكيد كبير عشان 3000 سى سى و انا شايف 160 فى الجيب مناسب جدا خصوصا انها مش عريضه اوى و عاليه.
حضرتك ياريت تقولى مشاكل الاوتوماتيك ايه لانى استويت من سواقه المانيول و شكرا

مشاكل الاوتوماتيك عموما بتكون في الحساسات اللي في الفتيس وفي منها خارجي (وده صيانته الى حد ما سهلة ومش مكلفة قوي) وفي حساسات داخلي ودي بيسموها مخ الفتيس ولو فيها مشكلة كأنك بتصلح فتيس بالكامل ومكلفة

في العربيات الجيب وخصوصا اللي دفع رباعي مع High & Low Double المشكلة بتكون ان الفتيس الاوتو هو اللي بيختار التعشيق المناسب مع الكرونه(الدفرنس) وده اللي بيبوظ الحساسات لكن لو مانيوال الموضوع بيبقى في ايدك انت.

ولو مصر على الاوتو ممكن أقوللك على الاعراض اللي في الفتيس الاوتو المستهلك:

لما تنقل من P الى D لو لقيت العربية ساكته وبعدين نطت لقدام يبقى مش كويس
لو الفتيس بيأخر في التعشيق ونقل السرعات ولااااااااازم تشيل رجلك من البنزين عشان ينقل يبقى مش كويس (الفتيس الصح بينقل عادي ومن غير ما تحس بنتعه في العربية وانت دايس بنزين عااااااااااادي وقارص كمان)

بالنسبة لفتيس الغرز وده اللي ممكن يبوظ الفتيس برده عشان ليه أوضاع معينه

Low Double وده في حالة الغرز الجامد فقط (يعني لو غرزت تستخدمه) ومينفعش تمشي بيه على الاسفلت او أرض ممهده اكتر من 30 كم في الساعة والا هيضرب

High Double وده في حالة المشي في الصحراء او الارض الرملية الغير ممهده أو الجر وده لا يتعدى سرعة 80 كم مع تهوية الكاوتش شوية(لو التربة ناعمة)

والله أعلم

[Lord of the flies]

متشكر جدا لرد حضرتك الوافى.