الي كل مالكي الأوبترا يا ريت تدخل و تجاوب علي السؤال

[mostafabakry]

السلام عليكم و رحمة الله و بركاته
بالنسبة للسادة مالكي الأوبترا نفسي اسألكم سؤال
ليه اشتريت اوبترا مع انك كان ممكن تشتري النيسان صني و بنفس السعر او بفرق قليل
:?: :?: :?:

[osman hisham]

الشكل الخارجى ................................. أحلى بكتير (أذواق)
التقفيل و الخامات .............................. أفضل بكتير و تقفيل بره
التابلوه و عدادات السرعه .................. أحدث و أجمل
الماتور ....................................... موتور أوبل أهدأ و العزم أشد
الصالون .................................... أشيك و طبعا أحسن من الموبيكا
التوكيل .................................. منصور شيفورليه !!!!
أماكن التخزين بالداخل ............... أكتر من الصنى

[running_man]

الشكل الخارجى ................................. أحلى بكتير (أذواق)

الماتور ....................................... موتور أوبل أهدأ و العزم أشد

التوكيل .................................. منصور شيفورليه !!!!

+1111

Sunny is great

but Optra is another thing

[د.محمود صلاح]

جودة التقفيل وتناسق الصالون وعلو السيارة عن الأرض وسعر اعادة البيع وعدم وجود شكل جديد آخر قد يؤثر على سوق العربية كل ده كان فى صالح الأوبترا أما لو تحدثت عن نيسان صانى سوبر صالون اللى اغلى من الاوبترا ب 10 آلاف تقريبا فهناك فرق وهوال 6 لسى دى تشينجر و2 ايرباج ومرايات الضم وال 4 جنوط فهل هذه الفروق تساوى ال 10 آلاف ام لا ؟

[sherif elsayed]

[b]انا اقول لك عن نفسى:
مافيش عربية اوتوماتيك 1600 فى نفس الفئة السعرية ممكن تتطلع منك فعلا اتوماتيك ممتازغير النوبيرا تماما.

العفشة كتير بيقولوا ناشفة شوية بس انا شايف دى ميزة تعرفها و انت بتعدى مطب و راكب معاك 3 افراد , حتلاقى كل العربيات بتحك فى المطب فيما عدا انت.

عزل الصوت داخل الصالون مش طبيعى كانك فى عالم تانى.

جودة الخامات المستعملة فى الصالون ممتازة والتابلوه بالذات , اضاءة التابلوه و منطقة العدادات منظمة و شيك جدا مش زيادة عن اللزوم.

اماكن تخزين منتشرة فى العربية من الداخل تعطيك اقصى استفادة من المساحة الداخلية المتسعة اصلا.

صاج خفيف شوية يس انا فاكر زمان و انا صغير كان بيتقال كدة على بيجو 504 و شوف دلوقت بيقولوا انها دبابة.

اسعار قطع غيارها بالنسبة لكل السيارات الجديدة تعتبر عادية.

التكييف ممتاز بس زى التكييفات الآلمانى بياخد وقت فى الأول.

استهلاك البنزين بالنسبة لأوتوماتيك طبيعى جدا,داخل المدينة 200 كم فى الصفيحة ده لو انت سواقتك مش بتحرق على الموتور يعنى ال ار بى ام لا يتخطى 3000 لفة فى الدقيقة اما لو بتحرق يزيد الاستهلاك الى 160-170 كم فى الصفيحة , فى السفر هى ظريفة جدا لو ماشى 120 حتعمل معاك 270 كم فى الصفيحة و ممكن اكتر

فى المجمل العربية تستاهل فلوسها و اكتر, بس فى نقطة مهمة الشكل حيتغير فى 2009 بس انا عندى امل ان منصور يصنع الشكل ده هنا و يستمر شوية.

