استشاره بخصوص شراء شيروكي kk

[ogouda]

السلام عليكم
أنا ناوي ان شاء الله أجيب شيروكي kk و كنت عاوز أسأل بعض الأسئله بعد اذنكم

-هل هناك فرق فى الكماليات أو الموتور فى الموديلات من 2008 ل 2013
-ممكن ترشحولي مركز صيانه محترم و متجرب و يكون متخصص فى ال 4*4 للكشف على السياره قبل شراءها
-أنا حاطط رينج 250 الف ؛ الرقم ده ممكن يجيب موديل سنة كام (حاله جيده جدا+كيلومتر أقل من 100 ألف)

لو فيه أي نصائح عامه أخرى بخصوص السياره أكون شاكر جدا

[م/أحمد عبد الفتاح]

مافيش إختلافات كبيرة من سنة ٢٠٠٨ حتى سنة ٢٠١٣ غير شوية حاجات بسيطة على سبيل المثال:
- من سنة ٢٠٠٩ تم تقوية الأكسات الخلفية - تحسين الفرامل - تحسين المساعدين - تحسين أداء الدركسيون.
- من سنة ٢٠١١ تم تغيير شكل الدركسيون
العربيات دى الكيلومتراج القليل فيها أحسن طبعاً ورينج السعر حسب حالتها وأعتقد المبلغ إللى معاك ممكن يجيب لغاية موديل ٢٠١٠ لأن أسعارها اليومين دول مش عارف حصل لها إيه؟ عموماً شوف الأسعار فى دوبيزل مصر
دى لينكات لمواضيع هنا ممكن تلاقى فيها شوية معلومات عن الـ KK

http://www.nilemotors.net/Nile/448564-kk.html

http://www.nilemotors.net/Nile/451024-a-2.html

وتحت أمرك فى أى إستفسار

[ogouda]

شكرا يا باشمهندس أحمد على الرد ؛ سؤال تاني معلش

هو فيه كذا فئه فى ال kk و لا فئه واحده - و هل الشيروكي ليمتد هي هي ال kk

[م/أحمد عبد الفتاح]

الـ kk ليها كذا طراز بس الليمتد هو إللى موجودة فى مصر وتعتبر أحسن طراز - فيه منها ليمتيد LX ودى الصراحة معرفش إيه فيها زيادة لأن الـKK الليمتد العادية مافيهاش حاجه ناقصة غير إن الكاسيت يكون تاتش وفيه نافيجيشن وإن ضهر الكرسى يكون كهربا ( الكرسى قاعدته كهربا ٦ اتجاهات)

[ogouda]

بعد طول حيره اخيرا ربنا وفقني في عربيه kk2011 حالتها كويسه جدا و عامله كيلومتر قليل 45000 كم، و طبعا طبقت كل النصايح الي قريتها هنا خصوصا نصايح الاحمدين فهمي و عبدالفتاح.
عندي بقه تخوف واحد معدل استهلاك البنزين الموجود في التابلوه غير طبيعي (32.4/100) انا شايف انه استهلاك غير منطقي حتى في أسوأ ظروف المرور. انا معنديش تفسير غير ان ممكن يكون كترة تجربة العربيه في الفتره الاخيره نتيجة عرضها للبيع و تشغيل و تبطيل الكونتكت كتير هو الي أدى للاستهلاك يبان كده، مش عارف الكلام ده منطقي و لا لأ.
انتوا ايه رايكم و ايه ممكن اعملوا عشان اتطمن

[م/أحمد عبد الفتاح]

الف مبروك وربنا يباركلك فيها ويكفيك شرها
كلامك مظبوط
الإستهلاك اللى فى العداد قدامك ده مش بيبقى مظبوط قوى والعربية واقفة كتير او ماشية فى الزحمة - بتلاقى الارقام الخزعبلية دى - إعمل ريسيت عن طريق الزرار اللى فى الدركسيون على اليمين لتحت بس تدوس عليه فترة كبيرة مش لمسه وخلاص لغاية متلاقى العداد صفر ورجع تانى يقرا الإستهلاك تانى - بس تكون ماشى فى طريق سالك بسرعة معقولة وتعمل الموضوع ده كذا مرة - بالمشى حتلاقيها بتنزل لغاية ١٢ لتر وفى الزحمة ١٦ ولما تقف كتير حتلاقى المؤشر بقى فى التلاتينات زى ماهو قارى دلوقتى .
فيه كمان حل علشان تريح نفسك وتبدأ على نضافة تشيل الطرف السالب من البطارية لمدة ٥ دقايق وتركبه تانى حتلاقى عداد الاستهلاك بقى ١٢,٥ .
بس كل القرايات مش بتبقى مظبوطة الا وانت ماشى على طريق سالك مافيهوش وقوف كتير - إحسب بالطريقة البلدى بتاعتنا بتاعة زمان من التفويلة للتفويلة وتشوف كام لتر وكام كم .
الاستهلاك داخل المدينة بالتجربة والحسابات حوالى ١٢٠ كم فى الصفيحة وممكن اكتر
على طرق السفر بتوصل لـ ١٦٠ فى الصفيحة وممكن اكتر برضه خصوصاً لو مشيت بسرعة ٩٠كم/ساعة
وتحت امرك فى اى استفسار او سؤال
ظبطت البلوتوث بتاع التليفون ولا لسه :)

[ogouda]

شكرا يا احمد باشا على اهتمامك و نصايحك الي فعلا كانت مفيده لأقصى درجه. لا مظبطوش لسه الموضوع معقد و محتاج دراسه :)

[م/أحمد عبد الفتاح]

شكرا يا احمد باشا على اهتمامك و نصايحك الي فعلا كانت مفيده لأقصى درجه. لا مظبطوش لسه الموضوع معقد و محتاج دراسه :)

بكرة ان شاء الله حابعتلك خلاصة تعليمات الظبط الخاصة بالـ U-Connect اللى هو البلوتوث لأنى بنام على نفسى :)

[ahmed_eng2001]

الف مبروك .... ربنا يديك خيرها و يكفيك شرها

[ogouda]

السلام عليكم
هادوشكم شويه لحد ماخد على العربيه :)
هو الباور ضعيف و لا انا الي لسه مش واخد على حجم العربيه و لا ايه ؟ :)
باحاول أخد ملفين امبارح باخدهم على مرتين ؛صحيح الشارع ضيق بس بأي عربيه عاديه كان طبيعي اخدها على مره واحده ؛ انا ابتديت اقلق يا رجاله :)

[م/أحمد عبد الفتاح]

السلام عليكم
هادوشكم شويه لحد ماخد على العربيه :)
هو الباور ضعيف و لا انا الي لسه مش واخد على حجم العربيه و لا ايه ؟ :)
باحاول أخد ملفين امبارح باخدهم على مرتين ؛صحيح الشارع ضيق بس بأي عربيه عاديه كان طبيعي اخدها على مره واحده ؛ انا ابتديت اقلق يا رجاله :)

لا ياباشا الباور قوى بس تقيل عن اى عربية علشا العربية تقيلة فى الوزن (١٩٠٠ كجم) انت لو واقف جنب عربية تانية وكسرت الدركسيون للاخر ممكن تشيلها من مكانها من غير ماتاخد بالك - حاتتعود عليها يمكن بس علشان العربية طويلة - بس مناورتها والتحكم فيها وزوايا العجل هايلة - حابعتلك رسالة عن طريقة ظبط البلوتوث