المطلوب عند شراءك للجيب yj

[Biker]

السلام عليكم جميعاً،،

أنا اتفقت على جيب yj 4100، ونازل أخلص إن شاء الله موديل 97

هيا سليمة بس قديمة وواقفة مش بتتحرك
الاتفاق اني أشتريها بتوضيبها كلها و أعمال الصيانة بتاعتها...

السؤال: ايه المطلوب اني أبص عليه وأتأكد انه سليم وبحالة ممتازة...
(موتور، مساعدين، جير بوكس،..... إلخ)

ياريت بالتفصيل لو أمكن

سؤال جانبي: أنا حابب أرفع العربية لانه هايغير الكاوتشات لمقاس أكبر.... السؤال: هل لازم أغير الورق (المساعدين) علشان العربية تترفع.. ولا فيه حلول للرفع اقتصادية (مبدئياً) لغاية ما بعد كده يتم التعديل...

دي الاسئلة مبدئيا اللي جاية في دماغي

شكراً ليكم مقدماً

[م/أحمد عبد الفتاح]

شوية حاجات لازم تحطها فى بالك الاول :
ال yj اخرها ١٩٩٦
الموتور ال ٤١٠٠ قديم قوى اخره كان سنة ١٩٩٠ وبعدين نزل الموتور ال ٤٠٠٠
الرانجلر ال yj اتجمعت فى مصر بس بشاسية طويل لاستخدامات الجيش مش تجارى - هل العربية دى شاسية طويل ولا قصير عادى ؟؟؟؟
بعد ما تتأكد من المعلومات دى تخليه يدور العربية وتمشى بيها وتجربها وتكشف عليها كويس - يعنى تشوف حالة الموتور وتتاكد إن عمود الكردان الامامى موجود مش ملغى وتتاكد من العفشة هل كويسة والعربية مرفوعة ولا واقعة ؟ حالة الكاوتش كويس ولا متاكل من ناحية واحدة - حالة الصاج والارضيات والتابلوة والكهربا سليمة بضفيرة وعلبة فيوزات ولا فرح العمدة اسلاك طالعة من هنا ومن هنا ؟- عمة الموتور موجودة ولا متشاله هى والفلتر ؟ الدركسيون فيه بوش ولا كويس وهل بتسمع اى صوت لما بتلفه للاخر ولا لأ ؟
وعموماً تابع معانا واحنا معاك ان شاء الله

[Biker]

باشمهندس أحمد... شكراً جداً ليك وربنا يكرمك
عايز اقولك اني استفسرت على كل النقط اللي ذكرتها وفعلا كانت مفيدة..

أولاً: هي شاسيه قصير
اتأكدت ان الكورونا الأمامية موجودة وفتيس الغرز شغال
الموتور 4100 يعني القديم
ضفيرة وعلبة فيوزات قالي هاتبقى موجودة طبعاً وهتأكد عند الاستلام
مش فاهم يعني ايه العفشة مرفوعة ولا واقعة !!
باقي الأمور انا شايفها مش بطالة..
لسه مجاليش فرصة أجرب العربية بس إن شاء الله هجربها وهاخد بالي من النقط اللي ذكرتها....
أشكرك يا فندم على الافادة

- هل فيه أي نقط أخرى (محورية أو أقل أهمية) اخد بالي منها

- والسؤال الجانبي هو: ازاي ممكن ارفع العربية على الوضع الحالي من غير ما أغير عفشة old man
حاجة زي budget boost أو اي حلول اقتصادية

[م/أحمد عبد الفتاح]

