جيب شيروكى kk 2009

[ahmed_2007]

السلام عليكم اعضاء المنتدى الكرام و كل عام و حضارتكم بخير

ارجو الافادة فى كيفية المعاينة المبدئية للسيارة kk موديل ٢٠٠٩ حيث انى ان شاء الله مقبل على شراء هذه السياة

فأود ان تفيدونى عن الاساسيات التى لو وجدتها سليمة فى السيارة ان اقوم بالمفاوضة عليها خاصة و انى لس لدى خبرة فى كيفية فحص سيارات الدفع الرباعى بالاضافة الى انى لست من سكان القاهرة حتى يسهل عليا الذهاب الى التوكيل او مركز صيانة معتمد للكشف عن السيارة

و شكرا لحضراتكم

[ahmed_eng2001]

فيه حاجات عامة فى اى عربية لازم تبص عليها و انت بتشترى ... زى فواصل الابواب .. فواصل الكبوت و الحاجات دى ..
الطلاء الخارجى ... ترشيح زيت اسفل العربية ... حالة الفرش الداخلى .. و ده بيبين هل صاحبها كان مهتم بيها و لا لأ ....

احنا فى انتظار احد مالكى السيارة للافادة بشكل اكبر
تقبل مرورى و مبروك مقدما

[ahmed_2007]

كل الشكر للاستاذ ahmed_eng2001

بس انا اعرف ان سيارات الدفع الرباعى لها فحص من نوع خاص و خصوصا فيما يتعلق بالموتور و الفيتيس و نظام الدفع الدباعى و الكارونة

و هل موديل ٢٠٠٩ يختلف عن موديل ٢٠١١ لان امامى ايضا سيارة ٢٠١١

[ahmed_eng2001]

لا شكر على واجب يا فندم ..... و اعذرنى انا معنديش معلومات كتيرة عن السيارات الحديثة عموما .... و الشيروكى الحديثة خاصة ....
فى العربيات القديمة ... كنت قلت لحضرتك تنزل تحت العربية و تشوف الكردان الامامى موجود و لا لأ ... الشيروكى كلها بتعمل لوك اوتوماتيك للعجل ... ده مش حتعرف تتأكد منه غير من التجربة ....
ممكن حضرتك تجرب حاجة بسيطة ...

تخلى العربية تريح على الرصيف بالعجلتين الاماميتين ( عمودى على الرصيف ) و تحاول تطلعه بالدفع الخلفى فقط ... المفروض ان العربية متطلعوش ... و العجل الخلفى يفرك و العربية واقفة مكانها .....
و بعدين تعشق الدفع الرباعى ... و تجرب تانى ... لو نطت على الرصيف يبقى الدفع الرباعى شغال و الكارونة و اللوكات شغالة و كله تمام .... لو مطلعتش ؟!!! يبقى فيه حاجة مش مظبوطة ....

ممكن حضرتك تجرب على رصيف اوطى شوية ... بس اهم حاجة ان العربية متقدرش تطلعه بالدفع الخلفى

فى المشى ... بصفة عامة ... لما حضرتك بتعشق الدفع الرباعى .... العربية بتتقل جدا فى السحب و صوتها يعلى و عزمها يعلى .... بس ده مش قياس ان الدفع الرباعى شغال .... لأن فيه عربيات كتير ....تعشيق فتيس الغرز بيتقل العربية حتى لو الحركة مش واصلة للعجل الامامى
تقبل مرورى

[احمد فهمى]

انت محتاج خبير لأن العربيه دي معقده جدآ

[م/أحمد عبد الفتاح]

1 -تدخل العربية وتشوف السقف من الداخل هل عليه آثار تسريب مياه لو لقيت آثار تسريب مياه على هيئة بقع كبيرةوكتيرة تعمل للخلف در وروح وشكرا.
2-تشوف حالة الفرش والتابلوة ولو حالتهم مش كويسة يبقى برضه شكرا
3-تتاكد من عدم وجود صدا فى العربية من برة خصوصا فى مفصلا الشنطة والابواب وحوالين البربريز وحوالين قواعد الروف راك فى السقف وكمان حوالين فتحة السقف
4- تدور العربية وتشوف هل توجد أى لمبة فى التابلوة منورة غير لمبة الحزام وفرامل اليد
5- تسوقها وتشوف بتعمل ايه فى النقل بتاعها وحالة الدركسيون فيه صوت طقة مثلا وحالة الفرامل والكاوتش وتخلى صاحبها يكون فاتح الكمبيوتر على استهلاك البنزين والمفروض يكون قارى فى حدود من 16 إلى 18 فى المشى فى الزحمة ولو على طريق سريع فى حدود من 12 إلى 14
لو كل اللى فات تمام لازم تروح عند أى حد بيشتغل فى العربيات دى وعنده كمبيوتر علشان يديك تاريخها من حيث الأعطال إلا لو انت واثق فى صاحبها ومتابع العربية

[hesham_medhat]

[QUOTE=amadios;3875790428]1 -تدخل العربية وتشوف السقف من الداخل هل عليه آثار تسريب مياه لولقيت آثار تسريب[مياه على هيئة بقع كبيرةوكتيرة تعمل للخلف در وروح وشكرا.


انا هشتريت عربية KK 2009 وفيها المشكلة دي. هيا مالهاش حل ؟؟؟

[م/أحمد عبد الفتاح]

الأستاذ هشام مدحت :
سبب وجود بقع فى كسوة سقف العربية هو تسريب مياه من السقف على كسوة السقف وده ناتج من حاجتين :
١- وجود ثقوب بالسقف نتيجة صدأ وبارومة فى أماكن معينة فى السقف زى داير البرابريز وداير فتحة السقف وحوالين قواعد الروف راك أو تحت الكاوتشتين إللى تحت اروف راك بطول السقف أو مفصلات الشنطة .
وده أخطرنوع.
٢- النوع الثانى وهو إنسداد خراطيم تصريف المياه من السقف ودى بتتسلك عادى أو بتكون بعض وصلات الخراطيم إتفكت وسببت التسريب ودى برضه بتتركب.
أول حاجه تعملها تفتح فتحة السقف وتطلع من جوه العربية تبص على الحتة إللى قدام من الفتحة حتلاقى فيها ثقب صغير فى الشمال واليمين عند الكورنر إتأكد إنهم مش مسدوين وحاول تشيل اى أتربة أو طين يكون سدهم .
ده لينك فيلم يوضح شوية حاجات بالنسبة لأماكن الثقوب فى العربية الكوماندر وتقريباً نفس اللى موجود فى الـKK
بس ماتحاولش تعمل حاجة زيادة عن إنك تتأكد من ثقوب فتحة السقف إلا لو كنت عندك مياه فى ارضية العربية
وبالتوفيق إن شاء الله وتكون حاجة بسيطة ، وبعد كده تنظيف كسوة السقف حاتكون سهلة بإذن الله .

https://www.youtube.com/watch?v=bxrQNKg182I