نيجى للعيب الوحيد فى العربية دى و ده بجد ياريت الناس تاخد بالها منه اكتر و تقول رأيها لان اكيد فيه حد صادفه,
علبة الباور (الدركسيون) بيعمل ساعات هزة او رعشة فى العربية و هى طالعة و كمان العربية بتحدف يمين فى السرعات العالية (مش ضبط زوايا) واذا كسرت يمين او شمال على الآخر بتسمع صوت خنقة الباور عالى و غير الصوت المعتاد ياريت لو حد مشترى جديد ياخد باله من الموضوع ده.
على العموم انا رايح بيها التوكيل يوم الأحد و حوافيكم بالآخبار عملوا ايه و هو فعلا عيب فى العربية و لا انا اللى كان حظى كده معاها

بس مع العيب ده برده انا مقتنع بيها جدا

اما الصنى عندى واحد صاحبى جابها و بيشتكى ان قطع الغيار غالية و مش متوفرة حتى عند الوكيل هنا فى اسكندرية(ملحوظة كان معايا سوزوكى بالينو وهو نفس التوكيل وماكنش موفرلها قطع الغيار حتى ابسط قطع استهلاكية زى الفوانيس ماكنتش موجودة حتى فى القاهرة وده عيب قاتل لانك لو الحاجة باظت مش حتلاقيها علشان تغيرها و ده سبب كافى بالنسبة لى علشان ما افكرش فى الصنى خاصة بعد الخسارة الفادحة لما بعت البالينو .

[mostafabakry]

شكرا لكم يا جماعة علي تجاوبكم السريع
الأستاذ شريف السيد شكرا جدا علي شرحك الرائع
يا ريت تقولما ايه الأخبار بعد زيارة التوكيل

يا جماعة يا ريت لو حد معاه اوبترا يقولنا ان كان عندة نفس المشكلة و دا عيب في العربية ولا دي صدفة بس مع الأستاذ شريف
عشان نطمن من ناحية العربية

مشكورين

[mostafabakry]

في انتظار ردودكم

[osman hisham]

هوه الحقيقه اللى بيحصل ده مش صح و غالبا تلاقى عندك مشكله فى علبة الدركسيون .

[sherif elsayed]

اسف انى اتاخرت فى الرد يا جماعة
انا رحت التوكيل يوم الأحد فى العامرية استقبلنى مهندس حرق دمى من اولها (على فكرة هو الوحيد اللى يحرق الدم باقى المهندسين ناس زى الفل)
المهم استقبلنى باسطوانة لا ده الطبيعى فى الاوبترا فهمته ان دى تانى عربيه عندنا وان 2006 مش كده لكنه كان مصر على اقواله, فضلت مستحمله لحد ما انفجرت فيه انه مش عايز يعمل حاجه فى العربية وكل حاجه عنده ده عادى ودى مش مستاهله و سبته و طلعت للآستاذ طارق امام مسئول ارضاء العملاء و هو ده فعلا اللى عمله فى ثوانى و اخدنى عند مدير المهندسين على طول و هو اللى طلع معايا يسمع العيب و اقتنع بكلامى خاصة لما قارن الصوت بعربية اخرى زيرو و اتحدد العيب فعلا فى طرمبة الزيت بتاعة الباوران صوت خنقة الباور فيها عالى شويه و طبعا حقى اغيرها طالما فى الضمان .

المهم عملى امر شغل ليها يجيبوها لأن مش موجوده دلوقتى و تيجى خلال 10 ايام لكن العفشة نفسها سليمة و الدركسيون سليم
و التوكيل محترم و الناس زى الفل فعلا باستثناء المهندس اللى على ماتفرج ده. حقيقى مش عارف ازاى ده اتعين وسط باقى المهندسين اللى موجودين

وهى مسالة حظ جت معايا كده و الحمد لله على كل شىء و مازلت عند رأيى العربية تستاهل الفلوس فعلا و تستاهل اكتر لو حتقارن بالموجود فى السوق

[mostafabakry]

طيب الحمد لله ان المشكلة اتحلت و عرفت سببها
ربنا يحفظهالك يا باشا