رجاء قدامى شيروكى 93 2500سى سى ايه رأى خبراء الجيب ؟

[gaprony]

ياجماعة معلش ان جديد على الجيب ومعرفش عنها اى حاجة خالص و قدامى شيروكى 93 2500سى سى مغيرة عفشة جديدة و4 كاوتش جديد ومركونه بقالها فترة ...
ايه رأى ملاك الجيب والخبراء فيها ؟ وايه هو السعر المناسب ليها ؟
وانا طريقى بيبقى زحمة على طول هتبقى كويسه ولا لاء ؟
وشكرا وانتظر رد حضراتكم :)

[ALMAGICO]

اولا حضرتك لازم تكشف على العربية فى مكان متخصص لان لو العربية طلع فيها حاجة وخاصة الكوارين والفتيسين هتزعلك عشان كدة نتفادى دة بالكشف عليها واوعى حضرتك تاخد شيروكى فيها عيب فى الفتيسين او الكوارين وخلى بالك من سقف العربية
لما نيجى نتكلم عن الشيروكى ال2500 سى سى الشكل دة بدأ انتاجة من 1984 الى 1997
مميزات ال2500 سى سى انها موفرة فى البنزين مقارنة بال4000 سى سى اللى هى ال6 سلندر
متوسط الاستهلاك
ال4 سلندر جوة البلد 13.8 ليتر لكل 100 كم
طريق سريع 11.2 ليتر لكل 100 كم
ال6 سلندر جوة البلد 16.8 ليتر لكل 100 كم
طريق سريع 13.1 ليتر لكل 100 كم
بس قطع غيار ال6 سلندر متوفرة عن ال4 سلندر ودة مش معناة انها ال4 سلندر مش موجود كقطع غيار لا موجودة ومفيش قلق خالص بس الاكتر ال6 سلندر وارخص الى حد ما من ال4 سلندر بفارق مش كبير
موضوع انها هتبقى كويسة لحضرتك ولا لا دة يرجع لحضرتك ياريت حضرتك تقول احتياجك منها اية لان فى الزحمة ممكن تضايقك شوية بالنسبة للبنزين وحضرتك اللى تقدر تحدد
وياريت حضرتك تقول هى معروضة عليك بكام وهنشوف اذا كان مناسب ولا لا
والله اعلى واعلم فيما قلت

[gaprony]

طيب ممكن اعرف فين الاماكن الموجوده فى الجيزة اللى ممكن اكشف عليها فيها
وانا معروضه عليا من 35 الى 40 الف كده كويس ولا ايه وايه اهم حاجة ابص عليها فيها قبل ما اشتريها وشكر ا

[ALMAGICO]

اهم حاجة تبص عليها الكوارين والفتيسين والسقف لان فى ناس بتبهدل العربية دى اوى بس بردة الافضل ان حضرتك تكشف عليها كويس وكان فى مركز العضو الفاضل الاستاذ مينا كان بيشكر فية المركز دة فى الاوتوستراد فى صقر قريش اسمة جيبولى
بالنسبة للسعر هو قليل شوية ودة يخلينى اشك فيها فلازم حضرتك تكشف على العربية الاول وحذارى تاخد عربية فيها شك فى اساسيتها
واى استفسار انا تحت امر حضرتك