العفو ياباشا وتحت امرك بس انا مش فاهم ازاى تبقى yj موديل سنة ١٩٩٧؟؟؟؟
ممكن تكون tj - بس برضه هل موتورها الاصلى اتغير ؟؟؟؟؟؟
فيه حاجتين بيميزوا ال yj اول حاجه فوانيسها الامامية المربعة وتانى حاجة المساحات بتاعة الزجاج الامامى ( البرابريز) بتبقى واقفة فى نص البرابريز مش نايمة لتحت .
على العموم افحص العربية كويس ومعلش اسأل عنها فى المرور الأول بأى شكل
بالنسبة لانها تكون واقفة مش واقعة يعنى العربية واقفة وعالية وماسكة نفسها مش مايلة ولا واطية من قدام او من ورا
تطمن اهم حاجه على البودى والارضيات تشيل المشمع وتبص تحته وتشيل المشمع اللى على الفخد اللى ورا وتبص تحته وتشوف فيه بارومة ولا لا - تبص على الحتة اللى قدام باب السواق من جوة هى وباب الراكب اللى جنب السواق من جوه برضه لانها من الحتت الشهيرة فى البارومة - وتبص برضه على الفخد الامامية - تشوف هل الفبرات اللى حوالين الرفارف موجودة ولا متشالة - العتبة السلم اللى تحت الابواب موجودة ولا لا - الكراسى الامامية بتتحرك عادى لقدام ولورا ولا ملحومين فى الارضية - التابلوة والعدادات ظروفهم ايه - دراعات المساحات والانوار والاشارات شغالة ولا بتتحرك - قطمة الدركسيون ثابت ولا بتلعب وبتزيق لما تلف الدركسيون - تسوقها وتشوف غياراتها كويسة ولا لا - هل بتسمع نحرة فى الكردان وانت ماشى ولا لا - تشيل مقاس الموتور وتشوف الزيت اللى عليه نضيف ولا فيه شوائب وتشمه محروق ولا عادى
تبص على الموتور هل عليه اثار زيت ولا نضيف - تبص برضه على الفتيس والكورونات من تحت هل عليهم اثار زيت وخصوصاً من ناحية عمود الكردان - الفرامل برضه تجربها وتشوفها بتمسك كويس ولا بتزحف ولا بتحدف - فرامل اليد - المارش شغال كويس ولا بيعتل
المهم متشتريهاش الا لما تتأكد الاول من ورقها ومن حالتها لان اللعب كتير فى العربيات دى .
بالنسبة لرفع العربية وتكبير الكاوتش احسن طريقة للرفع هى بالسوست والمساعدين يتغيروا بنوع اعلى - ال bb اقصى حاجه يرفعها ٥ سم مش زى اللى فى دماغ اى حد وبعدين على ما اعتقد بيحتاج تغير المساعدين برضه بنوع اعلى فمالهوش لزمة ال bb

[احمد فهمى]

حاول كمان تشوف رقم الشاسيه نفسو رقم المتور والا لا وهو طالب كام فيها؟ وسقف وابواب راكبين والا لا كل دي فلوس وسقفا وتبوابها برقم خيالى خلي بالك

[Biker]

حبيبى مش عارف اشكرك ازاي
هاخد بالي من كل اللي قلته..
سيبك من الموديل يمكن انا غلطان واختلط عليا الأمر بس هي تسعينات، دا اللي فكره لما شفت الرخصة... ايوة مرخصة ومعلقة نمر كمان هيا بس شكلها قديم ومركونة وصالونها مبهدل، بس طبعاً الشاسيه مش رقم الموتور
وهتاكد من كل الحاجات دي..
خليني أسألك لو اطمنت من كل ده انه تمام أو معقول، تفتكر يبقى سعرها المعقول كام؟

[احمد فهمى]

حبيبى مش عارف اشكرك ازاي
هاخد بالي من كل اللي قلته..
سيبك من الموديل يمكن انا غلطان واختلط عليا الأمر بس هي تسعينات، دا اللي فكره لما شفت الرخصة... ايوة مرخصة ومعلقة نمر كمان هيا بس شكلها قديم ومركونة وصالونها مبهدل، بس طبعاً الشاسيه مش رقم الموتور
وهتاكد من كل الحاجات دي..
خليني أسألك لو اطمنت من كل ده انه تمام أو معقول، تفتكر يبقى سعرها المعقول كام؟

الحاله والموديل عامل تقييم السعر وطبعآ كده مغيره متور وده بيفرق في السعر

[Mecha]

مهم جدا حالة الكوارين وخصوصا الخلفية ,والشاسيه مفهوش لحام.
تفتح الرديتير وتتاكد مفيش نفخ وتشيل مقاس الزيت والغطا مفيش بوخ ودخنة.الصلايب عموما ممكن تتفاوض فيها وبيض الدركسيون .وبردك التعليق سوست ومساعدين .عاملة كام كم ؟؟؟؟.سوقها في طريق مفتوح وشوف نقلات الفتيس والكيك داون ولون زيت الفتيس,مفيش صدا نافد في الشاسيه.واي حاجة تانية ممكن تتفاوض وسهل اصلاحها.

[Mecha]

- والسؤال الجانبي هو: ازاي ممكن ارفع العربية على الوضع الحالي من غير ما أغير عفشة old man
حاجة زي budget boost أو اي حلول اقتصادية

ادي air lift من غير غيار عفشه

[م/أحمد عبد الفتاح]

بس الـ air lift دى تنفع ورا بس

[Mecha]

بس الـ air lift دى تنفع ورا بس

تمام ,ممكن تتعمل قدام بس هتضر