انواع السيارات الجيب بالحروف المميزة ( إعرف سيارتك)

[م/أحمد عبد الفتاح]

كل نوع من السيارات الجيب ليه حروف مميزة الناس بتتعامل بيها وهما فى الغالب حرفين .... هنا أنا حاذكر كل نوع والحروف بتاعته علشان كل واحد يعرف سيارته ولما يعمل سيرش على النت يعمله بالحروف دى حيلاقى معلومات اكتر عن عربيته :

أولاً الرانجلر
wrangler cj عربيات رانجلر انتجت من سنة ١٩٤٢ إلى سنة ١٩٨٦ (فوانيس مدورة)
wrangler yj عربيات رانجلر انتجت من سنة ١٩٨٧ الى سنة ١٩٩٦ (فوانيس مربعة)
wrangler tj عربيات رانجلر انتجت من سنة ١٩٩٧ الى سنة ٢٠٠٦ (فوانيس مدورة)
wrangler jk عربيات رانجلر انتجت من سنة ٢٠٠٧ومستمرة حتى الأن (زى اللى بتنتج فى مصر)
ثانياً الشيروكى :
jeep cherokee sj عربيات شيروكى انتجت من سنة ١٩٧٤ الى سنة ١٩٨٣
jeep cherokee xj عربيات شيروكى انتجت من سنة ١٩٨٤إلى سنة ٢٠٠١
jeep cherokee kj عربيات شيروكى انتجت من سنة ٢٠٠٢ الى سنة ٢٠٠٧ ويطلق عليها أيضاً إسم ليبرتى
jeep cherokee kk عربيات شيروكى انتجت من سنة ٢٠٠٨ الى سنة ٢٠١٣
jeep cherokee kl عربيات شيروكى يتم انتاجها حالياً من سنة ٢٠١٤
ثالثاً الجراند شيروكى :
grand cherokee zj عربيات جراند شيروكى انتجت من سنة ١٩٩٣ الى سنة ١٩٩٨
grand cherokee wj عربيات جراند شيروكى انتجت من سنة ١٩٩٩ الى سنة ٢٠٠٤
grand cherokee wk عربيات جراند شيروكى انتجت من سنة ٢٠٠٥ الى سنة ٢٠١٠
grand cherokee wk2 عربيات جراند شيروكى انتجت من سنة ٢٠١١ ومستمرة حتى الان

طبعاً فيه انواع تانية زى الكوماندر والباتريوت والكومباس دول مالهومش حروف علشان كده لم اذكرهم فى التصنيف ده.
أرجو انى اكون قد وفقت فى تصنيف مبدئى للسيارات الجيب حتى يستفيد الجميع وإن شاء الله قريباً ساقوم بتصنيف كل فئة حسب طرازاتها ( مثل الربيكون والرينجيد والـ ......)

تم التنسيق والتثبيت بواسطة مشرف القسم

[adelghanem]

معلومه مفيده فعلا
بارك الله فيك

[khaled_yassin]

تسلم ايدك

[waelgad84]

جزاك الله خير على المعلومات المفيدة

[dramir1]

جزاك الله خير

[احمد فهمى]

موضو مهم جدآ و مفيد هثبتو للأفاده

[م/أحمد عبد الفتاح]

موضو مهم جدآ و مفيد هثبتو للأفاده

شكراً ياباشا على الإضافات وتسلم ايدك

[احمد فهمى]

الشكر لله وموضوعك يستحق

[heldin_67]

الاستاذ...... أحمد فهمى

منســق قســم أوبــل والدفع الرباعي

ممكن أعرف رأى حضرتك في جيب kk موديل 2008 ماشيه 102000 كم و صورها فابريقه طالب 205000 جنيه.

الضريبه السنويه كام؟..... و نقل الملكيه تكلفتها كام؟ و هل هذه السياره بها عيوب بعد ال 100000 كم.

و شكرا".........

