معالجة بعض الصدأ فى جيب kk

[م/أحمد عبد الفتاح]

من حوالى سنة لقيت حوالين مفصلات باب الشنطة ظهور بعض الصدأ البسيط الموضح فى الصور:

الأسهم الحمراء تبين خط الصدأ عند المفصلة اليمين


الأسهم الحمراء تبين خط الصدأ عند المفصلة اليسار

والصدأ ده نتيجة إن تقفيل اللوحين بتوع السقف مع جسم الشنطة مش كويس
فقمت بعمل الأتى :
١- صنفرة الصدأ بصنفرة حدادى ناعمة
٢- دهنت إيبوكسى صدأ بريشة من بتوع الرسم (مقاس صغير جداً)
٣- إشتريت علبة سليكون عضم إسود ومليت الفراغ إللى بيسبب الصدأ بين اللوحين
الكلام ده كله عملته من حوالى سنة وإستنيت لما أتأكد من نجاح الفكرة علشان أنشرها ودى الصور إللى أخدتها النهاردة بعد مرور سنة من تنفيذ الفكرة والحمدلله مظهرش أى صدأ تانى ( أنا كملت سليكون عضم من الناحية اليمين للناحية الشمال على الفراغ بتاع اللوحين)





أنا حبيت أشارك الفكرة مع الأعضاء هنا فى المنتدى بعد تأكدى من نجاحها علشان الفايدة تعم على الجميع وأنا تحت أمر أى عضو فى أى إستفسار.

[Gelgel2004]

الله ينور بس الصدا من جوه و موش باين و ده معناه ان العربيه مش مدهونه بنظام elbo او الصاج متطهرش كويس قبل الدهان .
ارجو من حضرتك تراجع على المفصلات و من تحت فرش التابلوه للاطمئنان

شكرا لنقل التجربة
:)

[monamize4]

الله ينور ياباشا :)

على قد ما البارومة بتكون مشكلة صعبة جدا ,, على قد ما علاجها ف المراحل الاولى (الصدأ) بيكون سهل جداااااا

[م/أحمد عبد الفتاح]

الله ينور بس الصدا من جوه و موش باين و ده معناه ان العربيه مش مدهونه بنظام elbo او الصاج متطهرش كويس قبل الدهان .
ارجو من حضرتك تراجع على المفصلات و من تحت فرش التابلوه للاطمئنان

شكرا لنقل التجربة
:)

أشكرك ياباشا وأنا فعلاً عملت إللى إنت قولت عليه أنا فكيت الفبرة إللى فى السقف من ناحية الشنطة وداير الكاوتش والحمدلله ماكانش فيهم حاجه . الموضوع إللى أنا عملته ده المفروض يتعمل فى المصنع لأنه مهم جداً ودايماً الأحرف بتاعة الصاج المتقفل على بعضه بتكون صدأ زى مابيتحط فى تقفيلات حوض الموتور والشنطة فى أى عربية . ومتشكر لإضافتك

[احمد فهمى]

شغل فابريكه والله وبفلوس الله يكرمك احمد باشا افدت الجميع

[م/أحمد عبد الفتاح]

شغل فابريكه والله وبفلوس الله يكرمك احمد باشا افدت الجميع

الله يخليك ومتشكر جداً

[ahmed_eng2001]

شكرا على نقل التجربة , ربنا يجعله فى ميزان حسناتك

ايه هو ايبوكسى الصدأ ؟ و بيتجاب من فين ؟

[م/أحمد عبد الفتاح]

شكرا على نقل التجربة , ربنا يجعله فى ميزان حسناتك

ايه هو ايبوكسى الصدأ ؟ و بيتجاب من فين ؟

اللهم أمين - وألف شكر
الإيبوكسى بتاع الصدا ( نوع بوية مانعة للصدا بدل الأكسيد بتاع زمان وأحسن منه) بتجيبه من عند الناس اللى بتبيع الدوكو بتاع العربيات موجود منه حاجات مستوردة وفيه منه مصرى تقريباً نوع إسمه كابسى - أنا إشتريت المصرى ده لأنه ينفع يبيع منه تمن كيلو أو ربع كيلو بس المستورد بالكيلوـ وبيديلك معاه مصلب فى علبة تانية لوحدها بتخلطه بالنسبة إللى بيقولك عليها قبل الإستخدام على طول علشان ماينشفش

[stonecoldmido5]

شكرا لحضرتك علي كل مواضيعك المميزة