تغيير مكونات دورة التبريد

[yk_5]

السيارة لاريدو 2001 v8
تغيير مكونات دورة المياه المفروض (الردياتير + الخرطوم الداخل للردياتير + الخرطوم الخارج منه) فى حاجة تانى علشان عاوز اشترى دماغى من موضوع دوره مياه التبريد ده بشكل نهائى ؟؟ ملحوظة: أنا لا استخدم التدفئة الداخليه (التدفئة داخل صالون العربية)
العربيه واخدها من المالك السابق بتستخدم ميه تبريد (من الحنفيه) ومش عارف لمده أد ايه فهل بعد تغيير مكونات دورة مياه التبريد لو استخدمت مياه التبريد طبقاً للمواصفات (المياه الملونه) ده ممكن يؤثر على الموتور فى حاجه يعنى ممكن لا قدر الله طبه ميه تضرب أو ما شابه من أمور العكننه .
شكراً

[م/أحمد عبد الفتاح]

هى اصلا ايه نوع المشكلة اللى عند حضرتك هل فيه سخونة للموتور ولا الميه بتنقص ولا الرادياتير مخروم مثلا ولا حاجه تانية ؟؟ وعموما دورة التبريد فيها غير الرادياتير والخراطيم : غطا الرادياتير ( مهم جدا ) وطلمبة مياه وترموستات ومروحة وسينسور حرارة مياه التبريد وقربة - بس مش كل الحاجات دى بتبوظ مع بعض فى نفس الوقت

[م/أحمد عبد الفتاح]

والميه المخصوصة بتاعة الرادياتير عمرها ماحاتضر العربية فى حاجه بس قبل ماتحطها تكون معندكش مشاكل فى نقص المية

[yk_5]

أولا شكراً يا باشمهندس أحمد والإستجابه السريعة مش جديدة على حضرتك
الحمد لله مش مشكله سخونه مشكلة نقص المياه حوالى 0.5 لتر كل 15 يوم ومش شايف أى مصدر للتسريب. المالك السابق كان اخبرنى ان المشكله فى غطاء الردياتير ... وبالفحص تبين ان المشكله مش فى الغطاء طلعت فى زور الردياتير اللى الغطاء بيقفل عليه والميكانيكى قال ان ده ملوش علاج الا تغيير الردياتير. سؤال تانى هو الغطاء بيجى مع الردياتير؟؟

[م/أحمد عبد الفتاح]

اعتقد ان الرادياتير بييجى من غير غطا وانت بتشترى الغطا لوحده

[م/أحمد عبد الفتاح]

حاول كمان تشوف حد تانى يكشف على الموضوع ده لانى مش مستريح للكلام ده :) - يعنى واحد بتاع رادياتيرات كويس ويختبر الدايرة بتاعة التبريد بيبقى عنده وصله بيركبها على الرادياتير مكان الغطا وبيكبس الدايرة وبيعرف اذا كان فيه تسريب ولا لا - او غير الغطا مبدئيا لانك بو حاتغير الرادياتير كده كده حاتشترى غطا

[windofchange]

ممكن تجرب الحل ده قبل التغيير..فيه مادة بتتباع تحطها مع المياه القديمة وتنزلها بعد وقت معين بتتفاعل مع الهواء مكان التسريب وتسده

[Mecha]

الميه الملونه حلوه ومزيته ومش هتضرب طبب، اللي يضرب طبب مية الحنفيه اللي اخينا مشي عليها زمن.الصدا بياكل الطبب . الغرابه في الطبب دي تيجي تكبس الميه متسربش و لما تسخن وع الطريق تجيب . فلو واحده فتحت تغير كله.طبعا الردتير كتم فتسلكه او تغيره . لو المراوح عندك تمام ستارت ستوب. غير طرمبة مية بالمره وريح دماغك .

[borio1704]

فعلا موضوع الطبب ده أكبر مقلب ممكن يحصل بعد ما تغير كل حاجة في الدورة لو ما غيرتهاش هي كمان.

الطبب نفسها رخيصة جدا (الواحدة بـ2-3 جنيه).. بس تركيبها محتاج إنك ترفع الموتور بره العربية.


...

[Mecha]

فعلا موضوع الطبب ده أكبر مقلب ممكن يحصل بعد ما تغير كل حاجة في الدورة لو ما غيرتهاش هي كمان.

الطبب نفسها رخيصة جدا (الواحدة بـ2-3 جنيه).. بس تركيبها محتاج إنك ترفع الموتور بره العربية.


...

دي مشكلة المكانيكي البلدي، يحل وش السلندر عشان جوان تلاقيه مصربع يغير جوان في ليله ويقلب الزبون . لا بيبعت الوش للخراط وهو نفسه المفروض يغيرهم ، تركيبهم سهل وميعملش . ونفس القصه في البلوك طقم شمبر واقلب، رغم البلوك بره وممكن ينطر الطبب كلها. عموما الجيب فيها مكان للشغل والمكنه راكبه ، الطبب اللي ممكن تغلس اللي في ضهر المكنه ناحية الصدر.
تحياتي

[yk_5]

فعلا موضوع الطبب ده أكبر مقلب ممكن يحصل بعد ما تغير كل حاجة في الدورة لو ما غيرتهاش هي كمان.

الطبب نفسها رخيصة جدا (الواحدة بـ2-3 جنيه).. بس تركيبها محتاج إنك ترفع الموتور بره العربية.


...

عند حضرتك حق بس المشكله فعلا مش فى ثمن الطبب طبعا المشكله فى الهدد الى هيحصل علشان تركيبها.

[yk_5]

دي مشكلة المكانيكي البلدي، يحل وش السلندر عشان جوان تلاقيه مصربع يغير جوان في ليله ويقلب الزبون . لا بيبعت الوش للخراط وهو نفسه المفروض يغيرهم ، تركيبهم سهل وميعملش . ونفس القصه في البلوك طقم شمبر واقلب، رغم البلوك بره وممكن ينطر الطبب كلها. عموما الجيب فيها مكان للشغل والمكنه راكبه ، الطبب اللي ممكن تغلس اللي في ضهر المكنه ناحية الصدر.
تحياتي

اشكرك على المشاركة المتميزة وهشوف قصة تغيير الطببب دى ابعادها ايه