[احمد فهمى]

الاستاذ...... أحمد فهمى

منســق قســم أوبــل والدفع الرباعي

ممكن أعرف رأى حضرتك في جيب kk موديل 2008 ماشيه 102000 كم و صورها فابريقه طالب 205000 جنيه.

الضريبه السنويه كام؟..... و نقل الملكيه تكلفتها كام؟ و هل هذه السياره بها عيوب بعد ال 100000 كم.

و شكرا".........

الضريبه فى حدود 2300 جنيه وبتقل كل سنه ونقل الملكيه 6500 تقريبآ والسياره لو سليمه ومتصينه صح من صاحبها حتي لو عامله 200 الف هتكون كويسه بس 2008 الكيلو متر ده بتعمل فى حدود 190 الف ل200 الف حسب الحاله فاصل معاه واكشف كويس والمهندس احمد عبد الفتاح منسق مساعج هنا هيفيدك فى نقط خاصه اثناء الكشف على الموديل ده تحديدآ

[heldin_67]

شكرا" لرد حضرتك .....

ليه حضرتك قلت الموديل ده تحديدا"؟؟؟ هل فيه مشكله؟

تحياتي........

[م/أحمد عبد الفتاح]

الضريبه فى حدود 2300 جنيه وبتقل كل سنه ونقل الملكيه 6500 تقريبآ والسياره لو سليمه ومتصينه صح من صاحبها حتي لو عامله 200 الف هتكون كويسه بس 2008 الكيلو متر ده بتعمل فى حدود 190 الف ل200 الف حسب الحاله فاصل معاه واكشف كويس والمهندس احمد عبد الفتاح منسق مساعج هنا هيفيدك فى نقط خاصه اثناء الكشف على الموديل ده تحديدآ

أتفق مع رد الأستاذ أحمد فهمى
وبالنسبة للـ KK موديل ٢٠٠٨ ده كان اول انتاج ليها وفيه بعض العربيات مش كلها كان فيهم بعض الملاحظات الشهيرة لموديل ٢٠٠٨ :
- اثناء التفويل بالوقود بيحصل ان معدل البنزين بيسبق قدرة العربية على التموين بمعنى ان البنزين بيقع من فتحة التموين ( بتفيظ بسرعة) ولازم يكون مسدس البنزين بيمون بمعدل صغير علشان البنزين مايقعش وده طبعاً بيستهلك وقت وكان فيه عليه استدعاء من شركة كرايزلر لبعض العربيات دى وكان حل المشكلة فى بعض العربيات انهم يغيروا ماسورة وفى بعض العربيات غيروا التانك كله بس أنا معرفش العربيات المصنوعة فى مصر هل كان فيها المشكلة دى ولا لأ. بس طبقاً لللإستدعاء اللى عملته شركة كرايزلر ذكروا فيه بعض العربيات اللى اتصنعت خارج امريكا.
كل إللى حاتعمله حتسأل صاحبها على موضوع التفويل ده أو تخليه يجرب يمون وتشوف الحكاية.
وعلشان تعاين العربية دى فيه موضوع على الـ KK وده اللينك بتاعه

http://www.nilemotors.net/Nile/448564-kk.html

وده موضوع تانى برضه إقرا فيه الرد اللى فى رابع مشاركة ( المكتوب باللون البنى)

