أفيدوني في ليبرتي 2002

[ElDoctor9009]

السلام عليكم
انا قدامي عربية ليبيرتي 2002 ماشيه 75 الف وصاحبها عايز 130 الف جنيه ياريت تفيدوني برأيكم وتقولولي
-هل السعر ده مناسب ولا ايه ؟
و-ايه اهم العيوب للعربية دي غير موضوع البنزين؟
-هل صالونها يكفي 6 اشخاص؟
-ايه الاماكن اللي ممكن اكشف على العربية فيها قبل ما اشتريها؟



وشكراا

[M!NA]

السلام عليكم
انا قدامي عربية ليبيرتي 2002 ماشيه 75 الف وصاحبها عايز 130 الف جنيه ياريت تفيدوني برأيكم وتقولولي
-هل السعر ده مناسب ولا ايه ؟

كتير عليها...(بشوف منها بيتباع ب100 و 110 ألف أول الكلام و طبعا بيخلص أقل من كدا بكتير وقت التنفيذ) العربيات ديه رخصت و عمالة ترخص... خصوصا ال6 سلندر 3700cc

و-ايه اهم العيوب للعربية دي غير موضوع البنزين؟

ارتفاع سعر الضريبة عشان الموديل و السعة اللترية و عدد الاسطوانات... و قطع الغيار (أغلى من قطع غيار الxj) اللي هي الشكل الأقدم منها

-هل صالونها يكفي 6 اشخاص؟

بعكس ما يبدو عليها من برة... لأ... صالونها من جوة مش واسع و خصوصا الكنبة الخلفية... (ممكن تجرب تقعد فيها و تحسها واسعة لكن على السفر و المسافة الطويلة متعبة جداااااا)

-ايه الاماكن اللي ممكن اكشف على العربية فيها قبل ما اشتريها؟

مركز خدمة بتعامل معاه في صقر قريش في المعادي.. لو عايز بياناته ممكن أبعتهالك عالخاص...

[ElDoctor9009]

شكرا ليك على المعلومات الرائعة و ياريت تبعتلي بيانات مركز الخدمة اللي قلت عليه

[M!NA]

بعتلك البيانات عالخاص... بس لو عايز نصيحة غالية... ابعد عن الليبرتي و خصوصا 2002 و 2003
عشان مليانة مشاكل... و ده كلام من ناس موثوق فيهم في الهيئة العربية للتصنيع اللي بيجمعوا الجيب في مصر

[ElDoctor9009]

انا اقتنعت بكلامك بس تنصحني بأيه لو عايز عربية بموتور قوي وتستحمل ويكون سعرها مش عالي

[M!NA]

عايزها في ايه تحديدا؟ ناوي تستخدمها فين؟
هتدخل بيها صحرا؟ أو جبل؟

ياريت لو تحدد و بإذن الله أقولك أنسب حاجة...

[ElDoctor9009]

لأ مش هدخل صحرا ولا جبل بس حاجة تستحمل الشوارع بتاعتنا في نفس الوقت تكون مريحة وواسعة ويكون سحبها كويس مع الاوتوماتك والتكيف

[M!NA]

لأ مش هدخل صحرا ولا جبل بس حاجة تستحمل الشوارع بتاعتنا في نفس الوقت تكون مريحة وواسعة ويكون سحبها كويس مع الاوتوماتك والتكيف

كل المميزات ديه تلاقيها في الجيب شيروكي (اللي قبل الليبرتي علطول) بس ال6 سلندر...

أوتوماتيك... كراسي كهربا... ABS ... Air Bags ... مرايات كهربا...
و سعرها لو حالتها ممتازة بيكون 75-85 ألف تقريبا...

عيبها الوحيد البنزين... حووووووووووووووت بنزين....4100cc (غير طبعا الترخيص)

ممكن تدور على حاجة من أول موديل 98 لحد 2001

هي مش هتكون بنفس راحة العربيات الياباني و السيدان لأن ديه طبيعة الجيب... بس احساس الأمان و الارتفاع عن باقي العربيات ليه متعة خاصة...

غير قدرتك على الدخول في أي طريق... مكسر.. رملة... مدق...تطلع فوق الرصيف.... أي حاجة مش هتفرق معاك...

و بالتوفيق ان شاء الله...

[ElDoctor9009]

هادور على موديل قبل الليبرتي ولو لقيت هاستشيرك قبل ما اشتري طبعا
وشكرا على اهتمامك

[mrehab]

ازيك يا استاذ مينا
بس انا اخالف تماما
الليبرتي عن واقع تجربة قوية بمعني الكلمة بس محتاجه شوية تظبيط
يعني كاوتش جديد
فيه نيتروجين
تظبط زوايا
الكلام ده يعني
غير كده عزم الموتور قوي جدا
بس عاوز اعرف منك حاجه بقي
موديل 2002 لغاية 2004 حالة نضيفة تعمل كام النهارده
الا انا بعت عربيتي من حوالي شهر ونص لابن عمي وعاوز اشتري نفس العربية الي كانت معايا
افيدنا ياريت
وميرسي علي مواضيعك المتميزه
اخوك ايهاب

[theking2690]

