35 لتر بنزين على 130 كيلو أعمل ايه يا رجال الشيروكى

[a raafat]

السلام عليكم

انا يا جماعه معايا جيب شيروكى 93 اربعه سلندر 2500 سى سى مانيول العربيه فى المجمل مريحانى كقوه ومتانه وأبعاد واضحه طبعا بأستثناء العفشه اللى تعتبر اسوأ حاجه فيها
بس عندى مشكله قارفانى بقالها سنين وهيا ان استهلاك البنزين فيها غريب جدا حاليا العربيه جوه البلد بتاخد 35 لتر بنزين على 130 كيلو ! هل ده طبيعى يا جماعه ؟ الناس اللى معاها العربيه دى يفيدونى هل كل الشيروكى الموديل ده استهلاكه كده !
الميكانيكى اللى بتعامل معاه غلب حماره معاها غير حساس الميه وجرب غير حساس صدر بس لقينا العيب مش منه فشغلنا القديم عادى و غيرنا البوجيهات و المفروض الكهرباء مظبوطه مش عارف فاضل ايه هل العربيه ممكن تكون محتاجه عمرة موتور ؟
الواحد زهق زمان كنت مش بنزل بالعربيه كتير ممكن مره كل اسبوع او عشر ايام فمكنش حاسس بالأستهلاك اوى لكن دلوقتى ابتديت اعتمد عليها بشكل كبير مع زياده اسعار البنزين كمان الموضوع بقى صعب ولازم نشوفله حل :(

[hesham fawzy h]

استهلاك عالى جدا .. ربنا يعينك

[mnashat77]

استهلاك عالي جدا،، اكيد في حل افضل جرب تغير ميكانيكي

[م/أحمد عبد الفتاح]

يعنى هى كده بتعمل حوالى ٧٥ كم فى الصفيحة !!!! وده استهلاك عالى جداً .... العربية دى المفروض تعمل معاك فى حدود من ١٠٠ الى ١٢٠كم فى الصفيحة حسب حالة الزحمة .... حاول تغير البوجيهات بتشامبيون أو بوش والأحسن إن جى كى بس مش موجود كتير .... وغير طبعاً فلتر الهوا ..... كمان حاول تمشى والتانك مش فاضى قوى يعنى مايقلش عن التلت لأن ده برضه بيقلل الإستهلاك شوية

[احمد فهمى]

انت محتاج ميكانيكى جيب مش اي ميكانيكى فى واحد فى صقر قريش اسمو احمد زغلول محترم جدآ وهيقولك المفيد

[a raafat]

شكرا يا جماعه عالردود والاهتمام
والله انا تعبت والعيب ده مخلينى مخنوق من العربيه
وفعلا انا بفكر اشوف ميكانيكى تانى للعيب ده فقط لان الميكانيكى اللى معايا كويس ومريحنى بس العيب ده وقف قدامه ومش عارف يعمله
بس انا من اسكندريه حد يعرف ميكانيكى جيب محترم فى اسكندريه ؟