http://www.nilemotors.net/Nile/452305-kk-wrangler.html

بالنسبة لموضوع السعر ده بتحدده مدى الأوبشنات الموجودة فى العربية بعد ما تقرا الكلام إللى فى المشاركتين إللى لينكهم فوق وده فيه شوية حاجات تانية زى مثلاً لون العربية لو أسود والفرش الجلد كمان لونه إسود بتبقى أغلى من لو العربية سودا والفرش الجلد لونه بيج ( اللون الأسود والفرش الجلد إسود بتبقى أغلى من أى لون تانى)، كمان الكاسيت الموجود فيها حاتبص تحت على اليمين فى الكاسيت جنب فتحة الـ AUX حتلاقى ٣ حروف لو REQ حاتكون أغلى من لو كان RES وكمان بيبقى مكتوب من عند فتحة السى دى إنه ٦ إسطوانات وحروف دى فى دى ( للنوع الـ REQ) لكن النوع الـ RES بيبقى مكتوب عليه من عند فتحة الإسطوانات Single Disk- MP3. ( ممكن حد يقول حكاية الكاسيت دى حاجه تافهة بس الفرق فى السعر بين الاتنين حوالى ٣٠٠٠ جنيه لو حاتشتريه من أمريكا مش من التوكيل) ووتأكد من إن الهاندفرى
شغال وإسمه فى العربيات الجيب uconnect
وتتأكد من مثبت السرعة شغال ولا لأ
ولو لمبة الإيرباج ومعاها لمبة الـ ESP كانوا منورين على طول يبقى فيها عطل clock spring وده بيتكلف كتير حوالى من ٣٠٠٠ إلى ٤٠٠٠ جنيه.
تتأكد من الزجاج للاربع ابواب بيفتح ويقفل كويس .
كمان حاتشوف حالة الكاوتش كويس ولا متغير قريب ولا تعبان.
تتأكد من إن الإستبن الجنط بتاعه زى باقى الأربع جنوط بتوع العربية (يعنى ألومنيوم مش حديد)
وبرضه تروح لأى توكيل جيب وتكشف عليها كمبيوتر وأعطال ويدولك الـ history بتاعها
الخلاصة إنها تكون عربية مش ملعوب فيها علشان اللعب فى العربيات دى بيبوظها.
متتخضش من إللى أنا قلته أو الأستاذ أحمد فهمى - إنت حاتدفع مبلغ كبير بس بصفة عامة العربيات دى من أحسن العربيات اللى ممكن تركبها فى مصر او فى اى حته وإعتماديتها عالية جداً غير أى عربية وده رأى عن تجربة مش علشان انا عندى العربية دى - العربية أثبتت كفاءة فى مصر وفى كل حتة ومش محتاجانى علشان أعمل لها دعاية :) - إللى بيزعل فيها البنزين والضريبة بس :)
وتحت أمرك فى أى إستفسار تانى

[احمد فهمى]

شكرا" لرد حضرتك .....

ليه حضرتك قلت الموديل ده تحديدا"؟؟؟ هل فيه مشكله؟

تحياتي........

لا عشان معاه واحده

[heldin_67]

شكرا" جزيلا" علي رد حضراتكم الوافي و واضح ان الموضوع مش ساهل لأن فعلا" المبلغ اللي هيدفع كبير..

أن شاء الله أقرأ كل المواضيع الخاصه بالعربيه و أخد القرار المناسب....

و متشكر جدا" مره تانيه لأهتمامكم م. أحمد فهمي و م. أحمد عبد الفتاح..


تحياتي .......

[م/أحمد عبد الفتاح]

شكرا" جزيلا" علي رد حضراتكم الوافي و واضح ان الموضوع مش ساهل لأن فعلا" المبلغ اللي هيدفع كبير..

أن شاء الله أقرأ كل المواضيع الخاصه بالعربيه و أخد القرار المناسب....

و متشكر جدا" مره تانيه لأهتمامكم م. أحمد فهمي و م. أحمد عبد الفتاح..


تحياتي .......

العفو وتحت امرك فى اى استفسار ولو عاوز تشوف الموضوعات الخاصة بالموديل ده بالذات ممكن تكتب على الجوجل سيرش
2008jeep liberty reviews
وماتقلقش من كلمة ليبرتى لأن العربية برة مصر إسمها ليبرتى برضه - حاتعيش فى المواقع دى مع كل مميزات وعيوب العربية بس تدور على الليمتد مش الـ sport ولا الـ CRD ولا الـ JET