بص اشد عيب شوفته فى الليبرتى انها لما بتمشى فى الميه بتكون مراجيح و ده كلام كنت بسمعه على المنتدى و مش متأكد منه لحد ما شوفت بعينى يوم الاحد اللى فات عربيه ليبرتى بتتقلب فوق كوبرى اكتوبر بسبب الميه اللى كانت موجوده على الكوبرى نتيجة ان الدنيا كانت بتمطر و اللى لاحظته كمان ان النص الادمانى بتاع العربيه تقريبا كان مدمر و الايرباج مفتحش

[M!NA]

ازيك يا استاذ مينا
بس انا اخالف تماما
الليبرتي عن واقع تجربة قوية بمعني الكلمة بس محتاجه شوية تظبيط
يعني كاوتش جديد
فيه نيتروجين
تظبط زوايا
الكلام ده يعني
غير كده عزم الموتور قوي جدا
بس عاوز اعرف منك حاجه بقي
موديل 2002 لغاية 2004 حالة نضيفة تعمل كام النهارده
الا انا بعت عربيتي من حوالي شهر ونص لابن عمي وعاوز اشتري نفس العربية الي كانت معايا
افيدنا ياريت
وميرسي علي مواضيعك المتميزه
اخوك ايهاب

أهلا بيك يا أستاذ ايهاب...

الليبرتي عربية قوية... أتفق معاك... خصوصا بعد ما حلوا مشكلة ضيق الحوض في ال6 سلندر اللي قبلها.. (نظرا لأن الموتور كان طولي مش V) و دا طبعا اتحلت معاه مشكلة الحرارة...

و لكن...

الليبرتي فيها مشكلتين... الأولى زي ما قال مصطفى....الثبات... و خصوصا لو الأرض فيها مية ...(عن تجربة أتمنى متتكررش)

و التانية أن قطع غيارها غالية بشكل مبالغ فيه...

هي ممكن تكون عربية أسفلت كويسة... لكن من الصعب أوي أنها تكون عربية صحرا أو مدقات لمدة طويلة...

اما بالنسبة لسعر السوق لليبرتي 2002 ل 2004 بيكون ما بين 120-130 ألف .... (طبعا دا سعر ال6 سلندر أوتوماتيك كاملة)

لو عايز رأيي... لو حضرتك مش بتدخل صحرا أو مدقات و عايز عربية تكون فخمة و مريحة و برضه 6 سلندر أوتوماتيك... هات جراند موديل 99 - 2000 .... بس هات حاجة تكون حالتها كويسة... عشان لو جبتها و كانت محتاجة تظبيط و شغل كتير... هتكره اليوم اللي جبتها فيه - و هتكرهني أنا كمان عشان نصحتك بيها

عموما بالتوفيق و تحت أمرك لو احتجت أي سؤال

[mrehab]

ازيك يا مينا يا اخويا
ايه اخبارك
بقولك الليبرتي انتم شايفينها مش ثابته لكن انا شايفها ثابته جدا
يعني في اكتر من ان الدنيا بتمطر جامد وامشي علي الدولي 160
اظن يعني مفيش بعد كده ثبات
عارف بقي الناس مش شايفاها ثابته ليه
لان الدفع بتاعها قوي فمينفعش اخد بيها ملفات غلط يعني هي مش عربيه تريوس مع ان التريوس جميله بس هناك فرق
طيب لو الشيروكي كده يبقي التريوس ايه نظامه
وبعدين توزيع الصبابات مع حرف v حل مشكلة السخونه قوي
وبعدين تحس ان المكنه مرتاحه وتحت رجلك شيطان مش موتور
معلش اصل انا ركيب امريكاني ابا عن جد من ايام الشيفروليه الامبالا والبويك ياريت يا راجل العربيات دي تعود
تصور يا مينا ان التكنولوجيا موجوده في الامريكاني من سنة 1955
وقبل كده كمان يعني ابسط شيء الكراسي الكهربا الي الناس فرحانه بيها في الجيتا والبي ام دي كانت موجوده من زمان بس للاسف الناس متعرفش الكلام ده
كنا سنة 2000 روحت لفوزي الخواجه الي في فيصل عارفه اكيد
كان عنده حتة عربيه بس كنت غبي مخلصتش فيها
بونياك ترانز ام 5700 موتور 8 سلندر
سبور كانت موديل تقريبا 86 او 92 مش فاكر بس كانت عربيه مفيهاش الغلطه كنت بخلصها ب 60 الف بس حصل ظروف كده قولتله يومين ورجعلك كانت اتلقطت
لا لا لا انا من عشاق الامريكاني بس للاسف مش لاقي مركز صيانه كويس ياريت تبقي تبعتلي نمرته علي الخاص ورقم تليفونك يا مينا لان يشرفي اننا نكون اصدقاء واخوات كمان
وميرسي علي ردك

[M!NA]

بعتلك عالخاص يا أستاذ ايهاب.. و تحت أمر حضرتك في أي وقت...

[whataboutu]

معلومه مهمه

يا رجاله شكلكو فاهمين بتقولوا ايه اخوكم (لو سمحتولى) بفكر اجيب شيروكى جديده 2009 ومحتار وناس كتير بتحذرنى منها لاسباب زى الضريه والبنزين والصيانه لانى محتاج عبربيه واسعه من جوه ومن الاخر تستحمل وللعلم انا لا افقه شى فى الميكانيكا يعنى مش بتاع مستعمل وناس تانيه نصحونى بالشيفروله الجديده (كابتيفيا) وناس بال باسات لانها برضه واسعه
من الاخر ارجو امانه النصيحه وامشى فى انهى اتجاه